1. Sit enn kitsoz ki rann nou pli siperyer ki bann zanimo.

ZEOVA inn donn bann dimounn enn kitsoz spesial. Se nou konsians. Se enn parmi bann kitsoz ki rann nou pli siperyer ki bann zanimo. Kouma nou kone ki Adan ek Ev ti ena enn konsians? Apre ki zot ti dezobeir Bondie, zot ti al kasiet. Zot konsians ti repros zot.

2. Dan ki sans nou konsians li kouma enn bousol? (Get zimaz dan koumansman lartik.)

² Nou konsians se enn kapasite ki nou ena dan nou pou fer diferans ant seki bon ek seki move ek ki kapav gid nou dan nou lavi. Enn dimounn ki so konsians pa bien forme li kouma enn bato avek enn bousol deregle. Bann divan ek bann kouran kapav antrenn sa bato-la dan enn move direksion. Me enn bousol ki bien regle pou ed kapitenn-la gard so bato dan bon direksion. Dan mem fason, si nou bien form nou konsians, li kapav bien gid nou.

3. Ki kapav arive si nou pa form bien nou konsians?

 ³ Si nou konsians pa bien forme, li pa pou averti nou kan nou pe fer enn move kitsoz. (1 Timote 4:1, 2) Li kapav mem konvink nou ki “seki move, li bon.” (Izai 5:20) Zezi ti dir so bann disip: “Ler pe vini kot dimoun, ki pou touy zot, pou krwar ki zot pe servi Bondie kan zot pe fer sa.” (Zan 16:2) Se seki bann ki ti touy disip Etienn ti panse. (Zistwar Bann Apot 6:8, 12; 7:54-60) Toutlong listwar, boukou dimounn relizie finn komet bann move kitsoz kouma touy dimounn, ek zot dir ki zot finn fer sa pou Bondie. Me an realite, seki zot finn fer li kont lalwa Bondie. (Exod 20:13) Sa montre bien ki zot konsians pa finn bien gid zot!

4. Ki nou bizin fer pou ki nou konsians travay kouma bizin?

⁴ Alor, ki nou bizin fer pou ki nou konsians travay kouma bizin? Bann lalwa ek bann prinsip Labib zot itil “pou ansegne, repran, korize, fer grandi dan lazistis.” (2 Timote 3:16) Nou bizin etidie Labib regilierman, medit bien lor seki li dir, ek aplik li dan nou lavi. Dan sa fason-la, deplizanpli nou pou aprann pans parey kouma Zeova. Lerla nou kapav sir ki nou konsians pou bien gid nou. Anou gete kouma nou kapav servi bann lalwa ek bann prinsip Zeova pou form nou konsians.

5, 6. Kouma bann lalwa Bondie ed nou?

⁵ Si nou anvi ki bann lalwa Bondie ed nou, nou bizin pa zis lir ouswa zis konn sa bann lalwa-la. Nou bizin kontan ek respekte sa bann lalwa-la. Labib dir nou: “Ena laenn pou seki move, ek kontan seki bon.” (Amos 5:15) Me kouma nou kapav fer sa? Nou bizin aprann pou trouv bann kitsoz dan fason ki Zeova trouv zot. Anou pran enn lexanp. Fer koumadir to pa pe dormi bien, ek to dokter konsey twa manz bann manze ki bon pou to lasante, fer plis lexersis, ek fer bann lezot sanzman dan to fason viv. To swiv so bann konsey, ek sa marse! Ki to pou panse lor bann konsey sa dokter-la?

⁶ Dan mem fason, nou Kreater finn donn nou bann lalwa pou protez nou ar bann move konsekans pese ek pou amelior nou lavi. Par exanp, Labib ansegn nou pou pa koz manti, pa anbet lezot, pa kokin, pa komet limoralite, pa azir avek violans, ek pou pena okenn lien avek spiritis. (Lir Proverb 6:16-19; * Revelasion 21:8) Kan nou gagn bann bon rezilta parski nou finn obeir Zeova, nou lamour pou Li ek so bann lalwa kontign ogmante.

7. Kouma bann zistwar Labib kapav ed nou?

⁷ Li pa neseser ki nou dezobeir bann lalwa Bondie ek sibir bann move konsekans pou ki nou aprann seki bon ek seki pa bon. Nou kapav aprann ar bann erer ki lezot finn fer dan lepase. Nou kapav trouv sa bann lexanp-la dan Labib. Proverb 1:5 dir: “Enn dimounn saz  pou ekoute ek pou gagn plis lansegnman.” Se Zeova ki donn sa lansegnman-la ek se meyer lansegnman ki ena! Par exanp, reflesi ki kantite David finn soufer apre ki li finn dezobeir Zeova ek finn komet limoralite avek Betsabe. (2 Samiel 12:7-14) Kan to lir sa zistwar-la, demann tomem: ‘Kouma David ti kapav evit sa bann problem-la? Ki mo ti pou fer si mo ti dan enn sitiasion parey? Si mo ti tante pou komet limoralite, eski mo ti pou azir kouma David ouswa kouma Zozef?’ (Zenez 39:11-15) Si nou reflesi bien lor bann move konsekans pese, nou “laenn pou seki move” pou kontign ogmante.

8, 9. (a) Ki kitsoz nou konsians ed nou pou fer? (b) Ki lien bann prinsip Labib ena avek nou konsians?

⁸ Nou fer tou pou res lwin ar bann kitsoz ki Bondie ayir. Me ki nou pou fer si nou dan enn sitiasion kot pena okenn lalwa presi dan Labib? Kouma nou pou kone seki Zeova anvi nou fer? Si nou’nn les Labib form nou konsians, nou pou pran enn bon desizion.

⁹ Parski Zeova kontan nou, Li finn donn nou bann prinsip ki kapav gid nou konsians. Li explike: “Mwa, Zeova, Momem to Bondie, Momem ki ansegn twa pou to profi, Momem ki gid twa lor semin ki to bizin marse.”  (Izai 48:17, 18) Kan nou medit lor bann prinsip Labib ek les zot tous nou leker, nou kapav koriz ek form nou konsians ek sa ed nou pran bann bon desizion.

10. Ki ete enn prinsip, ek kouma Zezi ti servi bann prinsip dan so lansegnman?

¹⁰ Enn prinsip se enn verite debaz ki gid nou fason panse ek ed nou pou pran bann bon desizion. Kan nou konn bann prinsip Zeova sa ed nou pou konpran so fason panse ek kifer Li donn nou sertin lalwa. Pou montre ki bann latitid ek bann aksion ena bann konsekans, Zezi ti servi bann prinsip pou ansegn so bann disip. Par exanp, li ti ansegne ki lakoler kapav amenn violans ek ki bann panse imoral kapav amenn ladilter. (Matie 5:21, 22, 27, 28, NW.) Kan nou les bann prinsip Zeova gid nou, sa pou bien form nou konsians, ek nou pou pran bann desizion ki pou donn loner Zeova.​—1 Korintien 10:31.

11. Kouma konsians enn Kretien kapav diferan avek konsians enn lot Kretien?

¹¹ Mem si bann Kretien form zot konsians dapre bann prinsip Labib, zot kapav ena bann diferan fason panse lor sertin size, kouma par exanp lor konsomasion lalkol. Labib pa dir ki li pa bon ki nou bwar lalkol, me li averti nou ki fode pa nou bwar tro boukou ouswa bwar ziska sou. (Proverb 20:1; 1 Timote 3:8) Eski savedir ki tanki enn Kretien pa bwar tro boukou, li pa bizin kas latet ar konsians lezot kan li pran so desizion? Non. Mem si so konsians permet li bwar lalkol, li bizin osi pran kont konsians lezot.

12. Kouma bann parol ki ena dan Romin 14:21 kapav ed nou pou respekte konsians lezot?

¹² Pol ti montre ki nou bizin respekte konsians lezot kan li ti ekrir: “Li meyer ki evit manz laviann oubien bwar divin ou fer ninport ki kiksoz ki pou fer enn frer ou enn ser tonbe.” (Romin 14:21) Alor, mem si nou ena drwa bwar lalkol, nou pou pre pou sakrifie sa drwa-la si nou kone ki sa kapav sok konsians enn lot Kretien. Li kapav ki enn frer ti enn alkolik avan ki li konn laverite ek asterla li finn desid pou pa bwar ditou. Nou pa pou fer nanye ki pou pous li retom dan so bann vie labitid. (1 Korintien 6:9, 10) Si nou ti invit sa frer-la kot nou, eski nou ti pou insiste pou li bwar lalkol, mem si li ti refize? Non!

13. Kouma Timote ti respekte konsians lezot pou ki li kapav ed zot aksepte bonn nouvel?

¹³ Kan Timote ti enn zenom, li ti aksepte pou fer sirkonsizion mem si sa ti fer li soufer. Li ti kone ki sirkonsizion ti inportan pou bann Zwif avek ki li ti pou al prese. Parey kouma Pol, Timote pa ti anvi ofans personn. (Zistwar Bann Apot 16:3; 1 Korintien 9:19-23, NW.) Eski twa osi to pre pou fer bann sakrifis pou ed lezot?

14, 15. (a) Kouma nou vinn bann Kretien ki ena matirite? (b) Kouma enn Kretien ki ena matirite tret lezot?

¹⁴ Nou tou nou bizin fer zefor pou “avans ver matirite” ek pou pa aret nou avek “bann doktrinn debaz konsernan Kris.” (Ebre 6:1, NW.) Nou pa vinn enn Kretien ki ena matirite zis parski nou dan laverite pandan boukou lane. Nou bizin fer zefor pou gagn matirite. Nou bizin kontign ogmant nou konesans lor Labib ek fer zefor pou konpran seki nou pe lir. Alor, nou bizin lir Labib toulezour. (Psom 1:1-3) Kan to lir Labib toulezour, to pou plis konpran bann lalwa ek bann prinsip Zeova.

¹⁵ Ki lalwa ki pli inportan pou bann Kretien? Se lalwa lamour. Zezi ti dir so bann disip: “Si zot ena lamour pou zot kamarad, tou dimoun pou kone ki zot mo disip.” (Zan 13:35) Lamour apel “lalwa rwayal” ek li “akonplir tou seki lalwa demande.” (Zak 2:8, NW; Romin 13:10) Nou pa etone ki lamour ena sa gran linportans-la, parski Labib mem dir ki “Bondie limem lamour.” (1 Zan 4:8) Pou Bondie, lamour li plis ki zis enn santiman. Li montre so lamour par so bann aksion. Zan ti ekrir: “Ala kouma Bondie finn montre so lamour pou nou: Li finn avoy so sel garson dan lemonn pouki nou gagn vre lavi par li.” (1 Zan 4:9) Kan nou montre nou lamour pou Zeova, Zezi, nou bann frer, ek lezot dimounn, nou montre ki nou bann Kretien ki ena matirite.​—Matie 22:37-39.

16. Amezir ki nou vinn bann Kretien ki ena matirite, kouma eski deplizanpli nou akord valer bann prinsip Zeova?

¹⁶ Amezir ki nou vinn bann Kretien ki  ena matirite, nou akord deplizanpli valer bann prinsip. Bann lalwa souvan aplik ar enn sitiasion presi, me bann prinsip aplik ar diferan sitiasion. Par exanp, enn zanfan li pa konpran ki li danzere pou fer kamarad ar bann move dimounn, alor so bann paran bizin met bann lalwa pou protez li. (1 Korintien 15:33) Me amezir ki zanfan-la koumans grandi ek gagn matirite, li aprann rezone apartir bann prinsip Labib. Sa bann prinsip-la pou ed li swazir bann bon kamarad. (Lir 1 Korintien 13:11; 14:20.) Plis nou rezonn lor bann prinsip Labib, plis nou konsians pou vinn efikas. Nou konpran pli bien seki Zeova anvi nou fer dan ninport ki sitiasion.

17. Kifer nou kapav dir ki nou ena tou seki nou bizin pou pran bann bon desizion?

¹⁷ Nou ena tou seki nou bizin pou pran bann desizion ki fer plezir Zeova. Dan Labib, nou trouv bann lalwa ek bann prinsip ki ed nou vinn bann dimounn ki “kalifie ek ekipe pou fer enn bon travay.” (2 Timote 3:16, 17) Bann prinsip Labib ed nou pou konpran fason panse Zeova. Me nou bizin fer zefor pou trouv sa bann prinsip-la. (Efezien 5:17) Pou ed nou fer sa, nou ena Index des publications des Témoins de Jéhovah, Liv Resers pou Bann Temwin Zeova, Watchtower Library, Watchtower BIBLIOTEK LOR INTERNET, ek aplikasion JW Library. Kan nou servi sa bann zouti-la, nou pou tir profi dan nou letid personel ek dan nou letid familial.

18. Ki arive kan nou aplik bann lalwa ek bann prinsip Zeova dan nou lavi?

¹⁸ Kan nou aplik bann lalwa ek bann prinsip Zeova sa fer nou gagn boukou benediksion! Psom 119:97-100 dir: “O komie mo kontan to lalwa! Lanwit lizour mo medit lor to lalwa. To komandman grave dan mo latet; akoz sa mo ena plis sazes ki mo ennmi. Parfwa mo konpran plis ki profeser parski mo toultan pe medit lor to lansegnman. Mo lespri pli for ki lespri bann grandimoun parski mwa mo obeyir to instriksion.” Kan nou pran letan pou medit lor bann lalwa ek prinsip Zeova, nou pou azir avek plis sazes ek lintelizans. Ek kan nou servi so bann lalwa ek so bann prinsip pou form nou konsians, nou pou “devlope pou vinn bann krwayan adilt ziska nivo grander Lekris.”​—Efezien 4:13.