Ki Bon, Ki Pa Bon: Se Ou Ki Deside
Fason ki nou swazir pou viv nou lavi aster-la pou ena enn lefe lor nou lavenir. Bondie Zeova konn sa, ek akoz sa li anvi ki nou swiv so bann prinsip.
Zeova anvi ki nou ere ek ki nou santi nou anpe.
“Mwa, Zeova, Momem to Bondie, Momem ki ansegn twa pou to profi, Momem ki gid twa lor semin ki to bizin marse. Si selman to ti pran kont mo bann komannman! Lerla to lape ti pou vinn parey kouma enn larivier, ek to lazistis parey kouma bann vag lamer.”—Izai 48:17, 18.
Antan ki nou Kreater, Bondie kone ki pli bon pou nou. Li anvi nou swiv so bann konsey parski zot pou nou bien. Kan nou swiv Bondie so bann komannman, nou pa pou bizin demann noumem si desizion nou’nn pran li bon. Nou pou touletan pran bann bon desizion, ek nou pou ere ek nou pou santi nou anpe.
Zeova pa demann nou pou fer bann kitsoz ki nou pa kapav fer.
“Sa komannman ki mo pe komann twa pou swiv zordi la li pa tro difisil pou twa, ni tro lwin.”—Deteronom 30:11.
Pou kapav swiv Bondie so bann prinsip, kitfwa nou pou bizin fer bann sanzman dan nou fason panse ek dan nou fason azir. Me selman, Zeova pa demann nou fer bann kitsoz ki nou pa kapav fer. Li nou Kreater ek li konn nou kapasite. Kan nou aprann konn Zeova, nou pou trouve ki “so bann komannman pa lour.”—1 Zan 5:3.
Zeova promet pou ed bann ki swazir pou swiv so bann prinsip.
“Mwa, Zeova to Bondie, mo pe trap to lame drwat bien for, sa Kikenn ki pe dir twa: ‘Pa per. Mo pou ed twa.’”—Izai 41:13.
Nou kapav viv dan fason ki Bondie anvi nou viv parski li pou ed nou. Li servi so Parol Labib pou ankouraz nou ek donn nou lespwar.
Bann milyon dimounn atraver lemond inn trouve ki kan zot swiv bann prinsip ki ena dan Labib, sa inn amelior zot lavi. Kifer ou pa aprann plis lor bann bon konsey ki Labib done? Ou kapav koumans lir brosir Viv Ere pou Touletan! ki baze lor Labib lor jw.org. Sa brosir-la li gratis ek ena sa bann leson-la ladan:
-
Kouma Labib Kapav Ed Ou?
-
Labib Donn Ou enn Lespwar
-
Eski Ou Kapav Vremem Krwar Seki Labib Dir?
Amezir ou aprann seki ena dan Labib, ou pou trouve ki Labib pa’nn demode. Li touletan fiab. (Psom 111:8) Meyer fason ki nou kapav viv nou lavi se kan nou swiv bann prinsip ki ena dan Labib. Me selman, Bondie pa fors personn pou fer sa. (Deteronom 30:19, 20; Zozwe 24:15) Se nou ki deside ki nou pou fer.
