1-2. Dapre Psom 25:14, kouma nou kapav ena enn bon lamitie ar Zeova?

 DAPRE twa, ki bann kalite bien inportan pou to kapav ena enn bon lamitie ar enn kikenn? Sirman to pou dir ki zot bizin kontan ek soutenir sakenn zot kamarad. Me kitfwa to pa pou panse ki lakrint form parti sa bann kalite-la. Pourtan, kouma nou text prinsipal pou sa lartik-la montre, si nou anvi ena enn bon lamitie avek Zeova, nou bizin “ena enn gran respe” pou Li, setadir ena lakrint pou Li.​—Lir Psom 25:14, NW.

² Ki nou nouvo ouswa lontan dan laverite, nou tou nou bizin kontign ena enn gran respe pou Zeova. Me ki savedir ena enn gran respe pou Zeova? Kouma nou kapav aprann pou ena enn gran respe pou Li? Ek konsernan respe pou Zeova, ki nou kapav aprann ar lexanp Abdias, Gran Pret Zoad, ek Lerwa Zoas?

3. Explike kouma laper kapav protez nou.

³ Kan nou ena lakrint pou Bondie, savedir ki nou per pou fer enn kitsoz ki kapav kas so leker. Mem si laplipar ditan nou pa kontan gagn per, dan sertin sitiasion laper kapav protez nou ek fer nou azir ar sazes. Par exanp, akoz nou per ki nou tonbe, sa pou anpes nou pou mars tro pre ar enn falez. Akoz nou per ki nou blese, sa pou anpes nou pou fer bann kitsoz ki danzere. Ek akoz nou per tansion nou gat nou lamitie ar enn kikenn ki nou kontan, sa pou anpes nou pou dir li ouswa fer li bann kitsoz ki kapav fer li ditor.

4. Ki kalite laper Satan anvi ki bann dimounn ena?

 ⁴ Satan anvi ki bann dimounn gagn per Zeova. Li anvi ki nou krwar ki Zeova touletan ankoler, ki Li anvi pini nou, ek ki zame nou pa pou kapav fer Li plezir. (Zob 4:18, 19) Satan anvi ki nou telman per Zeova ki nou aret servi Li. Me nou pena okenn rezon pou per Zeova. Parkont, nou bizin per tansion nou fer enn kitsoz ki kapav kas so leker. Akoz sa, nou bizin aprann pou ena enn gran respe pou Bondie.

5. Ki savedir ena enn gran respe pou Bondie?

⁵ Enn kikenn ki ena enn gran respe pou Zeova, li kontan Zeova ek li pa pou anvi fer nanye ki kapav gat so lamitie avek Li. Zezi ti ena sa kalite ‘gran respe-la’ pou Bondie. (Ebre 5:7) Zezi pa ti per Zeova. (Iza. 11:2, 3) Okontrer, li ti kontan Zeova ek li ti anvi obeir Li. (Zan 14:21, 31) Parey kouma Zezi, nou osi nou ena enn gran respe pou Zeova parski Li merite ki nou kontan Li, Li ena sazes, Li enn Bondie ki zis, ek Li pwisan. Nou kone osi ki Zeova bien kontan nou ek ki sa rann Li ere kan nou obeir Li. Parkont, kan nou dezobeir Li, nou kas so leker.​—Ps. 78:41; Prov. 27:11.

6. Sit enn fason kouma nou kapav aprann pou ena enn gran respe pou Bondie. (Psom 34:11)

⁶ Nou pa ne avek enn gran respe pou Zeova, me nou bizin aprann pou devlop sa kalite-la. (Lir Psom 34:11.) Enn fason ki nou kapav fer sa se kan nou examinn kreasion. Plis nou trouv sazes Zeova, so pwisans, ek so lamour pou nou dan “bann kitsoz ki li’nn fer,” plis nou lamour ek nou respe pou Li pou ogmante. (Rom. 1:20) Enn ser ki apel Adrienne ti dir: “Kan mo get tou seki Zeova inn kree ek ki kantite sazes Li ena, sa montre mwa ki Zeova kone seki pli bon pou mwa.” Souvan li ti reflesi lor la, ek akoz sa li ti dir: “Mo pa anvi fer nanye ki kapav gat mo lamitie ar Zeova, sa Kikenn ki’nn donn mwa lavi la.” Eski to kapav pran enn letan sa semenn-la pou reflesi lor enn kitsoz ki Zeova inn kree? Si to fer sa, sa pou ogmant to respe ek to lamour pou Zeova.​—Ps. 111:2, 3.

7. Kouma lapriyer kapav ed nou pou ena enn gran respe pou Zeova?

⁷ Enn lot kitsoz ki pou ed nou pou ena enn gran respe pou Zeova se kan nou priye Li souvan. Sak fwa ki nou priye Zeova, nou aprann konn Li pli bien. Sak fwa ki nou demann Li lafors pou andire, sa rapel nou ki kantite pwisan Li ete. Kan nou remersie Li pou sakrifis so Garson, sa rapel nou ki kantite Zeova kontan nou. Ek kan nou sipliy Zeova pou ed nou pou fer fas ar enn problem, sa rapel nou ki kantite sazes Li ena. Kan nou fer bann lapriyer koumsa, sa pou ed nou pou ena plis respe pou Zeova. Nou pou plis determine osi pou pa fer nanye ki kapav gat nou lamitie ar Li.

8. Ki nou kapav fer pou ogmant nou respe pou Bondie?

⁸ Nou kapav ogmant nou respe pou Bondie kan nou tir bann leson ar bann bon ek bann move lexanp ki ena dan Labib. Anou get lexanp de fidel serviter Zeova: Abdias, ki ti responsab lakaz lerwa, ek Zoad, ki ti gran pret. Apre sa, nou pou get lexanp enn lerwa Zida, Lerwa Zoas, ki o-koumansman ti pe servi Zeova, me apre li ti aret servi Li.

9. Kouma gran respe ki Abdias ti ena pou Zeova ti ed Li? (1 Lerwa 18:3, 12)

⁹ Premie fwa ki Labib koz lor Abdias b li dir: “Abdias ti ena enn gran respe pou Zeova.” (Lir 1 Lerwa 18:3, 12.) Kouma gran respe ki Abdias ti ena pou Zeova ti ed Li? Premierman, sa ti fer li vinn enn kikenn ki onet ek ki lezot kapav fer konfians. Akoz sa, lerwa ti met li an sarz so lakaz. (Konpar ar Neemi 7:2.) Ek deziemman, sa ti fer li ena enn gran kouraz, enn kalite ki li ti vremem bizin. Kifer? Parski li ti pe viv dan lepok Lerwa Akab, ki ti “fer seki move devan lizie Zeova. Li ti pli pir ki tou bann lerwa avan li.” (1 Ler. 16:30) Anplis, madam Akab, Zezabel, ti ador Baal ek li ti deteste Zeova. Zezabel ti anvi anpes bann dimounn ador Zeova dan Rwayom Lenor, ek li ti mem touy boukou profet Zeova. (1 Ler. 18:4) Wi, Abdias ti pe servi Zeova dan enn lepok bien difisil.

10. Kouma nou kone ki Abdias ti ena boukou kouraz?

¹⁰ Kouma nou kone ki Abdias ti ena boukou kouraz? Kan Zezabel ti pe rod bann profet Bondie pou touy zot, Abdias ti kasiet 100 parmi zot. Li ti met zot “par sinkant dan enn lakav, ek [li] ti fourni zot dipin ek delo.” (1 Ler. 18:13, 14) Si Zezabel ti kone seki Abdias ti fer, sirman li ti pou touy li. Abdias sirman ti gagn per, ek li pa ti anvi mor. Me Abdias ti kontan Zeova ek li ti osi kontan bann ki ti pe servi Zeova. Li ti kontan zot plis ki so prop lavi!

11. Kouma bann serviter Zeova dan nou lepok pe swiv lexanp Abdias? (Get zimaz osi.)

¹¹ Azordi, boukou serviter Zeova res dan bann pei kot nou laktivite interdi. Sa bann frer ek ser la respekte bann lotorite dan zot pei. Selman, parey kouma Abdias, zot pa aret servi Zeova. (Mat. 22:21) Zot montre ki zot ena enn gran respe pou Bondie kan zot obeir Li “plito ki bann zom.” (Zist. 5:29) Zot kontign pres bon nouvel ek zot kontign fer bann  renion, mem si zot bizin fer sa an kasiet. (Mat. 10:16, 28) Zot fer sir ki zot bann frer ek ser gagn seki zot bizin lor plan spiritiel, pou ki zot kapav res pros ar Zeova. Anou get lexanp Henri, enn frer ki res dan enn pei dan Lafrik, kot nou laktivite ti interdi avan. Pandan linterdiksion, Henri ti port li volonter pou al kit bann piblikasion pou bann frer ek ser. Li dir: “Mo enn kikenn ki timid. Akoz sa, mo sir ki mo’nn gagn kouraz pou fer sa travay-la gras-a gran respe ki mo ena pou Zeova.” Eski twa osi to kapav ena kouraz parey kouma Henri? Wi to kapav, si to ena enn gran respe pou Bondie!

12. Kouma Gran Pret Zoad ek so madam ti montre zot fidel ar Zeova?

¹² Gran Pret Zoad ti ena enn gran respe pou Zeova. Akoz sa, li ti res fidel anver Li ek li ti ankouraz lezot pou ador Zeova. Li ti res fidel ar Zeova kan Atali, tifi Zezabel, ti maniganse pou vinn larenn dan Zida. Lepep ti per Atali parski li ti bien kriel. Li ti telman anvi vinn larenn ki li ti esey touy tou so bann ti-zanfan pou li reisi fer sa. (2 Kro. 22:10, 11) Me Zoas, enn parmi Atali so bann ti-zanfan, ti reisi gagn lavi sov parski Zeosabat, Zoad so madam, ti sap li. Zoad ek so madam ti kasiet zanfan-la ek zot ti okip li. Kan zot ti fer sa, zot ti ede pou ki enn desandan David res an-vi, pou ki li kapav vinn lerwa. Zoad ti res fidel ar Zeova ek li pa ti per Atali.​—Prov. 29:25.

13. Kan Zoas ti ena set an, kouma Zoad ankor enn fwa ti montre ki li ti fidel ar Zeova?

¹³ Kan Zoas ti ena set an, Zoad ankor enn fwa ti montre ki li ti fidel ar Zeova. Li ti ena enn proze, ek si sa ti marse, Zoas, ki ti enn desandan David, ti pou kapav vinn lerwa. Parkont, si proze-la pa ti marse, Zoad ti kapav perdi so lavi. Avek led Zeova, proze-la ti marse. Bann sef fami ek bann Levit ti soutenir Zoad ek zot ti reisi fer touy Atali ek fer Zoas vinn lerwa. (2 Kro. 23:1-5, 11, 12, 15; 24:1) Lerla, Zoad “ti fer enn lalians ant Zeova, lerwa, ek lepep, pou ki zot kontign res pep Zeova. Li ti osi fer enn lot lalians ant lerwa ek lepep.” (2 Ler. 11:17) Zoad “ti osi met bann portie devan bann laport tanp Zeova, pou anpes bann dimounn ki inpir pou rantre.”​—2 Kro. 23:19.

14. Parski Zoad ti onor Zeova, kouma Zeova ti onor li?

¹⁴ Zeova ti dir: “Bann ki onor mwa, mo pou onor zot.” Ek vremem Zeova ti onor Zoad! (1 Sam. 2:30) Par exanp, Li’nn fer ekrir zistwar Zoad dan Labib pou ki nou kapav tir bann leson ar so lexanp. (Rom. 15:4) Anplis, kan Zoad ti mor, li ti gagn enn loner extraordiner; ti anter li “dan Lavil David avek bann lerwa, parski li ti fer seki bien an Izrael ek anver vre Bondie ek So lakaz.”​—2 Kro. 24:15, 16.

15. Ki nou kapav aprann ar zistwar Zoad? (Get zimaz osi.)

¹⁵ Zistwar Zoad kapav ed sakenn parmi nou pou ena enn gran respe pou Zeova. Bann ansien kapav swiv lexanp Zoad kan zot touletan fer zot maximum pou protez lasanble. (Zist. 20:28) Lexanp Zoad montre bann frer ek ser aze ki, kan zot ena enn gran respe pou Zeova ek ki zot res fidel anver Li, Li kapav servi zot pou realiz so proze. Zeova zame pa pou  met zot dan enn kwin! Ki leson bann zenn kapav aprann ar fason ki Zeova ti tret Zoad? Zot kapav imit Zeova kan zot montre respe anver bann frer ek ser aze, sirtou bann ki pe servi Zeova depi plizir lane. (Prov. 16:31) Anplis, nou tou nou kapav aprann enn leson ar bann sef fami ek bann Levit ki ti soutenir Zoad. Nou tou nou bizin soutenir “bann ki pe diriz” nou, kan nou obeir zot.​—Ebre 13:17.

16. Ki kitsoz montre ki Lerwa Zoas ti feb?

¹⁶ Gran Pret Zoad ti ena enn bon linflians lor Lerwa Zoas. (2 Ler. 12:2) Gras-a sa, kan Zoas ti zenn, li ti anvi fer Zeova plezir. Me apre lamor Zoad, Zoas ti koumans ekout bann prins ki pa ti servi Zeova. Ek akoz sa, li ek lepep ti “koumans servi bann poto sakre ek bann zidol.” (2 Kro. 24:4, 17, 18) Sa ti fer Zeova so leker fermal. Kanmem sa, “Li ti kontign avoy bann profet parmi zot pou fer zot retourn ar [Li] . . . , me zot pa ti ekoute.” Zot ti mem rezet konsey Zakari, ki ti garson Zoad. Zakari pa ti zis enn pret ek profet Zeova, li ti osi kouzin Zoas. Lerwa Zoas pa ti ena okenn rekonesans pou lafami ki ti sap so lavi, parski li ti fer touy Zakari.​—2 Kro. 22:11; 24:19-22.

17. Ki ti ariv Lerwa Zoas?

¹⁷ Zoas pa ti kontign ena enn gran respe pou Zeova, ek akoz sa, sa ti mal fini  pou li. Zeova ti dir: “Me bann ki pa respekte mwa, mo pa pou tret zot ar respe.” (1 Sam. 2:30) Zoas ti ena enn gran larme. Kanmem sa, enn ti larme, ki ti sorti Siri, ti gagn laviktwar lor so larme, ek Zoas ti bien blese. Apre ki bann Sirien ti ale, bann serviter Zoas ti touy li parski li ti touy Zakari. Pou lepep, Lerwa Zoas ti telman move ki zot pa ti mem “anter li dan bann tom kot anter bann lerwa.”​—2 Kro. 24:23-25.

18. Dapre Zeremi 17:7, 8, ki nou bizin fer pou ki nou pa vinn parey kouma Zoas?

¹⁸ Ki nou kapav aprann ar lexanp Zoas? Zoas ti koumadir enn pie ki so rasinn pa profon dan later. Li ti bizin enn dibwa pou tini li, ek sa dibwa-la ti Zoad. Me kan ti nepli ena sa dibwa-la, setadir kan Zoad ti mor, Zoas ti koumans ekout bann ki pa servi Zeova. Akoz sa, li pa ti res fidel ar Zeova. Ki nou aprann ar sa lexanp-la? Sa lexanp-la montre nou ki fode pa nou obeir Zeova zis akoz nou fami ouswa akoz bann frer ek ser dan lasanble. Pou nou res pros ar Zeova, nou bizin ogmant nou lamour ek nou respe pou Li. Nou fer sa kan nou etidie regilierman, kan nou reflesi lor seki nou etidie, ek kan nou priye Zeova.​—Lir Zeremi 17:7, 8; Kol. 2:6, 7.

19. Ki kitsoz Zeova demann nou pou fer?

¹⁹ Zeova pa demann nou pou fer bann kitsoz ki nou pa kapav fer. Nou trouv seki Li demann nou dan Ekleziast 12:13, ki dir: “Ena lakrint pou vre Bondie ek gard so bann komannman, parski se tou seki enn dimounn bizin fer.” Parey kouma Abdias ek Zoad, kan nou ena enn gran respe pou Bondie, nou pou res fidel anver Li ninport ki arive. Nanye pa pou kapav kas nou lamitie ar Zeova!