1-2. Ki diferans ti ena ant Akab ek Manase, ek ki kestion nou pou reponn dan sa lartik-la?

ANOU get lexanp de lerwa dan lepase. Enn ti regn lor rwayom dis tribi dan Izrael, ek lot-la ti regn lor rwayom de tribi dan Zida. Mem si zot pa ti viv dan mem lepok, zot ti ena boukou kitsoz an komin. Toulede lerwa ti rebel kont Zeova ek akoz zot, lepep ti fer pese. Toulede ti ador bann fos bondie ek zot ti bann kriminel. Selman, ti ena enn diferans ant sa de zom-la. Enn parmi zot ti kontign fer bann move kitsoz ziska ki li mor, me lot-la la ti repanti ek Zeova ti pardonn so bann pese. Kisannla sa de lerwa-la?

² Sa de lerwa-la ti Akab, lerwa Izrael ek Manase, lerwa Zida. Diferans ki ti ena ant sa de zom-la kapav ansegn nou bann kitsoz bien inportan lor repantans. (Zist. 17:30; Rom. 3:23) Ki savedir repanti, ek kouma nou montre ki nou vremem repanti? Nou bizin konn repons sa kestion-la parski nou anvi ki Zeova pardonn nou kan nou fer pese. Pou nou reponn sa kestion-la, anou aprann plis lor sa de lerwa-la, ek anou gete seki nou kapav aprann ar zot lexanp. Ek apre sa, anou gete seki Zezi inn ansegn nou lor repantans.

3. Ki kalite lerwa Akab ti ete?

³ Akab ti setiem lerwa ki ti regn lor rwayom dis tribi Izrael. Li ti marye ar Zezabel, tifi lerwa Sidon. Sidon ti enn pei bien ris ki ti trouv dan lenor Izrael. Sa maryaz-la kitfwa ti fer pei Izrael vinn bien ris. Me akoz sa maryaz-la, nasion Izrael ti fer pli boukou pese kont Zeova. Zezabel ti ador Baal ek li ti fer an-sort ki Akab ek lepep swiv so larelizion. Sa larelizion-la ti bien degoutan parski zot ti fer prostitision dan tanp ek zot ti osi fer sakrifis bann zanfan. Sa lepok-la, tou bann profet Zeova ti an danze. Zezabel ti mem fer touy plizir parmi zot. (1 Ler. 18:13) Akab “ti pli  pir ki tou bann lerwa avan li.” (1 Ler. 16:30) Zeova ti konn bien tou seki Akab ek Zezabel ti pe fer. Me Zeova ti ena mizerikord ek Li ti avoy profet Eli pou ed lepep pou sanz zot fason azir, pou ki zot servi Li avan ki li tro tar. Me Akab ek Zezabel pa ti ekout profet Zeova.

4. Kouma Zeova ti pou pini Akab, ek kouma Akab ti reazir?

⁴ Finalman, Zeova ti desid pou pini Akab. Zeova ti avoy profet Eli pou dir Akab ek Zezabel kouma Li ti pou pini zot. Tou zot fami ti pou mor. Bann parol profet Eli ti tous Akab! Sa zom orgeye la ti “imilie limem.”​—1 Ler. 21:19-29.

5-6. Kouma nou kone ki Akab pa ti vremem repanti?

⁵ Mem si Akab ti imilie limem dan sa ler-la, seki li ti fer apre ti montre ki li pa ti vremem repanti. Par exanp, li pa ti eliminn ladorasion Baal dan so rwayom, ek li pa ti ankouraz lepep pou ador Zeova. Anplis, Akab ti fer lezot kitsoz ankor ki ti montre ki li pa ti repanti.

⁶ Plitar, Akab ti demann Zozafat, lerwa Zida, pou al lager kont bann Sirien ansam avek li. Lerwa Zozafat ti enn bon lerwa ek li ti ena konfians an Zeova. Alor, li ti propoz Akab pou demann enn profet Zeova seki zot ti bizin fer avan ki zot al lager. Akab pa ti’le fer sa. Li ti dir: “Ena ankor enn zom ki kapav demann Zeova pou nou; me mo deteste li parski zame li profetiz bann bon kitsoz lor mwa, li dir zis bann move kitsoz.” Kanmem sa, zot ti al rod konsey ar profet Mikaya. Akab ti ena rezon, parski profet Mikaya ti predir bann move kitsoz lor li! Olie ki Akab repanti ek ki li demann Zeova pou pardonn li, li ti fer zet profet Mikaya dan prizon. (1 Ler. 22:7-9, 23, 27) Akab ti kapav met Mikaya dan prizon, selman li pa ti kapav anpes profesi-la realize. Kan zot ti al lager, Akab ti perdi lavi.​—1 Ler. 22:34-38.

7. Kouma Zeova ti konsider Akab apre so lamor?

⁷ Apre lamor Akab, Zeova ti fer kone seki Li ti vremem panse lor sa zom-la. Kan Lerwa Zozafat ti retourn kot li, Zeova ti avoy profet Zeou pou fer li kone ki li ti fer enn move kitsoz kan li ti al ed Akab. Profet Zeova ti dir: “Eski se bann move ki to bizin ede, ek eski se bann ki deteste Zeova ki to bizin kontan?” (2 Kro. 19:1, 2) Reflesi lor la: Si Akab ti vremem repanti, profet Zeova pa ti pou dekrir li kouma enn kikenn ki move ek ki deteste Zeova. Alor, li kler ki, mem si Akab ti imilie limem ek ti regret seki li ti fer, li pa ti vremem repanti.

8. Ki nou kapav aprann lor repantans gras-a lexanp Akab?

⁸ Ki nou kapav aprann ar lexanp Akab? Kan Eli ti dir Akab ki tou so fami ti pou mor, o-koumansman Akab ti imilie limem. Sa ti deza enn premie pa, me bann aksion ki li ti fer apre ti montre ki li pa ti vremem repanti. Alor, kan enn kikenn repanti, li bizin fer plis ki demann exkiz pou seki li’nn fer. Asterla, anou gete seki nou kapav aprann lor vre repantans ar lexanp Manase.

9. Ki kalite Lerwa Manase ti ete?

⁹ Apepre 200 an plitar, Manase ti vinn lerwa lor Zida. Kitfwa so bann pese ti pli grav ki bann pese Akab! Labib dir: “Li ti fer boukou move kitsoz devan lizie Zeova, pou ofans Li.” (2 Kro. 33:1-9) Manase ti aranz bann lotel pou bann fos bondie, ek li ti mem met enn poto sakre dan tanp Zeova. Sa poto sakre la kitfwa ti  reprezant ladorasion pou sex. Manase ti osi fer sorselri ek mazik. Li ti touy boukou dimounn, ek li ti mem sakrifie ek bril so garson dan dife pou bann fos bondie.​—2 Ler. 21:6, 7, 10, 11, 16.

10. Kouma Zeova ti disiplinn Manase, ek kouma Manase ti reazir?

¹⁰ Parey kouma Akab, Manase pa ti ekout lavertisman bann profet Zeova. Finalman, “Zeova ti pous bann sef larme lerwa Lasiri pou atak [Zida]; zot ti trap Manase avek bann krose, zot ti atas li ar de menot an kwiv, ek zot ti amenn li Babilonn.” Kan li ti dan prizon dan Babilonn, li posib ki Manase ti reflesi lor tou seki li ti fer. Li “ti kontign imilie limem boukou devan Bondie so bann anset.” Ek li ti fer plis ki sa. Li ti sipliy so Bondie Zeova pou gagn So faver. An realite, Manase “ti kontign priye” Zeova. Sa zom move la ti pe koumans sanze. Li ti pe koumans konsider Zeova kouma “so Bondie,” ek li ti kontign priye ek sipliye Zeova.​—2 Kro. 33:10-13.

11. Dapre 2 Kronik 33:15, 16, kouma Manase ti montre ki li ti vremem repanti?

¹¹ Avek letan, Zeova ti reponn bann lapriyer Manase. Zeova ti ekout so bann lapriyer ek Li ti trouve ki Manase ti vremem sanze. Zeova ti pardonn Manase ek Li ti les Manase revinn lerwa. Apre sa, Manase ti fer so maximum pou montre ki li ti vremem repanti. Li ti fer seki Akab pa ti fer. Li ti sanz fason ki li ti azir. Li ti fer zefor pou eliminn fos ladorasion ek li ti ankouraz lepep pou ador Zeova. (Lir 2 Kronik 33:15, 16. *) Manase ti bizin ena kouraz ek lafwa pou fer sa, parski avan ki li repanti, pandan plizir lane li ti enn move lexanp pou so fami, pou lepep, ek pou bann dimounn inportan dan so rwayom. Mem si li ti vie, Manase ti fer zefor pou koriz bann erer ki li ti fer dan lepase. Gras-a sa, li finn ena enn bon linflians lor so ti-zanfan, Zozias, ki plitar ti vinn enn bon lerwa.​—2 Ler. 22:1, 2.

12. Ki nou kapav aprann lor repantans gras-a lexanp Manase?

¹² Ki nou kapav aprann ar lexanp Manase? Li ti imilie limem ek li ti fer plis ki sa. Li ti priye ek li ti sipliy Zeova pou pardonn li. Ek li ti sanz fason ki li ti azir. Li ti fer zefor pou koriz bann erer ki li ti fer dan lepase, ek li ti fer so maximum pou ador Zeova ek pou ed lezot osi pou ador Zeova. Lexanp Manase bien ankourazan pou bann dimounn ki’nn fer boukou move kitsoz. So lexanp montre nou ki  nou Bondie Zeova, Li “ranpli ar bonte ek pardon.” (Ps. 86:5) Alor, Zeova pou pardonn bann dimounn ki vremem repanti.

13. Servi enn lexanp ki kapav ed nou pou konpran enn kitsoz inportan lor repantans.

¹³ Manase pa ti zis regret bann pese ki li ti fer. Li ti fer plis ki sa. Sa kapav aprann nou enn leson inportan lor repantans. Anou pran enn lexanp: Fer koumadir to al aste enn gato dan patisri. Me olie ki vander-la donn twa to gato, li donn twa enn dizef. Eski to pou dakor? Non! Eski to pou aksepte pou pran dizef-la si li explik twa ki dizef-la se enn ingredian inportan dan gato-la? Non! Dan mem fason, Zeova demann enn kikenn ki’nn fer pese pou repanti. Si peser-la regret pese ki li’nn fer, se enn bon kitsoz. Sa santiman-la se enn ingredian inportan pou ki enn kikenn repanti, me li pa ase. Ki kitsoz ankor li bizin fer? Nou kapav aprann boukou lor sa size-la dan enn parabol ki Zezi ti servi.

14. Dan parabol Zezi, kouma sa garson-la ti montre ki li ti pe koumans repanti?

¹⁴ Dan Lik 15:11-32, Zezi rakont enn zoli zistwar konsernan enn garson ki ti perdi. Sa garson-la ti rebel kont so papa, li ti kit lakaz, ek li ti al “bien-bien lwin dan enn lot pei.” Laba, li ti amenn enn lavi bien imoral. Me kan so lavi ti vinn bien difisil, garson-la ti koumans reflesi lor tou seki li ti fer. Li ti realize ki so lavi ti pli bon kan li ti lakaz so papa. Zezi explike ki sa garson-la ti aksepte erer ki li ti fer. Li ti bien deside pou retourn kot li, pou rod pardon so papa. Sa ti bien inportan ki garson-la aksepte ek regret bann erer ki li ti fer. Me sa pa ti ase. Asterla, li ti bizin azir!

15. Kouma sa garson-la ti montre ki li ti vremem repanti?

¹⁵ Sa garson-la ti montre ki li ti vremem repanti pou seki li ti fer. Li ti fer enn long vwayaz pou retourn kot li ek kan so papa ti vinn get li, li ti dir: “Mo finn fer pese kont lesiel e kont twa; mo nepli dign ki to apel mwa to garson.” (Lik 15:21) Seki sa garson-la ti dir, ti montre ki li ti anvi regagn enn bon relasion avek Zeova. Li ti rekonet osi ki so bann aksion ti bien bles so papa, ek li ti mem dispoze pou fer zefor pou regagn enn bon relasion avek so papa. Pou li fer sa, li ti mem dispoze pou travay pou so papa! (Lik 15:19) Sa parabol-la pa zis enn zoli zistwar. Li bien itil pou bann ansien parski li kapav ed zot pou trouve si enn kikenn ki’nn fer enn pese grav, inn vremem repanti.

16. Kifer sa kapav difisil pou bann ansien pou kone si enn kikenn inn vremem repanti?

¹⁶ Sa kapav bien difisil pou bann ansien pou kone si enn kikenn ki’nn fer enn pese grav, inn vremem repanti. Kifer?  Bann ansien pa kapav lir dan leker, alor zot bizin rod bann prev ki montre ki sa dimounn-la inn vremem sanze ek ki li regret seki li’nn fer. Dan sertin sitiasion, enn kikenn inn kapav fer enn pese telman grav ki bann ansien pa sir si li’nn vremem repanti.

17. (a) Servi enn lexanp pou montre ki enn kikenn kitfwa pa’nn vremem repanti, mem si li dir ki li regret seki li’nn fer. (b) Dapre 2 Korintien 7:11, kan enn kikenn vremem repanti, ki li bizin fer?

¹⁷ Anou pran enn lexanp. Pandan plizir lane, enn frer inn amenn enn lavi imoral. Olie ki li rod led, li kasiet seki li pe fer. Li pa dir nanye so madam, so bann kamarad ek bann ansien. Avek letan, bann ansien aprann seki li’nn fer. Kan bann ansien dir li ki zot ena bann prev ki li’nn amenn enn lavi imoral, li rekonet so bann aksion ek kitfwa li mem regret seki li’nn fer. Me eski sa montre ki li’nn vremem repanti? Non. Mem si sa dimounn-la regret seki li’nn fer, kan bann ansien okip bann ka koumsa, zot rod bann lezot sign ki montre ki sa dimounn-la inn vremem repanti. Sa dimounn-la pa’nn fer enn pese zis enn fwa parski li’nn pran enn move desizion. Okontrer, li’nn fer pese pandan plizir lane. Li pa’nn vinn konfes so pese. Se bann ansien ki’nn dekouver so pese. Akoz sa, bann ansien pou bizin rod bann sign ki montre ki sa dimounn-la inn sanz so fason panse ek so kondwit. (Lir 2 Korintien 7:11, NW. *) Kitfwa sa pou pran letan avan ki sa dimounn-la fer bann sanzman ki montre ki li’nn vremem repanti. Ek li posib osi ki bann ansien pou bizin exkli sa dimounn-la dan lasanble.​—1 Kor. 5:11-13; 6:9, 10.

18. Kouma enn kikenn ki’nn exkli kapav montre ki li’nn vremem repanti, ek ki kapav arive lerla?

¹⁸ Pou montre ki li’nn vremem repanti, enn kikenn ki’nn exkli pou vinn renion regilierman ek li pou swiv konsey bann ansien, setadir priye ek etidie regilierman. Li pou osi fer boukou zefor pou evit bann kitsoz ki kapav fer li refer mem pese. Si li fer zefor pou regagn enn bon relasion avek Zeova, li kapav sir ki Zeova pou pardonn li ek ki bann ansien pou reintegre li dan lasanble. Bann ansien kone ki sak sitiasion diferan, alor zot pou examinn bien sak sitiasion pou kone si enn kikenn inn vremem repanti, ek zot pou tret sa dimounn-la avek douser.

19. Ki savedir vremem repanti? (Ezekiel 33:14-16)

¹⁹ Kouma nou’nn trouve, kan enn kikenn inn vremem repanti, li bizin pa zis  demann exkiz pou seki li’nn fer. Li bizin osi sanz so fason panse ek so kondwit, ek fer bann kitsoz ki montre ki li’nn vremem repanti. Li bizin osi obeir bann prinsip Zeova. (Lir Ezekiel 33:14-16. *) Kan enn kikenn fer enn pese, kitsoz pli inportan pou li se regagn enn bon relasion avek Zeova.

20-21. Kouma nou kapav ed enn kikenn ki’nn fer enn pese grav?

²⁰ Zezi ti koz lor enn parmi bann kitsoz pli inportan dan so minister. Li ti dir: “Mo . . . finn vinn apel . . . bann peser pouki zot repanti.” (Lik 5:32) Nou osi nou anvi fer parey kouma Zezi. Fer koumadir to finn aprann ki enn bon kamarad finn fer enn pese bien grav. Ki to bizin fer?

²¹ Si to kasiet pese ki to kamarad inn fer, to pe fer li ditor. Ek to pa pou kapav kasiet so pese parski Zeova trouv tou kitsoz. (Prov. 5:21, 22; 28:13) To kapav ed to kamarad kan to dir li ki bann ansien anvi ed li. Si to kamarad refiz konfes so pese ar bann ansien, to bizin al dir bann ansien. Sa pou montre ki to vremem anvi ed to kamarad. Pa bliye ki se so relasion avek Zeova ki an danze!

22. Ki nou pou examine dan prosin lartik?

²² Asterla, fer koumadir enn kikenn inn fer enn pese bien grav pandan lontan ek bann ansien desid pou exkli li, eski savedir ki bann ansien pena mizerikord anver li? Dan prosin lartik, nou pou gete kouma Zeova disiplinn bann peser avek boukou mizerikord ek nou pou gete osi kouma nou kapav imit Li.