Pandan plizir milye lane, personn pa ti konn repons sa kestion-la. Pandan tou sa letan-la, bann lepidemi ti touy plizir milyon dimounn. Avek letan, bann siantis finn aprann laverite. Zot finn dekouver ki se souvan akoz bann mikrob, kouma bann bakteri ouswa bann viris, ki bann maladi fane. Sa laverite-la finn ed bann dimounn pou evit bann maladi ek pou gagn bann tretman ki bizin, ek sa finn permet ki bann milyar dimounn viv pli lontan ek ena enn pli bon lasante.

Me ena bann lezot kestion inportan kouma par exanp:

• Kisannla Bondie?

• Kisannla Zezi Kris?

• Ki ete Rwayom Bondie?

• Ki pou arive dan lavenir?

Kan bann milyon dimounn finn konn laverite lor sa bann kestion-la, sa finn amelior zot lavi. Ou osi, ou kapav gagn bann bienfe gras-a sa bann repons-la.

Sirman ou pe demann oumem: ‘Kouma nou kapav trouv laverite lor bann kitsoz?’ Parski deplizanpli li pe vinn difisil pou trouv laverite. Kifer?

Boukou dimounn pena konfians ki bann gouvernman, bann konpagni, ouswa bann media pou dir zot laverite. Li pa fasil pou bann dimounn kone si lezot pe dir zot laverite ouswa si zot pe donn zot lopinion personel, pe kasiet bann linformasion, ouswa mem pe koz manti. Parski boukou dimounn pena konfians ar sakenn so kamarad ek ki laplipar bann linformasion fos, bann dimounn pa dakor ki kitsoz vremem laverite ek kouma pou konpran laverite.

Malgre sa bann obstak-la, li posib pou trouv laverite lor bann kestion inportan dan lavi. Kouma? Se kan ou servi bann teknik ki ou abitie servi dan ou lavi toulezour.

Dan enn sertin sans, toulezour ou rod laverite. Anou pran lexanp Jessica. Li dir: “Mo tifi telman alerzik ar pistas ki mem enn ti tras proteinn pistas kapav touy li.” Jessica bizin kone si manze ki li aste pa danzere pou so tifi. Li azoute: “Premie kitsoz ki mo fer se lir bien lalis bann ingredian. Apre mo fer bann lezot resers ek mo mem kontakte lizinn pou fer sir ki pa finn ena bann proteinn pistas ki’nn melanze par aksidan dan manze-la. Mo examinn osi bann sours ki kapav fer konfians ki pou donn mwa garanti ki konpagni-la ena repitasion pou prepar bann manze kouma bizin.”

Bann resers ki ou fer toulezour pou konn laverite kitfwa pa osi inportan ki pou Jessica, me parey kouma Jessica, ou kapav servi sa metod-la pou gagn repons pou ou bann kestion:

• Gagn tou bann linformasion.

• Fer bann lezot resers.

• Fer sir ki kapav fer konfians ou bann sours.

Ou kapav servi sa metod-la pou rod laverite lor bann kestion inportan dan lavi. Kouma?

Kan Jessica ti pe rod laverite lor Labib, li ti servi mem metod ki li servi pou fer bann resers konsernan bann manze avek ki so tifi alerzik. Li dir: “Enn bon lektir Labib ek bann resers an profonder ti ed mwa pou trouv bann verite ki ena dan Labib.” Parey kouma Jessica, bann milyon dimounn finn aprann seki Labib dir lor sa bann kestion-la:

• Kifer nou lor later?

• Ki arive kan nou mor?

• Kifer nou soufer?

• Ki Bondie pe fer pou aret bann soufrans?

• Kouma nou kapav ena enn lavi fami ere?

Ou kapav gagn bann repons exakt pou sa bann kestion-la ek lezot ankor, kan ou lir Labib ek fer bann lezot resers lor sit www.pr418.com.