1. Dapre 1 Pier 5:2, ki travay inportan bann ansien bizin fer?

 ZEOVA inn donn bann ansien responsabilite pou pran swin so bann serviter. Bann ansien bien rekonesan anver Zeova parski Li fer zot konfians pou fer sa travay-la. Akoz sa, zot fer boukou zefor pou vinn bann ‘bann berze ki vremem pran nou swin.’ (Zer. 23:4; lir 1 Pier 5:2.) Nou bien rekonesan ki nou ena bann zom koumsa dan nou lasanble, pa vre!

2. Ki difikilte sertin ansien kapav gagne?

² Bann ansien kapav gagn boukou difikilte pou asim zot bann responsabilite. Enn premie difikilte ki zot kapav gagne, se ki ena boukou travay pou fer dan enn lasanble. Tony, enn ansien ki res Letazini, inn trouve ki li bizin ena modesti. Kifer? Parski li ti pe aksepte tro boukou responsabilite. Li dir: “Dan koumansman pandemi COVID-19, mo ti aksepte plis responsabilite pou organiz bann renion ek predikasion. Me plis mo ti pe fer bann travay-la, plis ti ena ankor pou fer. Mo ti telman okipe ki mo pa ti ena ase letan pou lir Labib, pou etidie, ek pou priye Zeova.” Ilir, enn ansien ki res Kosovo, ti gagn enn lot difikilte. Kan li ti dan enn landrwa kot ti ena lager, li ti gagn difikilte pou obeir bann instriksion ki li ti gagne ar lorganizasion. Li dir: “Kan biro nasional ti donn mwa responsabilite pou al ed bann frer ek ser ki res dan enn landrwa bien danzere, sa ti teste mo kouraz. Mo ti gagn per, ek bann instriksion ki mo ti gagne pa ti paret lozik.” Tim, enn misioner ki res Lazi, ti gagn difikilte pou fer tou seki li ti ena pou fer toulezour. Li dir: “Parfwa, mo ti santi mwa tro fatige pou pran swin bann frer ek ser.” Ki kitsoz kapav ed bann ansien si zot pe fer fas ar bann sitiasion koumsa?

3. Kouma nou tou nou kapav tir bann leson ar lexanp Zedeon?

³ Bann ansien kapav aprann bann zoli leson ar lexanp Zedeon. (Ebre 6:12; 11:32) Zedeon ti gid ek protez pep Bondie.  (Ziz 2:16; 1 Kro. 17:6) Parey kouma Zedeon, Zeova inn donn bann ansien responsabilite pou pran swin so bann serviter pandan enn lepok bien difisil. (Zist. 20:28; 2 Tim. 3:1) Nou kapav tir bann leson ar lexanp Zedeon, parski li ti obeir Zeova, li ti ena modesti, ek li ti ena limilite. Anplis, li ti bizin ena landirans pou asim so bann responsabilite. Mem si nou enn ansien ouswa non, nou tou nou kapav ena plis rekonesans pou nou bann ansien. Nou kapav soutenir sa bann frer ki pe travay bien dir pou okip lasanble la.​—Ebre 13:17.

4. Kouma Zedeon ti montre ki li ti ena modesti ek limilite?

⁴ Zedeon ti enn zom ki ti ena modesti ek limilite. b Bann Madianit ti pe dominn lor bann Izraelit, ek kan enn anz ti dir Zedeon ki Zeova ti swazir li pou sap bann Izraelit, li ti dir: “Mo fami pli tipti fami ki ena dan Manase, ek mwa, momem ki pli tipti dan lakaz mo papa.” (Ziz 6:15) Zedeon ti panse ki li pa ti pou kapav asim sa responsabilite-la. Me Zeova ti kone ki li ti pou kapav fer li. Avek led Zeova, Zedeon ti reisi asim responsabilite-la.

5. Kan eski enn ansien kapav gagn difikilte pou ena limilite ek modesti?

⁵ Bann ansien fer zot maximum pou ena modesti ek limilite. (Mish. 6:8; Zist. 20:18, 19) Zot pa fer vantar kan zot reisi fer enn kitsoz, ek zot pa panse ki zot pa vo nanye kan zot fer bann erer. Me parfwa, enn ansien kapav gagn difikilte pou ena modesti ek limilite. Par exanp, li kapav aksepte plizir responsabilite ek li gagn difikilte pou asim zot. Ouswa li kapav gagn difikilte pou ena limilite ek modesti, kan lezot felisit li ouswa kritik li pou bann kitsoz ki li’nn fer. Ki kitsoz bann ansien kapav aprann ar lexanp Zedeon kan bann sitiasion koumsa arive?

6. Ki kitsoz bann ansien kapav aprann lor modesti gras-a lexanp Zedeon? (Get zimaz osi.)

⁶ Demann lezot pou ed twa. Enn kikenn ki ena modesti, se enn kikenn ki konn so bann limit. Zedeon ti montre ki li ti ena modesti parski li ti demann lezot pou ed li. (Ziz 6:27, 35; 7:24) Bann ansien ki ena sazes fer parey. Tony, ki nou ti mansione  taler-la, dir: “Akoz fason ki’nn elve mwa, souvan mo ti aksepte pou fer plis ki seki mo kapav fer. Alor, dan nou ladorasion an fami, nou ti etidie lor modesti ek mo ti demann mo madam seki li ti panse. Mo ti osi get video Donn Formasion, Fer Konfians ek Donn Pouvwar Lezot Parey Kouma Zezi Ti Fer, ki trouv lor jw.org.” Lerla, Tony ti koumans rod led ar lezot. Ki rezilta li’nn gagne? Tony dir: “Lezot pe ed mwa pou fer bann travay ki mo ena dan lasanble, ek aster-la, mo ena plis letan pou fer mo lamitie ar Zeova vinn pli for.”

7. Kouma enn ansien kapav swiv lexanp Zedeon si enn kikenn kritik li? (Zak 3:13)

⁷ Res kalm si enn kikenn kritik twa. Enn lot sitiasion ki kapav teste enn ansien se kan enn kikenn kritik li. Lexanp Zedeon kapav ed nou dan sa domenn-la osi. Zedeon ti kone ki li pa ti parfe. Alor, li ti res kalm kan bann Efraimit ti kritik li. (Ziz 8:1-3) Li pa ti sap lor kal. Li ti montre ki li ena limilite kan li ti ekout zot ek reponn zot avek zantiyes. Lerla, bann Efraimit ti kalme. Bann ansien ki ena sazes swiv lexanp Zedeon, kan zot ekout bien ek zot reponn ar zantiyes kan lezot kritik zot. (Lir Zak 3:13.) Kan zot fer sa, zot ede pou ki ena lape dan lasanble.

8. Kouma bann ansien bizin reazir kan lezot donn zot laglwar? Donn enn lexanp.

⁸ Donn tou laglwar Zeova. Kan lezot ti donn Zedeon laglwar parski li ti gagn laviktwar lor bann Madianit, li pa ti pran sa laglwar-la pou li. Li ti donn tou laglwar Zeova. (Ziz 8:22, 23) Kouma bann ansien kapav swiv lexanp Zedeon? Zot kapav donn Zeova laglwar pou tou seki zot reisi fer. (1 Kor. 4:6, 7) Par exanp, si lezot felisit enn ansien parski li’nn fer enn zoli diskour, li kapav dir ki li’nn reisi fer sa gras-a bann instriksion ki ena dan Labib ek bann formasion ki lorganizasion Zeova done. Detanzantan, bann ansien bizin reflesi si zot pe atir latansion lor zotmem. Anou pran lexanp enn ansien ki apel Timothy. Kan li ti fek nome, Timothy ti kontan fer bann diskour piblik. Li dir: “Mo ti pe fer bann long introdiksion ek mo ti pe servi boukou detay dan mo bann lexanp. Souvan, sa ti inpresionn lezot ek zot ti felisit mwa pou sa. Me malerezman, sa ti pe atir latansion lor mwa, olie ki sa atir latansion lor Zeova ek lor Labib.” Avek letan, Timothy ti konpran ki li ti bizin sanz fason ki li ti pe ansegne pou li pa atir latansion lor limem. (Prov. 27:21) Ki rezilta sa finn ena? Li dir: “Aster-la, bann frer ek ser dir mwa ki mo diskour inn ed zot pou sirmont zot bann problem, pou andir enn difikilte, ouswa pou vinn pli pros ar Zeova. Mo plis kontan kan zot dir mwa bann kitsoz koumsa, ki kan zot ti pe felisit mwa pou bann kapasite ki mo ena.”

9. Ki sitiasion ti teste lobeisans ek kouraz Zedeon? (Get zimaz lor kouvertir.)

⁹ Apre ki Zedeon ti gagn responsabilite pou gid bann Izraelit, sertin sitiasion ti teste so lobeisans ek so kouraz. Premierman, Zeova ti demann li pou fer enn kitsoz bien danzere. Li ti bizin detrir lotel ki so papa ti pe servi pou ador Baal. (Ziz 6:25, 26) Deziemman, kan li ti fini rasanble enn larme, de fwa Zeova ti demann li pou diminie kantite solda ki ti ena dan larme-la. (Ziz 7:2-7) Ek trwaziemman, Zeova ti dir li atak so bann lennmi omilie lanwit.​—Ziz 7:9-11.

10. Ki sitiasion kapav teste lobeisans bann ansien?

¹⁰ Bann ansien bizin “dispoze pou obeir.” (Zak 3:17) Kan enn ansien obeisan, deswit li swiv bann prinsip Labib ek bann instriksion ki lorganizasion Zeova done. Lerla, li  enn bon lexanp pou lezot. Selman, sertin sitiasion kapav teste lobeisans bann ansien. Par exanp, bann instriksion ki bann ansien gagne sanz telman vit, ki enn ansien kapav trouv sa difisil pou met zot an pratik. Ek parfwa, kitfwa enn ansien kapav demann limem si enn instriksion li lozik ek pratik. Ouswa, enn ansien kapav gagn responsabilite pou al servi dan enn landrwa kot so lavi kapav an danze. Kouma bann ansien kapav imit lobeisans Zedeon dan bann sitiasion koumsa?

11. Ki kitsoz kapav ed bann ansien pou res obeisan?

¹¹ Ekout bien bann instriksion ek met zot an pratik. Zeova ti dir Zedeon kouma pou detrir lotel so papa, kotsa pou aranz enn nouvo lotel pou Bondie, ek ki zanimo li ti bizin sakrifie. Zedeon pa ti kritik bann instriksion ki li ti gagne. Li ti fer exakteman seki Zeova ti demann li. Azordi, lorganizasion Zeova donn bann ansien bann instriksion atraver bann let ek bann lanons. Sa bann instriksion-la ed nou pou res an sekirite ek pou res pros ar Zeova. Nou bien kontan nou bann ansien parski zot swiv bann instriksion ki zot gagne ar fidelite. Kan zot fer sa, lasanble gagn bann bienfe.​—Ps. 119:112.

12. Kouma bann ansien met Ebre 13:17 an pratik kan lorganizasion demann zot pou fer enn kitsoz dan enn lot fason?

¹² To bizin dispoze pou adapte. Kan Zeova ti demann Zedeon pou diminie kantite solda ki ti ena dan so larme, Zedeon ti fer plis ki 99 poursan so bann solda retourn kot zot. (Ziz 7:8) Kitfwa Zedeon ti demann limem: ‘Eski vremem bizin fer sa sanzman-la? Eski sa pou marse?’ Kanmem sa, Zedeon ti obeir Zeova. Azordi, bann ansien kapav swiv lexanp Zedeon. Kouma? Kan lorganizasion demann zot pou fer enn kitsoz dan enn lot fason, zot obeir. (Lir Ebre 13:17.) Par exanp, an 2014, Komite Santral ti fer bann sanzman dan fason ki finans bann konstriksion pou bann Lasal Renion ek bann Lasal Lasanble. (2 Kor. 8:12-14) Dan lepase, kan ti bizin aranz enn lasal, lorganizasion ti donn enn loan sa lasanble-la. Lerla, tigit-tigit lasanble-la ti ranbours loan-la. Me aster-la, kan bizin aranz enn Lasal Renion ouswa enn Lasal Lasanble, lorganizasion servi bann kontribision ki bann lasanble dan lemond antie fer. Ar sa metod-la, mem bann lasanble ki pa kapav kontribie boukou pe reisi gagn zot Lasal Renion. Kan José ti aprann sa sanzman-la, li ti panse ki sa pa ti pou marse. Li ti dir: ‘Enn lasal mem nou pa pou reisi ranze koumsa! Se pa koumsa ki travay-la bizin fer dan nou pei.’ Ki kitsoz ti ed José pou soutenir dispozision ki lorganizasion ti pran? Li dir: “Proverb 3:5, 6 ti rapel mwa ki mo ti bizin fer Zeova konfians. Ek sa finn amenn bann rezilta extraordiner! Aster-la, nou pe aranz pli boukou Lasal. Gras-a fason ki pe servi bann kontribision pou finans bann konstriksion, mem dan bann  landrwa ki mizer, nou bann frer ek ser pe reisi gagn zot Lasal Renion.”

13. (a) Ki kitsoz Zedeon ti sir? (b) Kouma bann ansien kapav swiv lexanp Zedeon? (Get zimaz osi.)

¹³ Fer volonte Zeova ar kouraz. Zedeon ti obeir Zeova mem si li ti per ek mem si Zeova ti demann li pou fer enn kitsoz ki danzere. (Ziz 9:17) Apre ki Zedeon ti gagn bann prev ki Bondie ti pou avek li, Zedeon ti sir ki Zeova ti pou ed li pou protez So pep. Bann ansien ki res dan bann pei kot nou laktivite interdi, zot swiv lexanp Zedeon. Avek kouraz, zot diriz bann renion ek laktivite predikasion, mem si akoz sa bann gard kapav poz zot bann kestion, menas zot, ouswa aret zot. Zot kapav mem perdi zot travay akoz sa. c Pandan gran soufrans (gran detres) bann ansien pou bizin ena kouraz pou obeir ninport ki instriksion zot pou gagne, mem si zot lavi kapav an danze akoz sa. Par exanp, nou kapav gagn bann instriksion lor kouma nou pou bizin pres mesaz zizman ki pou kouma “bann gro lagrel.” Nou kapav osi gagn bann instriksion lor seki nou pou bizin fer pou ki nou reisi fer fas ar latak Gog ki sorti pei Magog.​—Eze. 38:18; Rev. 16:21.

14. Ki sitiasion ti teste landirans Zedeon?

¹⁴ Zedeon ti enn ziz ek li ti ena boukou travay pou fer. Kan Zedeon ti lager kont bann Madianit omilie lanwit, zot ti sove. Alor, depi Vale Zezreel ziska Larivier Zourdin, Zedeon ti bizin travers bann bwa pou swiv zot. (Ziz 7:22) Eski Zedeon ti arete kot Zourdin? Non! Mem si zot ti fatige, li ek so 300 zom ti travers larivier ek zot ti kontign swiv bann-la. Finalman, zot ti reisi zwenn bann Madianit ek zot ti gagn laviktwar lor bann-la.​—Ziz 8:4-12.

15. Ki sitiasion kapav teste landirans enn ansien?

¹⁵ Parfwa, enn ansien kapav santi li extra fatige fizikman ouswa emosionelman, parski li ena pou okip lasanble ouswa so fami. Dan sa bann sitiasion-la, kouma bann ansien kapav imit Zedeon?

16-17. Ki kitsoz ti ed Zedeon pou andire, ek ki kitsoz bann ansien kapav sir? (Izai 40:28-31) (Get zimaz osi.)

 ¹⁶ Ena konfians ki Zeova pou donn twa lafors. Zedeon ti ena konfians ki Zeova ti pou donn li lafors, ek se seki Zeova ti fer. (Ziz 6:14, 34) Enn fwa, Zedeon ek so bann zom ti bizin galoup deryer de lerwa Madianit ki kitfwa ti lor bann samo. (Ziz 8:12, 21) Me Bondie ti ed bann Izraelit pou trap zot ek pou gagn lager. Dan mem fason, bann ansien kapav kont lor Zeova, sa Kikenn ki zame “pa fatige ni perdi lafors” la. Li pou donn zot lafors ki zot bizin.​—Lir Izai 40:28-31.

¹⁷ Anou get lexanp Matthew, ki enn manb Komite Liezon Ospitalie. Ki kitsoz ti ed li pou andire? Matthew dir: “Mo finn resanti lafors ki Zeova done ek ki mansione dan Filipien 4:13. Plizir fwa, kan mo ti santi mwa extra fatige ek ki mo ti nepli ena lafors pou kontigne, mo ti priye Zeova. Ek mo ti sipliy Li pou donn mwa lafors fizik ek mantal ki mo bizin pou soutenir mo bann frer ek ser. Dan sa bann moman-la, mo ti santi ki lespri Zeova ti pe donn mwa lafors ek ti pe ed mwa pou andire.” Parey kouma Zedeon, nou bann ansien travay bien dir pou okip pep Zeova, mem si sa pa touletan fasil. Selman, zot bizin ena modesti ek rekonet ki zot pa pou touletan reisi fer seki zot anvi fer. Me zot kapav ena konfians ki Zeova pou ed zot kan zot demann Li so led ek Li pou donn zot lafors pou andire.​—Ps. 116:1; Fil. 2:13.

18. Kouma bann ansien kapav imit Zedeon?

¹⁸ Ena boukou leson ki bann ansien kapav aprann ar lexanp Zedeon. Bann ansien bizin ena modesti ek limilite konsernan kantite travay ki zot aksepte pou fer. Zot bizin osi ena modesti kan lezot felisit zot ouswa kritik zot. Zot bizin obeir ek ena kouraz, sirtou amezir ki lafin pe koste. Zot bizin osi ena konfians ki, ninport ki difikilte zot kapav gagne, Zeova kapav donn zot lafors pou andire. Nou vremem apresie bann ansien ki pe travay dir ek nou bizin “kontign ena enn gran lestim pou bann zom koumsa.”​—Fil. 2:29.