Haykanush, enn proklamatris ki pankor batize ki res l’Arménie, ti trouv enn paspor pre kot so lakaz. Kan li ti ouver paspor-la, andan ti ena bann kart labank ek enn kantite kas. Li ti al dir sa so misie, ki ti enn proklamater ki pa ti ankor batize li osi.

Sa koup-la ti ena bann gro problem finans ek ti ena boukou det. Me zot ti desid pou rann sa kas-la. Alor zot ti get ladres ki ti ena dan paspor-la ek ti al rann kas-la. Misie ki ti perdi so paspor la ek so fami ti etone. Haykanush ek so misie ti explike ki se gras-a bann kitsoz ki zot ti pe aprann dan Labib ki zot bann dimounn onet. Lerla, zot ti profit lokazion pou koz lor bann Temwin Zeova ek pou donn sa fami-la bann piblikasion.

Sa fami-la ti anvi donn Haykanush inpe kas pou rekonpans li, me li pa ti aksepte. Landemin, madam-la ti al get Haykanush ek so misie kot zot. Ek pou montre ki kantite li ti rekonesan, madam-la ti insiste ki Haykanush aksepte enn bag an diaman.

Parey kouma sa fami-la, boukou dimounn ti pou etone si zot ti trouve kouma Haykanush ek so misie ti onet. Me eski Zeova ti etone? Ki Zeova inn resanti kan zot inn montre zot onet? Eski sa ti vo lapenn ki zot inn fer zefor pou montre zot onet?

Li bien fasil pou reponn sa bann kestion-la. Kifer? Parski bann serviter Bondie kone ki kan zot imit bann kalite ki Zeova ena, pou Li, sa ena plis valer ki diaman, lor, ouswa lezot kitsoz materyel. Seki ena valer pou Zeova li bien diferan ar seki laplipar dimounn akord linportans. (Izai 55:8, 9) Ek pou bann serviter Bondie, bann zefor ki zot fer pou imit Bondie so bann kalite, sa li ena enn gran valer.

Nou kapav trouv sa kan nou examinn seki Labib dir lor disernman ek sazes. Proverb 3:13-15 dir: “Ere enn kikenn ki trouv lasazes, ek enn kikenn ki gagn disernman; vomie ena li kouma enn profi ki ena larzan kouma enn profi, ek seki li raporte vo plis ki lor. Li ena plis valer ki bann koray, ek tou to bann lezot plezir pa kapav egal ar li.” Li kler ki pou Zeova, bann kalite koumsa ena boukou plis valer ki ninport ki trezor.

Ki nou kapav dir lor lonette?

Zeova Limem Li onet. “Bondie zame koz manti.” (Tit 1:2) Atraver so lespri, Zeova ti inspir lapot Pol pou ekrir bann Kretien Ebre dan premie siek: “Kontign priye pou nou, parski nou sir ki nou ena enn konsians ki drwat, akoz nou anvi res onet dan tou kitsoz.”​—Ebre 13:18, NW.

Zezi Kris ti onet ek finn les enn bon lexanp dan sa domenn-la. Par exanp, kan Gran Pret Kaif ti dir: “Par nom nou Bondie vivan, mo demann twa fer serman ek reponn si tomem Lekris, Garson Bondie!,” Zezi ti onet ek ti idantifie limem kouma Lemesi. Li ti dir laverite mem si li ti kone ki Sanedrin ti kapav akiz li ek dir ki li pe blasfeme. Ek sa ti kapav mem amenn li perdi lavi.​—Matie 26:63-67.

Ki nou kapav dir lor nou? Fer koumadir nou dan enn sitiasion kot nou kapav gagn bann profi lor plan materyel. Me nou pou gagn sa bann profi-la zis si nou kasiet laverite, ouswa si nou deform laverite. Eski nou pou touzour onet?

Li kapav vremem bien difisil pou montre nou onet dan sa bann dernie zour-la, parski  boukou dimounn ‘kontan zotmem, kontan kas.’ (2 Timote 3:2, NW.) Kan ena bann kriz finansie ouswa kan bien difisil pou gagn travay, boukou trouv sa normal pou kokin, pou anbet lezot ouswa pou fer lezot kitsoz malonet. Sa kalite mantalite-la finn telman fane partou ki boukou panse ki sel mwayin pou gagn bann profi materyel se kan zot fer malonet. Ena mem sertin Kretien ki finn pran bann move desizion ek parski zot finn “rod gagn bann kitsoz dan enn fason malonet,” zot finn perdi zot bon repitasion dan kongregasion.​—1 Timote 3:8, NW; Tit 1:7.

Selman, laplipar Kretien imit Zezi. Zot realize ki, ena bann mem kalite ki Bondie ena, li pli inportan ki ninport ki rises ouswa bienfe. Se akoz sa ki bann zenn Kretien pa gore pou gagn enn bon rezilta dan lekol. (Proverb 20:23) Kan nou onet, pa touletan ki nou pou gagn enn rekonpans, parey kouma Haykanush ti gagne. Me kan nou onet, Zeova pou konsider nou kouma enn  dimounn ki drwat. Anplis, sa permet nou ena enn konsians kler, enn kitsoz ki ena vremem enn gran valer.

Lexanp Gagik montre nou sa. Li dir: “Avan ki mo vinn enn Kretien, mo ti pe travay dan enn gran konpagni kot proprieter-la ti anrezistre zis enn ti parti bann profi ki li ti pe gagne pou evit pey tax. Antan ki direkter zeneral, mo ti sipoze fer ‘enn lakor’ avek ofisie tax kan mo donn li gous pou ki li ferm lizie lor tou bann aktivite malonet ki’nn ena dan konpagni. Akoz sa, bann dimounn ti trouv mwa kouma enn kikenn malonet. Kan mo’nn konn laverite, mo pa ti dakor pou kontign fer sa, mem si mo ti pe gagn enn bon lapey. Alor, mo ti ouver mo prop biznes. Ek depi premie zour, mo ti anrezistre mo konpagni legalman ek mo ti pey tou mo bann tax.”​—2 Korintien 8:21.

Gagik dir: “Mo ti gagn de fwa mwins ki avan, alor li ti bien difisil pou pran swin mo fami. Selman, mo pli ere asterla. Mo ena enn konsians kler devan Zeova. Mo pe donn enn bon lexanp mo de garson, ek mo kalifie pou asim bann responsabilite dan kongregasion. Asterla, bann ofisie tax ek lezot dimounn avek ki mo travay trouv mwa kouma enn dimounn onet.”

Zeova kontan bann ki donn Li laglwar kan zot imit so bann zoli kalite, ki inplik osi vinn bann dimounn onet. (Tit 2:10) Ek kan nou onet, Li promet ki Li pou ed nou. Zeova ti inspir Lerwa David pou dir: “Mo ti enn zenom ek asterla mo’nn vinn vie, me mo pa finn trouv enn dimounn zis ki’nn abandone, ni so bann zanfan ki pe rod dipin.”​—Psom 37:25, NW.

Pou prouv sa, nou ena lexanp Rit, ki ti fidel. Olie ki li ti kit Naomi, so belmer, parski li ti vie, Rit finn montre li fidel kan li’nn res avek li. Rit ti al viv dan Izrael, kot li ti pou kapav ador vre Bondie. (Rit 1:16, 17) Li ti onet ek ti travay dir pou glane. Kan li ti fer sa, li ti pe swiv enn dispozision ki ti etabli dan Lalwa, pou bann pov. Ek parey kouma David osi ti fer lexperyans apre, Zeova zame pa ti abandonn Rit ek Naomi. (Rit 2:2-18) Li ti osi fer plis ki zis donn Rit seki li ti bizin lor plan materyel. Zeova ti swazir Rit pou vinn enn parmi bann anset Lerwa David ek mem Lemesi!​—Rit 4:13-17; Matie 1:5, 16.

Kitfwa pou sertin serviter Zeova, li bien difisil pou gagn ase kas pou aste bann kitsoz ki zot bizin pou viv. Me olie ki zot rod enn semin fasil me malonet, zot travay dir ek zot fer tou pou fer seki drwat. Kan zot fer sa, zot montre ki pou zot, Bondie so bann kalite extraordiner, ki inplik osi vinn bann dimounn onet, ena boukou plis valer ki bann kitsoz materyel.​—Proverb 12:24; Efezien 4:28.

Parey kouma Rit, bann Kretien dan lemond antie finn montre ki zot ena lafwa dan lafors ki Bondie ena pou ed zot. Zot ena enn konfians total an Zeova, ki’nn fer sa promes-la ar zot: “Zame mo pa pou kit twa, ni abandonn twa.” (Ebre 13:5) Plizir fwa, Zeova finn montre ki Li kapav ek ki Li pou ed bann ki touzour montre zot onet. Touletan Li’nn tini so promes pou donn so bann serviter seki zot bizin pou viv.​—Matie 6:33.

Alor, bann dimounn kapav akord boukou valer bann diaman ek bann lezot kitsoz materyel. Me nou kapav sir ki, pou nou Papa ki dan lesiel, nou lonette ek bann lezot bon kalite ki nou ena, zot ena boukou plis valer ki ninport ki trezor!