SAK lane, enn kantite dimounn reintegre dan lasanble. Mazinn ‘lazwa ki ena dan lesiel’ kan enn kikenn retourne! (Lik 15:7, 10) Si to’nn reintegre, to kapav sir ki Zezi, bann anz, ek Zeova bien kontan ki to’nn reform parti dan lasanble. Selman, amezir ki to rekonstrir to lamitie avek Zeova, kitfwa to pou gagn bann difikilte. Anou get sertin difikilte ki to kapav gagne, ek anou gete seki to kapav fer pou sirmont zot?

Boukou frer ek ser kontign ena bann panse negatif mem apre ki zot inn reintegre. Sirman zot ena mem santiman ki Lerwa David. Mem si Zeova ti pardonn David, David dir ki so bann fot ti “pez lour” lor li. (Ps. 40:12; 65:3) Mem si enn kikenn inn reintegre, li kapav kontign gagn onte ek santi li koupab pandan plizir lane. Isabelle ti exkli pandan plis ki 20 an. * Li dir: “Mo ti trouv sa bien difisil pou aksepte ki Zeova kapav pardonn mwa.” Si to dekouraze, to kapav revinn feb lor plan spiritiel. (Prov. 24:10) Alor, fode pa to les sa arive.

Sertin exkli panse ki zot pa pou kapav fer tou seki bizin pou zot regagn enn bon lamitie avek Zeova. Apre ki li ti reintegre, Antoine ti dir: “Mo ti ena linpresion ki mo ti bliye boukou kitsoz ki mo ti aprann ek ki mo ti fer avan, kan mo ti enn Temwin.” Akoz sa bann santiman-la, sertin pa fer zot maximum pou servi Zeova.

Anou pran enn lexanp. Kan enn kikenn so lakaz inn kraze akoz enn siklonn, li kapav dekouraze kan li mazinn kantite letan ek zefor ki li pou bizin pou rekonstrir so lakaz. Dan mem fason, si to’nn fer enn pese grav, to  kapav panse ki to pou bizin boukou letan ek zefor pou rekonstrir to lamitie avek Zeova. Me to kapav gagn led pou fer sa.

Zeova dir nou: “Vini, ek anou remet bann kitsoz an-ord ant nou.” (Iza. 1:18) To’nn deza koumans fer boukou kitsoz pou remet “bann kitsoz an-ord.” Zeova bien kontan twa parski to’nn fer sa bann zefor-la. Parski to’nn retourn ar Zeova, Li kapav servi twa kouma enn lexanp pou montre ki Satan enn manter!​—Prov. 27:11.

Kan to’nn retourn dan laverite, to’nn rekoumans vinn pros ar Zeova. Ek Zeova promet ki Li pou revinn pros avek twa. (Zak 4:8) Li bon ki lezot inn trouve ki to’nn retourn dan lasanble. Selman, to bizin fer plis ki sa. To bizin kontign ogmant to lamour pou to Papa, Zeova. Kouma to kapav fer sa?

Esey fixe bann lobzektif ki to kapav realize. Sirman to ankor rapel bann lansegnman debaz ki to’nn aprann lor Zeova ek so promes konsernan Paradi. Me asterla, to bizin repran bann bon labitid, kouma par exanp, prese regilierman, asiste bann renion, ek pas letan avek to bann frer ek ser. Anou get sertin lobzektif ki to kapav fixe.

Priye Zeova regilierman. Zeova kone ki, si to kontign santi twa koupab pou seki to’nn fer, to kapav trouv sa difisil pou priye Li. (Rom. 8:26) Kanmem sa, kontign priye Zeova, ek dir Li ki kantite to anvi vinn so kamarad. (Rom. 12:12) Andrej dir: “Mo ti bien onte ek mo ti extra santi mwa koupab. Me apre sak lapriyer ki mo ti fer, sa bann santiman-la ti diminie ek mo ti santi mwa anpe.” Si to pa kone ki to pou dir dan to bann lapriyer, reflesi lor lapriyer ki Lerwa David ti fer dan Psom 51 ek 65.

Etidie Labib regilierman. Sa pou ed twa pou ena enn lafwa for ek pou ogmant to lamour pou Zeova. (Ps. 19:7-11) Felipe dir: “Mo ti vinn feb ek mo ti elwagn mwa ar Zeova parski mo pa ti ena enn bon program letid personel. Mo pa ti anvi fer sa erer-la enn deziem fwa, alor mo ti bien deside pou fer mo letid personel regilierman.” Twa osi to kapav fer parey. Si to bizin led pou swazir bann size pou to letid personel, to kapav demann enn kamarad ki ena enn bon lamitie avek Zeova pou ed twa.

Rekonstrir to lamitie avek to bann frer ek ser. Kan sertin retourn dan laverite, zot kapav panse ki lezot pou trouv zot dan enn move fason. Larissa dir: “Mo ti extra onte ek mo ti panse ki mo ti trayir mo bann frer ek ser. Mo ti ena sa santiman-la pandan enn bon bout letan.” To kapav sir ki bann ansien ek bann frer ek ser anvi ed twa pou rekonstrir to lamitie avek Zeova. (Get lankadre “ Ki Bann Ansien Kapav Fer?”) Zot bien kontan ki to’nn retourne ek zot anvi ki to ere!​—Prov. 17:17.

Ki to kapav fer pou vinn pli pros avek to bann frer ek ser? Asiste tou bann renion, ek pres regilierman avek to bann frer ek ser. Kouma sa kapav ed twa? Felix dir: “Bann frer ek ser ti bien kontan kan mo ti reintegre. Mo ti santi ki zot kontan mwa. Zot tou ti ed mwa pou mo reform parti dan lasanble. Zot ti ed mwa pou trouve ki Zeova ti pardonn mwa, ek zot ti ed mwa pou kontign servi Li.”​—Get lankadre “ Ki To Kapav Fer?”

Satan pou kontign met bann leprev devan twa pou anpes twa rekonstrir to lamitie avek Zeova. (Lik 4:13) Alor, kontign fer to lamitie avek Zeova vinn pli for.

Kan Li koz lor so bann mouton, Zeova fer sa promes-la: “Mo pou al rod seki’nn perdi, ek mo pou re-amenn seki’nn al lwin. Mo pou met enn bandaz lor seki’nn blese, ek mo pou fortifie seki feb.” (Eze. 34:16) Zeova inn ed boukou dimounn pou rekonstrir zot lamitie avek Li. Alor, to kapav sir ki Li anvi ed twa pou ki to kontign grandi to lamitie avek Li.