Eski se enn dezir ki natirel? Wi! Labib dir nou ki Bondie finn met sa dezir-la dan nou. (Ekleziast 3:11) Li dir osi ki “Bondie limem lamour.” (1 Zan 4:8) Bondie kontan nou ek Li pa ti pou donn nou sa dezir pou viv pou touletan la si li ti inposib pou nou gagn li.

Personn pa anvi mor. Avredir, Labib dekrir lamor kouma enn “lennmi.” (1 Korintien 15:26) Sertin dimounn mor zenn, lezot viv pli lontan, me pa zordi pa dime nou tou nou pou mor. Boukou dimounn gagn per kan zot pans lamor. Eski enn zour pou kapav gagn laviktwar lor lamor?

Eski sa ti pou sok ou pou aprann ki zame sa ti dan proze Bondie ki bann dimounn mor? Premie liv Labib, Zenez, donn bann prev ki Bondie ti prevwar ki bann dimounn viv pou touletan lor later. Zeova * ti kree later avek tou seki bann dimounn bizin pou ki zot viv ek ki zot ere. Apre sa, Li ti kree premie zom, Adan, ek ti met li dan enn paradi, zardin Edenn. Lerla, “Bondie ti get tou seki Li ti fer, ek gete, tou ti bien bon.”​—Zenez 1:26, 31.

Kan Bondie ti kree Adan li ti enn zom parfe. (Deteronom 32:4) Adan so fam, Ev, li osi pa ti ena okenn defo, li ti ena enn lespri ek enn lekor parfe. Zeova ti dir zot: “Gagn zanfan, vinn boukou, ranpli later ek ena kontrol lor li, ek ena kontrol lor bann pwason dan lamer ek lor bann kreatir ki anvole dan lesiel ek lor tou kreatir vivan ki bouze lor later.”​—Zenez 1:28.

 Sa ti pou pran letan pou ki Adan ek Ev ranpli later. Ev ti pou gagn bann zanfan, ek so bann zanfan ti pou gagn bann zanfan zot osi, sa ti pou ale mem koumsa ziska ki later ranpli avek bann dimounn, parey kouma Bondie ti anvi. (Izai 45:18) Alor, li pa lozik pou panse ki Zeova ti pou donn sa posibilite-la Adan ek Ev si zot ti’nn kree pou viv zis ase letan pou trouv zis zot zanfan ek kitfwa zot bann ti zanfan, san kone ki ti pou arive apre.

Reflesi osi, lor mision pou kontrol bann zanimo. Adan ti bizin donn bann zanimo enn nom, ek sa ti pou pran letan. (Zenez 2:19) Me, ki sa ti pou inplike pou kontrol bann zanimo? Savedir ki Adan ti pou bizin aprann konn zot ek konpran kouma pou okip zot. Sa ti pou pran plis letan ki zis donn bann zanimo enn nom.

Alor, bann instriksion ki Bondie ti done pou ranpli later ek pou kontrol bann zanimo montre ki premie koup imin ti’nn kree pou ki zot viv bien lontan. Avredir, Adan inn viv bien lontan.

Labib montre ki enn lepok bann dimounn ti pe viv pli lontan ki nou azordi. Li dir: “Adan ti viv 930 an.” Apre sa, li mansionn sis lezot zom ki ti viv plis ki 900 an! Zot ti apel Set, Enos, Kenan, Zared, Matuzalem, ek Noe. Zot tou ti viv avan Deliz dan lepok Noe, ek Noe li, li ti viv 600 an avan ki Deliz vini. (Zenez 5:5-27; 7:6; 9:29) Kouma eski li ti posib viv sa kantite letan-la?

Sa bann zom-la ti ne pa tro lontan apre ki Adan ek Ev ti ena enn lavi parfe. Kitfwa se enn rezon kifer zot ti viv osi lontan ki sa. Me kouma perfeksion lie ar kantite letan ki nou viv? Ek kouma pou kapav gagn laviktwar lor lamor? Avan gagn repons sa bann kestion-la, nou bizin konpran kifer nou vinn vie ek mor.