Dan Labib nou aprann ki enn anz rebel, ki plitar ti apel Satan Lediab, ti met an dout drwa ki Bondie ena pou dirize. Satan ti fer nou bann premie paran, Adan ek Ev, krwar ki bann dimounn ti pou pli ere san direksion Bondie. Malerezman, zot ti swiv mem sime ki Satan ek zot ti rebel kont Bondie.​—Zenez 3:1-6; Revelasion 12:9.

Adan ek Ev ti rezet Bondie kouma zot dirizan, akoz sa zot ti perdi zot lakaz, setadir Paradi, ek zot lesperans pou viv pou touletan ek pou ena enn lasante parfe. (Zenez 3:17-19) Zot desizion finn osi ena enn lefe lor zot bann zanfan. Labib dir ki parski Adan finn fer pese, “pese finn vinn dan lemonn, e lamor finn rantre par pese.” (Romin 5:12) Pese finn amenn enn lot move konsekans: “Dimounn finn dominn dimounn pou zot prop maler.” (Ekleziast 8:9) Savedir ki pou touletan ena problem kan bann dimounn dirize par zotmem.

Premie dirizan imin ki mansione dan Labib se Nemrod. Ek li ti rebel kont direksion Bondie. Depi lepok Nemrod, bann dimounn ki ena lotorite finn servi zot pouvwar pou fer dominer ar lezot. Inn gagn 3,000 an, Lerwa Salomon ti ekrir: “Mo ti trouv larm bann dimounn ar ki ti pe fer dominer, ek pa ti ena personn pou konsol zot. Ek bann ki ti pe fer dominer ar zot ti ena pouvwar, ek pa ti ena personn pou konsol zot.”​—Ekleziast 4:1.

Azordi, nou ena bann mem problem. An 2009, l’Organisation des Nation Unies ti dir ki pli ale pe konsider move fason ki bann dimounn dirize kouma “enn parmi bann rezon kifer ena boukou problem dan lemond.”

Lemond bizin bann pli bon dirizan ek enn pli bon gouvernman. Ek se samem ki nou Kreater inn promet!

Bondie finn met anplas enn Rwayom, ouswa enn gouvernman, ki pou ranplas tou lezot gouvernman imin, ek se “limem ki pou regne pou touletan.” (Daniel 2:44) Se pou sa Rwayom-la ki bann milyon dimounn finn priye. (Matie 6:9, 10) Me se pa Bondie ki pou diriz sa gouvernman-la. Okontrer, Li’nn swazir enn kikenn ki ti viv kouma enn imin pou vinn Dirizan sa gouvernman-la. Kisannla Bondie finn swazir?