1. Kifer boukou dimounn dan konfizion azordi?

AZORDI, ena boukou relizion ki dir ki zot Kretien, ek zot dir osi ki zot ador Bondie dan fason ki fer Li plezir. Akoz samem ki boukou dimounn dan konfizion. Zot demann zotmem, “Eski ena enn sel vre relizion, ouswa eski Bondie aksepte tou bann relizion?” Antan ki Temwin Zeova, eski nou sir ki nou pe ansegn laverite, ek ki fason ki nou ador Zeova, se sel fason ki fer Li plezir? Anou get bann prev ki pou konvink nou ki nou pe servi Zeova dan bon fason.

2. Dapre 1 Tesalonisien 1:5, kifer lapot Pol ti sir ki li ti dan laverite?

² Lapot Pol ti sir ki li ti dan laverite. (Lir 1 Tesalonisien 1:5.) Li pa ti ena sa santiman-la zis parski li ti santi li bien kot li ti ete. Okontrer, Pol ti etidie Parol Bondie an profonder, ek li ti sir ki “tou seki dan Lekritir” inspire par Bondie. (2 Tim. 3:16) Ki li ti aprann dan bann Lekritir? Pol ti gagn bann prev ki Zezi ti Lemesi, alor ki bann sef relizie Zwif ti swazir pou rezet sa bann prev-la. Zot ti pretann ki zot ti ansegn laverite lor Bondie, me zot ti pe fer bann kitsoz ki Bondie deteste. (Tit 1:16) Pol pa ti parey kouma sa bann zom-la. Li pa ti swazir ki parti Lekritir li pou aksepte, ek ki parti Lekritir li pou rezete. Pol ti dispoze pou ansegn ek aplik ‘plan Bondie an antie.’​—Zist. 20:27.

3. Eski nou bizin gagn repons pou tou nou bann kestion, pou ki nou sir ki nou dan laverite? (Get lankadre “ Bann Mirak ek Bann Mervey Zeova​—Tro Boukou pou Rakonte.”)

³ Sertin dimounn panse ki vre relizion bizin kapav reponn tou bann kestion, mem bann kestion ki so repons pa trouv dan Labib. Eski sa li vre? Anou get lexanp lapot Pol. Li ti ankouraz bann Kretien pou “examinn tou kiksoz,”  me li ti osi rekonet ki ena boukou kitsoz ki li pa ti konpran. (1 Tes. 5:21) Li ti dir ki “nou konesans li limite,” ek ki “nou trouv flou kouma dan enn vie laglas.” (1 Kor. 13:9, 12) Pol pa ti konpran tou kitsoz, ek nou osi parey. Me Pol ti konpran bann verite inportan lor Zeova ek So proze, ek seki li ti kone, ti ase pou ki li sir ki li dan laverite.

4. Kouma nou kapav ena plis konviksion ki nou’nn trouv laverite, ek ki nou pou examine konsernan bann vre Kretien?

⁴ Enn fason pou nou ena plis konviksion ki nou finn trouv laverite, se kan nou konpar model ki Zezi inn lese konsernan vre ladorasion avek fason ki bann Temwin Zeova ador Zeova azordi. Dan sa lartik-la, nou pou trouve ki bann vre Kretien (1) rezet lidolatri, (2) respekte nom Zeova, (3) kontan laverite, ek (4) kontan sakenn zot kamarad.

5. Ki Zezi inn ansegn nou konsernan fason pou ador Bondie, ek kouma nou kapav aplik seki li’nn ansegn nou?

⁵ Kan Zezi ti dan lesiel ek kan li ti lor later, li ti ador zis Zeova tousel, parski li ti kontan Li. (Lik 4:8) Li ti ansegn so bann disip osi pou ador zis Zeova tousel. Zezi ek so bann disip pa ti servi bann zimaz pou ador Zeova. Bondie Li invizib, alor personn pa kapav fer enn kitsoz ki resanble Li. (Iza. 46:5) Me eski nou kapav servi zimaz bann dimounn ki sertin konsider kouma sin ek priye sa bann dimounn-la? Dan deziem komannman ki Zeova ti donn bann Izraelit dan Dis Komannman, Li ti dir: “Fode pa to fer okenn zimaz ni okenn form ki parey kouma enn kitsoz ki lao dan lesiel ouswa ki  anba lor later . . . Fode pa to prostern devan sa bann kitsoz-la.” (Ex. 20:4, 5) Sa bann parol-la montre ki, si nou anvi fer Bondie plezir, fode pa nou servi bann zimaz pou ador Li.

6. Konsernan vre ladorasion, ki lexanp bann Temwin Zeova swiv azordi?

⁶ Dapre bann istorien, bann Kretien dan premie siek ti pe ador zis Bondie tousel. Par exanp, liv History of the Christian Church dir ki sa bann Kretien-la zame pa ti pou dakor ki servi bann zimaz dan bann plas kot ador Bondie. Azordi, bann Temwin Zeova swiv lexanp bann Kretien dan premie siek. Nou pa servi zimaz bann “sin” ouswa bann anz kan nou priye, ek nou pa mem priye Zezi. Nou pa salie drapo, ek nou pa fer nanye ki kapav donn enn ladorasion nou pei. Ninport ki arive, nou bien deside pou obeir seki Zezi ti dir: “To pou ador Lesegner [“Zeova,” NW] to Bondie, li tousel to bizin servi.”​—Mat. 4:10.

7. Kouma bann Temwin Zeova bien diferan ar lezot relizion?

⁷ Azordi, boukou dimounn kontan ekout bann pret ouswa bann paster ki bien popiler. Zot telman kontan sa bann dimounn-la ki zot preske donn zot enn ladorasion. Boukou dimounn asiste zot bann sermon, aste zot bann liv, ek donn boukou larzan pou soutenir zot bann lorganizasion. Sertin dimounn krwar tou seki sa bann sef relizie la dir. Zot telman kontan sa bann dimounn-la ki, mem si Zezi ti aparet ar zot, zot pa ti pou kapav plis kontan ki sa! Parkont, bann dimounn ki ador Bondie dan fason ki bizin, zot pa swiv bann zom. Mem si nou respekte bann frer ki pran latet dan lasanble, nou konpran lansegnman ki Zezi inn done kan li’nn dir: “Zot tou zot frer.” (Mat. 23:8-10, NW) Nou pa ador bann dimounn, ki zot bann sef relizie ouswa bann dirizan politik. Ek nou pa soutenir zot bann lorganizasion. Okontrer, nou res separe ar lemond ek nou gard nou netralite. Dan sa bann domenn-la, nou bien diferan ar bann lezot relizion ki dir zot Kretien.​—Zan 18:36.

8. Kouma nou kone ki Zeova anvi ki so nom glorifie ek ki tou dimounn konn so nom?

⁸ Dan enn lapriyer, Zezi ti dir: “Papa, glorifie to nom.” Avek enn lavwa for depi lesiel, Zeova Limem ti reponn so lapriyer ek Li ti promet ki Li pou glorifie So nom. (Zan 12:28) Toutlong so minister, Zezi ti glorifie nom so Papa. (Zan 17:26) Alor, pou bann vre Kretien, se enn gran privilez pou servi nom Bondie ek pou fer lezot dimounn konn so nom.

9. Kouma bann Kretien dan premie siek ti montre ki zot ti respekte nom Bondie?

⁹ Dan premie siek, zis apre ki lasanble Kretien ti etabli, Zeova ti “vizit bann non-Zwif pou swazir parmi zot enn pep ki pou port so nom.” (Zist. 15:14) Sa bann Kretien-la ti bien fier pou servi nom Bondie ek pou fer lezot konn so nom. Zot ti servi nom Bondie kan zot ti prese ek kan zot ti ekrir bann liv Labib. * Se dan sa fason-la ki zot ti montre ki zis zot tousel ti fer konn nom Bondie.​—Zist. 2:14, 21.

10. Kouma nou kone ki se zis bann Temwin Zeova ki pe fer bann dimounn konn nom Bondie?

 ¹⁰ Eski se zis bann Temwin Zeova ki pe fer bann dimounn konn nom Bondie? Wi. Anou get bann prev. Azordi, boukou sef relizie inn fer tou seki zot kapav pou kasiet nom Bondie. Zot finn tir nom Bondie dan zot bann tradiksion Labib, ek dan sertin ka, zot finn anpes bann dimounn servi nom Bondie dan zot legliz. * Li kler ki se zis bann Temwin Zeova ki ena enn gran respe pou nom Bondie! Plis ki ninport ki group relizie, bann Temwin Zeova pe fer konn nom Bondie partou lor later. Nou pe fer nou maximum pou viv an-akor avek nou nom, Temwin Zeova. (Iza. 43:10-12) Nou finn prodir plis ki 240 milyon kopi Labib Traduction du monde nouveau. Dan sa Labib-la, nou finn remet nom Zeova dan bann plas kot bann lezot tradikter Labib ti tir nom Zeova. Nou prodir bann piblikasion Biblik dan plis ki 1,000 lang, ek ena nom Zeova dan sa bann piblikasion-la.

11. Kouma bann Kretien dan premie siek ti montre ki zot ti kontan laverite?

¹¹ Zezi ti kontan laverite, setadir laverite lor Bondie ek so bann proze. Zezi ti viv an-akor avek laverite, ek li ti fer lezot konn laverite. (Zan 18:37) Bann  vre disip Zezi kontan laverite. (Zan 4:23, 24) An realite, lapot Pier ti dir ki larelizion Kretien ti “sime laverite.” (2 Pier 2:2) Bann Kretien dan premie siek ti bien kontan laverite. Akoz sa, zot ti rezet bann krwayans relizie, bann tradision, ek bann lide personel ki pa ti an-akor avek laverite. (Kol. 2:8) Dan mem fason, bann vre Kretien azordi fer zefor pou “mars dan laverite” kan zot swiv bann lansegnman ek bann prinsip ki ena dan Parol Bondie.​—3 Zan 3, 4.

12. Ki arive kan Komite Santral trouve ki nou bizin sanz fason ki nou ti pe konpran enn lansegnman, ek kifer zot fer sa?

¹² Bann Temwin Zeova pa pretann ki zot konpran tou kitsoz ki ena dan Labib. Parfwa, zot fer bann erer dan fason ki zot konpran bann lansegnman Biblik ouswa dan fason ki zot organiz lasanble. Me fode pa ki sa etonn nou! Labib dir dan enn fason bien kler ki bann serviter Zeova pou konpran laverite pli bien amezir ki letan pase. (Kol. 1:9, 10) Zeova fer nou konpran laverite tigit par tigit, ek nou osi nou bizin ena pasians pou nou konpran li pli bien. (Prov. 4:18) Kan Komite Santral trouve ki nou bizin sanz fason ki nou ti pe konpran enn lansegnman, ouswa sanz fason ki nou ti pe fer enn kitsoz, deswit zot fer bann sanzman. Azordi, boukou legliz sanz zot bann lansegnman parski zot anvi fer plezir zot bann manb ouswa zot anvi vinn popiler. Parkont, bann Temwin Zeova fer bann sanzman parski zot anvi vinn pli pros ar Bondie ek zot anvi ador Li dan mem fason ki Zezi. (Zak 4:4) Nou fer bann sanzman parski nou konpran Labib pli bien, pa parski lopinion bann dimounn dan lemond inn sanze. Sa montre ki nou kontan laverite!​—1 Tes. 2:3, 4.

13. Ki kalite pli inportan bann vre Kretien bizin manifeste, ek kouma bann Temwin Zeova manifeste sa kalite-la azordi?

¹³ Bann Kretien dan premie siek ti ena bann zoli kalite, me kalite pli inportan ki zot ti manifeste se lamour. Zezi ti dir: “Si zot ena lamour pou zot kamarad, tou dimoun pou kone ki zot mo disip.” (Zan 13:34, 35) Azordi, dan lemond antie, bann Temwin Zeova pe viv dan linite ek zot pe manifeste vre lamour. Nou bien diferan ar bann lezot relizion, parski nou enn fami, mem si nou sorti dan diferan pei ek kiltir. Dan nou bann renion ek nou bann lasanble, nou kapav trouv vre lamour ki nou ena pou nou kamarad. Ek sa donn nou lasirans ki nou pe ador Zeova dan fason ki fer Li plezir.

14. Dapre Kolosien 3:12-14, kouma nou kapav montre vre lamour pou sakenn nou kamarad?

¹⁴ Labib ankouraz nou pou ena enn gran lamour pou sakenn nou kamarad. (1 Pier 4:8) Enn fason ki nou kapav montre sa kalite lamour-la se kan nou pa pran kont defo nou kamarad ek nou pardonn zot. Nou rod bann lokazion pou montre nou zenere ek pou montre lospitalite anver tou dimounn dan lasanble, mem anver bann ki’nn ofans nou. (Lir Kolosien 3:12-14.) Kan nou manifeste sa kalite lamour-la, nou montre ki nou bann vre Kretien.

15. Dan ki lezot domenn nou swiv lexanp bann Kretien dan premie siek konsernan vre ladorasion?

¹⁵ Nou swiv lexanp bann Kretien dan premie siek dan lezot domenn osi. Par  exanp, nou organiz nou dan mem fason ki zot. Nou ena bann responsab sirkonskripsion, bann ansien, ek bann asistan ministeryel, parey kouma zot. (Fil. 1:1, NW; Tit 1:5) Ek parey kouma zot, nou respekte bann lalwa Zeova konsernan sexialite ek maryaz, lalwa konsernan disan, ek nou osi protez lasanble kont bann dimounn ki pa anvi swiv lalwa Bondie.​—Zist. 15:28, 29; 1 Kor. 5:11-13; 6:9, 10; Ebre 13:4.

16. Ki nou aprann dan Efezien 4:4-6?

¹⁶ Mem si boukou dimounn pretann ki zot bann disip Zezi, Zezi ti anonse ki boukou parmi zot pa ti pou bann vre disip. (Mat. 7:21-23) Labib osi ti predir ki, dan bann dernie zour, boukou dimounn ti pou “fer sanblan zot relizie.” (2 Tim. 3:1, 5) Kanmem sa, Labib dir dan enn fason bien kler ki ena “enn sel lafwa” ki Bondie aksepte.​—Lir Efezien 4:4-6.

17. Kisannla azordi pe swiv Zezi ek pe ador Bondie dan fason ki bizin?

¹⁷ Kisannla azordi pe ador Bondie dan fason ki bizin? Dan sa lartik-la, nou’nn trouv bann prev. Nou’nn trouv osi model ki Zezi ti lese konsernan vre ladorasion, ek nou’nn trouve kouma bann Kretien dan premie siek ti swiv sa model-la. Alor, ena zis enn sel repons pou sa kestion-la: Bann Temwin Zeova. Se vremem enn gran privilez pou form parti pep Zeova ek pou konn laverite lor Li ek so bann proze. Alor, anou kontign tini ferm dan laverite!