Kifer Ena Otan Laenn?
Kifer ena otan laenn dan lemond? Pou sa, nou bizin konpran ki ete laenn, kifer bann dimounn koumans devlop laenn, ek kouma li propaze.
Ki Ete Laenn?
Laenn se pa zis ankoler avek enn dimounn pou enn ti moman. Li plis ki sa. Laenn se kan enn dimounn ena degou pou enn lot dimounn ouswa enn group dimounn.
KIFER BANN DIMOUNN KOUMANS DEVLOP LAENN?
Bann dimounn devlop laenn pou plizir rezon. Bien souvan bann dimounn ena laenn pou enn group dimounn, mem si sa group dimounn la pa’nn fer nanye ki move. Zot konsider sa group dimounn la kouma bann ki fer ditor, ki danzere, ek ki zame pa pou sanze. Souvan konsider zot osi kouma bann nanye ditou, kouma enn menas, ouswa ki la zis pou kree problem. Kitfwa bann ki ena laenn anver lezot, zot ti bann viktim laviolans, linzistis, ouswa zot inn konn lezot move lexperyans ki’nn fer ki laenn inn pran rasinn dan zot leker.
KOUMA LI PROPAZE?
Enn kikenn kapav ena laenn pou enn dimounn mem si zame li’nn zwenn li. Par exanp, souvan bann dimounn pans enn fason akoz zot fami ouswa zot bann kamarad pans koumsa. Alor, si sertin dan zot fami ouswa zot bann kamarad ena laenn pou lezot, bien vit tou dimounn dan group-la kapav koumans pans parey.
Kan nou konpran kouma laenn propaze, nou arive konpran kifer otan dimounn ena laenn dan zot leker. Selman, pou gagn laviktwar lor laenn, nou bizin konpran kouma laenn finn koumanse. Ek Labib ed nou pou konpran sa.
LABIB EXPLIKE KOUMA LAENN FINN KOUMANSE
LAENN PA TI KOUMANSE AVEK BANN IMIN. Li ti koumanse avek enn anz dan lesiel, ki finn opoz li ar Bondie ek ki finn gagn tit Satan Lediab. Labib dir ki Lediab “ti enn asasin” kan li’nn koumans opoz li ar Bondie. Li “enn manter e limem papa bann manter,” ek ziska zordi li pe kontign propaz laenn ek laviolans. (Zan 8:44; 1 Zan 3:11, 12) Labib dekrir li kouma enn kikenn ki bien move, ki bien ankoler, ek ki fer lezot ditor.—Zob 2:7; Revelasion 12:9, 12, 17.
LI BIEN FASIL POU BANN IMIN INPARFE DEVLOP LAENN. Premie zom, Adan, finn swiv move sime Satan. Akoz sa, tou bann imin finn erit pese ek linperfeksion. (Romin 5:12) Premie garson Adan, Kain, ti ena laenn pou so frer Abel ek ti touy li. (1 Zan 3:12) Li vre ki azordi boukou dimounn montre lamour ek konpasion anver lezot. Me akoz pese, laplipar dimounn zot egois, vantar ek gourman, ek sa fer ki laenn propaze.—2 Timote 3:1-5.
DISKRIMINASION KREE LAENN. Lemond kot nou pe viv ankouraz bann dimounn pou pena pitie ek pou fer lezot ditor. Sa fer ki laenn pe kontign fane partou. Diskriminasion, bann prezize, bann parol blesan ek bann aksion violan pe plis ogmante akoz “lemonn antie li dan pouvwar Lemal,” setadir Satan Lediab.—1 Zan 5:19.
Me Labib pa zis koz lor lorizinn laenn, li osi montre kouma laenn pou disparet.
