Biento, kan Bondie so gouvernman ki dan lesiel pou diriz lor tou bann dimounn, later pou vinn enn landrwa kot ena lazwa, kot bann dimounn pou kapav viv ansam dan lakorite ek fer bann bon travay. Bondie inn swazir Zezi Kris pou diriz later. Azordi, bann dirizan pa gagn traka bann dimounn. Me Zezi, li diferan parski li pou fer seki pli bon pou bann dimounn. Li pou diriz later avek boukou lamour, ek li pou enn bon Lerwa ki ena zantiyes ek konpasion.​—Izai 11:4.

Bann dimounn ki pou viv dan sa nouvo lemond-la pa pou divize antan ki bann diferan nasion ouswa diferan ras. Limanite pou enn sel pep ki pou viv dan linite. (Revelasion 7:9, 10) Tou bann dimounn lor later pou kontan Bondie ek zot prosin. Ek zot pou travay ansam dan lape pou pran swin later, parey kouma Bondie ti touletan anvi.​—Psom 115:16.

Kan Rwayom Bondie pou diriz later, Bondie pou pran full kontrol lor klima ek pou fer sir ki nepli ena okenn katastrof natirel. (Psom 24:1, 2) Kan Zezi ti lor later, li ti kalme enn gran tanpet. Li ti montre seki li kapav fer gras-a pwisans Bondie. (Mark 4:39, 41) Alor, kan Zezi pou diriz later, personn pa pou bizin per bann katastrof natirel. Kan Rwayom Bondie pou diriz later, nou pou viv anpe avek bann zanimo ek nou pou nepli detrir nou lanvironnman.​—Oze 2:18.

Tou dimounn pou ena enn lasante parfe. Personn pa pou malad, vinn vie, ouswa mor. (Izai 35:5, 6) Bann dimounn pou kapav profit enn lanvironnman ki bien zoli ek prop, parey kouma premie koup imin ti profite dan zardin Edenn. Dan lemond nouvo, later pou prodir manze an-abondans, parey kouma dan zardin Edenn, ek tou bann dimounn lor later pou ena plin manze. (Zenez 2:9) Parey kouma ansien pep Izrael, zot tou dan Paradi pou “manz zot dipin ziska zot vant plin.”​—Levitik 26:4, 5.

Kan gouvernman Bondie pou diriz later, tou bann dimounn pou viv dan lape ek pou tret sakenn so kamarad dan enn bon fason. Pa pou ena okenn lager, personn pa pou abiz lor zot lotorite, ek personn pa pou bizin rinte pou zot gagn seki zot bizin. Labib promet: “Vremem sakenn pou asiz anba so pie rezin ek anba so pie fig, ek pa pou ena personn ki fer zot per.”​—Mishe 4:3, 4.

Sak fami pou ena enn lakaz pou reste ek zot pa pou bizin per pou perdi zot lakaz. Anplis, tou travay ki nou pou fer, pou fer nou plezir. Kouma Labib dir, bann ki pou viv dan Bondie so nouvo lemond “pa pou rinte pou nanye,” ouswa rinte dan vid.​—Izai 65:21-23.

Labib promet: “Vremem later pou ranpli avek konesans Zeova.” (Izai 11:9) Bann dimounn ki pou viv anba direksion Rwayom Bondie pou aprann ar gran sazes nou Kreater, Zeova, ek lor bann zoli kitsoz ki Li’nn kree. Zot pa pou servi zot konesans pou aranz bann zarm ouswa pou fer lezot dimounn ditor. (Izai 2:4) Okontrer, zot pou aprann kouma pou viv anpe ar sakenn so kamarad ek kouma pou pran swin later.​—Psom 37:11.

Bondie finn prepar later avek boukou lamour pou ki sak zour nou kapav profit lavi afon. Li anvi ki bann dimounn viv pou touletan lor later. (Psom 37:29; Izai 45:18) Pou realiz so proze, Bondie pou “fer lamor disparet pou touletan.” (Izai 25:8) Labib promet ki “pa pou ena ni lamor, ni dey, ni lamantasion, ni douler.” (Revelasion 21:4) Bondie pou donn tou dimounn posibilite pou viv pou touletan. Parmi pou ena bann dimounn ki li pou sape kan li detrir sa move lemond-la ek bann milye dimounn ki li pou resisite dan sa nouvo lemond-la.​—Zan 5:28, 29; Zistwar Bann Apot 24:15.

 Bann milyon dimounn dan lemond pe deza prepar zot pou viv anba direksion Rwayom Bondie, ki biento pou koumans dirize. Mem si zot inparfe, zot deza pe fer zefor pou vinn sa kalite dimounn ki Bondie anvi ena dan so nouvo lemond. Kouma? Kan zot aprann konn Zeova ek sa kikenn ki li finn avoye la, Zezi Kris.​—Zan 17:3, NW.

Si ou anvi konn plis kouma ou kapav sirviv lafin sa lemond-la ek viv dan sa nouvo lemond ki pe vini la, aksepte enn letid Labib gratis ki bann Temwin Zeova done, dan liv Viv Ere pou Touletan!.