Mem si Labib li pa enn liv medikal, li donn bann konsey pratik ki bon pou nou. Sa bann konsey-la kapav ed enn kikenn ki pe fer fas ar bann problem lasante mantal. Anou get detrwa lexanp.

“Se pa bann dimounn ki ena enn bon lasante ki bizin dokter, me bann ki malad.”​—MATIE 9:12.

Labib ankouraz nou pou al get enn dokter kan nou malad. Boukou dimounn ki ena enn problem lasante mantal inn remarke ki kan zot inn fer plis resers lor zot maladi ek kan zot inn al get enn dokter, sa finn bien ed zot.

“Lexersis fizik li itil.”​—1 TIMOTE 4:8.

Kan ou fer bann kitsoz pou amelior ou lasante fizik, sa kapav amelior ou lasante mantal osi. Par exanp, ou kapav fer lexersis regilierman, manz bann manze ki bon pou lasante, ek dormi bien.

“Enn leker ki dan lazwa li enn bon medsinn, me enn dimounn ki so lespri inn abat fer li perdi lafors.”​—PROVERB 17:22.

Kan ou lir bann verse Labib ki ankourazan ek kan ou fixe bann lobzektif ki rezonab, sa pou ed ou pou res zwaye. Si ou res konsantre lor bann bon kitsoz dan lavi ek ki ou ena lespwar ki bann kitsoz pou ameliore dan lavenir, sa  pou ed ou fer fas ar bann problem ki sa maladi-la kapav fer ou gagne.

“Lasazes li avek bann dimounn modes.”​—PROVERB 11:2.

Kitfwa ou pou trouve ki ou pa pou reisi fer tou kitsoz par oumem, alor pa ezite pou aksepte led. Ou bann fami ek ou bann kamarad sirman anvi ede, me kitfwa zot pa kone ki kapav fer. Fer zot kone ki kitsoz pou vremem itil pou ou, me pa atann ki zot fer tou kitsoz pou ou. Okontrer, montre ou rekonesan pou tou seki zot pe fer.

“Mo’nn santi ki ti ena kitsoz ki pa normal ar mwa, alor mo’nn al get enn dokter. Dokter-la inn examinn mwa ek li’nn trouve ki mo gagne. Sa finn permet mwa konpran kifer mo ti pe santi mwa koumsa. Sa inn ed mwa pou rod bann tretman apropriye pou ki mo kapav pran plis swin mo lasante.”​—Nicole, a ki ena enn problem bipoler.

“Mo finn trouve ki kan mo lir Labib regilierman avek mo madam, sa ed mwa pou koumans mo lazourne avek bann panse pozitif ek ankourazan. Ek ena zour kan sa pli difisil, ena enn verse partikilie ki ankouraz mwa .”​—Peter, ki ena enn depresion.

“Li ti difisil pou koz ar lezot lor mo maladi parski mo ti bien onte. Me enn kamarad ki ti bien pros ar mwa ti pran letan pou ekout mwa ek pou esey konpran seki mo ti pe resanti. Li ti fer mwa santi mwa pli bien ek li ti fer mwa santi ki mo pa ti tousel.”​—Ji-yoo, ki ena enn problem alimanter.

“Labib inn ed mwa pou ki mo rezonab lor letan ki mo pase pou travay ek repoze. Sazes ki ena ladan inn ed mwa pou fer fas ar bann problem emosionel ki fatig mwa.”​—Timothy, ki ena maladi OCD.