San soley, li inposib ki ena lavi lor later. Soley donn bann pie lenerzi pou ki zot kapav gagn bann fey, bann fler, bann frwi, ek bann lagrin. Li osi ed bann pie pou servi zot bann rasinn. Bann rasinn-la pou ris delo depi later ek avoy li dan bann fey, ek apre sa delo-la evapore dan ler.

Gras-a lapli, enn kado ki ena boukou valer ki sorti kot Bondie, later prodir manze pou nou. Depi lesiel Bondie avoy lapli ek bann bon rekolt, koumsa Li donn nou manze an-abondans ek ranpli nou leker avek lazwa.

Boukou papa gagn traka si zot pou kapav donn zot fami ase manze ek linz. Get seki bann Lekritir Sakre dir: “Get bann zwazo dan lezer, zot pa ni seme, ni rekolte, ni ramase dan grenie, e pourtan Bondie Papa ki dan lesiel nouri zot. Eski zot pena plis valer ki zwazo?”​—Matie 6:25, 26.

“Get bann fler lis dan karo, kouma zot pouse . . . , me mo dir zot, mem [Lerwa] Salomon dan tou so laglwar pa finn zame abiye kouma sa bann fler la. Si Bondie abiy enn karo lerb parey, . . . eski li pa pou abiy zot ankor pli zoli ki sa?”​—Matie 6:28-30.

Si Bondie kapav donn nou manze ek labiyman, Li kapav osi ed nou gagn bann lezot kitsoz ki nou bizin dan lavi. Si nou esey fer volonte Bondie, Li kapav beni nou bann zefor pou kiltiv later ouswa Li kapav ed nou pou trouv enn travay pou ki nou kapav aste seki nou bizin.​—Matie 6:32, 33.

Kan nou get soley, lapli, bann zwazo, ek bann fler, nou vremem ena bann bon rezon pou kontan Bondie. Dan lartik ki swiv, nou pou gete kouma nou Kreater kominik avek bann dimounn.