1. Dan premie siek, ki kitsoz bann disip ti ankouraz enn lafoul dimounn pou fer?

ENN gran lafoul dimounn inn vinn Zerizalem. Zot sorti dan diferan pei ek zot koz diferan lang. Sa zour-la, enn kitsoz extraordiner arive! Sertin Zwif koumans koz dan lang sa bann dimounn-la. Sa lafoul dimounn la bien etone! Me seki pli extraordiner ankor se bann kitsoz ki sa bann Zwif-la ek lapot Pier pe dir. Bann dimounn aprann ki zot kapav gagn lavi sov si zot ena lafwa dan Zezi Kris. Sa mesaz-la tous zot leker. Zot telman kontan seki zot pe aprann ki zot demande: “Ki nou bizin fer?” Lerla, lapot Pier dir zot: “Ki sakenn parmi zot pran batem.”​—Zist. 2:37, 38, NW.

2. Ki nou pou examine dan sa lartik-la? (Get zimaz lor kouvertir.)

² Apre sa, enn lot kitsoz extraordiner arive! Apepre 3,000 dimounn pran batem sa zour-la ek zot vinn bann disip Zezi. Sa levennman-la ti koumansman gran travay predikasion ki Zezi ti donn lord so bann disip pou fer. Bann disip Zezi pe kontign fer sa travay-la azordi. Me dan nou lepok, enn kikenn pa kapav pran batem apre zis de-trwa konversasion ki nou’nn gagne avek li. Sa kapav pran plizir mwa ouswa plis ki enn-an avan ki enn etidian pran batem. Si to ena enn letid Labib, to kone ki sa demann boukou zefor pou ed enn kikenn pou vinn enn disip Zezi. Dan sa lartik-la, nou pou examine seki nou kapav fer pou ed nou etidian pou progrese ziska batem.

3. Dapre Matie 28:19, 20, ki kitsoz enn etidian bizin fer pou progrese ziska batem?

³ Avan ki enn etidian pran batem, li bizin met an pratik seki li pe aprann dan Labib. (Lir Matie 28:19, 20.) Kan enn etidian aplik seki li pe aprann, li pou koumadir sa zom dan lexanp Zezi, ki ti fouy enn transe bien fon pou ki li kapav mont so lakaz lor enn fondasion solid. (Mat. 7:24, 25; Lik 6:47, 48) Kouma nou kapav ed enn etidian pou met an pratik seki li pe aprann? Anou get trwa kitsoz ki nou kapav fer.

4. Kouma nou kapav ed enn etidian pou ki li kontign progrese ziska batem? (Get lankadre “ Ed To Etidian pou Fixe Bann Lobzektif ek pou Realiz Zot.”)

⁴ Ed to etidian pou fixe bann lobzektif. Kifer to bizin fer sa? Anou pran enn lexanp: Si to pou roule pou al dan enn landrwa ki bien lwin, kitfwa to pou anvi aret de-trwa zoli plas lor larout-la, koumsa larout-la pou paret mwin long. Dan mem fason, kan enn etidian fixe bann ti lobzektif ek li realiz zot, li pou trouve ki li pa difisil pou li fixe lobzektif pou pran batem. Dan liv Viv Ere pou Touletan!, to kapav servi lankadre “Mo Lobzektif” pou ed to etidian pou fer bann progre. Alafin sak leson, demann to etidian kouma sa lobzektif-la kapav ed li pou met an pratik seki li’nn fek aprann. Si to anvi ki to etidian realiz enn lot lobzektif, to kapav ekrir li dan lespas “Lezot Lobzektif.” To kapav reget sa lankadre-la souvan avek to etidian pou koz lor so bann lobzektif.

5. Dan Mark 10:17-22, ki kitsoz Zezi ti demann sa zom ris la pou fer, ek kifer?

⁵ Ed to etidian pou li fer bann sanzman dan so lavi. (Lir Mark 10:17-22.) Zezi ti kone ki sa ti pou difisil pou ki enn zom ris  vann tou so bann dibien. (Mark 10:23) Kanmem sa, Zezi ti demann sa zom-la pou fer sa gran sanzman-la dan so lavi. Kifer? Parski Zezi ti kontan li. Parfwa, li kapav arive ki nou pa ankouraz nou etidian pou aplik seki li pe aprann, parski nou panse ki li pankor pare pou fer bann sanzman ki bizin. Sa kapav pran letan avan ki enn dimounn aret so bann move labitid ek met nouvo personalite lor li. (Kol. 3:9, 10, NW) Me pli vit to koz ar to etidian lor bann sanzman ki li bizin fer, pli vit li pou kapav koumans fer sa bann sanzman-la. Kan to gagn sa kalite konversasion-la avek to etidian, to montre ki to kontan li.​—Ps. 141:5, NW; Prov. 27:17.

6. Kifer nou bizin demann nou etidian so lopinion?

⁶ Li bien inportan ki nou demann nou etidian so lopinion lor enn size. Koumsa, nou pou kapav kone dan ki kitsoz li krwar ek osi seki li’nn konpran lor enn size. Si to fer sa souvan, li pou pli fasil pou to koz avek li lor bann size ki anbarasan. Dan liv Viv Ere pou Touletan!, ena boukou kestion pou konn lopinion bann etidian. Par exanp, leson 04 demande: “Dapre ou, ki Zeova resanti kan ou servi so nom?” Leson 09 demande: “Pou ki kitsoz ou ti pou kontan priye?” O-koumansman, kitfwa to etidian pou pran inpe letan pou li donn so lopinion. Me to kapav ed li kan to fer li reflesi lor bann verse Labib ek lor bann zimaz.

7. Kouma to kapav servi bann lexanp modern dan enn fason efikas?

⁷ Kan to etidian inn konpran seki li bizin fer, to kapav servi bann lexanp modern pou ankouraz li. Par exanp, si to etidian pe gagn difikilte pou asiste bann renion, to kapav servi video Zeova Inn Pran Mwa Bien Swin, ki trouv dan seksion “Dekouver,” dan leson 14. Dan boukou leson dan liv Viv Ere pou Touletan!, to pou trouv bann lexanp koumsa dan seksion “Anou Get Inpe Plis” ouswa dan seksion “Dekouver.” * Selman, fer atansion ki to pa konpar to etidian avek bann dimounn ki dan sa bann video-la, ek to dir li: “Si li’nn kapav fer sa, twa osi to pou kapav.” Les to etidian tir so prop konklizion. Koz lor bann kitsoz presi ki’nn ed sa dimounn dan video la pou aplik bann prinsip Labib. Kitfwa to kapav atir so latansion lor enn verse inportan ouswa lor enn kitsoz pratik ki sa dimounn-la inn fer. Montre li osi kouma Zeova inn ed sa dimounn-la.

8. Kouma nou kapav ed nou etidian pou kontan Zeova?

⁸ Ed to etidian pou kontan Zeova. Kouma to kapav fer sa? Rod bann lokazion pou atir latansion to etidian lor bann kalite ki Zeova ena. Ed to etidian pou li trouv Zeova kouma enn Bondie ki ere ek ki soutenir bann dimounn ki kontan Li. (1 Tim. 1:11, NW; Ebre 11:6) Explik to etidian ki li pou gagn bann benediksion si li aplik seki li pe aprann, ek explik li ki sa bann benediksion-la montre ki Zeova kontan li. (Iza. 48:17, 18) Plis to etidian ogmant so lamour pou Zeova, plis li pou anvi fer bann sanzman ki bizin.​—1 Zan 5:3.

9. Dapre Mark 10:29, 30, ki kitsoz kapav ed enn kikenn pou li fer bann sakrifis ki bizin pou li kapav pran batem?

⁹ Pou ki li progrese ziska batem, enn etidian Labib bizin fer bann sakrifis.  Parey kouma sa zom ris dan lexanp Zezi la, sertin etidian Labib kitfwa pou bizin abandonn sertin kitsoz materyel. Ouswa si zot fer enn travay ki pa an-akor avek bann prinsip Labib, kitfwa zot pou bizin sanz travay. Kitfwa zot pou bizin osi aret frekant zot bann kamarad ki pa kontan Zeova. Sertin etidian Labib ena bann fami ki pa kontan bann Temwin Zeova, ek kitfwa bann-la pou abandonn li akoz sa. Zezi ti dir ki sertin dimounn ti pou trouv sa difisil pou fer sa bann kalite sakrifis-la. Me li’nn promet ki sa bann sakrifis-la pa pou dan vid, parski Zeova pou donn zot enn gran fami spiritiel ki kontan zot. (Lir Mark 10:29, 30.) Kouma to kapav ed to etidian pou gagn bann bienfe gras-a sa gran fami spiritiel la?

10. Ki nou kapav aprann ar lexanp Manuel?

¹⁰ Fer kamarad avek to etidian. Li bien inportan ki to montre to etidian ki to gagn so traka. Kifer? Manuel, ki res Mexik, explike kouma so ansegnan ti ed li kan li ti pe etidie Labib. Li dir: “Avan sak letid, mo ansegnan ti pran mo nouvel. Li ti met mwa alez, ek mo ti kapav koz lor ninport ki size avek li. Mo ti trouve ki li ti vremem gagn mo traka.”

11. Ki bienfe nou etidian Labib pou gagn si li pas letan avek nou?

¹¹ Parey kouma Zezi ti pas letan avek so bann disip, to bizin pas letan avek to etidian. (Zan 3:22) Si to etidian Labib pe fer bann sanzman dan so lavi, kitfwa to kapav invit li kot twa pou bwar enn kitsoz, pou pran enn repa, ouswa pou get enn emision Program Televizion JW. To etidian kitfwa pou bien apresie ki to invit li kan so fami ek so bann kamarad pe selebre enn fet relizie. Koumsa, li pa pou santi li tousel sa zour-la. Kazibwe, ki res Ouganda, dir: “Mo’nn aprann boukou kitsoz lor Zeova dan mo letid. Me mo’nn osi aprann boukou kitsoz lor Zeova kan mo’nn pas letan ar mo ansegnan. Mo’nn  trouve ki kantite Zeova pran swin so pep, ek osi kouma zot ere. Se samem ki mo ti anvi dan mo lavi.”

12. Kan nou fer letid avek enn kikenn, kifer nou bizin invit diferan proklamater pou asiste letid?

¹² Invit diferan proklamater pou asiste letid. Parfwa, nou kapav trouv sa pli fasil pou al fer enn letid tousel ouswa pou amenn mem proklamater avek nou. Me mem si li pli fasil pou fer sa, nou etidian pou tir plis profi si nou amenn diferan proklamater avek nou. Dmitrii, ki res Moldavi, dir: “Sak proklamater ki ti asiste mo letid ti ena so prop fason pou explik bann kitsoz. Sa ti ed mwa pou trouve kouma mo kapav aplik seki mo ti pe aprann dan diferan fason. Mo ti deza konn boukou frer ek ser, alor mo ti santi mwa alez kan mo ti asiste renion pou premie fwa.”

13. Kifer nou bizin ed nou etidian Labib pou asiste bann renion?

¹³ Ed to etidian pou asiste bann renion. Kifer nou bizin fer sa? Parski Zeova inn donn lord so bann serviter pou zot zwenn ansam. Sa form parti nou ladorasion. (Ebre 10:24, 25) Anplis, nou bann frer ek ser dan lasanble, zot nou fami spiritiel. Kan nou asiste renion ansam avek zot, se koumadir nou pe manz enn bon manze ansam. Kan to ed to etidian pou asiste bann renion, to pe ed li pou fer enn kitsoz inportan ki pou ed li pou progrese ziska batem. Me kitfwa li kapav trouv sa difisil pou koumans asiste bann renion. Kouma liv Viv Ere pou Touletan! kapav ed to etidian pou sirmont ninport ki difikilte ki pe anpes li asiste renion?

14. Kouma nou kapav ankouraz nou etidian pou asiste bann renion?

¹⁴ To kapav servi leson 10 dan liv Viv Ere pou Touletan! pou ankouraz to etidian pou asiste bann renion. Avan ki sa liv-la sorti, inn demann sertin proklamater pou servi sa leson-la avek zot bann etidian, ek zot dir ki sa leson-la ti ed zot bann etidian pou asiste bann renion. Biensir, fode pa ki to atann ki zot ariv dan leson 10 pou to invit to etidian pou vinn renion. Invit li pli vit posib, ek kontign invit li regilierman. Tou bann etidian Labib pena mem problem. Alor, get bien ki problem to etidian ena ek ed li dan enn fason pratik. Fode pa to dekouraze si li pran letan pou asiste bann renion. To bizin ena pasians, me to bizin kontign invit li.

15. Sit sertin laper ki nou etidian kapav ena.

¹⁵ Eski to ti inpe per pou vinn enn Temwin Zeova? Kitfwa to ti panse ki zame to ti pou kapav prese lakaz-lakaz. Ouswa, kitfwa to ti per tansion to fami ouswa to bann kamarad opoz ar twa. Si to’nn pas par sa bann sitiasion-la, to kapav konpran seki to etidian pe resanti. Zezi ti dir ki sertin dimounn ti pou ena sa bann laper-la. Selman, li ti ankouraz so bann disip pou pa les laper anpes zot servi Zeova. (Mat. 10:16, 17, 27, 28, NW) Kouma Zezi ti ed so bann disip pou sirmont zot bann laper? Ek kouma nou kapav swiv so lexanp?

16. Kouma nou kapav form nou etidian pou li partaz seki li pe aprann avek lezot?

¹⁶ Tigit-tigit, form to etidian pou li partaz seki li pe aprann avek lezot. Bann disip Zezi kitfwa ti inpe strese kan Zezi ti avoy zot prese. Me Zezi ti ed zot kan li ti dir zot kotsa zot bizin prese ek ki kitsoz  zot bizin dir. (Mat. 10:5-7) Kouma to kapav imit lexanp Zezi? Ed to etidian pou trouv bann lokazion kot li kapav prese. Par exanp, demann li si li konn enn kikenn ki ti pou kontan aprann seki Labib dir lor enn size presi. Lerla, ed li pou prepar seki li bizin dir ek montre li kouma li kapav fer sa dan enn fason sinp. Si posib, servi seki ena dan seksion “Sertin Dimounn Dir” ek seksion “Sertin Kapav Demande,” ki trouv dan liv Viv Ere pou Touletan!, pou fer bann seans lexersis avek to etidian. Kan to fer sa, form to etidian pou li servi Labib, pou ki li kapav reponn avek takt ek dan enn fason ki sinp.

17. Kouma nou kapav servi Matie 10:19, 20, 29-31 pou ed nou etidian pou ena konfians an Zeova?

¹⁷ Ed to etidian pou ena konfians an Zeova. Zezi ti dir so bann disip ki Zeova ti pou ed zot parski Li kontan zot. (Lir Matie 10:19, 20, 29-31.) Twa osi, rapel to etidian ki Zeova pou ed li. To kapav ed li pou ena konfians an Zeova kan to priye ansam avek li konsernan so bann lobzektif. Franciszek, ki res Pologn, dir: “Mo ansegnan souvan ti mansionn mo bann lobzektif dan so bann lapriyer. Kan mo ti trouve kouma Zeova ti reponn so bann lapriyer, deswit mo ti koumans priye. Mo ti trouv lame Zeova kan mo ti bizin pran konze pou asiste bann renion ek lasanble.”

18. Ki Zeova resanti konsernan travay lansegnman ki bann Kretien fer?

¹⁸ Zeova vremem gagn traka nou bann etidian Labib. Li kontan bann ansegnan ki fer boukou zefor pou ed zot etidian pou vinn pros avek Li, ek Li bien apresie zot travay. (Iza. 52:7) Si to pena enn letid Labib pou linstan, to kapav ed bann etidian Labib pou progrese ziska batem kan to akonpagn lezot proklamater pou al fer letid.