1. Kifer nou kapav konpar Satan ar enn saser?

LOBZEKTIF enn saser se pou may ouswa touy enn zanimo. Li kapav servi diferan piez, parey kouma piez ki mansione dan liv Zob. (Zob 18:8-10) Kouma enn saser atir enn zanimo dan so piez? Li etidie zanimo-la. Kotsa li ale? Ki kitsoz interes li? Ki meyer piez li kapav servi pou may zanimo-la? Satan parey kouma sa saser-la. Li etidie nou. Li veye kotsa nou ale ek ki kitsoz interes nou. Apre sa, li swazir enn piez ki kapav may nou san ki nou atann. Selman, Labib rasir nou ki, mem si nou tom dan piez Satan, nou kapav sorti ladan. Labib ansegn nou osi kouma nou kapav fer sir ki nou pa tom dan bann piez Satan.

2. Sit de piez bien efikas ki Satan servi.

² De piez bien efikas ki Satan servi se lorgey ek lanvi exazere pou gagn plis. * Depi plizir milye lane, Satan pe reisi may plizir dimounn gras-a sa de vilin defo-la. Satan parey kouma enn “kikenn ki may zwazo,” ki atir zot dan so piez ouswa ki may zot avek enn file. (Ps. 91:3) Me nou kapav anpes Satan may nou, parski Zeova inn explik nou bann taktik ki Satan servi.​—2 Kor. 2:11.

3. Dan Labib, kifer Zeova inn fer ekrir lexanp bann dimounn ki ti vinn orgeye ouswa ki ti ena enn lanvi exazere?

³ Zeova montre nou ki lorgey ek lanvi bien danzere, kan Li explik nou seki’nn ariv sertin parmi so bann serviter. Koumsa, nou kapav evit fer bann mem erer ki zot. Dan bann lexanp ki nou pou examine dan sa lartik-la, nou pou trouve kouma Satan ti mem reisi may bann dimounn ki ti pe servi Zeova depi bien lontan. Me eski savedir ki nou pa kapav fer nanye ek ki nou oblize tom dan piez Satan?  Non. Zeova inn fer ekrir sa bann lexanp-la dan Labib “pou averti nou.” (1 Kor. 10:11) Li kone ki nou kapav tir bann leson ar sa bann lexanp-la, pou nou pa tom dan piez Satan.

4. Ki kapav ariv nou si nou orgeye?

⁴ Satan anvi ki nou vinn orgeye. Li kone ki si nou vinn orgeye, nou pou vinn parey kouma li ek nou pa pou gagn lavi eternel. (Prov. 16:18) Akoz sa, lapot Pol ti explike ki enn kikenn bizin fer bien atansion, parski “lorgey kapav mont dan so latet e li fini kouma diab.” (1 Tim. 3:6, 7) Sa kapav ariv nou tou, ki nou nouvo ouswa lontan dan laverite.

5. Dapre Ekleziast 7:16, 20, kouma enn kikenn montre ki li orgeye?

⁵ Bann dimounn ki orgeye, zot egois osi. Satan anvi ki nou plis interese ar noumem olie ki nou interese ar Zeova, sirtou kan nou gagn bann difikilte. Par exanp, eski enn kikenn inn fer enn fos lakizasion lor twa? Ouswa eski enn kikenn inn tret twa dan enn fason inzis? Satan ti pou bien kontan ki to ankoler ar Zeova ek ar to bann frer ek ser. Li anvi ki to panse ki, sel fason ki to kapav rezoud to problem, se ki to fer par to prop latet olie ki to swiv bann konsey ki Zeova donn twa dan Labib.​—Lir Ekleziast 7:16, 20. *

6. Ki nou kapav aprann ar lexanp enn ser ki res Oland?

⁶ Anou get lexanp enn ser ki res Oland. Li ti bien agase ar defo bann frer ek ser so lasanble, ek li ti nepli anvi frekant zot. Li dir: “Mo ti santi mwa tousel ek mo pa ti kapav sanz mo latitid anver zot. Alor, mo ti dir mo misie ki nou ti bizin sanz lasanble.” Apre sa, ser-la ti get Program Televizion JW pou mwa Mars 2016. Sa program-la ti donn bann  sigzesion lor kouma nou kapav fer fas ar defo lezot. Ser-la dir: “Mo’nn konpran ki mo bizin ena limilite ek konsantre lor mo prop defo, olie ki mo esey sanz bann frer ek ser dan lasanble. Sa program-la ti ed mwa pou konsantre mo latansion lor Zeova ek lor so souverennte.” Ki leson nou aprann? Kan to fer fas ar enn difikilte, konsantre to latansion lor Zeova. Demann Li pou ed twa pou trouv lezot parey kouma Li Li trouv zot. Zeova trouv zot bann erer, pourtan Li dispoze pou pardonn zot. Li anvi ki to fer parey kouma Li.​—1 Zan 4:20.

7. Ki ti ariv Lerwa Ozias?

⁷ Lerwa Ozias ti vinn orgeye, li pa ti ekout konsey lezot, ek li ti fer enn kitsoz ki li pa ti sipoze fer. Ozias ti ena boukou kapasite. Li ti gagn boukou lager, li ti aranz boukou lavil, ek li ti ena boukou laferm. “Vre Bondie ti fer li prospere.” (2 Kro. 26:3-7, 10) Me Labib dir: “Me, deswit kouma li ti vinn for, so leker ti ranpli ar lorgey ziska ki sa inn fini li net.” Dapre lalwa Zeova, zis bann pret ti kapav bril lansan dan tanp. Me Ozias ti fer enn kitsoz ki li pa ti gagn drwa fer. Li ti rant dan tanp pou al bril lansan. Zeova ti ankoler, ek Li ti fer sa zom orgeye la gagn lalep. Ozias ti res avek sa lalep-la ziska so lamor.​—2 Kro. 26:16-21.

8. Kan nou swiv konsey ki ena dan 1 Korintien 4:6, 7, kouma sa kapav ed nou pou rezet lorgey?

⁸ Eski li kapav arive ki nou vinn orgeye ek ki nou fer enn pese, parey kouma Ozias? Anou get lexanp José. Li ti enn gran biznesmenn ek li ti enn ansien ki bann frer ek ser ti bien respekte. Li ti fer bann diskour pou lasanble sirkonskripsion ek rezional, ek bann responsab sirkonskripsion ti mem al get li kan zot ti bizin bann konsey. José dir: “Mo ti kont lor mo prop kapasite ek mo lexperyans. Mo pa ti kont lor Zeova. Mo ti panse ki mo ti for, alor mo pa ti ekout bann lavertisman ek bann konsey Zeova.” José ti fer enn pese bien grav ek li ti exkli. Sa fer plizir lane asterla ki li’nn reintegre, ek li dir: “Zeova inn ansegn mwa ki, seki pli inportan, se pa ena enn tit, me se obeir Li.” Fode pa nou bliye ki, ninport ki kapasite nou ena ek ninport ki responsabilite  nou ena dan lasanble, se Zeova ki donn nou sa. (Lir 1 Korintien 4:6, 7.) Si nou orgeye, Zeova pa pou servi nou.

9. Parski zot ti ena enn lavi exazere, ki kitsoz Satan ek Ev ti fer?

⁹ Kan nou pans lanvi exazere, sirman nou pans Satan Lediab. Satan ti enn parmi bann anz Zeova, alor sirman li ti ena bann gran responsabilite. Me Satan ti anvi gagn plis. Li ti anvi ki bann dimounn ador li, alor ki se zis Zeova tousel ki ena drwa gagn sa ladorasion-la. Satan anvi ki nou vinn parey kouma li, alor li ankouraz nou pou gagn plis ki seki nou ena. Premie fwa ki li ti esey fer sa, se kan li ti koz avek Ev. Zeova ti donn Ev ek so mari enn kantite bon manze pou manze. Zot ti kapav manz “frwi tou bann pie ki ena dan zardin,” exsepte frwi enn sel pie. (Zen. 2:16) Kanmem sa, Satan ti reisi konvink Ev ki li ti bizin manz frwi sa pie-la. Ev pa ti kontant li ar seki li ti ena; li ti anvi gagn plis. Ek nou kone ki ti arive apre. Ev ti fer pese ek akoz sa li’nn mor.​—Zen. 3:6, 19.

10. Ki ti arive kan Lerwa David ti les lanvi dominn li?

¹⁰ Lerwa David ti les lanvi dominn li. Akoz sa, li ti bliye tou seki Zeova ti donn li, bann kitsoz kouma larises, laglwar, ek laviktwar lor so bann lennmi. David ti rekonet ki bann kado Bondie, “zot vremem boukou!” (Ps. 40:5) Me ariv enn moman, David ti bliye seki Zeova ti donn li. Li ti nepli satisfe ar seki li ti ena; li ti anvi gagn plis. Mem si David ti ena boukou madam, li ti les enn move dezir grandi dan so leker ek li ti anvi gagn madam so kamarad. Sa madam-la ti apel Betsabe. So mari ti enn Itit ek li ti apel Uri. David ti azir dan enn fason egois, ek li ti gagn relasion sexiel avek Betsabe. Plitar, Betsabe ti tom ansint. David ti azir dan enn move fason, me apre sa li ti fer pli pir ankor. Li ti fer touy Uri! (2 Sam. 11:2-15) Kifer David ti azir koumsa? Eski li ti panse ki Zeova pa ti pou trouv li? Mem si David ti pe servi Zeova depi bien lontan, li ti les lanvi dominn li, ek akoz sa li ti bien soufer. Erezman, David ti rekonet so erer ek li ti repanti. Sirman li ti  bien rekonesan ki Zeova ti pardonn li!​—2 Sam. 12:7-13.

11. Dapre Efezien 5:3, 4, ki kitsoz kapav ed nou pou rezet lanvi?

¹¹ Ki nou kapav aprann ar lexanp David? Nou aprann ki nou kapav rezet lanvi si nou kontign ena rekonesans pou tou seki Zeova donn nou. (Lir Efezien 5:3, 4.) Nou bizin satisfe ar seki nou ena. Kan nou etidie Labib avek enn kikenn, nou kapav ankouraz li pou reflesi lor enn benediksion ki Zeova inn donn li, ek pou remersie Zeova pou sa. Si li fer sa sak zour pandan enn semenn, savedir ki li’nn priye Zeova pou set diferan kitsoz. (1 Tes. 5:18) Eski twa osi to fer sa? Si to medit lor tou seki Zeova inn fer pou twa, to pou rekonesan anver Li. Ek kan to rekonesan anver Zeova, to pou satisfe ar seki to ena. Kan to satisfe ar seki to ena, to pa pou rod bann kitsoz ki to pena.

12. Ki kitsoz Zida Iskaryot ti fer parski li ti les lanvi dominn li?

¹² Zida Iskaryot ti les lanvi dominn li ek akoz sa, li ti trayir Zezi. O-koumansman, Zida pa ti enn move dimounn. (Lik 6:13, 16) Zezi ti swazir Zida pou vinn enn parmi so bann zapot. Zezi ti ena konfians an Zida, parski Zida ti responsab lakes bann disip. Zezi ek bann zapot ti servi kas ki ti ena dan sa lakes-la pou bann depans ki zot ti bizin fer pou zot laktivite predikasion. Sa kas-la ti koumadir bann kontribision ki nou bann frer ek ser dan lemond antie fer azordi pou nou laktivite predikasion. Me ariv enn moman, Zida ti koumans kokin dan lakes, mem si plizir fwa li ti tann Zezi donn bann lavertisman konsernan lanvi. (Mark 7:22, 23; Lik 11:39; 12:15) Zida pa ti pran kont sa bann lavertisman-la.

13. Dan ki sitiasion Zida ti montre ki lanvi ti fini koumans dominn li?

¹³ Inpe avan lamor Zezi, Zida ti montre ki lanvi ti fini koumans dominn li. Simon, enn zom ki ti ena lalep avan, ti invit Zezi ek so bann disip pou pran enn repa kot li. Li ti osi invit Mari ek Mart. Ariv enn moman, Mari ti vers enn delwil parfime bien ser lor latet Zezi. Zida ek bann lezot disip ti ankoler. Bann lezot disip kitfwa ti panse ki ti kapav servi sa kas-la pou zot laktivite predikasion. Me Zida ti ankoler pou enn lot rezon. Li ‘ti enn voler’ ek li ti anvi kokin kas dan lakes. Inpe apre, Zida ti trayir Zezi pou enn som larzan.​—Zan 12:2-6; Mat. 26:6-16; Lik 22:3-6.

14. Kouma enn koup inn met an pratik konsey ki ena dan Lik 16:13?

¹⁴ Zezi ti rapel so bann disip enn lansegnman bien inportan: “Zot pa kapav vinn esklav Bondie ek Larzan toulede.” (Lir Lik 16:13, NW. *) Sa lansegnman-la ankor ena valer azordi. Par exanp, anou gete kouma enn koup dan Roumani ti met an pratik sa konsey-la. Zot ti gagn enn travay part-time dan enn lot pei, ek sa ti kapav fer zot gagn pli boukou kas. Sa koup-la dir: “Nou ti ena enn gro loan pou peye, alor nou ti panse ki sa travay-la ti enn benediksion Zeova.” Selman, ti ena enn problem. Sa travay-la pa ti pou permet zot kontign zot servis. Apre ki zot ti lir lartik “Anou garde nou fidelité avek enn leker entier,” dan Latour Degard 1^e Out 2008, zot ti pran zot desizion. Zot dir: “Si nou ti al dan enn lot pei, kot pli difisil  pou servi Zeova, pou gagn pli boukou kas, sa ti pou montre ki nou relasion avek Zeova pa ti nou priorite. Nou ti sir ki sa ti pou gat nou lamitie avek Zeova.” Alor, sa koup-la ti refiz travay-la. Ki ti arive apre? Misie-la ti gagn enn travay dan so pei mem, ek so lapey ti ase pou tou seki zot ti bizin. Madam-la dir: “Lame Zeova zame tro kourt.” Sa koup-la bien kontan ki zot inn swazir Zeova kouma zot Met, olie ki zot inn swazir larzan.

15. Kifer nou sir ki nou kapav sorti dan bann piez Satan?

¹⁵ Ki nou bizin fer si nou trouve ki nou’nn koumans vinn orgeye ouswa ki nou’nn koumans ena enn lanvi exazere pou gagn plis? Nou kapav sorti dan sa bann piez-la! Pol ti explike ki bann dimounn ki Satan “finn maye” ankor kapav sorti dan piez Satan. (2 Tim. 2:26) Se seki ti ariv David. Li ti ekout bann konsey ki Natan ti donn li, li ti repanti, ek li ti fer tou pou regagn enn bon lamitie avek Zeova. Pa bliye, Zeova pli for ki Satan. Alor, si nou aksepte led Zeova, nou kapav sorti dan ninport ki piez Satan.

16. Ki kitsoz pou ed nou pou evit bann piez Satan?

¹⁶ Biensir, li pou pli bon si nou pa les lorgey ek lanvi dominn nou. Ek nou kapav fer sa zis avek led Zeova. Fode zame nou panse ki nou for, ek ki zame nou pa pou tom dan sa bann piez-la! Mem bann dimounn ki’nn servi Zeova depi plizir lane, inn tom dan sa bann piez-la. Alor, sipliy Zeova toulezour pou ki Li ed twa pou trouve si sa bann defo-la inn koumans inflians to fason panse ek to bann aksion. (Ps. 139:23, 24) Fode zame to les lorgey ek lanvi dominn twa!

17. Ki pou ariv Satan biento?

¹⁷ Sa fer plizir milye lane ki Satan pe azir kouma enn saser. Me biento, Zezi pou atas Satan ek pou detrir li. (Rev. 20:1-3, 10) Nou atann sa zour-la avek inpasians, pa vre! Me ziska ki sa zour-la arive, kontign evit bann piez Satan. Fer zefor pou anpes lorgey ek lanvi dominn twa. Ek kontign “reziste diab e li pou sove, al lwin ar [twa].”​—Zak 4:7.