Mem si li normal ki nou ankoler kan lezot fer nou ditor, Bondie pa dakor ki nou tir vanzans. Plito, Li demann nou pou atann avek pasians ki Li azir parski biento Li pou repar tou bann linzistis.​—Psom 37:7, 10.

Kan bann dimounn tir vanzans, sa fer ki laenn kontign fane. Alor, si kikenn inn bles ou ek fer ou ditor, pa tir vanzans. Esey kontrol ou bann lemosion ek azir dan enn fason kalm. Dan sertin sitiasion, sa kapav fer nou mwins soufer kan nou pas lor seki’nn arive. (Proverb 19:11) Biensir, ena fwa, nou bizin fer kone ki finn arive. Par exanp, dan bann sitiasion ki bien grav, kouma si nou viktim enn krim, nou kapav desid pou raport sa lapolis.

Me ki ou pou fer, si li paret ki pena okenn fason pou rezoud sa problem-la dan lape? Ouswa, ki ou pou fer, si ou’nn fer tou seki ou kapav pou gard lape me nanye pa’nn marse? Pa rod tir vanzans. Kifer? Parski sa kapav fer sitiasion-la vinn pli pir. Dan plas tir vanzans, fer tou pou aret propaz laenn. Ou kapav ena konfians dan fason ki Bondie pou rezoud sa problem-la. “Met to konfians an li, e li pou ed twa.”​—Psom 37:3-5.