1, 2. (a) Ki sitiasion boukou zanfan imigre bizin fer fas? (b) Ki bann kestion sa lartik-la pou examine?

JOSHUA, zanfan enn fami imigre, dir: “Depi ki mo tipti, mo koz lang mo bann paran dan lakaz ek dan kongregasion. Me kan mo ti rant lekol, mo ti koumans kontan lang ki koze dan pei. De-trwa lane apre, mo ti nepli abitie ar lang mo bann paran. Mo ti nepli konpran bann renion, ek mo ti santi ki mo pa ti ena mem kiltir ki mo bann paran.” Boukou zenn retrouv zot dan mem sitiasion ki Joshua.

² Azordi, plis ki 240,000,000 dimounn pa viv dan pei ki zot inn ne. Si to enn paran ki’nn imigre, kouma to kapav fer to maximum pou ki to zanfan aprann kontan Zeova ek “mars dan laverite”? (3 Zan 4) Ek kouma nou kapav ed bann imigre ek zot zanfan?

3, 4. (a) Kouma bann paran kapav donn enn bon lexanp zot zanfan? (b) Ki kitsoz fode pa bann paran atann ki zot zanfan fer?

³ Paran, si to anvi ki to zanfan ena enn bon relasion avek  Zeova ek viv pou touletan, li inportan ki to donn enn bon lexanp to zanfan. Kan to zanfan trouv twa pe ‘rod Rwayom Bondie avan tou kitsoz,’ li pou aprann pou kont lor Zeova pou seki li bizin toulezour. (Matie 6:33, 34, NW.) Fer to servis pou Zeova vinn to priorite olie ki to rod pli boukou kitsoz materyel. Viv dapre to mwayin ek evit ena det. Rod “trezor dan lesiel,” setadir faver Zeova, olie ki to rod larzan ouswa “laglwar bann zom.”—Lir Mark 10:21, 22; Zan 12:43, NW.

⁴ Fode zame ki to telman okipe ki to pena letan pou to bann zanfan. Fer zot kone ki to bien fier kan zot desid pou met Zeova an premie dan zot lavi, olie ki zot rod laglwar ouswa larzan, ki li pou zot ouswa pou twa. Fode pa to panse ki bann zanfan bizin fer tou pou ki zot paran ena enn lavi konfortab. Sa fason panse-la pa Kretien. Rapel sa: “Pa bann zanfan ki ramas larzan pou zot paran, me paran ki pran swin zanfan.”—2 Korintien 12:14.

5. Kifer bann paran bizin koz lor Zeova souvan ar zot zanfan?

⁵ Parey kouma Labib ti predir, dimounn “dan tou lang bann nasion” pe vinn dan lorganizasion Zeova. (Zekaria 8:23) Me si to zanfan pa konpran to lang bien, li kapav difisil pou to ansegn zot laverite. Zotmem bann etidian Labib pli inportan ki to kapav ena, ek kan zot “arive konn” Zeova, zot pou kapav gagn lavi pou touletan. (Zan 17:3, NW.) Pou ki to zanfan aprann bann lansegnman Zeova, to bizin “koz sa ar zot” souvan.—Lir Deteronom 6:6, 7. *

6. Ki lavantaz to zanfan pou ena si li aprann to lang? (Get zimaz dan koumansman lartik.)

⁶ Sirman to zanfan pou aprann lang ki koze dan pei ar lezot ek dan lekol. Me li pou aprann to lang kan to koz avek li regilierman. Kan to zanfan koz to lang, li pou pli fasil pou ki li koz ar twa ek dir twa seki li resanti. Me ena lezot lavantaz. Kan to zanfan koz plizir lang, sa amelior so kapasite pou reflesi ek sa ed li pou konpran fason panse lezot. Sa kapav osi donn li lokazion pou fer plis dan so minister. Carolina, zanfan enn fami imigre, dir: “Form parti enn kongregasion ki koz enn lot lang ti extra interesan. Ede kot bizin led, top net!”

7. Ki to kapav fer si langaz enn difikilte dan to fami?

⁷ Selman, kan zanfan bann imigre aprann kiltir ek lang ki koze dan pei, sertin parmi zot nepli anvi ouswa mem nepli kapav kominik dan lang zot paran. Paran, si to zanfan dan sa sitiasion-la, eski to kapav omwin aprann  inpe lang ki koze dan pei? Li pou pli fasil pou to grandi to zanfan dan laverite si to konpran zot bann konversasion, zot divertisman, zot bann devwar lekol ek si to kapav koz ar zot profeser. Li vre ki pou aprann enn nouvo lang sa demann letan, zefor, ek limilite. Me li vo lapenn to fer li. Par exanp, si to zanfan vinn sourd, eski to pa pou esey aprann langaz sign pou to kapav kominik ar li? Alor, si enn zanfan koz pli bien enn lot lang, eski to pa dakor ki so paran bizin fer zefor pou aprann sa lang-la? *—Get not.

8. Kouma to kapav ed to zanfan si to pa koz bien lang ki koze dan pei?

⁸ Li kapav bien difisil pou sertin paran ki’nn imigre pou koz bien nouvo lang ki zot zanfan inn aprann. Akoz sa, li kapav difisil pou bann paran ed zot zanfan pou konpran “bann lekritir sakre.” (2 Timote 3:15, NW.) Si to dan sa sitiasion-la, to kapav kanmem ed to zanfan pou konn Zeova ek pou kontan Li. Enn ansien ki apel Shan rakonte: “Nou mama ti tousel kan li ti elve nou, ek li pa ti konpran bien lang ki nou ti koze. Mo bann ser ek mwa, nou osi nou pa ti konpran bien lang ki li ti koze. Me kan nou ti trouv li etidie, priye, ek fer tou seki li kapav pou fer ladorasion an fami sak semenn, nou ti konpran ki aprann konn Zeova ti enn kitsoz bien inportan.”

9. Kouma bann paran kapav ed zot zanfan ki kitfwa bizin etidie dan de lang diferan?

⁹ Sertin zanfan kitfwa pou bizin aprann konn Zeova dan de lang diferan. Kifer? Parski zot koz enn lang dan lekol, ek enn lot lang dan lakaz. Akoz sa, sertin paran servi bann piblikasion, bann lanrezistreman odio, ek bann video dan toulede lang. Li kler ki bann paran imigre bizin travay dir pou ki zot zanfan vinn pros ar Zeova.

10. (a) Kisannla dan lafami bizin deside dan ki kongregasion zot pou ale? (b) Ki bann sef fami bizin fer avan ki zot pran enn desizion?

¹⁰ Kan bann “etranze” res lwin ar enn kongregasion ki servi zot lang, zot bizin al dan enn kongregasion ki servi lang ki koze dan pei. (Psom 146:9) Me si ena enn kongregasion ki servi lang sa bann imigre-la ek ki li pa lwin, sef fami bizin deside ki kongregasion pou pli bon pou so fami. Me avan ki li pran enn desizion, li pou bizin bien reflesi ek priye lor la. Li pou bizin osi koz sa ar so madam ek so bann zanfan. (1 Korintien 11:3) Lor ki kitsoz li pou bizin reflesi? Ki prinsip Labib kapav ed li pou pran enn bon desizion?

11, 12. (a) Kouma lang ki servi dan renion kapav ena enn bon lefe lor enn zanfan? (b) Kifer sertin zanfan pa anvi aprann lang zot paran?

¹¹ Bann paran bizin pran kont seki zot bann zanfan vremem bizin. Pou ki bann zanfan konpran bien bann verite  ki ena dan Labib, zot bizin plis ki de-trwa lertan lansegnman Biblik ki gagne dan renion sak semenn. Me reflesi lor la: Kan bann zanfan asiste renion dan lang ki zot konpran pli bien, zot pou plis tir profi. Kitfwa zot pou aprann plis ki seki zot paran panse. Me li pa pou parey pou enn zanfan ki pa bien konpran lang ki pe servi dan renion. (Lir 1 Korintien 14:9, 11.) Ek sa pa vedir ki enn zanfan pou kontign reflesi ek exprim so bann santiman dan so lang maternel. An realite, sertin zanfan kapav aprann pou donn bann komanter, fer bann demonstrasion ek bann diskour dan lang zot paran, san ki zot vremem exprim zot panse ek zot santiman.

¹² Anplis, se pa zis langaz ki tous leker enn zanfan. Joshua, ki nou ti mansione pli lao, ti remark sa. So ser ki apel Esther dir: “Bann zenn zanfan inflianse par lang, kiltir ek relizion zot paran.” Si bann zanfan santi ki zot pena mem kiltir ki zot paran, kitfwa zot pa pou anvi aprann lang ek relizion zot paran. Ki bann paran imigre kapav fer?

13, 14. (a) Kifer enn koup imigre ti amenn zot zanfan dan enn kongregasion ki ti servi lang ki koze dan pei? (b) Kouma sa bann paran-la ti reisi gard enn bon relasion avek Zeova?

¹³ Bann paran Kretien fer lintere zot zanfan pas avan zot prop lintere. (1 Korintien 10:24) Samuel, papa Joshua ek Esther, dir: “Mo madam ek mwa, nou ti obzerv nou bann zanfan pou kone dan ki lang laverite ti pou plis tous zot leker ek nou ti priye pou gagn sazes Zeova. Seki ti pli bon pou nou bann zanfan pa vedir ti pli bon pou nou. Me kan nou ti trouve ki bann renion dan nou lang pa ti ed zot boukou, nou ti desid pou al dan enn kongregasion ki servi lang ki koze dan pei. Regilierman, nou ti asiste bann renion ek nou ti partisip dan minister ansam. Nou ti osi invit bann frer ek ser dan sa kongregasion-la pou enn repa ouswa pou fer bann sorti ansam. Tousala ti ed nou bann zanfan pou konn bann frer ek ser, ek pou trouv Zeova, pa zis kouma zot Bondie, me kouma zot Papa ek zot Kamarad. Seki ti pli inportan pou nou se spiritialite nou zanfan, pa ki zot aprann bien nou lang.”

¹⁴ Samuel azoute: “Pou nou res for lor plan spiritiel, mo madam ek mwa, nou ti asiste osi bann renion dan nou lang. Nou ti bien okipe ek nou ti fatige. Me nou remersie Zeova parski Li’nn beni nou bann zefor ek nou bann sakrifis. Azordi, nou trwa zanfan pe servi Zeova aplintan.”

15. Kifer Kristina ti panse ki li ti pou plis progrese dan enn kongregasion ki servi lang ki koze dan pei?

¹⁵ Amezir ki zot grandi, kitfwa bann zanfan pou realize ki zot pou pli kapav servi Zeova dan enn kongregasion ki servi lang ki zot konpran pli bien. Dan sa sitiasion-la, fode pa bann paran panse ki zot zanfan pe rezet zot. Kristina rakonte: “Mo ti konpran inpe lang mo bann paran, me kan ti servi sa lang-la dan renion, sa ti tro difisil pou mwa. Kan mo ti ena 12 an, mo ti asiste enn lasanble dan lang ki mo ti aprann dan lekol. Pou premie fwa dan mo lavi, mo ti konpran ki seki mo ti tande ti laverite!  Enn lot kitsoz ki ti sanz mo lavi se kan mo ti koumans priye dan lang ki mo ti aprann dan lekol. Asterla, mo ti kapav koz avek Zeova ar tou mo leker!” (Zistwar Bann Apot 2:11, 41) Kan Kristina ti gagn 18 an, li ti koz sa ar so bann paran ek li ti desid pou al dan enn kongregasion ki ti servi lang ki koze dan pei. Li dir: “Kan mo finn aprann konn Zeova dan lang ki mo ti aprann dan lekol, sa ti motiv mwa.” Bien vit, Kristina ti vinn enn pionie permanan ek li bien zwaye.

16. Kifer Nadia kontan ki li finn res dan enn kongregasion ki koz enn lang etranze?

¹⁶ Zenn, eski to ti pou prefer asiste renion dan enn kongregasion ki servi lang ki koze dan pei? Si to reponn wi, demann tomem kifer. Si to sanz kongregasion, eski se parski sa pou ed twa vinn pli pros ar Zeova? (Zak 4:8) Ouswa eski se parski to pa anvi ki to bann paran vey tou seki to fer, ouswa parski to pa anvi fer okenn zefor? Nadia, enn ser ki pe servi dan Béthel, rakonte: “Kan nou ti adolesan, mwa ek mo bann frer ek ser, nou ti anvi al dan enn kongregasion ki servi lang ki koze dan pei.” Me so bann paran ti kone ki si zot ti fer sa, relasion ki bann zanfan-la ti ena avek Zeova ti pou pati. Nadia dir: “Azordi, nou bien rekonesan anver nou bann paran ki finn fer boukou zefor pou fer nou aprann zot lang ek ki finn ankouraz nou pou res dan enn kongregasion ki koz enn lang etranze. Sa finn fer nou gagn bann benediksion ek finn permet nou gagn boukou lokazion pou ed lezot pou konn Zeova.”

17. (a) Kisannla Zeova finn donn responsabilite pou grandi bann zanfan? (b) Kouma bann paran kapav gagn led pou ansegn zot zanfan laverite?

¹⁷ Zeova finn donn bann paran responsabilite pou ansegn zot zanfan laverite. Li pa finn donn sa responsabilite-la granper-granmer, ni personn. (Lir Proverb 1:8 *; 31:10, 27, 28. *) Me kanmem sa, bann paran ki pa konn lang ki koze dan pei kitfwa pou bizin led pou tous leker zot zanfan. Kan bann paran demann led, sa pa vedir ki zot pe negliz zot responsabilite pou grandi zot zanfan. Okontrer, sa kapav form parti dan ledikasion ki zot donn zot zanfan dan “disiplinn ek lansegnman [Zeova, NW].” (Efezien 6:4) Par exanp, bann paran kapav demann bann ansien dan kongregasion bann konsey lor fason pou diriz ladorasion an fami ek rod zot led pou trouv bann bon kamarad pou zot bann zanfan.

18, 19. (a) Kouma lezot Kretien kapav ed bann zenn? (b) Ki bann paran bizin kontign fer?

¹⁸ Detanzantan, bann paran kapav invit lezot fami dan zot ladorasion an fami. Sa kapav ed zot zanfan. Anplis, bien souvan bann zenn aprann ar lezot Kretien kan zot al prese ar zot ek fer lezot kitsoz ansam. (Proverb 27:17) Shan, ki nou ti mansione avan, dir: “Mo rapel bien bann frer ki ti ed mwa. Kan zot ti ed  mwa pou prepar bann devwar ki mo ti gagne pou renion, touletan mo ti aprann boukou ar zot. Ek mo ti bien apresie bann ti plan ki nou ti mete ansam.”

¹⁹ Biensir, bann frer ek ser ki bann paran swazir pou ed zot zanfan, bizin touletan ankouraz bann zanfan-la pou respekte zot paran. Sa bann frer ek ser-la kapav fer sa kan zot koz an bien lor bann paran, ek kan zot pa rod pran responsabilite sa bann paran-la pou elve zot zanfan. Ek bann ki pe ed sa bann zanfan-la bizin evit tou kondwit ki kapav donn bann dimounn dan kongregasion ouswa andeor linpresion ki zot ena enn move moralite. (1 Pier 2:12) Mem si kitfwa bann paran rod led ar lezot, kanmem sa, se zot responsabilite pou ansegn zot zanfan laverite. Zot bizin vey bien lor led ki lezot Kretien pe donn zot zanfan.

20. Kouma bann paran kapav ed zot zanfan pou vinn bann fidel serviter Zeova?

²⁰ Paran, priye pou gagn led Zeova, ek fer to maximum. (Lir 2 Kronik 15:7. *) Fer lamitie ki to zanfan ena ar Zeova pas avan to prop lintere. Fer tou seki to kapav pou ki Parol Bondie tous leker to zanfan. Zame pa perdi lespwar ki to zanfan kapav vinn enn serviter Zeova. Kan to zanfan swiv Parol Bondie ek swiv to bon lexanp, to pou ena mem santiman ki lapot Zan ki ti dir konsernan so bann zanfan spiritiel: “Pena nanye ki fer mwa pli kontan ki tann dir ki mo bann zanfan pe mars dan laverite.”—3 Zan 4.