1-2. Parey kouma Lot, ki difikilte bann Kretien gagne azordi?

 KAN nou reflesi lor bann prinsip moral ki bann dimounn ena azordi, nou ena mem santiman ki Lot. Lot “ti bien boulverse par kondwit devergonde bann dimounn ki ti dezobeir Lalwa,” parski li ti kone ki Zeova deteste bann move kondwit. (2 Pier 2:7, 8) Lot ti kontan Bondie ek li ti ena enn gran respe pou Li. Akoz sa, li ti deteste kondwit bann dimounn ki ti ena otour li. Nou osi nou antoure ar bann dimounn ki pa respekte bann prinsip moral Bondie. Selman, si nou kontign kontan Zeova ek nou ena enn gran respe pou Li, nou pou ena enn bon kondwit moral.​—Prov. 14:2.

² Zeova ed nou pou ena bann bon prinsip moral gras-a bann konsey ki ena dan liv Proverb. Tou bann Kretien, ki zot zenn ouswa vie, kapav gagn bann bienfe gras-a bann bon konsey ki ena dan sa liv-la.

3. Dapre Proverb 17:3, sit enn rezon kifer nou bizin protez nou leker. (Get zimaz osi.)

³ Enn rezon inportan kifer nou bizin protez nou leker sinbolik, se parski Zeova examinn nou leker. Savedir ki kan Zeova get nou, Li pa trouv zis seki lezot trouve; Li trouve ki kalite dimounn nou ete vremem. (Lir Proverb 17:3.) Zeova pou kontan nou si nou kontign swiv so bann konsey, ek so bann konsey kapav fer nou gagn lavi eternel. (Zan 4:14) Kan nou swiv bann konsey Zeova, nou pa pou les nou inflianse par Satan ek so lemond. (1 Zan 5:18, 19) Plis nou vinn pros ar Zeova, plis nou lamour ek nou respe pou Li pou ogmante. Ek parski nou pa anvi desevwar  nou Papa, nou pa pou mem pans pou fer enn pese. Kan enn tantasion vinn devan nou, nou pou dir ar noumem, ‘Kouma eski volonterman mo kapav desevwar mo Bondie, Li ki’nn montre telman boukou lamour pou mwa?’​—1 Zan 4:9, 10.

4. Kouma respe pou Bondie ti ed enn ser pou rezet enn tantasion?

⁴ Marta, enn ser ki res Kroasi, ti gagn tantasion pou komet limoralite. Li dir: “Mo ti trouv sa difisil pou lit kont sa move dezir-la. Me mo ti reisi fer li parski mo ti ena enn gran respe pou Bondie.” b Kouma respe pou Bondie ti ed Marta? Marta dir ki li ti reflesi lor bann move konsekans ki li ti pou gagne si li ti pran enn move desizion. Nou osi nou kapav fer parey. Pli move konsekans ki kapav arive, se ki nou kas leker nou Papa Zeova ek ki nou perdi posibilite pou ador Li pou touletan.​—Zen. 6:5, 6.

5. Ki nou kapav aprann ar lexanp Leo?

⁵ Kan nou ena enn gran respe pou Zeova, nou pa fer kamarad ar bann dimounn ki ena enn move kondwit. Anou gete seki ti ariv Leo, enn frer ki res Kongo. Kat-r-an apre so batem, li ti koumans ena bann move frekantasion. Li ti panse ki, tanki li pa fer parey kouma so bann kamarad, li pa ti pe fer enn pese kont Zeova. Selman, bien vit so bann kamarad ti inflians li pou bwar ek li ti tom dan limoralite. Apre sa, li ti koumans reflesi lor seki so bann paran ti ansegn li ek lor kouma li ti ere kan li ti pe servi Zeova. Ki ti arive lerla? Li ti koumans fer bann sanzman. Avek led bann ansien, li ti retourn ar Zeova. Azordi Leo ere, ek li pe servi kouma ansien ek pionie spesial.

6. Ki sa de madam dan Proverb sapit 9 la reprezante?

 ⁶ Anou examinn Proverb sapit 9. Sa sapit-la koz lor de madam sinbolik. Enn madam-la reprezant sazes, ek lot madam-la li bet. (Konpar ar Romin 5:14; Galat 4:24.) Amezir ki nou examinn sa sapit-la, pa bliye ki lemond Satan li ranpli ar limoralite ek pornografi. (Efe. 4:19) Akoz sa, li bien inportan ki nou kontign ena enn gran respe pou Bondie ek ki nou kontign rezet lemal. (Prov. 16:6) Lerla, nou tou nou pou kapav gagn bann bienfe ar bann konsey ki ena dan Proverb sapit 9. Dan sa sapit-la, sa de madam-la pe invit bann ki pena lexperyans, setadir bann ki “pena bon sans.” Sak madam pe dir: ‘Vinn dan mo lakaz ek vinn manze.’ (Prov. 9:1, 5, 6, 13, 16, 17) Me ena enn gran diferans ant seki ariv bann ki aksepte linvitasion sa madam ki reprezant sazes la ek bann ki aksepte linvitasion sa madam ki bet la.

7. Dapre Proverb 9:13-18, ki ariv bann dimounn ki aksepte linvitasion sa fam ki bet la? (Get zimaz osi.)

⁷ Anou lir linvitasion sa “fam ki bet” la. (Lir Proverb 9:13-18.) San okenn laont, li invit bann ki pena lexperyans pou rant dan so lakaz ek pou manz ansam ar li. Ki ariv bann dimounn ki aksepte so linvitasion? Labib dir: “Bann ki nepli ena lafors ek ki’nn mor, se laba mem ki zot ete.” Inpe avan dan liv Proverb, nou retrouv inpe bann mem lide. Labib averti nou kont enn “fam volaz” ek “imoral.” Li dir ki “so lakaz desann dan lamor.” (Prov. 2:11-19) Proverb 5:3-10 koz lor enn lot “fam volaz” ki “so lipie desann dan lamor.”

8. Ki desizion nou bizin pran?

⁸ Bann dimounn ki tann lavwa sa “fam ki bet” la, zot ena enn desizion pou pran: Eski zot pou aksepte so linvitasion ouswa non? Nou osi, kitfwa nou kapav ena sa kalite desizion-la pou pran. Kan enn kikenn esey tant nou pou fer enn kitsoz ki imoral, ouswa kan bann zimaz porno aparet lor nou bann laparey elektronik, ki desizion nou pou pran?

9-10. Sit bann rezon kifer nou bizin rezet limoralite sexiel.

⁹ Nou ena bann bon rezon pou rezet limoralite sexiel. Sa “fam ki bet” la dir: “Bann delo ki’nn kokin zot dou.” Ki ete sa “bann delo ki’nn kokin” la? Labib konpar bann relasion sexiel ki ena ant enn misie  ek so madam ar enn bon delo fre ki rafresi. (Prov. 5:15-18) Enn misie ek enn madam ki marye legalman, zot kapav fer zot kamarad plezir gras-a bann relasion sexiel. Sa bien diferan ar “bann delo ki’nn kokin,” ki reprezant bann relasion sexiel imoral. Souvan bann dimounn ki komet limoralite, zot esey fer sa an kasiet, parey kouma enn kikenn ki kokin. “Bann delo ki’nn kokin,” setadir limoralite sexiel, kapav paret “dou” pou bann dimounn ki panse ki personn pa’nn trouv zot. Selman, zot pe anbet zotmem, parski Zeova trouv tou kitsoz. Pena nanye ki pli amer ki perdi faver Zeova. Se pa enn kitsoz ki “dou” ditou! (1 Kor. 6:9, 10) Me limoralite sexiel ena osi bann lezot konsekans.

¹⁰ Akoz limoralite sexiel, sertin dimounn santi ki zot pena valer, zot gagn onte, ena ki tom ansint san ki zot atann, ek ena ki zot menaz kase. Alor, nou montre ki nou ena sazes kan nou refiz linvitasion sa “fam ki bet” la. Kan enn kikenn imoral, anplis ki li perdi so lamitie ar Zeova, li kapav osi gagn bann maladi ki fer li mor avan ler. (Prov. 7:23, 26) Proverb 9:18 dir: “Bann invite sa fam-la zot dan Tom.” Me kifer eski boukou dimounn aksepte linvitasion sa fam-la?​—Prov. 9:13-18.

11. Kifer pornografi fer bann dimounn ditor?

¹¹ Enn piez ki may boukou dimounn azordi se pornografi. Sertin dimounn panse ki pena nanye demal pou get pornografi. Me pornografi fer bann dimounn ditor. Li fer zot nepli ena respe pou zotmem, ek zot perdi respe lezot osi. Kan enn kikenn inn pran labitid pou get pornografi, sa bien difisil avan li reisi arete. Kan enn kikenn get enn zimaz imoral, sa bien difisil avan ki li reisi bliye li. Anplis, pornografi pa ed bann dimounn pou rezet zot bann move dezir. Okontrer, li fer sa bann move dezir-la vinn pli for. (Kol. 3:5; Zak 1:14, 15) Ek malerezman, boukou dimounn ki get pornografi, avek letan zot komet limoralite sexiel.

12. Kifer nou bizin rezet bann zimaz ki kapav fer nou ena bann panse imoral?

¹² Ki bann Kretien bizin fer kan enn zimaz porno aparet lor zot laparey elektronik? Deswit nou bizin tir sa zimaz-la devan nou lizie. Li pou pli fasil nou fer sa, si nou pa bliye ki seki pli inportan pou nou, se nou lamitie ar Zeova. An realite, mem bann zimaz ki pa porno kitfwa kapav fer nou ena bann panse imoral. Kifer nou bizin rezet sa bann kalite zimaz-la? Parski nou pa anvi mem pans pou fer enn kitsoz ki imoral. (Mat. 5:28, 29) Enn ansien, ki apel David ek ki res Tayland, dir: “Mo ti demann momem: ‘Mem si sa bann zimaz-la pa porno, eski Zeova pou kontan si mo kontign get zot?’ Kan mo reflesi koumsa, sa ed mwa pou azir ar sazes.”

13. Ki kitsoz pou ed nou pou azir avek sazes?

¹³ Kan nou ena enn gran respe pou Zeova ek ki nou pa anvi desevwar Li, sa pou ed nou pou azir avek sazes. Respe pou Bondie se “koumansman lasazes.” (Prov. 9:10) Nou trouv sa dan koumansman Proverb sapit 9, ki konpar “vre sazes” ar enn lot madam sinbolik.

14. Ki lot linvitasion nou trouve dan Proverb 9:1-6?

¹⁴ Lir Proverb 9:1-6. Dan sa bann verse-la, nou trouv linvitasion Zeova, nou Kreater ek Lasours vre sazes. (Prov. 2:6; Rom. 16:27) Sa bann verse-la koz lor enn gran lakaz kot ena set kolonn. Sa montre  ki Zeova Li zenere, ek ki Li akeyir tou bann dimounn ki aksepte so sazes.

15. Ki kitsoz Zeova invit nou pou fer?

¹⁵ Ar lexanp sa madam ki reprezant vre sazes la, nou aprann ki Zeova Li enn Bondie ki zenere ek ki Li donn nou boukou bon kitsoz. Sa bann verse-la montre ki sa madam-la inn prepar enn bon manze. Li’nn prepar so laviann, li’nn prepar so divin, ek li’nn invit bann dimounn kot li pou zot vinn manze. (Prov. 9:2) Anplis, verse 4 ek 5 dir: “Li [vre sazes] dir ar bann ki pena bon sans: ‘Vini! Manz mo dipin.’” Kifer nou bizin vinn dan lakaz “vre sazes” pou manz manze ki li donn nou? Zeova anvi ki so bann zanfan ena sazes ek ki zot res an sekirite. Li pa anvi ki nou fer bann erer ek ki nou soufer akoz sa. Se pou sa rezon-la ki “Li gard lasazes pou bann zom ki drwat.” (Prov. 2:7) Kan nou ena enn gran respe pou Zeova, nou pou anvi fer Li plezir. Lerla, nou pou ekout so bann konsey ki ena sazes ek nou pou met zot an pratik.​—Zak 1:25.

16. Kouma Alain ti pran enn bon desizion parski li ena enn gran respe pou Bondie, ek ki rezilta sa finn amene?

¹⁶ Anou gete kouma enn ansien, ki apel Alain, ti pran enn bon desizion parski li ti ena enn gran respe pou Zeova. Alain travay kouma profeser dan enn lekol. Li dir: “Boukou parmi mo bann koleg ti konsider bann fim porno kouma enn form ledikasion sexiel.” Me Alain ti kone ki sa pa ti vre. Li dir: “Parski mo kontan ek mo respekte Zeova, mo’nn refiz get sa bann fim-la. Mo’nn osi explik bann lezot profeser kifer mo pa get sa bann fim-la.” Alain ti swiv konsey “vre sazes” ek li ti “mars lor semin lintelizans.” (Prov. 9:6) Ki rezilta sa finn amene? Sertin profeser ti telman inpresione ki aster-la zot pe etidie Labib ek asiste bann renion.

17-18. Ki bienfe bann ki pe aksepte linvitasion “vre sazes” pe gagne, ek ki zot pou gagne dan lavenir? (Get zimaz osi.)

¹⁷ Atraver lexanp sa de madam-la, Zeova montre nou kouma nou kapav ena enn zoli lavenir. Bann ki aksepte linvitasion sa “fam ki bet” la, zot kontan seki “dou,” setadir bann plezir imoral. Selman, zot pa realize ki sa pou ena enn lefe lor zot lavenir. Alafin, zot pou fini “dan Tom.”​—Prov. 9:13, 17, 18.

¹⁸ Sa bien diferan pou bann dimounn ki aksepte linvitasion “vre sazes”! So bann invite ere, parski zot ena tou seki zot bizin pou zot kapav res pros ar Zeova. (Iza. 65:13) Zeova ti servi profet Izai pou dir: “Ekout mwa bien, ek manz seki bon, ek zot  pou vremem apresie bann manze ki vremem ris.” (Iza. 55:1, 2) Nou pe aprann pou kontan bann kitsoz ki Zeova kontan, ek pou deteste bann kitsoz ki Li deteste. (Ps. 97:10) Ek nou ere parski nou kapav osi ed lezot pou vinn aprann ar “vre sazes.” Nou koumadir bann serviter ki pe apel bann dimounn depi “bann plas ki ot dan lavil,” ek nou pe dir zot: “Zot ki pena lexperyans, rant isi.” Ansam avek nou, bann ki pe aksepte sa linvitasion-la pa pe zis gagn bann bienfe depi aster-la mem. Si nou kontign “mars lor semin lintelizans,” nou pou “gagn lavi” pou touletan.​—Prov. 9:3, 4, 6.

19. Dapre Ekleziast 12:13, 14, ki nou bizin bien deside pou fer? (Get osi lankadre “ Nou Gagn Bann Bienfe kan Nou Ena enn Gran Respe pou Bondie.”)

¹⁹ Lir Ekleziast 12:13, 14. Anou bien deside pou kontign ena enn gran respe pou Zeova. Sa pou enn proteksion pou noumem, sa pou ed nou pou res pros ar Li, ek sa pou ed nou pou res prop lor plan moral. Kan nou ena enn gran respe pou Bondie, sa pou osi motiv nou pou kontign ed maximum dimounn pou zot gagn “vre sazes” ek pou zot gagn bann bienfe gras-a sa.