LARTIK LETID 25
“Momem Mo Pou Al Rod Mo Bann Mouton”
“Momem mo pou al rod mo bann mouton ek mo pou pran zot swin.”—EZE. 34:11.
KANTIK 105 “Bondie Li Lamour”
REZIME *
1. Kifer Zeova ti konpar Limem ar enn mama?
“ESKI enn fam kapav bliye so tibaba ki ankor pe bwar avek li?” Zeova ti poz sa kestion-la dan lepok profet Izai. Apre Li ti azoute: “Sa bann fam-la kapav bliye, me mwa mo pa pou bliye twa.” (Iza. 49:15) Zeova pa souvan konpar Limem ar enn mama. Me sann fwa-la Li ti fer sa. Kifer? Li ti servi lien ki ena ant enn mama ek so tibaba pou montre ki kantite Li kontan so bann serviter. Boukou mama sirman ena mem santiman ki Jasmin, ki dir: “Kan to baba bwar avek twa, to devlop enn lien bien spesial avek li, ki dire toutlong to lavi.”
2. Ki Zeova resanti kan enn parmi so bann zanfan abandonn Li?
2 Zeova kone kan enn so bann zanfan aret prese ek aret vinn renion. Alor, esey mazine ki kantite Li soufer kan Li trouv plizir milye so bann serviter vinn inaktif * sak lane.
3. Ki Zeova anvi?
3 Kan bann inaktif rekoumans vinn renion, nou bien kontan pou akeyir zot. Zeova anvi ki zot retourne, ek nou osi! (1 Pier 2:25) Kouma nou kapav ed zot? Avan ki nou reponn sa kestion-la, li bon ki nou konpran kifer sertin aret prese ek aret vinn renion.
KIFER SERTIN ARET SERVI ZEOVA?
4. Ki kapav arive akoz travay?
4 Sertin finn les zot travay vinn kitsoz pli inportan dan zot lavi. Hung *, enn frer ki res Lazi, dir: “Mo’nn les mo travay pran tro boukou mo letan ek mo lenerzi. Mo ti anbet momem ek mo ti panse ki si mo ti ena pli boukou kas, mo ti pou kapav servi Zeova pli bien. Alor, mo ti travay pli boukou. Tigit-tigit, mo’nn koumans rat pli boukou renion ziska ki mo’nn aret vini net. Satan servi lemond pou elwagn bann dimounn ar Zeova tigit par tigit.”
5. Kouma enn ser ti reazir akoz bann difikilte ki li ti ena?
5 Sertin frer ek ser ena boukou problem ek sa dekouraz zot. Anne ena sink zanfan ek li res Langleter. Li dir: “Enn parmi mo bann zanfan inn ne andikape. Plitar, enn parmi mo bann tifi inn exkli, ek enn mo bann garson inn gagn enn maladi mantal. Mo ti telman dekouraze ki mo ti aret al renion ek aret prese. Finalman, mo ti vinn inaktif.” Nou ena boukou lapenn pou Anne ek so fami, ek pou tou bann frer ek ser ki pe fer fas ar sa bann kalite difikilte-la!
6. Kouma enn kikenn kapav elwagn li ar Zeova si li pa met Kolosien 3:13 an pratik?
6 Lir Kolosien 3:13. Sertin finn santi zot blese akoz seki enn frer ouswa enn ser inn fer. Lapot Pol ti rekonet ki parfwa nou kapav ena enn bon rezon pou ena “kit repros” kont enn frer ouswa enn ser. Li kapav mem arive ki enn frer ouswa enn ser azir dan enn fason inzis anver nou. Si nou pa fer atansion, nou riske gard sa dimounn-la dan leker. Kan enn kikenn ankoler, li riske elwagn li ar Zeova. Anou pran lexanp Pablo, enn frer ki res Lamerik Disid. Enn kikenn ti koz manti ek ti dir ki Pablo ti fer enn move kitsoz. Pablo ti inosan, me bann ansien ti panse ki li ti koupab ek zot ti disiplinn li. Kouma Pablo ti reazir? Li dir: “Mo ti ankoler, ek tigit-tigit mo ti aret vinn renion.”
7. Ki kapav arive kan enn kikenn santi li koupab?
7 Enn kikenn ki’nn fer enn pese grav dan lepase kapav santi li koupab pandan lontan. Li kapav mem panse ki li nepli merit lamour Bondie. Mem si li’nn repanti ek ki li’nn gagn pardon so pese, kitfwa li panse ki li nepli ase bon pou form parti pep Bondie. Enn frer ki apel Francisco ti ena sa santiman-la. Li dir: “Mo ti gagn enn disiplinn parski mo ti komet limoralite sexiel. Mem si o-koumansman mo ti kontign asiste renion, mo ti bien dekouraze ek mo pa ti santi mwa dign pou form parti pep Zeova. Mo konsians ti pe fatig mwa, ek mo ti sir ki Zeova pa ti pardonn mwa. Avek letan, mo ti aret prese ek aret al renion.” Ki to resanti pou bann frer ek ser ki pas par bann sitiasion ki nou’nn mansione dan sa bann paragraf-la? Eski to konpran zot lapenn? Me pli inportan, ki Zeova resanti pou zot?
ZEOVA KONTAN SO BANN SERVITER
Enn berze Izraelit pe pran swin enn mouton ki ti perdi (Get paragraf 8-9) *
8. Eski Zeova bliye bann ki’nn servi Li? Explike.
8 Zeova pa bliye bann ki’nn servi Li, mem si pou linstan zot nepli prese ek asiste renion. Ek Li pa bliye osi tou seki zot inn fer pou Li. (Ebre 6:10, NW) Profet Izai ti servi enn zoli lexanp pou montre kouma Zeova pran swin so bann serviter. Izai ti ekrir: “Parey kouma enn berze, Li pou pran swin so troupo. Avek so lebra, Li pou rasanble so bann ti mouton, ek Li pou sarye zot lor so lestoma.” (Iza. 40:11) Ki Zeova, nou Gran Berze, resanti kan enn so bann serviter aret servi Li? Zezi ti explike ki santiman Zeova ena, kan li ti dir so bann disip: “Ki zot panse? Sipoze enn dimoun ena san mouton, e enn parmi perdi, eski li pa pou les sa katrovin-diznef mouton la lor montagn pou al rod sa enn ki finn perdi la? Si li retrouv li, mo sir li pou pli kontan pou sa sel mouton la ki sa lezot katrovin-diznef ki pa finn perdi.”—Mat. 18:12, 13.
9. Dan lepok Biblik, kouma enn bon berze ti pran swin so bann mouton? (Get zimaz lor kouvertir.)
9 Kifer nou kapav konpar Zeova ar enn berze? Parski dan lepok Biblik, enn bon berze ti vremem pran swin so mouton. Par exanp, David ti lager ar enn lion ek enn lours pou protez so troupo. (1 Sam. 17:34, 35) Enn bon berze ti remarke kan ti mank enn mouton dan so troupo. (Zan 10:3, 14) Si li ti ena 100 mouton ek ki enn ladan ti perdi, li ti pou kit so 99 mouton dan enn lanklo ouswa avek bann lezot berze, kot zot ti pou an sekirite, ek li ti pou al rod sa mouton ki ti perdi la. Zezi ti servi sa lexanp-la pou ansegn nou enn leson bien inportan: “Koumsamem zot Papa ki dan lesiel, li pa anvi ki okenn sa bann . . . dimoun la perdi.”—Mat. 18:14.
Dan ansien Izrael, enn berze pe pran swin enn mouton ki ti perdi (Get paragraf 9)
ZEOVA ROD SO BANN MOUTON
10. Dapre Ezekiel 34:11-16, ki promes Zeova ti fer konsernan so bann mouton ki’nn perdi?
10 Zeova kontan sakenn parmi nou, mem bann “dimoun” ki’nn elwagn zot ar so troupo. Atraver profet Ezekiel, Bondie ti promet ki Li ti pou rod so bann mouton ki’nn perdi ek ed zot pou regagn enn bon relasion avek Li. Li ti osi dir seki Li ti pou fer pou sov zot. Li ti pou servi mem metod ki bann berze Izraelit ti servi kan zot ti perdi enn mouton. (Lir Ezekiel 34:11-16. *) Pou koumanse, berze-la ti rod so mouton, mem si sa ti demann li boukou letan ek boukou zefor. Kan li ti trouv so mouton, li ti re-amenn li dan so troupo. Ek si so mouton ti blese ouswa gagn fin, li ti pou pran li swin avek boukou lamour. Li ti pou pran li dan so lebra, donn li manze, ek swagn so bann blesir. Bann ansien, bann berze “troupo Bondie,” bizin swiv sa trwa letap-la pou ed bann ki’nn elwagn zot ar pep Bondie. (1 Pier 5:2, 3) Bann ansien bizin al rod zot ek ed zot pou retourn dan lasanble. Zot bizin osi montre ki zot kontan zot kan zot ed zot pou regagn enn bon relasion avek Zeova. *
11. Ki kitsoz enn bon berze ti konpran?
11 Enn bon berze ti konpran ki enn mouton kapav perdi. Ek si enn mouton ti elwagn li ar troupo, berze-la pa ti tret li dan enn move fason. Anou gete kouma Zeova ti azir anver so bann serviter ki, pandan enn tan, ti elwagn zot ar Li.
12. Kouma Zeova ti azir ar Zonas?
12 Profet Zonas ti dezobeir Zeova ek li pa ti al Niniv. Kanmem sa, Zeova pa ti abandonn Zonas. Parey kouma enn bon berze, Zeova ti sov li ek ti ed li pou gagn lafors pou akonpli so mision. (Zonas 2:7; 3:1, 2) Plitar, Zeova ti servi enn pie pou fer Zonas konpran ki lavi sak dimounn ena valer. (Zonas 4:10, 11) Ki leson nou aprann? Bann ansien bizin pa abandonn enn kikenn ki inaktif. Okontrer, zot bizin esey konpran kifer li’nn elwagn li ar pep Zeova. Ek kan sa dimounn-la retourn ar Zeova, bann ansien bizin kontign montre ki zot kontan li ek ki zot interese ar li.
13. Ki nou aprann ar fason ki Zeova ti reazir anver ekrivin Psom 73?
13 Ekrivin Psom 73 ti dekouraze kan li ti trouve kouma bann move dimounn ti pe reisi dan lavi. Li ti pe demann limem si li vo lapenn servi Bondie. (Ps. 73:12, 13, 16) Kouma Zeova ti reazir? Li pa ti kondann so serviter. Okontrer, Li ti mem fer ekrir bann parol sa ekrivin Psom la dan Labib. Finalman, ekrivin-la ti realize ki seki ena plis valer dan lavi, se ena enn bon relasion avek Zeova. (Ps. 73:23, 24, 26, 28) Ki leson nou aprann? Bann ansien bizin pa ziz tro vit bann ki koumans demann zotmem si li vo lapenn servi Zeova. Bann ansien bizin pa kondann zot. Okontrer, zot bizin esey konpran kifer zot koz ek azir koumsa. Apre sa, bann ansien kapav servi Labib pou ankouraz zot.
14. Kifer Eli ti bizin led, ek kouma Zeova ti ed li?
14 Profet Eli ti sove parski Larenn Zezabel ti pe rod touy li. (1 Ler. 19:1-3) Eli ti panse ki zis li tousel ti pe servi Zeova kouma profet, ek li ti panse ki so travay ti dan vid. Eli ti telman dekouraze ki li ti anvi mor. (1 Ler. 19:4, 10) Me Zeova pa ti kondann Eli. Okontrer, Zeova ti rasir Eli ki li pa ti tousel, ki li ti kapav kont lor pwisans Zeova, ek ki li ti ankor ena boukou travay pou fer. Avek bonte, Zeova ti ekout Eli ek ti donn li bann nouvo responsabilite. (1 Ler. 19:11-16, 18) Ki leson nou aprann? Nou tou, sirtou bann ansien, bizin azir avek bonte anver troupo Zeova. Kan enn kikenn dir ki li ankoler ouswa li panse ki Zeova pa pou pardonn li, bann ansien pou ekout li kan li dir zot seki li resanti. Apre, zot pou esey rasir li ki Zeova kontan li.
KOUMA NOU BIZIN KONSIDER BANN MOUTON KI’NN PERDI?
15. Dapre Zan 6:39, kouma Zezi ti konsider bann mouton so Papa?
15 Kouma Zeova anvi ki nou konsider so bann mouton ki’nn perdi? Zezi finn donn nou enn lexanp dan sa domenn-la. Li ti kone ki Zeova bien kontan tou so bann mouton. Alor, li ti fer tou seki li kapav pou ed “bann brebi perdi pep Izrael” pou retourn ar Zeova. (Mat. 15:24; Lik 19:9, 10) Zezi, nou bon berze, ti fer tou seki li kapav pou ki li pa perdi okenn mouton Zeova.—Lir Zan 6:39.
16-17. Ki santiman bann ansien bizin ena kan zot ed enn mouton ki’nn perdi? (Get lankadre “ Seki enn Mouton Ki’nn Perdi Resanti.”)
16 Lapot Pol ti ankouraz bann ansien dan lasanble Efez pou imit lexanp Zezi. Li ti dir zot: “Zot bizin ed bann feb, ek zot bizin gard dan zot lespri bann parol Segner Zezi, kan limem li ti dir: ‘Ena plis lazwa kan done ki gagne.’” (Zist. 20:17, 35, NW) Sa verse-la montre ki bann ansien ena enn responsabilite bien inportan, setadir pran swin pep Zeova. Salvador, enn ansien dan Lespagn, dir: “Kan mo mazine ki kantite Zeova pran swin so bann mouton ki’nn perdi, sa motiv mwa pou fer tou seki mo kapav pou ed zot. Mo kone ki Zeova anvi ki mo pran zot swin.”
17 Tou bann frer ek ser inaktif ki mansione dan sa lartik-la finn revinn ver Zeova gras-a led ki zot finn gagne. Me azordi, ankor ena boukou ki anvi revinn ver Zeova. Dan prosin lartik, nou pou gete seki nou kapav fer pou ed zot retourn ar Zeova.
KANTIK 139 Mazinn Twa dan Lemond Nouvo
^ par. 5 Kifer sertin aret vinn renion mem si zot inn servi Zeova avek fidelite pandan plizir lane? Ki santiman Zeova ena pou zot? Sa lartik-la pou reponn sa bann kestion-la. Nou pou osi gete seki nou kapav aprann ar fason ki Zeova ti ed sertin parmi so bann serviter dan lepase, ki ti elwagn zot ar Li pandan enn tan.
^ par. 2 EXPRESION KI’NN EXPLIKE: Enn proklamater inaktif se enn kikenn ki pa finn donn enn rapor predikasion depi sis mwa ouswa plis. Kanmem sa, bann ki inaktif zot res nou bann frer ek ser, ek nou kontan zot.
^ par. 4 Sertin nom finn sanze.
^ par. 10 Ezekiel 34:11-16: “11 Ala seki Souverin Segner Zeova dir: ‘Ala mo la! Momem mo pou al rod mo bann mouton ek mo pou pran zot swin. 12 Mo pou pran swin mo bann mouton parey kouma enn berze ki’nn trouv so bann mouton ki’nn perdi ek ki donn zot manze. Mo pou al rod zot dan tou bann plas kot zot finn perdi zour kot ti ena boukou niaz ek kot ti fer bien nwar. 13 Mo pou tir zot parmi bann pep, parmi bann pei mo pou rasanble zot. Mo pou amenn zot dan zot pei ek mo pou donn zot manze dan bann montagn Izrael, kot bann ti larivier ek kot bann dimounn reste dan pei-la. 14 Mo pou donn zot manze dan enn bon patiraz, ek zot pou manz lerb ki trouv lor bann gran montagn Izrael. Laba, zot pou repoze dan enn bon patiraz, ek zot pou manz bann bon lerb ki trouv lor bann montagn Izrael.’ 15 ‘Momem mo pou nouri mo bann mouton, ek momem mo pou fer zot repoze,’ ala seki Souverin Segner Zeova dir. 16 ‘Mo pou al rod seki’nn perdi, ek mo pou re-amenn seki’nn al lwin. Mo pou met enn bandaz lor seki’nn blese, ek mo pou fortifie seki feb. Me bann ki gra ek for, mo pou detrir zot. Mo pou ziz zot ek mo pou donn zot pinision ki zot merite.’”
^ par. 10 Prosin lartik pou explik an detay kouma bann ansien kapav swiv sa trwa letap-la.
^ par. 61 DESKRIPSION ZIMAZ: Dan lepase, enn berze Izraelit ti trakase kan li ti perdi enn mouton. Li ti rod so mouton ek li ti ed li pou revinn dan so troupo. Azordi, bann berze spiritiel fer parey.
^ par. 65 DESKRIPSION ZIMAZ: Enn ser inaktif dan enn bis ek li pe get de Temwin bien zwaye ki pe fer prezantwar.
