Sa bann verse-la koz lor nef kalite: “Frwi lespri se lamour, lazwa, lape, pasians, zantiyes, bonte, lafwa, douser, metriz lor noumem.” Me fode pa nou panse ki se zis sa nef kalite-la ki lespri sin kapav ed nou pou devlope.

Kouma nou konn sa? Zis avan ki lapot Pol koz lor frwi lespri, li ti ekrir: “Seki laser prodir li kler, se limoralite sexiel, linpirte, kondwit devergonde, lidolatri, pratik spiritis, laenn, bagar, zalouzi, kriz koler, dispit, divizion, sekt, anvie lezot, soulezon, bann fet kot pena okenn kontrol, ek bann kitsoz ki parey.” (Gal. 5:19-21, NW) Dan dernie parti sa bann verse-la, Pol ti servi lexpresion “bann kitsoz ki parey,” savedir ki li pa ti koz lor tou seki form parti dan bann kitsoz ki “laser prodir,” kouma bann kitsoz ki mansione dan Kolosien 3:5. Dan mem fason, apre ki Pol ti koz lor sa nef bon kalite-la, li ti dir: “Pena okenn lalwa ki kont sa bann kitsoz-la.” Alor, li kler ki Pol pa ti mansionn tou bann zoli kalite ki lespri sin ed nou pou devlope.

Nou konpran sa kan nou konpar frwi lespri ar frwi lalimier. Pol ti koz lor la kan li ti ekrir bann Efezien. Li ti dir: “Frwi lalimier prodir tou sort kalite bonte, lazistis ek laverite.” (Efe. 5:8, 9, NW) Alor, “bonte,” ansam avek lazistis ek laverite, form parti “frwi lalimier,” me li osi form parti “frwi lespri.”

Nou konpran sa osi kan nou konpar frwi lespri ar sa sis kalite ki Pol ti ankouraz Timote pou devlope la: “Rod lazistis, latasman ar Bondie, lafwa, lamour, landirans ek douser.” (1 Tim. 6:11, NW) Zis trwa parmi sa bann kalite-la (lafwa, lamour, ek douser) ki form parti “frwi lespri.” Kanmem sa, Timote ti pou bizin led lespri sin pou devlop bann lezot kalite ki Pol ti mansione, setadir lazistis, latasman ar Bondie, ek landirans.​—Konpar avek Kolosien 3:12; 2 Pier 1:5-7.

Alor, li kler ki Galat 5:22, 23 pa mansionn tou bann kalite ki bann Kretien bizin kiltive. Lespri sin kapav ed nou pou kiltiv sa nef kalite ki form parti “frwi lespri” la. Me amezir ki nou grandi lor plan spiritiel, ena lezot kalite ki nou bizin kiltive. Nou bizin osi “met lor [nou] nouvo personalite ki finn kree dapre volonte Bondie, dan enn vre lazistis ek enn vre fidelite.”​—Efe. 4:24, NW.