LARTIK LETID 29
KANTIK 121 Nou Bizin Ena Metriz
Res lor To Gard pou pa Tom dan Tantasion
“Kontign veye ek kontign priye, pou ki zot pa tom dan tantasion.”—MAT. 26:41.
PWIN PRINSIPAL
Sa lartik-la pou rapel nou ki nou bizin fer tou seki nou kapav pou pa fer pese, ek osi li pou rapel nou ki nou bizin fer atansion pou pa fer bann kitsoz ki kapav fer nou fer enn pese grav.
1-2. (a) Ki lavertisman Zezi ti donn so bann disip? (b) Kifer bann disip Zezi ti abandonn li? (Get zimaz osi.)
“VREMEM, lespri anvi fer seki bon, me laser li feb.” a (Mat. 26:41b) Sa bann parol Zezi la montre ki li konpran ki nou bann dimounn inparfe ek ki nou pou fer bann erer. Me par sa bann parol-la Zezi ti donn nou enn lavertisman osi: Fode pa nou ena tro boukou konfians dan nou-mem. De-trwa lertan avan ki Zezi ti dir sa bann parol-la, so bann disip ti promet li ki zot pa ti pou abandonn li. (Mat. 26:35) Zot ti ena bann bon lintansion. Selman, zot pa ti realize ki bien vit zot ti kapav vinn feb, parski lezot inn met presion lor zot. Akoz samem, Zezi ti dir zot: “Kontign veye ek kontign priye, pou ki zot pa tom dan tantasion.”—Mat. 26:41a.
2 Selman, bann disip pa ti kontign res lor zot gard. Kan ti aret Zezi, eski so bann disip ti res avek li, ouswa zot ti per ek zot ti sove? Malerezman, zot pa ti res lor zot gard ek zot ti fer exakteman seki zot ti promet zot pa pou fer, zot ti abandonn Zezi.—Mat. 26:56.
Zezi ti donn lord so bann disip pou kontign veye ek res lor zot gard pou pa tom dan tantasion, me zot ti abandonn li (Get paragraf 1-2)
3. (a) Pou nou kapav res fidel ar Zeova, kifer fode pa nou ena tro boukou konfians dan nou-mem? (b) Ki nou pou examine dan sa lartik-la?
3 Fode pa nou ena tro boukou konfians dan nou-mem. Selman, nou anvi fer tou seki nou kapav pou pa fer nanye ki pou fer Zeova so leker fermal. Me akoz nou inparfe ek san ki nou realize, nou kapav fer bann kitsoz ki pa fer Zeova plezir. (Rom. 5:12; 7:21-23) San ki nou atann, nou kapav gagn bann tantasion pou fer seki pa bon. Alor, pou nou kapav res fidel ar Zeova ek so Garson, nou bizin swiv konsey ki Zezi ti donn nou pou kontign veye pou ki nou pa tom dan tantasion. Dan sa lartik-la, nou pou gete, premierman, ar ki bann febles nou bizin fer atansion pou ki nou pa tom dan tantasion. Deziemman, kouma nou kapav protez nou-mem kont bann tantasion. Ek trwaziemman, kouma nou kapav kontign res lor nou gard.
FER ATANSION AR TO BANN FEBLES
4-5. Kifer nou bizin res lor nou gard mem pou bann pese ki mwin grav?
4 Ena bann pese ki mwin grav ki lezot, me zot kapav gat to lamitie avek Zeova. Ek zot kapav osi fer twa fer bann pese pli grav.
5 Nou tou nou gagn tantasion pou fer pese, ek kitfwa nou tou nou ena bann febles ki kapav fer nou tom dan tantasion. Par exanp, enn dimounn kitfwa pe lite pou pa komet limoralite sexiel. Ena lezot ki pe bizin kontign lite pou pa les zot tante pou fer bann kitsoz inpir, kouma mastirbasion ouswa get pornografi. Ek ena ki pe bizin lite pou pa ankoler vit, pou pa vinn gran-nwar, ouswa per pou fer seki bon parski zot per seki dimounn pou dir. Akoz samem Zak dir, “sak dimounn pas par enn test kan li les so prop dezir atir li ek antrenn li.”—Zak 1:14.
6. Lor ki kitsoz nou bizin onet?
6 Eski to kone ki sitiasion kapav tant twa plis? Li danzere si nou pa pran kont nou bann febles, ouswa si nou panse ki nou tro for ek zame nou pa pou fer pese. (1 Zan 1:8) Me rapel, Pol ti dir ki mem bann “ki kalifie lor plan spiritiel” kapav gagn bann tantasion si zot pa res lor zot gard. (Gal. 6:1) Alor, li bien inportan ki nou onet anver nou-mem ek rekonet ki febles kapav fer nou tonbe pli fasilman.—2 Kor. 13:5.
7. Ar ki kitsoz nou bizin fer plis zefor ek plis atansion? Donn enn lexanp.
7 Apre ki nou’nn kone ki kitsoz kapav fer nou tom dan tantasion pli fasilman, ki nou bizin fer? Fer plis zefor pou ki to kapav lit kont sa bann tantasion la! Anou pran enn lexanp. Dan lepok Biblik, plas ki ti pli fasil pou bann lennmi atak enn lavil, se so bann laport. Akoz samem ti ena boukou solda kot sa bann laport-la pou protez lavil. Dan mem fason, nou bizin fer plis zefor ek plis atansion ar bann febles ki kapav fer nou tom dan tantasion pli fasilman.—1 Kor. 9:27.
KOUMA TO KAPAV PROTEZ TOMEM?
8-9. Kouma sa zenn zom ki mansione dan Proverb sapit 7 la ti kapav evit fer enn pese grav? (Proverb 7:8, 9, 13, 14, 21)
8 Anou gete seki nou kapav aprann ar lexanp enn zenn zom ki trouv dan Proverb sapit 7. Li ti komet limoralite sexiel avek enn fam ki ti ena enn move lavi. Verse 22 dir nou ki “deswit” sa zenn zom-la ti swiv li. Me kouma bann verse avan montre, sa zenn zom-la ti deza pran bann move desizion avan, ek dousman-dousman sa inn fer li fer pese.
9 Ki kitsoz sa zenn zom-la ti fer avan ki li fer sa pese bien grav la? Pou koumanse, aswar li “ti pe pas dan sime kot fam [imoral]-la reste.” Apre sa, li ti al dan direksion lakaz sa fam-la. (Lir Proverb 7:8, 9.) Lerla, kan li ti trouv fam-la, li pa ti sanz semin. Okontrer, li ti les fam-la anbras li ek ekout fam-la rakonte kouma li ti ofer enn sakrifis lape. Fam-la ti fer sa pou fer li krwar ki li enn bon dimounn. (Lir Proverb 7:13, 14, 21.) Si sa zenn zom-la pa ti pran bann move desizion, sa ti pou protez limem pou pa tom dan tantasion ek fer enn pese.
10. Azordi, kouma enn dimounn kapav fer mem erer ki sa zenn zom ki mansione dan Proverb la?
10 Sa lexanp-la montre nou seki kapav ariv enn serviter Zeova. Par exanp, sa serviter Zeova la kapav fer enn pese grav ek panse ki sa inn arive “deswit” ouswa “enn kout koumsa.” Me selman, kan li reflesi lor seki’nn arive, kitfwa li pou trouve ki li ti deza pran bann move desizion avan ki li fer sa pese grav la. Kitfwa li’nn fer kamarad ar bann dimounn ki pa kontan Zeova. Ouswa kitfwa li’nn swazir bann divertisman, al lor bann sit Internet, ouswa al dan bann plas ki pa bon pou enn Kretien. Kitfwa li’nn mem aret priye, lir Labib, al renion, ek prese. Parey kouma sa zenn zom dan Proverb la, sa serviter Zeova la inn fer enn pese grav parski avan li’nn pran bann move desizion.
11. Pou ki nou pa fer pese, ki kitsoz nou bizin evit fer?
11 Ki leson nou aprann? Nou bizin pa zis evit fer pese me nou bizin evit tou ti kitsoz ki kapav fer nou fer pese. Se seki Salomon ti explike kan li ti rakont zistwar sa zenn zom-la ek sa fam ki ena enn move lavi la. Konsernan sa fam-la li dir: “Pa perdi lor sime sa fam-la.” (Prov. 7:25) Ek li ti mem dir: “Res bien lwin ar li; pa al pre ar lantre so lakaz.” (Prov. 5:3, 8) Alor, li bien inportan ki nou protez nou-mem pou pa fer pese. b Nou fer sa kan nou evit tou bann kitsoz ek bann sitiasion ki kapav fer nou fer bann kitsoz ki move. Savedir ki mem si enn kitsoz li pa move pou enn Kretien, me si sa kitsoz-la pou tant nou ek pou fer nou fer pese, fode pa nou fer li.—Mat. 5:29, 30.
12. Ki Zob ti bien deside pou fer, ek ki kitsoz inn protez li pou li pa tom dan tantasion? (Zob 31:1)
12 Pou ki nou kapav evit bann sitiasion ki pou fer nou fer pese, nou bizin bien deside pou res lor nou gard. Se seki Zob ti fer. Li ti “fer enn lalians avek [so] lizie” pou ki zame li pa get enn lot fam avek bann move dezir. (Lir Zob 31:1.) Sa ti ed li pou ki zame li pa komet ladilter. Alor, nou osi nou bizin bien deside pou pa fer nanye ki kapav tant nou.
13. Kifer nou bizin protez nou bann panse? (Get zimaz osi.)
13 Nou bizin osi protez nou bann panse. (Ex. 20:17) Sertin dimounn panse ki li normal pou kontign pans lor bann move kitsoz tanki zot pa fer li. Selman sa fason panse la li pa bon. Si enn dimounn kontign pans lor bann move dezir, sa pou fer so move dezir vinn pli for. Se koumadir li’nn kree enn tantasion, ek aster-la li bizin lit kont sa tantasion-la. Biensir, ena fwa bann move panse kapav vinn dan nou lespri. Me kan sa arive, nou bizin rezet zot deswit ek ranplas zot par bann bon panse. Lerla, nou pou protez nou-mem pou ki nou pa fer enn pese grav, parski nou pa’nn les enn move panse vinn enn gran dezir.—Fil. 4:8; Kol. 3:2; Zak 1:13-15.
Nou bizin evit tou kitsoz ki kapav fer nou tom dan tantasion (Get paragraf 13)
14. Ki kitsoz ankor kapav ed nou pou pa tom dan tantasion?
14 Ki lezot kitsoz nou bizin fer pou protez nou-mem pou ki nou pa tom dan tantasion? Nou bizin san poursan sir ki, si nou obeir bann lalwa Zeova nou pou gagn bann bienfe. Parfwa li kapav difisil pou ena bann panse, bann dezir, ek bann lobzektif ki fer leker Zeova plezir. Me kan nou fer zefor pou fer sa bann kitsoz-la, nou pou gagn vre lazwa.
15. Kan nou fer zefor pou ena bann bon dezir, kouma sa kapav ed nou pou pa tom dan tantasion?
15 Nou bizin fer zefor pou ena bann bon dezir. Si nou aprann pou “ena laenn pou seki move, ek kontan seki bon,” nou pou bien deside pou fer seki bon ek evit tou bann sitiasion ki kapav fer nou fer pese. (Amos 5:15) Ek kan nou ena bann bon dezir, sa pou ed nou pou lit kont bann tantasion kan zot arive san ki nou atann.
16. Kan nou fer zefor pou res pros ar Zeova, kouma sa kapav ed nou pou res lor nou gard? (Get zimaz osi.)
16 Ki nou kapav fer pou ena bann bon dezir? Nou bizin res bien okipe dan bann laktivite ki pou fer nou lamitie avek Zeova vinn for. Kan nou al renion ek nou prese, nou dezir pou fer Zeova plezir vinn pli for, ek sa anpes nou pou tom dan tantasion. (Mat. 28:19, 20; Ebre 10:24, 25) Nou bizin osi lir, etidie, ek reflesi lor Parol Bondie. Sa pou ed nou pou plis kontan bann bon kitsoz, ek pou ena plis laenn pou seki move. (Zozwe 1:8; Ps. 1:2, 3; 119:97, 101) Rapel seki Zezi ti dir so bann disip: “Kontign priye, pou ki zot pa tom dan tantasion.” (Mat. 26:41) Alor kan nou priye nou Papa Zeova, sa donn Li lokazion pou ed nou, ek nou pou plis anvi kontign fer Li plezir.—Zak 4:8.
Kan nou res bien okipe dan bann laktivite ki pou fer nou lamitie ar Zeova vinn for, nou pa pou tom dan tantasion (Get paragraf 16) c
RES LOR TO GARD
17. Ar ki febles Pier ti bizin kontign lite?
17 Li posib ki nou sirmont sertin nou bann febles net, me kitfwa nou pou bizin kontign lit kont lezot febles boukou pli lontan. Anou get lexanp lapot Pier. Pier ti renie Zezi trwa fwa, parski li ti per bann zom. (Mat. 26:69-75) Selman, li ti reisi sirmont so laper kan li ti pres devan Sanedrin avek kouraz. (Zist. 5:27-29) Me de-trwa lane apre, li ti aret manz avek bann Kretien non-Zwif parski li ti per seki bann Kretien Zwif ti pou panse lor li. (Gal. 2:11, 12) Pier so laper ti revini ek kitfwa zame li’nn reisi sirmont so laper net.
18. Konsernan sertin nou bann febles, ki kapav arive?
18 Kitfwa nou kapav pas dan mem sitiasion ki Pier. Kouma? Ena fwa, nou pou bizin kontign lit kont enn febles ki nou ti panse nou’nn fini sirmonte. Par exanp, enn frer dir: “Sa fer di-z-an ki mo’nn aret get pornografi, ek mo ti sir ki mo pa ti pou regagn sa problem-la. Me mo febles ti parey kouma enn zanimo bien danzere ki ti pe kasiet ek ki ti pe atann bon moman pou atake.” Kanmem sa, frer-la pa ti bes lebra! Li’nn konpran ki li pou bizin fer plis zefor toulezour pou lit kont sa febles-la, ek kitfwa li pou bizin kontign lite tanki li ankor vivan. Gras-a so fam ek bann ansien dan so lasanble, frer-la inn kapav fer plis atansion pou res lwin ar pornografi.
19. Ki nou kapav fer si nou ena enn febles ki nou pankor sirmonte?
19 Si nou ena enn febles ki nou pankor sirmonte, ki nou kapav fer pou ki sa pa amenn nou fer enn move kitsoz? Nou kapav swiv konsey ki Zezi ti done konsernan tantasion. Li ti dir: “Kontign veye.” Mem dan bann moman kot nou santi nou for, nou bizin kontign evit bann sitiasion ki kapav fer nou tom dan tantasion. (1 Kor. 10:12) Kontign fer bann kitsoz ki pe deza ed twa pou lit kont sa febles-la. Ek parey kouma Proverb 28:14 dir: “Ere sa kikenn ki touletan fer atansion la.”—2 Pier 3:14.
BANN BIENFE KAN NOU KONTIGN RES LOR NOU GARD
20-21. (a) Ki bienfe nou pou gagne si nou kontign res lor nou gard pou pa tom dan tantasion? (b) Si nou kontign fer zefor pou lit kont nou bann tantasion, ki Zeova pou fer pou nou? (2 Korintien 4:7)
20 Nou kapav sir ki li vo lapenn ki nou kontign res lor nou gard pou pa tom dan tantasion. Fer pese kapav fer nou pou gagn bann “plezir tanporer,” me viv dapre bann prinsip Zeova pou fer nou vremem ere. (Ebre 11:25; Ps. 19:8) Akoz samem Zeova finn kree nou pou viv dapre so bann prinsip. (Zen. 1:27) Alor, kan nou viv dan enn fason ki fer Zeova plezir, sa pou fer nou santi nou bien. Nou pou ena enn bon konsians, ek enn zour nou pou kapav viv pou touletan.—1 Tim. 6:12; 2 Tim. 1:3; Zid 20, 21.
21 Li vre ki “laser li feb.” Me sa pa vedir ki nou pa kapav fer nanye pou lit kont nou bann febles. Zeova pre pou donn nou seki nou bizin, setadir so pwisans. (Lir 2 Korintien 4:7.) Me remarke ki Bondie promet pou donn nou enn pwisans ki plis ki normal. Me avan, nou bizin fer tou seki nou kapav pou lit kont bann tantasion. Si nou fer nou par, nou kapav sir ki Zeova pou reponn nou bann lapriyer ek Li pou donn nou plis lafors. (1 Kor. 10:13) Wi, gras-a led Zeova, nou kapav kontign res lor nou gard pou pa tom dan tantasion.
KANTIK 47 Priye Zeova Sak Zour
a EXPRESION KI’NN EXPLIKE: Kan Zezi ti koz lor “lespri” dan Matie 26:41, li ti pe koz lor nou volonte pou fer seki bon. Kan li ti koz lor “laser,” li ti pe rod dir ki, parski nou inparfe ek ki nou fer pese, souvan nou pans ek fer bann move kitsoz. Alor, ena fwa mem si nou anvi fer seki bon, si nou pa fer atansion, nou kapav les nou tante ek fer seki pa bon.
b Enn dimounn ki’nn fer enn pese grav kapav gagn bann konsey dan liv Viv Ere pou Touletan! leson 57 pwin 1-3 ek lartik “Res Konsantre lor Lavenir” dan Latour Degard Novam 2020, p. 27-29, par. 12-17.
c DESKRIPSION ZIMAZ: Gramatin, enn frer pe lir text pou azordi, pandan so dezene li pe lir Labib, ek aswar li pe asiste renion lasemenn.
