NOU tou nou kone ki Zeova pe diriz so pep pandan “bann dernie tan” ek ki Li pe donn zot seki zot bizin pou zot kapav res pros ar Li. (2 Tim. 3:1) Parkont, nou tou nou bizin obeir Zeova. Nou kapav konpar nou sitiasion ar bann Izraelit kan zot ti dan dezer. Zot ti bizin azir kan zot ti tann son tronpet.

Zeova ti dir Moiz fer de tronpet an arzan ek ti servi zot “pou rasanble lepep ek fer zot lev kan.” (Nonb 10:2) Bann pret ti soufle tronpet-la dan diferan fason pou fer lepep kone seki zot ti bizin fer. (Nonb 10:3-8) Azordi, Zeova donn so bann serviter bann instriksion dan diferan fason. Dan sa lartik-la, nou pou koz lor trwa fason ki Zeova donn nou bann instriksion ek nou pou konpar zot ar bann son tronpet ki ti servi dan ansien Izrael. Sa trwa fason-la se kan Zeova invit nou pou asiste bann gran lasanble, kan bann ansien gagn bann formasion, ek kan bann lasanble gagn instriksion pou fer bann sanzman.

Kan Zeova ti anvi ki “lepep an-antie” rasanble kot lantre tabernak, ki trouv dan kote les, bann pret ti soufle toulede tronpet. (Nonb 10:3) Tou bann tribi Izrael, ki ti kanp otour tabernak ek ki ti divize an kat group, ti tann son sa bann tronpet-la. Bann ki ti res pre ar tabernak ti kapav arive bien vit. Parkont, bann ki ti res pli lwin ti pran pli boukou letan pou vini ek zot ti ena plis zefor pou fer. Ninport kotsa zot ti reste, Zeova ti anvi ki zot tou rasanble ek ekout so bann instriksion.

Azordi, nou pena pou rasanble kot tabernak, me nou invite pou asiste bann gran lasanble. Parmi sa bann lasanble-la, ena lasanble rezional ek bann lezot levennman spesial kot nou gagn bann instriksion ki bien inportan. Dan lemond antie, bann serviter Zeova gagn mem lansegnman. Alor, tou bann ki aksepte linvitasion pou asiste sa bann lasanble-la, zot form parti enn gran group ki bien zwaye. Sertin ena enn pli long traze pou fer. Me tou bann ki aksepte sa linvitasion-la, zot kone ki zot bann zefor pa dan vid.

Eski bann frer ek ser ki dan bann group izole ek ki res bien lwin kapav profit sa bann gran lasanble-la? Wi, gras-a bann nouvo teknolozi, boukou parmi zot pe kapav profit sa bann lasanble-la ek zot mem santi zot pros ar zot bann frer ek ser ki asiste sa bann rasanbleman-la. Par exanp, kan ti ena vizit enn reprezantan biro mondial, biro nasional Benin ti transmet sa program-la dan Arlit, enn lavil kot ena bann laminn ek ki trouv  dan dezer Saara, dan Nizer. Sa zour-la, 21 dimounn, parmi ti ena sink frer ek ser, ti asiste sa program-la. Mem si zot ti bien-bien lwin, zot ti santi zot pros avek sa 44,131 asistan ki ti asiste sa rasanbleman-la. Enn frer ti dir: “Avek tou mo leker, mo remersie zot ki zot finn transmet nou sa program-la. Ankor enn fwa, sa montre nou ki kantite zot kontan nou.”

Kan bann pret Izraelit ti soufle enn sel tronpet, “zis bann sef, bann ki sef lor mil dimounn,” ti bizin al kot latant renion. (Nonb 10:4) Laba, Moiz ti pou donn zot bann instriksion ek formasion. Sa ti pou ed zot pou asim bien bann responsabilite ki zot ti ena dan zot tribi. Si to ti enn parmi sa bann sef-la, eski to pa ti pou fer to maximum pou profit sa bann formasion-la?

Azordi, bann ansien zot pa bann “sef” ek zot pa “dominn” lor troupo Bondie ki anba zot responsabilite. (1 Pier 5:1-3, NW) Me zot fer zot maximum pou pran swin troupo Bondie. Akoz sa, kan invit zot pou gagn bann formasion kouma Lekol pou Bann Frer Nome, zot dispoze pou les zot forme. Dan sa lekol-la, bann ansien aprann kouma pou okip lasanble pli bien. Sa bann formasion-la ed bann ansien ek bann lezot manb lasanble pou vinn pli pros ar Zeova. Mem si to pa finn gagn sa bann formasion-la, twa osi to gagn bann bienfe parski bann frer ki asiste sa bann lekol-la servi seki zot aprann pou ed lasanble.

Parfwa, bann pret Izraelit ti varye son zot tronpet. Kan zot ti tann sa son-la, bann Izraelit ti kone ki Zeova ti anvi ki zot al dan enn lot landrwa. (Nonb 10:5, 6) Kan lepep ti bizin lev zot kan, zot ti fer sa dan enn fason organize, me sa ti kanmem enn gro travay. Parfwa, sertin Izraelit ti ezite pou al dan enn lot landrwa. Kifer?

Kitfwa sertin ti panse ki bann tronpet-la ti sonn tro souvan ouswa ti sone san ki zot atann. “Parfwa, niaz-la ti res zis depi aswar ziska gramatin.” Lezot fwa, niaz-la “ti res de zour, enn mwa, ouswa pli lontan,” ek kan niaz-la ti bouze bann Izraelit ti bizin lev zot kan. (Nonb 9:21, 22) An realite, komie fwa zot ti lev zot kan? Nonb sapit 33 koz lor anviron 40 plas kot bann Izraelit ti reste.

Parfwa, bann Izraelit ti kanp dan bann landrwa kot ti ena lonbraz. “Dan enn gran dezer ki fer per,” kanp dan enn landrwa kot ena lonbraz ti bien agreab. (Det. 1:19) Akoz sa, kan zot ti bizin bouze, kitfwa zot ti panse ki zot ti pou al dan enn landrwa ki dan pins ek sa ti fer zot gagn per.

Kan bann Izraelit ti bizin lev zot kan, sertin tribi kitfwa ti trouv sa difisil pou atann zot tour pou ale. Tou dimounn ti tann son tronpet-la, me tou dimounn pa ti kapav al anmemtan. Kan tronpet-la ti sone, bann tribi ki ti dan les, setadir Zida, Isakar, ek Zaboulon, ti bizin ale. (Nonb 2:3-7; 10:5, 6) Kan zot ti fini ale, bann pret ti sonn tronpet-la enn deziem fwa ek trwa tribi ki ti dan lesid ti ale. Bann pret ti kontign fer sa ziska ki tou bann tribi ti ale.

Eski to finn trouv sa difisil pou aksepte sertin sanzman ki finn ena dan lorganizasion? Kitfwa to ti pe panse ki finn ena tro boukou sanzman. Ouswa kitfwa to ti kontan fason ki ti pe fer bann kitsoz avan ek to pa ti anvi ki sa sanze. Sirman to finn bizin ena plis pasians pou adapte ar sa bann sanzman-la. Selman, si nou fer zefor pou adapte ar bann sanzman, nou pou trouve ki Zeova pou beni nou.

Dan lepok Moiz, Zeova ti gid plizir milyon dimounn dan dezer. Si Li pa ti gid zot ek pran zot swin, zot ti pou mor. Azordi, pou nou pa mor lor plan spiritiel, nou bien bizin ki Zeova gid nou. Li ed nou pou res pros ar Li ek pou gard nou lafwa for. Alor, anou fer nou best pou res obeisan parey kouma bann Izraelit ki ti azir kan zot ti tann son tronpet!