• Swazir par Bondie. “Mwa ki finn swazir mo lerwa . . . tou bann nasion pou vinn pou twa; . . . e later antie pou vinn to rwayom.”​—Psom 2:6, 8.

• Enn zeritie Lerwa David. “Parski ena enn zanfan ki finn ne pou nou, finn donn nou enn garson . . . Lor tronn David ek so rwayom pa pou ena lafin ni ar kantite pouvwar ki so dominasion pou ena ni ar lape. So rwayom pou bien etabli.”​—Izai 9:6, 7.

• Ne dan Betleem. “O Betleem . . . , dan twa pou sorti sa kikenn ki pou vinn sef lor Izrael . . . Pou rekonet so grander ziska dan bout later.”​—Mishe 5:2, 4.

• Rezete par bann zom ek ti pou touy li. “Ti mepriz li ek nou ti konsider li kouma enn nanye ditou. . . . Li’nn blese pou nou pese; ti kraz li pou nou bann erer.”​—Izai 53:3, 5.

• Resisite ek gagn laglwar. “To pa pou abandonn mwa dan Tom. To pa pou permet ki lekor to fidel pouri. . . . Dan to kote drwat ena boner pou touletan.”​—Psom 16:10, 11, NW.

Ena enn sel dimounn ki ti koresponn exakteman ar deskripsion sa Dirizan ki pli kalifie-la, ek sa dimounn-la se Zezi Kris. Avredir, enn anz ti dir ar Mari, Zezi so mama: “Bondie Lesegner pou donn li tronn lerwa David, so anset, e . . . so regn pa pou fini zame.”​—Lik 1:31-33.

Kan Zezi ti lor later li pa ti enn dirizan. Okontrer, li pou diriz bann imin depi dan lesiel kouma Lerwa dan Rwayom Bondie. Ki kitsoz fer ki limem meyer Dirizan? Anou gete ki Zezi ti fer kan li ti lor later.

•   Zezi ti gagn traka bann dimounn. Zezi ti ed bann zom ek bann fam, zenn ek vie, ninport kotsa zot ti sorti, ouswa zot ran sosial. (Matie 9:36; Mark 10:16) Kan enn lepre ti sipliy li: “Si vremem to anvi, to kapav pirifie mwa,” Zezi ti ena pitie pou li ek ti geri li.​—Mark 1:40-42, NW.

• Zezi ti aprann nou kouma pou fer plezir Bondie. Li ti dir: “Zot pa kapav travay kouma bann esklav pou Bondie ek pou Larzan toulede.” Li ti dir osi ki nou bizin tret lezot parey kouma nou ti pou kontan lezot tret nou. Anplis, li ti montre ki Bondie pa zis interese ar seki nou fer me osi ar seki nou panse ek resanti. Alor pou fer plezir Bondie, nou bizin kontrol nou bann santiman. (Matie 5:28; 6:24, NW; 7:12) Zezi ti dir ki nou pou vremem ere kan nou aprann kone ki Bondie anvi nou fer ek lerla fer li.​—Lik 11:28.

• Zezi ti montre seki vedir lamour. Seki Zezi ti dir ek fer ti ena boukou lefe ek sa ti tous leker bann ki ti pe ekout li. “Lafoul ti etone par so lansegnman, parski li ti ansegn zot parey enn kikenn ki ena lotorite.” (Matie 7:28, 29) Li ti ansegn zot pou “kontan zot lennmi.” Li ti mem priye pou sertin dimounn ki ti responsab so lamor: “Papa pardonn zot parski zot pa kone ki zot pe fer.”​—Matie 5:44; Lik 23:34.

Zezi limem Dirizan ki pli kalifie pou diriz lemond parski li kontan ede ek li ena bonte. Me kan eski li’nn koumans dirize?