LARTIK LETID 28
KANTIK 123 Nou Soumet ar Bondie Avek Fidelite
Kouma To Kapav Fer Diferans ant Seki Vre ek Seki Fos?
“Tini ferm, avek sintir laverite ki ser zot lerin.”—EFE. 6:14.
PWIN PRINSIPAL
Dan sa lartik-la nou pou aprann kouma nou kapav fer diferans ant laverite ki nou’nn aprann ar Zeova ek bann foste ki Satan ek nou bann opozan pe fane.
1. Ki to resanti konsernan bann verite ki ena dan Labib?
BANN serviter Zeova bien kontan bann verite ki ena dan Labib. Samem baz nou lafwa. (Rom. 10:17) Nou sir ki se Zeova ki’nn etabli lasanble Kretien kouma “enn kolonn ek enn soutien pou laverite.” (1 Tim. 3:15) Ek nou bien kontan pou soumet ar “bann ki pe diriz” nou, parski zot explik nou bann verite ki ena dan Labib ek zot donn nou bann instriksion ki an-akor ar volonte Zeova.—Ebre 13:17.
2. Dapre Zak 5:19, ki kapav ariv nou apre ki nou’nn aksepte laverite?
2 Me selman, apre ki nou’nn aksepte laverite ek konpran ki nou bizin obeir direksion ki nou gagne ar lorganizasion Zeova, li kapav arive ki nou al lwin ar Zeova. (Lir Zak 5:19.) Satan pou bien kontan si nou perdi konfians dan Labib ouswa dan direksion ki lorganizasion Zeova pe donn nou.—Efe. 4:14.
3. Kifer nou bizin obeir laverite? (Efezien 6:13, 14)
3 Lir Efezien 6:13, 14. Biento, Lediab pou fann bann fos linformasion pou anbet tou bann gouvernman pou ki zot opoz zot ar Zeova. (Rev. 16:13, 14) Ek anplis, nou kapav atann ki Satan pou fer ankor plis zefor pou anbet bann serviter Zeova. (Rev. 12:9) Akoz sa, li bien inportan ki nou antrenn nou pou fer diferans ant seki vre ek seki fos, ek pou obeir laverite. (Rom. 6:17; 1 Pier 1:22) Sa li bien inportan, parski sa pou ed nou pou sirviv pandan gran soufrans.
4. Ki nou pou gete dan sa lartik-la?
4 Dan sa lartik-la, nou pou get de kalite ki nou bizin ena, ki pou ed nou pou rekonet laverite ki sorti dan Labib ek pou aksepte direksion ki lorganizasion Zeova pe donn nou. Apre sa, nou pou koz lor trwa kitsoz ki nou bizin fer pou kontign res atase ar laverite.
BANN KALITE KI NOU BIZIN ENA POU REKONET LAVERITE
5. Kan nou ena enn gran respe pou Zeova, kouma sa kapav ed nou pou rekonet laverite?
5 Gran Respe pou Zeova. Ena enn gran respe pou Zeova vedir ki nou telman kontan Li ki zame nou pou anvi fer enn kitsoz ki Li pa kontan. Nou anvi aprann fer diferans ant seki bon ek seki pa bon, ant seki vre ek seki fos, koumsa sa pou ed nou pou ki nou gagn Zeova so faver. (Prov. 2:3-6; Ebre 5:14) Me fode zame nou les laper bann zom vinn pli for ki nou lamour pou Zeova, parski seki bann dimounn kontan dan sa lemond-la bien souvan pa fer Zeova kontan.
6. Kouma laper bann zom inn fer dis sef tribi Izraelit sanz laverite?
6 Si nou plis per bann dimounn olie ki nou ena enn gran respe pou Bondie, sa kapav fer nou al lwin ar laverite. Anou get lexanp 12 sef tribi ki ti espionn pei ki Zeova ti promet pou donn bann Izraelit. Dis parmi sa 12 espion-la ti plis per bann Kananeen ki zot ti kontan Zeova. Zot ti dir bann lezot Izraelit: “Nou pa pou kapav atak sa pep-la, parski zot pli for ki nou.” (Nonb 13:27-31) Pou bann dimounn sa lepok-la, bann Kananeen ti pli for ki bann Izraelit. Me si enn kikenn ti dir ki bann Izraelit pa ti pou reisi gagn laviktwar kont zot bann lennmi, sa ti pou montre ki swa li pa konn Zeova swa li pa ti pe pans lor Zeova. Sa dis espion-la ti sipoze konsantre lor seki Zeova ti anvi ki bann Izraelit fer. Ek anplis zot ti bizin reflesi lor tou seki Zeova inn fek fer pou zot. Lerla, zot ti pou konpran ki lafors bann Kananeen ti enn nanye ditou konpare avek pwisans ki Zeova ena. Parkont, Zozwe ek Kaleb ti anvi gagn faver Zeova. Zot ti dir bann Izraelit: “Si Zeova inn donn nou so faver, vremem Li pou fer nou rant dan sa pei-la ek Li pou donn nou li.”—Nonb 14:6-9.
7. Kouma nou kapav ena enn pli gran respe pou Zeova? (Get zimaz osi.)
7 Pou ki nou ena enn pli gran respe pou Zeova, sak fwa ki nou ena pou pran enn desizion, nou bizin reflesi ki kitsoz pou fer Zeova kontan. (Ps. 16:8) Kan to lir bann zistwar ki ena dan Labib, demann tomem: ‘Si mo ti dan sa sitiasion-la, ki mo ti pou fer?’ Par exanp, mazine ki to parmi bann Izraelit ek ki to pe ekout sa dis sef tribi Izraelit la. Zot pe dir bann Izraelit ki zot pa pou reisi rant dan Kanaan. Eski to ti pou krwar zot ek per bann zom, ouswa to lamour ek to gran respe pou Zeova ti pou pli for ki to laper? Laplipar bann Izraelit pa ti krwar Zozwe ek Kaleb, alor ki zot ti pe dir laverite. Akoz sa, zot ti perdi posibilite pou rant dan pei ki Bondie ti promet zot.—Nonb 14:10, 22, 23.
Kisann-la to ti pou krwar? (Get paragraf 7)
8. Ki kalite nou bizin fer zefor pou ena?
8 Limilite. Zeova fer bann dimounn ki ena limilite konn laverite. (Mat. 11:25) Ek avek limilite nou’nn aksepte pou aprann laverite. (Zist. 8:30, 31) Me selman, nou bizin fer bien atansion pou ki nou pa vinn gran-nwar. Si nou vinn gran-nwar, nou pou panse ki nou lopinion li ena mem valer ki bann prinsip Labib ek bann instriksion ki lorganizasion Zeova pe donn nou.
9. Kouma nou kapav kontign ena limilite?
9 Pou ki nou kontign ena limilite, nou bizin rapel ki kantite tipti nou ete konpare ar Zeova. (Ps. 8:3, 4) Nou kapav osi priye Zeova pou ki Li ed nou pou ena plis limilite, ek pou ki Li kontign form nou. Nou kapav kone ki Zeova panse gras-a so Parol ek so lorganizasion. Ek Li pou ed nou pou konsider so bann panse kouma pli inportan ki nou prop panse. Kan to pe lir Labib, rod bann prev ki pou montre twa kouma Zeova kontan limilite ek deteste enn dimounn ki gran-nwar, ki vantar, ek ki ena lorgey. Ek kontign fer zefor pou ena limilite kan to gagn enn responsabilite ki donn twa enn sertin lotorite ouswa ki fer lezot remark twa inpe plis.
KOUMA NOU KAPAV OBEIR LAVERITE?
10. Kisann-la Zeova inn servi pou donn so pep bann instriksion?
10 Kontign ena konfians dan bann instriksion ki lorganizasion Zeova pe done. Dan lepase, Zeova ti servi Moiz ek Zozwe pou donn so pep bann instriksion. (Zozwe 1:16, 17) Bann Izraelit ti gagn bann bienfe kan zot ti konsider sa bann zom-la kouma bann reprezantan Zeova. Bann santenn lane apre, kan ti etabli lasanble Kretien, se bann 12 zapot ki ti donn bann instriksion. (Zist. 8:14, 15) Plitar, ti ena bann ansien dan Zerizalem ki ti vinn ansam avek sa bann 12 zapot la. Kan bann Kretien ti swiv direksion ki sa bann zom-la ti pe done, “bann lasanble ti kontign vinn for dan lafwa ek kantite bann krwayan ti pe ogmante zour apre zour.” (Zist. 16:4, 5) Dan nou lepok, nou osi nou gagn bann bienfe kan nou obeir bann instriksion ki lorganizasion Zeova pe donn nou. Me ki Zeova pou resanti si nou refiz rekonet bann ki Li’nn swazir pou diriz nou? Nou kapav trouv sa repons-la kan nou examinn seki’nn ariv bann Izraelit kan zot ti pe al dan pei ki Zeova ti promet zot.
11. Dan lepase, ki ti ariv bann ki ti rebel kont Moiz, sa kikenn ki Zeova ti swazir pou diriz so pep la? (Get zimaz osi.)
11 Pandan ki bann Izraelit ti pe vwayaze pou al dan pei ki Zeova ti promet zot, bann zom ki ti ena enn sertenn responsabilite ti defie Moiz ek zot ti dout responsabilite ki Zeova ti donn li. Zot ti dir: “Tou dimounn parmi lepep [pa zis Moiz], zot sin ek Zeova omilie zot.” (Nonb 16:1-3) Mem si li ti vre ki pou Zeova “tou dimounn parmi lepep” ti sin, Zeova ti swazir Moiz pou diriz so pep. (Nonb 16:28) Me kan zot ti kritik Moiz, sa bann rebel-la ti pe kritik Zeova osi. Zot pa ti konsantre zot lor seki Zeova anvi, me zot ti konsantre zot lor seki zot, zot ti anvi, setadir pou gagn plis pouvwar ek responsabilite. Akoz sa, Zeova ti touy bann rebel ek bann milye dimounn ki ti soutenir zot. (Nonb 16:30-35, 41, 49) Azordi osi, nou kapav sir ki Zeova pa dakor avek bann ki pa pe respekte bann instriksion ki so lorganizasion pe done.
Kisann-la to ti pou soutenir? (Get paragraf 11)
12. Kifer nou kapav kontign fer lorganizasion Zeova konfians?
12 Nou kapav kontign fer lorganizasion Zeova konfians, parski bann ki pe diriz lorganizasion Zeova pa ezite pou fer bann sanzman kan bizin. Par exanp, kan ena pou fer bann sanzman dan fason ki ti konpran enn verite ki ena dan Labib ouswa dan fason ki bizin organiz travay ki pep Bondie fer, zot pa ezite pou fer li. (Prov. 4:18) Zot fer sa parski seki pli inportan pou zot, se fer Zeova plezir. Anplis, zot fer tou seki zot kapav pou baz zot desizion lor Labib, ek sa li enn model ki tou bann serviter Zeova bizin swiv.
13. Ki savedir “model bann bon parol,” ek kouma sa kapav ed nou pou res atase ar laverite?
13 “Kontign res atase ar model bann bon parol.” (2 Tim. 1:13) “Model bann bon parol” se bann lansegnman ki ena dan Labib. (Zan 17:17) Ek tou seki nou krwar, li baze lor sa bann lansegnman-la. Lorganizasion Zeova inn ansegn nou pou res atase ar sa model-la. Tanki nou fer sa, nou pou gagn bann bienfe.
14. Kouma sertin Kretien inn aret res atase ar “model bann bon parol”?
14 Ki kapav arive si nou nepli “res atase ar model bann bon parol”? Anou get enn lexanp. Dan premie siek, sertin Kretien ti pe fann enn rimer ki zour Zeova inn arive. Kitfwa ti ena enn let ki ti koz lor la, ki swadizan lapot Pol ti ekrir. San ki zot inn pran letan pou verifie si sa ti vre ouswa non, sertin Kretien dan Tesalonik ti krwar ladan ek zot ti mem pe fann sa rimer-la. Si zot ti rapel bann kitsoz ki Pol ti ansegn zot kan li ti avek zot, zot pa ti pou les sa rimer-la anbet zot. (2 Tes. 2:1-5) Pol ti konsey so bann frer ek ser pou pa krwar tou seki zot tande. Ek pou ed zot dan lavenir, Pol ti fini so deziem let pou bann Tesalonisien par sa bann parol-la: “Mwa Pol, mo pe ekrir zot ar mo prop lame pou fer zot konpliman. Se avek sa lekritir-la ki mo konfirm tou mo bann let; se koumsa ki mo ekrir.”—2 Tes. 3:17.
15. Kouma nou kapav protez nou-mem ar bann foste ki kapav paret vre? Donn enn lexanp. (Get zimaz osi.)
15 Ki nou kapav aprann ar seki Pol ti dir bann Tesalonisien? Kan nou tann enn kitsoz ki pa an-akor ar seki nou aprann dan Labib, ouswa si nou tann enn rimer ki paret inpresionan, nou bizin servi nou bon zizman. Dan lepase, dan Linion Sovietik, nou bann lennmi ti donn bann frer enn let ki swadizan sorti depi biro mondial. Sa let-la ti ankouraz sertin parmi nou bann frer pou kree enn lot lorganizasion ki indepandan. Sa let-la ti paret vre. Me nou bann frer pa’nn les sa let-la anbet zot. Zot ti konpran ki mesaz ki ena dan sa let-la pa ti an-akor avek seki zot ti aprann dan Labib. Azordi osi, nou bann lennmi kapav servi bann teknolozi kouma Internet ek rezo sosial pou anbet ek kree divizion parmi nou. Olie ki nou ‘les nou trouble dan nou bon zizman,’ nou kapav protez nou-mem kan nou reflesi lor seki nou pe tande ek lor seki nou pe lir, pou gete si li an-akor avek bann verite ki nou’nn aprann dan Labib.—2 Tes. 2:2; 1 Zan 4:1.
Pa les bann foste ki paret vre anbet twa (Get paragraf 15) a
16. Dapre Romin 16:17, 18, ki nou bizin fer si sertin al kont laverite?
16 Res ini ar bann ki fidel ar Zeova. Bondie anvi ki nou ador Li dan linite ansam avek nou bann frer ek ser. Selman, nou pou res ini tanki nou res atase ar laverite. Tou dimounn ki fann bann linformasion ki al kont laverite ki ena dan Labib, kree divizion dan lasanble. Akoz sa, Bondie inn averti nou pou “evit” zot. Sinon, nou kapav al lwin ar laverite.—Lir Romin 16:17, 18.
17. Ki bann bienfe nou pou gagn kan nou rekonet laverite ek res atase ar li?
17 Kan nou rekonet laverite ek res atase ar li, nou pou res pros ar Zeova ek nou pou gard enn lafwa for. (Efe. 4:15, 16) Sa pou protez nou osi kont tou bann fos kitsoz ki Satan pe fane, ek nou pou res an sekirite dan lebra Zeova pandan gran soufrans. Alor, anou kontign res atase ar laverite, “ek Bondie lape pou avek [twa].”—Fil. 4:8, 9.
KANTIK 122 Res Ferm, Res Fidel!
a DESKRIPSION ZIMAZ: Enn senn ki montre kouma dan lepase, bann frer dan Linion Sovietik ti gagn enn let ki swadizan ti sorti depi biro mondial. Me an realite, se nou bann lennmi ki ti avoy sa. Dan nou lepok, nou bann lennmi kapav servi Internet pou fann bann fos linformasion lor lorganizasion Zeova.
