Pandan Deziem Lager Mondial, mo bann paran ti kit Estoni ek zot ti al Lalmagn. Se laba ki mo’nn ne. Apre mo nesans, zot ti koumans fer bann demars pou al Kanada. Nou premie lakaz dan Kanada ti pre ar Ottawa. Li ti dan enn ti batiman kot ti ena osi bann poul. Nou ti extra mizer, selman nou ti reisi manz dizef pou nou ti-dezene.

Enn zour, bann Temwin Zeova ti lir Revelasion 21:3, 4 ar mo mama. Sa ti telman tous li ki li ti koumans plore. Tigit-tigit, lagrin laverite ti grandi dan leker mo mama ek mo papa, ek bien vit zot ti progrese ek zot ti pran batem.

Mem si mo bann paran pa ti tro konpran Angle, zot ti bien aktif dan zot servis pou Zeova. Mo papa ti travay dan Sudbury, Ontario, dan enn lizinn kot fonn nikel. Preske toule samdi, mo papa ti amenn mwa ek mo ti ser Sylvia dan predikasion, mem si lavey li ti travay enn lanwit. Ek sak semenn, nou ti etidie Latour Degard an fami. Gras-a Mama ek Papa, mo’nn aprann pou kontan Zeova. An 1956, mo lamour pou Zeova inn pous mwa pou pran batem. Mo ti ena di-z-an. Zot lamour pou Zeova inn ankouraz nou pou servi Li toutlong mo lavi.

Apre mo dernie lane kolez, mo pa ti tro anvi servi Zeova. Mo ti panse ki, si mo fer pionie, mo pa ti pou ena ase kas pou realiz mo rev, setadir pou vwayaze ek al dan bann lezot pei. Mo ti al travay kouma DJ dan enn stasion radio dan landrwa, ek mo ti bien kontan mo travay. Me mo ti pe travay aswar, savedir ki mo ti pe rat mo bann renion souvan, ek ki souvan mo ti pe frekant bann dimounn ki pa kontan Zeova. Me avek letan, gras-a mo konsians ki forme par Labib, mo’nn fer bann sanzman.

Mo ti al res dan Oshawa, dan Ontario. Laba, mo ti fer konesans Ray Norman, so ser Lesli, ek bann lezot pionie. Zot ti bien akeyir mwa. Kan mo ti trouve ki kantite zot ti ere, sa ti pous mwa pou reflesi lor seki mo anvi fer ar mo lavi. Zot ti ankouraz mwa pou fer pionie, ek mo ti koumans fer pionie an Septam 1966. Mo ti ere, ek mo ti bien kontan mo lavi. Selman, bann zoli sirpriz ki mo pa ti atann ti pou sanz mo lavi.

Kan mo ti ankor kolez, mo ti ranpli enn form pou al servi dan Betel Toronto, dan Kanada. Ek kan mo ti pe fer pionie, mo ti gagn linvitasion pou al servi kat-r-an dan Betel. Mo ti bien kontan Lesli, ek mo ti per tansion mo pa rezwenn li si mo aksepte linvitasion  pou rant Betel. Apre ki mo ti bien priye Zeova, mo ti aksepte pou al servi dan Betel, ek mo ti bien tris pou kit Lesli.

Dan Betel, mo ti travay dan servis ki lav linz, ek plitar mo ti travay kouma sekreter. Lesli ti pe servi kouma pionie spesial dan Gatineau, dan Quebec. Souvan mo ti demann momem seki li ti pe fer ek si mo ti pran enn bon desizion. Me enn zour, mo’nn gagn enn parmi bann pli zoli sirpriz dan mo lavi. Ray, Lesli so frer, ti gagn linvitasion pou vinn servi Betel, ek li ti pou res dan mem lasam ki mwa. Gras-a sa, mo ti reisi re-rant an kontak ar Lesli. Le 27 Fevriye 1971, dernie zour mo kat-r-an servis dan Betel, Lesli ek mwa nou ti marye.

Lesli ek mwa nou ti al servi dan enn lasanble lang Franse dan Quebec. Apre de-trwa lane, bann frer ti demann mwa pou servi kouma responsab sirkonskripsion. Sa ti bien etonn mwa parski mo ti ena zis 28 an. Mo ti panse ki mo tro zenn ek ki mo pa ti ena ase lexperyans pou servi kouma responsab sirkonskripsion. Me bann parol Zeremi 1:7, 8 ti bien ankouraz mwa. Selman, Lesli ti deza fer de-trwa aksidan loto, ek akoz sa, li ti gagn difikilte pou dormi. Alor, kouma nou ti pou kapav fer servis sirkonskripsion? Malgre so sitiasion difisil, Lesli ti dir: “Si Zeova invit nou pou fer enn kitsoz, eski nou pa bizin esey fer li?” Nou ti aksepte pou al dan servis sirkonskripsion, ek nou’nn gagn lazwa pou fer sa pandan 17 an.

Mo ti bien okipe dan servis sirkonskripsion, ek souvan mo pa ti ena ase letan pou pas ar Lesli. Enn zour, mo ti aprann enn lot leson inportan. Enn Lindi gramatin boner, enn kikenn ti pez sonet nou laport. Ler mo ti al ouver, pa ti ena personn. Ti ena zis enn tant, ek dan tant-la ti ena enn nat, bann frwi, fromaz, dipin, enn boutey divin, bann ver, ek enn ti not kot ti ekrir, “Al fer enn piknik ar to madam.” Anplis, sa zour-la, ti ena enn zoli soley. Selman, sa zour-la mo ti bizin prepar bann diskour. Kan mo ti explik sa Lesli, li ti inpe tris, me li ti konpran. Ler mo ti asize dan mo biro pou prepar mo bann diskour, mo konsians ti koumans fatig mwa. Mo ti mazinn Efezien 5:25, 28. Sa bann verse-la ti koumadir enn fason ki Zeova ti pe dir mwa pran kont santiman mo madam. Apre ki mo ti priye Zeova, mo ti al get Lesli ek mo ti dir li, “Anou ale.” Li ti extra kontan! Nou ti pran nou loto ek nou ti al kot enn larivier. Laba, nou ti gagn enn zoli plas pou asize, ek se enn bann pli zoli zourne ki nou’nn pase dan nou lavi. Anplis, mo ti reisi prepar mo bann diskour osi.

Nou ti gagn boukou benediksion dan nou servis sirkonskripsion. Mo ti pe okip bann lasanble depi Colombie-Britannique ziska Terre-Neuve. Mo ti reisi realiz mo rev pou vwayaze. Mo ti deza pans pou ranpli form pou fer lekol Galaad, me mo pa ti anvi al dan enn lot pei. Pou mwa, bann misioner ti bann dimounn spesial, ek mo pa ti santi mwa kalifie pou  vinn enn misioner. Anplis, mo ti per tansion avoy nou dan enn pei Lafrik, kot ena bann maladi ek lager. Mo ti bien kontan kot mo ti ete.

An 1992, bann Temwin ti kapav rekoumans prese dan sertin pei ki ti form parti dan Linion Sovietik. Alor, bann frer ti demann nou si nou ti pou kontan al Estoni ek servi kouma misioner. Lesli ek mwa nou ti bien etone ek nou ti priye Zeova lor la. Ankor enn fwa nou ti dir, ‘Si Zeova invit nou pou fer enn kitsoz, eski nou pa bizin esey fer li?’ Nou ti aksepte pou al Estoni, ek mo ti bien soulaze parski nou pa ti pe al Lafrik.

Deswit nou ti koumans aprann koz Estonien. Apre de-trwa mwa dan Estoni, nou ti koumans fer servis sirkonskripsion. Nou ti bizin vizit apepre 46 lasanble ek group dan Estoni, Letoni, Litiani, ek osi dan Kaliningrad, ki dan Larisi. Savedir ki nou ti bizin aprann koz Letonien, Litianien ek Ris osi. Sa ti bien difisil! Selman, bann frer ek ser ti vremem apresie nou bann zefor ek zot ti ed nou. An 1999, enn biro nasional inn ouver dan Estoni ek mo ti servi kouma manb Komite Biro Nasional, ansam ar Toomas Edur, Lembit Reile, ek Tommi Kauko.

Nou’nn fer konesans boukou Temwin ki bann Sovietik ti deport dan Siberi avan. Mem si zot ti lwin ar zot fami ek ki zot ti gagn maltrete dan prizon, sa bann frer ek ser-la pa ti ankoler ek zot pa ti gard rankinn. Okontrer, zot ti zwaye ek zot ti bien aktif dan predikasion. Zot lexanp ti montre nou ki nou kapav andire ek gard nou lazwa, mem kan nou gagn bann difikilte.

Nou’nn travay dir pandan plizir lane, ek nou pa ti pran letan pou repoze kouma bizin. Lesli ti koumans santi li extra fatige. Sa lepok-la, nou pa ti kone ki li ti fatige akoz enn maladi ki apel fibromialzi. Kan nou’nn konn sa, nou’nn pans pou retourn Kanada. Kan nou ti gagn linvitasion pou asiste Lekol pou Bann Manb Komite Biro Nasional dan Patterson, New York, mo ti panse ki nou pa ti pou kapav ale. Selman, nou ti bien priye Zeova lor la, ek nou ti aksepte linvitasion-la. Zeova ti beni nou desizion, parski se pandan ki nou ti pe asiste sa lekol-la ki Lesli inn reisi gagn bann tretman medikal ki li ti bizin. Gras-a sa, nou’nn reisi repran nou servis apre.

Apre ki nou ti retourn Estoni, enn tanto an 2008 bann frer biro mondial ti sonn mwa ek zot ti demann mwa si mo ti pou aksepte al servi dan Kongo. Mo ti etone, sirtou parski mo ti bizin donn zot mo repons landemin. Sa zour-la, mo pa ti dir nanye Lesli parski mo ti kone ki li pa ti pou dormi aswar. Selman, se mwa ki pa’nn dormi aswar, parski mo’nn priye Zeova akoz bann laper ki mo ti ena konsernan Lafrik.

Kan landemin mo ti dir Lesli, li ti dir: “Zeova pe invit nou pou al Lafrik. Kouma nou pou kone ki nou pa kontan sa si nou pa ale?” Alor, apre 16 an dan Estoni, nou’nn pran enn avion ek nou’nn al Kinshasa, dan Kongo. Dan Betel laba, ena enn zoli zardin  ek nou ti santi nou anpe ladan. Enn parmi bann premie kitsoz ki Lesli ti met dan nou lasam, se enn kart ki li ti ena ar li depi ki nou’nn kit Kanada. Lor kart-la ti ekrir, “Fleri kot plant twa.” Apre ki nou’nn zwenn bann frer ek ser, ki nou’nn koumans bann letid Labib, ek ki nou’nn apresie nou travay kouma misioner laba, nou lazwa dan nou servis pou Zeova inn ogmante. Avek letan, nou’nn gagn privilez pou vizit 13 lezot pei Lafrik. Nou’nn gagn lokazion pou zwenn diferan kalite dimounn ek pou aprann konn zot. Bann laper ki mo ti ena o-koumansman konsernan Lafrik, ti disparet. Nou vremem remersie Zeova ki Li’nn avoy nou servi dan Lafrik.

Dan Kongo, bann frer ek ser ti fer nou gout bann manze ki mo ti panse zame mo pa ti pou kapav manze, kouma par exanp bann insekt. Me kan nou ti trouve kouma zot vremem apresie sa bann manze-la, nou ti goute, ek nou vremem kontan ki nou’nn fer li.

Nou ti al dan les Kongo pou ankouraz nou bann frer ek ser, ek pou donn zot bann kitsoz ki zot ti bizin. Dan sa bann landrwa-la, bann solda rebel ti pe atak bann vilaz, ek zot ti violan anver bann fam ek bann zanfan. Nou bann frer ek ser laba ti bien mizer. Selman, kan nou ti trouve ki kantite zot kontan Zeova, zot fidel anver so lorganizasion, ek zot ena konfians dan lesperans rezireksion, sa ti tous nou leker. Zot lexanp ti pous nou pou reflesi lor kifer nou pe servi Zeova, ek sa ti ankouraz nou pou ogmant nou lafwa. Sertin parmi nou bann frer ek ser ti perdi zot lakaz ek zot bann karo. Sa ti rapel mwa ki nou kapav perdi nou bann dibien materyel bien vit, ek ki nou lamitie avek Zeova pli inportan ki ninport ki kitsoz. Mem si zot ti pe pas par bann sitiasion difisil, nou bann frer pa ti plengne. Zot latitid ti ankouraz nou pou andir nou bann difikilte ek nou bann problem lasante ar kouraz.

Apre sa, nou ti gagn enn lot sirpriz. Bann frer ti demann nou pou al servi dan biro nasional Hong Kong. Zame nou ti panse ki nou ti pou al viv dan Lazi! Me kan nou’nn mazine kouma Zeova inn beni nou dan tou bann lafektasion ki nou ti gagne avan, nou ti aksepte pou al Lazi. An 2013, nou ti  bien plore kan nou ti kit nou bann bon kamarad ek nou zoli pei Lafrik, pou al dan enn pei ki nou pa kone.

Sa ti enn gran sanzman pou nou pou al res Hong Kong, parski dan sa lavil-la ti ena boukou dimounn ek zot ti sorti dan lemond antie. Anplis, Kantone ti enn lang bien difisil pou aprann. Me bann frer ek ser ti bien akeyir nou, ek nou ti bien kontan manz bann manze ki ena laba. Biro nasional Hong Kong ti pe koumans fer pli boukou travay. Selman, pri bann terin ek bann batiman ti pe ogmante bien vit. Akoz sa, Komite Santral ti pran desizion pou vann laplipar bann dibien ki nou ti ena dan pei. Inpe apre sa, an 2015, Lesli ek mwa nou ti al kontign nou servis dan Kore Disid. Nou ti bizin aprann koz enn lot langaz difisil. Me mem si nou pa ti konn tro koz Koreen, bann frer ek ser ti ankouraz nou kan zot ti dir nou ki nou ti pe fer bien.

Li pa touletan fasil pou fer bann nouvo kamarad. Me nou’nn remarke ki, kan nou montre lospitalite anver lezot, li pli fasil pou aprann konn zot. Nou’nn remarke osi ki, ninport kotsa nou’nn ale, nou bann frer pa sa kantite diferan-la. Zeova inn kree nou dan enn fason ki nou kapav ouver nou leker ar lezot ek montre zot ki nou kontan zot.​—2 Kor. 6:11.

Nou’nn konpran ki nou bizin aksepte bann dimounn, parey kouma Zeova aksepte zot, ek ki nou bizin rod bann sign ki montre ki Zeova kontan nou ek ki Li pe diriz nou. Ninport kan nou dekouraze, ouswa si nou pe demann noumem si lezot kontan nou, nou relir bann ti kart ankourazan ouswa bann let ki nou bann kamarad inn avoy nou. Nou’nn trouve osi kouma Zeova reponn nou bann lapriyer, kouma Li montre ki Li kontan nou, ek kouma Li donn nou lafors pou nou kontigne.

Pandan tou sa bann lane-la, Lesli ek mwa nou’nn aprann ki li bien inportan ki nou pas letan ar nou kamarad, mem si nou bien okipe. Nou’nn aprann osi ki nou bizin riye ek aksepte kan nou fer bann erer, sirtou si nou pe aprann enn lot lang. Ek toule aswar, nou rod enn kitsoz ki nou’nn apresie sa zour-la, pou nou remersie Zeova pou sa.

O-koumansman, mo ti panse ki zame mo pa ti pou kapav fer travay enn misioner, ouswa viv dan enn lot pei. Selman, mo’nn trouve ki pena nanye ki inposib kan Zeova soutenir twa, ek sa inn donn mwa boukou lazwa. Sa fer mwa rapel bann parol ki profet Zeremi ti dir: “To’nn anbet mwa, A! Zeova.” (Zer. 20:7) Wi, Zeova inn fer nou plizir sirpriz, ek Li’nn donn nou boukou benediksion ki nou pa ti atann. Li’nn mem realiz mo rev pou vwayaz par avion. Kan mo ti tipti, mo ti anvi vizit plizir pei. Gras-a Zeova, nou’nn vizit pli boukou pei ki sa; nou’nn vizit plizir Betel lor sink diferan kontinan. Mo bien rekonesan osi anver Lesli, ki’nn soutenir mwa pandan tou sa bann lane-la.

Lesli ek mwa, nou touletan fer zefor pou rapel ki nou pe fer tousala parski nou kontan Zeova. Bann benediksion ki nou pe gagne azordi, se zis enn avangou lavi ki Zeova pou donn nou kan Li pou ‘ouver so lame e rasazie tou kreatir.’​—Ps. 145:16.