BIOGRAFI
Mem si Mo Sourd sa Pa Finn Anpes Mwa Ansegn Lezot
Mo finn pran batem an 1941. Mo ti ena 12 an. Me se apartir 1946 ki mo finn vremem konpran laverite ki ena dan Labib. Kifer? Les mo rakont zot mo zistwar.
DAN bann lane 1910, mo bann paran ti kit Tbilissi, dan Géorgie, pou al res dan Canada. Zot ti res dan enn ti lakaz lor enn laferm pre ar Pelly, enn vilaz dan Saskatchewan, dan lwes Canada. Mo’nn ne an 1928. Mo bann paran ti ena sis zanfan ek momem dernie. Mo papa inn mor sis mwa avan mo nesans, ek mo mama inn mor kan mo ti ankor enn tibaba. Inpe letan apre, mo gran ser, Lucy, inn mor. Li ti ena 17 an. Alor, se mo tonton Nick ki finn elve nou.
Enn zour, kan mo ti ankor tipti ek mo ti fek koumans marse, mo fami ti trouv mwa pe ris lake enn parmi bann seval ki nou ti ena. Zot ti gagn per tansion seval-la donn mwa enn kout sabo, alor zot ti kriye for pou ki mo aret zwe ar lake-la. Me mo ti pe donn zot ledo ek mo pa ti tann zot kriye. Erezman, mo pa ti gagn nanye. Me sa zour-la, mo fami finn konpran ki mo ti sourd.
Enn kamarad ar nou fami ti dir ki li ti pou pli bon ki mo al lekol avek lezot zanfan ki sourd. Alor, Tonton Nick ti avoy mwa dan enn lekol pou bann sourd dan Saskatoon, ki trouv dan Saskatchewan. Sa lekol-la ti bien lwin ar mo lakaz ek mo ti ena zis sink an. Sa ti fer mwa bien per. Mo ti kapav vizit mo fami zis pandan vakans ek pandan lete. Avek letan, mo ti aprann langaz sign ek mo ti bien kontan zwe ar bann lezot zanfan.
MO APRANN BANN VERITE KI ENA DAN LABIB
An 1939, mo gran ser Marion ti marye ar Bill Danylchuck, ek zot ti okip mwa ek mo ser, Frances. Zotmem ti premie dan mo fami ki ti koumans etidie ar bann Temwin Zeova. Pandan lete, kan mo ti an vakans, zot ti fer zot maximum pou partaz avek mwa seki zot ti pe aprann dan Labib. Li pa ti fasil pou zot kominik ar mwa parski zot pa ti konn langaz sign. Me kanmem sa, zot ti trouve ki mo ti extra kontan seki mo ti pe aprann lor Zeova. Mo ti konpran ki seki zot ti pe fer, ti ena enn lien ar Labib. Alor, kan zot ti al prese, mo ti al ansam ar zot. Inpe letan apre, mo ti anvi pran batem. Le 5 Septam 1941, Bill ti batiz mwa dan enn tink an metal ranpli ar delo. Delo-la ti extra glase!
An 1946, avek enn group dimounn ki sourd pou enn lasanble dan Cleveland, dan Ohio
An 1946, kan mo ti retourn lakaz pandan lete, nou ti asiste enn lasanble dan Cleveland, ki trouv dan Ohio, dan l’États-Unis. Premie zour lasanble, mo bann ser ti pran bann not pou ki mo reisi swiv. Me deziem zour, mo ti extra kontan kan mo ti aprann ki ti ena enn group dimounn ki sourd dan sa lasanble-la ek ki ti ena enn interpret langaz sign avek zot. Anfin, mo ti kapav profit lasanble, ek sa ti extraordiner pou vremem konpran seki Labib ansegne!
MO ANSEGN LAVERITE
Sa lepok-la, Deziem Lager Mondial ti fek fini, ek boukou dimounn ti anvi montre ki zot ti fidel anver zot pei. Me kan mo ti retourn lekol apre lasanble, mo ti determine pou res fidel ar Zeova. Alor, mo ti aret salie drapo, sant lim nasional, ek partisip dan bann fet. Mo ti osi aret al legliz ar bann lezot zelev. Bann profeser lekol pa ti kontan ditou. Zot ti esey persekit mwa ek zot ti koz manti ar mwa pou fer mwa sanz lide. Mo bann kamarad lekol ti trouv seki ti pe arive, ek gras-a sa, mo ti gagn boukou lokazion pou pres ar zot. Sertin parmi mo bann kamarad lekol, kouma Larry Androsoff, Norman Dittrick, ek Emil Schneider, ti aksepte laverite ek zot ankor pe servi Zeova.
Kan mo ti vizit bann lezot lavil, mo ti touletan fer enn zefor spesial pou pres ar bann dimounn sourd. Dan Montréal, par exanp, mo ti al dan enn plas kot bann dimounn sourd ti rasanble. Laba, mo ti pres ar Eddie Tager, enn zenn zom ki ti dan enn gang. Ziska so lamor lane dernie, li ti dan kongregasion langaz sign ki trouv dan Laval, dan Quebec. Mo ti zwenn osi enn zenn garson ki ti apel Juan Ardanez. Parey kouma bann Bereen dan 1e siek, li ti fer bann resers pou fer sir ki seki li ti pe aprann ti sorti dan Labib. (Zistwar Bann Apot 17:10, 11) Li osi, li ti vinn dan laverite, ek ziska so lamor, li ti servi kouma enn ansien dan Ottawa, ki trouv dan Ontario.
Temwaniaz lor semin dan koumansman bann lane 1950
An 1950, mo ti al res Vancouver. Mem si mo extra kontan pres ar bann dimounn ki sourd, zame mo pa pou bliye seki ti arive kan mo ti rann temwaniaz lor semin ar enn madam ki pa ti sourd. Li ti apel Chris Spicer. Li ti aksepte enn labonnman ar nou bann magazinn ek li ti anvi ki mo zwenn so mari ki apel Gary. Mo ti al vizit zot, ek nou ti gagn enn long konversasion. Kouma? Nou ti ekrir bann ti not ki nou ti sanz ar nou kamarad. Nou pa ti zwenn ditou apre sa
vizit-la ziska ki, de-trwa lane apre, zot ti vinn dir mwa bonzour dan enn lasanble dan Toronto, ki trouv dan Ontario. Gary ti pran batem sa zour-la. Sa lexperyans-la ti fer mwa konpran ki kantite li inportan ki nou kontign prese, parski nou pa kone si sa kikenn ar ki nou’nn prese la kapav vinn dan laverite enn zour.Plitar, mo ti retourn dan Saskatoon. Laba, mo ti zwenn enn madam ki ti demann mwa pou fer letid ar so de tifi ki ti sourd, Jean ek Joan Rothenberger. Zot ti de ser zimel. Zot ti al mem lekol ki mo ti ale. Bien vit, sa de tifi-la ti partaz seki zot ti aprann lor Labib ar zot bann kamarad lekol. Finalman, sink zelev dan zot klas ti vinn bann Temwin Zeova. Enn parmi zot ti apel Eunice Colin. Premie fwa ki mo ti zwenn Eunice se pandan mo dernie lane dan lekol. Enn zour, li ti donn mwa enn bout bonbon ek li ti demann mwa si mo ti anvi vinn so kamarad. Plitar, li ti vinn enn dimounn inportan dan mo lavi. Li ti vinn mo madam!
Avek Eunice an 1960 ek an 1989
Kan mama Eunice ti aprann ki so tifi ti pe etidie Labib, li ti demann direkter lekol pou konvink Eunice pou aret etidie. Mem si direkter lekol ti pran bann liv letid Eunice ek ti esey fer li aret etidie, Eunice ti determine pou res fidel ar Zeova. Kan li ti anvi pran batem, so bann paran ti dir li: “Si to vinn enn Temwin Zeova, to pou bizin kit lakaz!” Alor, kan li ti ena 17 an, Eunice ti kit so lakaz ek li ti al res kot enn fami Temwin. Li ti kontign etidie ek apre, li ti pran batem. Kan nou’nn marye an 1960, so bann paran pa ti vinn nou maryaz. Me selman, avek letan, zot finn ena plis respe pou nou akoz nou bann krwayans ek fason ki nou ti elve nou bann zanfan.
ZEOVA FINN PRAN MWA SWIN
Mo garson Nicholas ek so madam, Deborah, pe servi dan Béthel Londres
Antan ki bann paran ki sourd, sa pa ti fasil pou elve set garson ki pa sourd. Me nou ti fer an sort ki zot konpran langaz sign, pou ki nou kapav kominik bien ar zot ek ansegn zot laverite. Bann frer ek ser dan kongregasion ti ed nou boukou. Par exanp, enn paran ti ekrir nou enn ti mo pou dir nou ki enn parmi nou bann garson ti pe zoure dan Lasal. Deswit nou ti okip sa sitiasion-la. Kat parmi nou bann garson, James, Jerry, Nicholas, ek Steven, pe servi kouma ansien, ek zot pe servi Zeova avek fidelite ar zot madam ek zot zanfan. Nicholas ek so madam, Deborah, pe ede dan tradiksion langaz sign dan biro nasional l’Angleterre. Steven ek so madam, Shannan, form parti dan enn lekip tradiksion langaz sign dan biro nasional l’États-Unis.
Mo bann garson James, Jerry, ek Steven, ek zot bann madam pe soutenir travay predikasion dan langaz sign dan diferan fason
Malerezman, enn mwa avan nou 40em laniverser maryaz, Eunice inn mor akoz enn kanser. Pandan sa moman difisil la, so lafwa dan rezireksion ti ed li pou res for lor plan spiritiel. Mo atann avek inpasians zour ki mo pou retrouv li.
Faye ek James, Jerry ek Evelyn, Shannan ek Steven
An Fevriye 2012, mo ti tonbe ek mo laans ti kase. Apartir sa moman-la, Psom 10:14) Mo bien rekonesan anver tou bann dimounn ki ti dispoze pou ekrir bann not, aprann langaz sign, ek servi kouma interpret pou mwa.
mo’nn rann mwa kont ki mo ti pou bizin ki enn dimounn ed mwa. Alor, mo finn al res kot enn mo bann garson. Asterla, nou dan Kongregasion Langaz Sign Calgary ek mo ankor pe servi kouma ansien. Ofet, se premie fwa ki mo dan enn kongregasion langaz sign! Alor, pandan tou sa bann lane kot mo ti dan enn kongregasion Angle la, kouma mo’nn fer pou ki mo relasion avek Zeova res for? Zeova ti ed mwa. Li’nn tini so promes pou pran swin bann orfelin. (Mo ti asiste lekol pionie an langaz sign kan mo ti ena 79 an
Parfwa, mo pa ti pe konpran seki lezot ti pe dir, ouswa mo ti ena santiman ki personn pa ti kone kouma pou ed enn dimounn ki sourd. Dan bann moman koumsa, kan mo ti santi mwa dekouraze ek ki mo ti anvi bes lebra, mo ti mazinn bann parol ki Pier ti dir Zezi: “Segner, kot nou pou ale? Tomem ki ena parol lavi eternel.” (Zan 6:66-68) Parey kouma boukou frer ek ser sourd ki dan laverite depi lontan, mo finn aprann pou ena pasians. Mo finn aprann pou ena konfians an Zeova ek so lorganizasion, ek sa finn fer mwa gagn boukou benediksion. Asterla, ena boukou piblikasion pou bann dimounn ki sourd, ek mo bien kontan ki mo kapav asiste bann renion ek bann lasanble dan Langaz Sign Ameriken. Toutlong mo lavi, mo finn vremem gagn boukou lazwa ek boukou benediksion kan mo’nn servi nou gran Bondie, Zeova.