Ki Bon, Ki Pa Bon: Labib Kapav Vremem Ed Ou
Anou gete kouma Labib finn ed bann milyon dimounn dan kat domenn.
1. Maryaz
Bann dimounn ena diferan lopinion lor maryaz ek lor seki bizin fer pou ena enn maryaz ere.
SEKI LABIB DIR: “Sakenn parmi zot bizin kontan so fam parey kouma li kontan limem; fam-la li, li bizin ena enn profon respe pou so mari.”—Efezien 5:33.
SINIFIKASION: Se Bondie ki’nn kree maryaz. Alor, li kone seki enn koup bizin pou ki zot ere. (Mark 10:6-9) Enn koup pou vremem ere kan mari ek fam pa viv dan enn fason egois, me plito kan zot konsantre zot lor seki sakenn kapav fer pou ranforsi zot maryaz. Enn mari ki kontan so fam pou pran li bien swin ek li pou tret li dan enn bon fason. Ek enn fam pou montre ki li kontan so mari kan li soutenir li ek kan li koz ar li avek respe.
KONSEY LABIB VREMEM MARSE: Quang ek Thi ki res Vietnam, ti panse ki zame zot ti pou ere dan zot maryaz. Quang pa ti pe tret so madam bien. Li dir: “Mo pa ti vremem kas latet ar seki Thi ti resanti ek souvan mo ti pe imilie li.” Thi ti anvi divorse. Li dir: “Mo ti nepli ena konfians ni respe pou mo mari.”
Avek letan, Quang ek Thi inn aprann seki Labib ansegne ek kouma pou aplik Efezien 5:33 dan zot maryaz. Quang dir: “Sa verse-la inn ed mwa konpran ki li inportan ki mo tret Thi bien ek ki mo montre li ki mo kontan li. Ek osi, mo bizin pran li swin lor plan materyel, fizik ek emosionel. Kan mo fer zefor dan sa fason-la, mo madam kontan mwa ek respekte mwa plis.” Ek Thi dir, “Plis mo fer zefor pou aplik Efezien 5:33 ek montre respe anver mo mari, plis li fer mwa santi ki li kontan mwa. Mo santi mwa an sekirite ek anpe.”
Pou gagn plis linformasion lor maryaz, lir magazinn Leve! No. 2 2018 “12 Pwin ki Finn Ed Bann Fami pou Ere” lor jw.org.
2. Kouma pou Tret Lezot
Souvan bann dimounn maltret lezot parski zot sorti dan enn lot pei, enn lot ras, enn lot relizion, zot ena enn diferan laparans, ouswa akoz fason ki zot swazir pou viv zot sexialite.
SEKI LABIB DIR: “Onor tou sort kalite dimounn.”—1 Pier 2:17.
SINIFIKASION: Labib pa ansegn nou pou ena laenn anver lezot akoz zot sorti enn lot pei, akoz zot ras ouswa akoz zot bann omosexiel. Okontrer, li ankouraz nou pou ena respe anver tou dimounn ninport ki pei zot sorti, ki ras zot ete, ki zot ris ouswa pov. (Zistwar Bann Zapot 10:34) Ek mem si nou pa dakor avek seki enn dimounn krwar ouswa avek fason ki li azir, nou bizin touzour tret zot avek zantiyes ek respe.—Matie 7:12.
KONSEY LABIB VREMEM MARSE: Akoz seki ti ansegn li, Daniel ti konsider bann dimounn ki sorti Lazi kouma enn menas pou so pei. Li ti ena laenn pou tou dimounn ki Aziatik ek souvan li ti imilie zot an piblik. Li dir: “Mo ti panse mo pe soutenir mo pei ek mo pa ti trouv mo fason panse ek mo fason azir move.”
Avek letan, Daniel finn aprann seki Labib ansegne. Li dir: “Mo ti bizin sanz net mo fason panse. Mo ti bizin trouv tou dimounn parey kouma Bondie trouve, setadir ninport kotsa nou sorti, nou tou nou parey.” Gete ki Daniel resanti kan li zwenn bann dimounn aster-la. Li dir: “Li pa inportan pou mwa pou kone kotsa zot sorti. Mo kontan tou dimounn parey ek mo ena bann bon kamarad ki sorti dan diferan pei.”
Pou gagn plis linformasion, lir magazinn Leve! No. 3 2020 “Eski Ena enn Remed Kont Prezize?” lor jw.org.
3. Larzan
Boukou dimounn anvi vinn ris parski zot anvi ere ek ena enn pli bon lavenir.
SEKI LABIB DIR: “Sazes li enn proteksion parey kouma larzan li enn proteksion; me lavantaz konesans se sa: Sazes prezerv lavi sa kikenn ki posed li la.”—Ekleziast 7:12.
SINIFIKASION: Nou bizin larzan. Me selman, larzan li pa enn garanti ki nou pou vremem ere ek ki nou pou ena enn bon lavenir. (Proverb 18:11; 23:4, 5) Se zis kan nou pou aplik bann konsey ki Bondie done dan Labib ki nou pou vremem ere ek ki nou pou ena enn bon lavenir.—1 Timote 6:17-19.
KONSEY LABIB VREMEM MARSE: Cardo, enn misie ki res Indonezi, pou vinn ris se samem ki ti so priorite avan. Li dir: “Mo ti ena tou seki laplipar dimounn rode. Mo ti pe vwayaze ek mo ti kapav aste bann kitsoz ki bien ser, bann bel-bel loto ek lakaz.” Me apre, li’nn perdi tou so larzan. Li dir: “Enn kikenn inn anbet mwa ek inn pran tou larzan ki mo ti travay bien dir pou gagne. Pandan boukou lane mo ti galoup deryer larzan. Me alafin, mo ti dekouraze parski mo pa ti ena nanye ek mo ti santi ki mo pena valer.”
Cardo inn koumans aplik bann konsey ki Labib done lor larzan. Li nepli perdi so lenerzi pou galoup deryer kas. Me plito, li swazir pou viv enn lavi sinp. Li dir: “Mo santi ki se aster-la ki mo ena vre rises parski mo ena enn bon relasion avek Bondie. Aswar mo dormi bien ek mo vremem ere.”
Pou gagn plis linformasion lor seki Labib dir lor larzan, lir lartik “Eski Ledikasion ek Kas Kapav Garanti Ou enn Pli Bon Lavenir?” ki trouv dan magazinn Latour Degard No. 3 2021, lor jw.org.
4. Sex
Bann dimounn ena diferan lopinion lor fason ki zot konsider sex.
SEKI LABIB DIR: “Rezet limoralite sexiel. Sakenn parmi zot bizin kone kouma pou kontrol so prop lekor dan enn fason ki sin ek onorab, pa avek bann dezir sexiel exazere ek ki pa kontrole parey kouma bann nasion ki pa konn Bondie ena.”—1 Tesalonisien 4:3-5.
SINIFIKASION: Labib met bann limit lor kouma nou kapav satisfer nou bann dezir sexiel. Limoralite sexiel inplik ladilter, prostitision, relasion sexiel ant bann dimounn ki pa marye, lomosexialite ek gagn relasion sexiel avek bann zanimo. (1 Korintien 6:9, 10) Bann relasion sexiel se enn kado ki Bondie inn rezerve zis pou enn misie ek enn madam ki marye ar zot kamarad.—Proverb 5:18, 19.
KONSEY LABIB VREMEM MARSE: Kylie, enn madam ki res Lostrali dir: “Kan mo ti selibater, mo ti panse ki kan mo ti pou gagn bann relasion sexiel, mo ti pou santi mwa an sekirite ek mo ti pou santi mwa bien parski enn kikenn kontan mwa. Me se lekontrer ki’nn arive. Mo ti santi mwa angwase ek mo pa ti santi ki sa kikenn-la ti kontan mwa.”
Plitar, Kylie inn aprann ek inn swiv bann konsey ki Labib done lor sex. Li dir: “Mo’nn konpran ki bann prinsip ki Bondie done zot la pou protez nou ek anpes nou soufer. Aster-la, mo fer bann kitsoz dan fason ki Zeova demann nou, ek azordi mo ena enn mari ki kontan mwa ek mo santi mwa an sekirite!”
Pou gagn plis linformasion, lir lartik “Ki Labib Dir lor De Dimounn Ki Viv Ansam San ki Zot Marye?” lor jw.org.
Nou Kreater anvi ed nou pou kone ki bon ek ki pa bon. Mem si li pa touletan fasil pou obeir seki Li dir, li vo lapenn pou fer bann zefor. Nou kapav sir ki kan nou swiv so bann konsey, nou pou konn enn zoli lavenir ek nou pou ere.
