MAZINN SA SENN-LA: Ou pe vizit enn mize ki ranpli ar bann vie moniman. Laplipar inn bien abime, inn sanz kouler, ek ena bann gro bout ki manke. Me selman, ena enn ladan ki pa’nn sanze; nou kapav trouv boukou detay bien kler lor sa moniman-la. Ou demann gid-la: “Eski li pli nef ki lezot?” Li dir ou: “Non, li pli vie ki laplipar moniman, ek zame pa finn fer renovasion lor li.” Ou demann li: “Eski finn protez li?” Gid-la dir ou: “Non, okontrer! Li finn fer fas ar bann pli gro divan ek lapli. Ek boukou vwayou finn esey detrir li.” Kitfwa ou etone ek ou demann oumem, ‘Ar ki inn fer sa?’

Dan enn sertin fason, Labib parey kouma sa moniman extraordiner la. Li enn liv ki bien vie, enn parmi bann pli vie. Biensir, ena ankor lezot vie liv. Me parey kouma bann vie moniman ki’nn abime, laplipar sa bann vie liv-la finn bien abime avek bann lane ki’nn pase. Par exanp, seki zot dir lor lasians, li pa an-akor ar bann nouvo linformasion ki ena azordi, bann linformasion ki’nn prouve. Bann konsey ki ena dan sa bann vie liv-la dan domenn medikal pa finn ede, okontrer zot bien danzere. Ek azordi, res zis bann ti bout sa bann vie dokiman-la; sertin parti finn perdi ouswa finn bien abime.

Me selman, Labib li bien diferan. Finn koumans ekrir li inn gagn plis ki 3,500 an, ek pourtan Labib ankor parey. Ek mem si finn ena bann latak kont Labib pandan plizir siek, ti bril li, interdi li, ek mepriz li, seki Labib dir ankor parey. Konpare ar bann nouvo linformasion ki ena azordi, Labib li pa demode. Okontrer, li aprann nou bann kitsoz ki konsern lavenir.​—Get lankadre “Demode Ouswa An-avans lor So Lepok?”

Selman, kitfwa ou pe demann ou, ‘Bann lansegnman ki ena dan Labib, eski li vremem pratik azordi?’ Pou gagn sa repons-la, demann oumem: ‘Ki bann problem pli pir zordi bann dimounn pe bizin fer fas? Lekel ki fer plis per?’ Kitfwa ou pe pans bann lager, polision, krim, ouswa koripsion. Asterla, anou get sertin prinsip ki Labib ansegne. Amezir ki ou pe fer sa, demann oumem, ‘Si bann dimounn ti viv an-akor ar sa bann prinsip-la, eski lemond ti pou pli bon?’

KONTAN LAPE

“Ere zot ki met lape, Bondie pou apel zot so bann zanfan.” (Matie 5:9) “Otan ki posib viv dan lape ar tou dimoun.”​—Romin 12:18.

MIZERIKORD, PARDON

“Ere bann dimounn ki ena mizerikord, parski pou montre mizerikord anver zot.” (Matie 5:7, NW.) “Kontign siport sakenn zot kamarad, ek pardonn sakenn zot kamarad avek tou zot leker mem si kikenn ena kitsoz kont enn lot. Parey kouma Zeova a inn pardonn zot avek tou so leker, fer parey zot osi.”​—Kolosien 3:13, NW.

BANN DIMOUNN DIFERAN RAS VIV DAN LAPE

“Depi enn sel anset li [Bondie] finn fer tou nasion pouki zot abit later anantie.” (Zistwar Bann Apot 17:26) “Bondie tret tou dimoun parey lor mem baz. Bondie aksepte ninport ki dimoun dan ninport ki nasion si li ador li e fer seki drwat.”​—Zistwar Bann Apot 10:34, 35.

RESPEKTE LATER

“Zeova ti pran li ek ti met li dan zardin Edenn pou kiltiv zardin-la ek pou pran li swin.” (Zenez 2:15) Bondie pou “detrir bann ki detrir later.”​—Revelasion 11:18.

ENA LAENN POU LIMORALITE EK LANVI EXAZERE POU GAGN PLIS

“Rezet tou sort kalite lanvi exazere, parski mem kan enn dimounn ena boukou dibien, so lavi pa depann lor bann kitsoz ki li ena.” (Lik 12:15, NW.) “Fode pa ki limoralite sexiel ek ninport ki form linpirte ouswa lanvi exazere pou gagn plis pa mem mansione parmi zot.”​—Efezien 5:3.

ONET, TRAVAY DIR

“Nou anvi res onet dan tou kitsoz.” (Ebre 13:18, NW.) “Fode ki sa kikenn ki kokin-la aret kokin, okontrer li bizin travay dir.”​— Efezien 4:28, NW.

LI INPORTAN ED BANN KI BIZIN LED

“Koz dan enn fason ki pou ankouraz bann ki deprime, soutenir bann ki feb, ena pasians avek tou dimounn.” (1 Tesalonisien 5:14, NW.) “Pran swin bann orfelin ek vev dan zot soufrans.”​—Zak 1:27.

Labib pa zis fer enn lalis sa bann prinsip-la. Dan enn fason pratik, Labib pa zis dir nou seki nou bizin fer me kouma nou bizin fer li. Si pli boukou dimounn ti aplik bann prinsip ki’nn mansione lao, eski ou pa panse ki ti pou ena mwins problem dan lemond azordi? Alor, bann prinsip Labib zot vremem inportan ek itil azordi! Me, ki sa bann lansegnman Labib la kapav fer pou ou asterla?

Enn zour, zom pli saz ki ena ti dir: “Rekonet sazes enn dimounn par so bann aksion.” (Matie 11:19, NW.) Eski ou pa dakor avek sa? Pou teste lasazes, ou bizin gete ki rezilta li pou prodir kan ou aplik li. Alor, kitfwa ou pe demann ou: ‘Si Labib li pratik vremem, eski li pa bizin prodir bann bon rezilta dan mo lavi? Kouma li kapav ed mwa ar bann problem ki mo pe gagne asterla?’ Anou get enn lexanp.

Delphine b ti ena enn lavi bien ranpli, ki ti donn li boukou satisfaksion. Me selman, enn sel kout li’nn gagn bann problem enn deryer lot. So tifi ki ti enn adolesan, inn mor. So maryaz inn kase. Enn kout li’nn koumans gagn bann gro problem finans. Li rakonte: “Mo ti nepli kone kisannla mo ete. Mo ti nepli ena nanye: ni tifi, ni mari, ni lakaz. Mo ti ena linpresion ki mo lavi ti nepli ena okenn sans, nepli kone kisannla mo ete, pena lafors, nepli kone ki pou panse lor lavenir.”

Delphine finn trouve kouma bann parol ki trouv dan Psom 90:10 zot vre: “Nou kapav viv swasanndis-an, katrovin si lasante bon, me se traka ek sagrin ki plin nou lekzistans; bann lane pas vit e nou anvole.”

 Se Labib ki finn ed Delphine pandan so bann sitiasion difisil. Seki Labib finn fer pou li, se extraordiner. Trwa prosin lartik pou montre, kouma Labib finn ed boukou lezot dimounn kan zot finn servi li kouma enn gid pou fer fas ar zot bann problem. Zot finn ena linpresion ki Labib parey kouma sa moniman ki ti dekrir dan koumansman sa lartik-la. Li bien diferan ar enn kantite liv ki’nn vinn vie ek demode. Eski se parski Labib finn fer ar enn kitsoz ki diferan? Eski finalman li ena panse Bondie, ek pa panse bann zom?​—1 Tesalonisien 2:13.

Kitfwa ou osi ou finn rann ou kont ki lavi kourt ek ranpli ar problem. Kan bann problem pe menas pou kraz ou, ver ki ou tourn ou pou gagn rekonfor, led, ek bann bon konsey?

Anou get trwa fason kouma Labib kapav ed ou dan enn fason pratik dan ou lavi. Li kapav montre ou kouma pou

1. evit bann problem kan li posib.

2. regle bann problem kan zot arive.

3. reisi fer fas ar bann sitiasion ki ou pa kapav sanze.

Bann lartik ki swiv pou koz lor sa trwa kitsoz-la.