LUZIA BWATE AKOZ SO LIPIE GOS. Kan Luzia ti tipti, li ti gagn polio, enn maladi ki bien kontazie ek ki atak sistem nerve. Kan Luzia ti ena 16 an, madam pou ki li ti pe travay ti dir li: “Bondie inn pini twa ek inn paraliz twa parski to ti move ek to pa ti obeir to mama.” Boukou lane apre, Luzia ankor rapel kouma sa koze-la ti bien afekte li.

KAN DAMARIS TI APRANN KI LI TI GAGN ENN KANSER SERVO, so papa ti demann li: “Ki to’nn fer pou ki enn kitsoz koumsa ariv twa? To’nn bizin fer enn move kitsoz. Se pou sa rezon-la ki Bondie pe pini twa.” Seki so papa ti dir li, ti bien tourmant Damaris.

Sa fer bien-bien lontan ki bann dimounn panse ki maladi se enn pinision Bondie. Liv Manners and Customs of Bible Lands dir ki boukou dimounn dan lepok Zezi Kris ti panse ki “bann dimounn ti malad, swa akoz zot pese, swa akoz pese zot fami, ek ki maladi-la ti pinision sa bann pese-la.” Dapre liv Medieval Medicine and the Plague, ant 5^em ek 15^em siek nou lepok, “sertin dimounn ti panse ki Bondie ti fer bann lepidemi vinn lor zot pou pini zot akoz zot bann pese.” Alor, kan enn lepidemi ti touy plizir milyon dimounn dan l’Europe dan 14^em siek, eski se Bondie ki ti amenn sa zizman-la lor bann move dimounn? Ouswa, kouma bann resers medikal montre azordi, eski sa lepidemi-la ti arive zis akoz enn bakteri ki ti lakoz enn infeksion? Sertin dimounn kitfwa demann zotmem si Bondie vremem servi maladi pou pini bann dimounn ki fer pese ek fer zot soufer? a

REFLESI LOR LA: Kifer eski Zezi ti pou geri bann dimounn malad si maladi ek soufrans ti bann pinision Bondie? Eski sa bann gerizon-la pa ti pou kont lazistis Bondie? (Matie 4:23, 24) Zame Zezi ti pou azir kont volonte Bondie. Zezi ti dir: “Mo azir dapre tou seki fer li plezir” ek “tou seki mo Papa dir mwa fer, mo fer.”​—Zan 8:29; 14:31.

Labib bien kler: Zeova “zame fer linzistis.” (Deteronom 32:4) Par exanp, Bondie zame pou fer enn avion kraze ek touy bann santenn dimounn inosan parski Li anvi pini enn kikenn ki dan sa avion-la! Konsernan lazistis Bondie, Abraam, enn fidel serviter Bondie, ti dir ki zame Bondie pou “touy enn dimounn zis ansam avek enn move dimounn.” Ek li ti azoute ki “pa kapav pans enn kitsoz koumsa” lor Bondie. (Zenez 18:23, 25) Labib dir osi ki Bondie pa “fer lemal,” Li pa “fer seki pa bon.”​—Zob 34:10-12.

Bann soufrans ki nou gagne, se pa enn pinision Bondie akoz enn pese ki nou’nn fer. Zezi ti explik sa dan enn fason bien kler kan li ek so bann disip ti zwenn enn zom ki ti aveg depi nesans. Bann disip ti demande: “Kifer li aveg, akoz so pese ou bien akoz pese so fami?” Zezi ti reponn zot: “Pa akoz so pese, ni akoz pese so fami me li aveg pouki dimoun trouv travay Bondie dan li.”​—Zan 9:1-3.

Bann disip Zezi ti panse ki sa dimounn-la ti aveg akoz enn pese ki li ouswa so fami ti fer. Alor, zot ti etone kan Zezi ti dir zot sa bann parol-la. Zezi ti geri sa zom aveg la. Kan li ti fer sa, li ti montre osi ki krwayans ki Bondie fer bann dimounn soufer pou pini zot, ti enn fos krwayans.  (Zan 9:6, 7) Bann dimounn ki ena bann maladi bien grav azordi kapav gagn rekonfor kan zot kone ki se pa Bondie ki pe fer zot soufer.

Labib donn nou sa garanti-la

• “Bondie pa kapav tante par lemal [“bann move kitsoz,” NW], e limem li pa tant personn.” (ZAK 1:13) Wi, bann “move kitsoz” ki pe tourmant bann dimounn depi plizir siek, kouma maladi, soufrans, ek lamor, biento pou disparet.

• Zezi Kris ti “geri tou seki ti malad.” (MATIE 8:16) Kan li’nn geri tou bann dimounn ki ti vinn get li, Garson Bondie inn montre seki Rwayom Bondie pou fer lor later antie.

• “Li [Bondie] pou souy tou zot larm. Pa pou ena ni lamor, ni dey, ni lamantasion, ni douler. Tousa parski vie lemonn finn disparet.”​—REVELASION 21:3-5.

Me alor, kifer eski bann dimounn soufer sa kantite-la? Pandan plizir siek, bann dimounn inn reflesi lor sa kestion-la. Si Bondie pa responsab, alor kisannla ki responsab? Nou pou reponn sa bann kestion-la dan prosin lartik.