BOUKOU dimounn kone ki Zezi ti mor lor enn poto ek ki li ti ant de kriminel. (Mat. 27:35-38, NW) Selman, boukou dimounn panse ki Labib pa exakt kan li dir ki ti prepar lekor Zezi apre so lamor ek ki ti met li dan enn tom.​—Mark 15:42-46.

Sertin exper, ki kritik bann Levanzil, panse ki pa ti kapav anter dan enn fason dign, kouma par exanp, dan enn tom, enn kikenn ki ti mor lor enn poto. Okontrer, zot panse ki ti azir dan enn lot fason ar bann kriminel ki ti mor lor enn poto. Enn zournalis, ki apel Ariel Sabar, ek ki ekrir dan magazinn Smithsonian, explike kifer sa bann dimounn-la pans koumsa. Li dir: “Pou pini bann pir kriminel dan lasosiete, bann lotorite ti krisifie zot. Bann exper dir ki li pa lozik pou panse ki bann Romin ti pou donn sa bann kalite dimounn-la enn lanterman ki dign.” Bann Romin ti kontan imilie bann kriminel. Alor, zot ti les lekor sa bann kriminel-la lor poto, pou ki bann zanimo sovaz manz zot. Apre sa, zot ti zet bann bout lekor ki ti reste dan bann tom piblik.

Selman, bann arkeolog inn dekouver enn kitsoz lor sertin Zwif ki bann Romin ti koulout lor enn poto. An 1968, zot ti dekouver lezo enn zom ki ti mor dan lepok Zezi. Zot ti dekouver sa bann lezo-la dan tom enn fami Zwif dan Zerizalem. Sa bann lezo-la ti dan enn ossuaire, setadir enn bwat lezo. Parmi sa bann lezo-la, ti ena enn lezo talon ki ti kouloute lor enn bout dibwa avek enn koulou 11.5 santimet. Sabar dir: “Sa talon-la ti pou enn zom ki ti apel Yehochanan . . . ek sa ti enn prev ki, seki bann Levanzil dir konsernan lekor Zezi, ki ti dan enn tom, kitfwa ti vre.” Alor, “talon Yehochanan ti montre ki, dan lepok Zezi, bann Romin ti permet ki anter dan enn fason dign, enn Zwif ki ti mor lor enn poto.”

Apre ki zot inn dekouver lezo talon Yehochanan, bann dimounn finn ena diferan lopinion konsernan pozision Zezi kan li ti lor poto. Selman, li kler ki ti anter sertin kriminel dan enn fason dign, ek ki pa ti zis zet zot dan enn tom piblik. Alor, parski ena enn prev ki montre sa, nou kapav ena konfians dan Labib kan li dir ki ti met lekor Zezi dan enn tom.

Me pli inportan, Zeova ti predir ki ti pou met lekor Zezi dan tom enn zom ris, ek personn pa kapav anpes parol Zeova realize.​—Iza. 53:9; 55:11.