1. Ki Izai ti anonse konsernan Zezi, ek kifer sa profesi-la ankouraz nou?

PROFESI Izai konsernan Zezi Kris ankouraz nou ek donn nou lespwar. Izai ti predir ki Zezi pa pou “ziz dapre seki li trouve avek so lizie, li pa pou koriz zis dapre seki li tande avek so zorey” ek ki li pou “ziz bann ti dimounn avek lazistis.” (Izai 11:3, 4) Kifer sa ankouraz nou? Parski nou pe viv dan enn lemond ki ranpli ar bann prezize, ek kot bann dimounn ziz zot kamarad par seki zot trouve. Nou vremem bizin Zezi, ki enn Ziz parfe, ek ki zame pa pou ziz nou par nou laparans!

2. Ki Zezi ti donn nou lord pou fer, ek ki nou pou examine dan sa lartik-la?

² Toulezour, nou fer nou prop lopinion lor bann dimounn. Me nou pa parfe kouma Zezi, alor nou bann lopinion osi pa parfe. Fasilman nou kapav les nou inflianse par seki nou trouve. Me Zezi ti donn sa lord-la: “Pa ziz dapre laparans me ziz dapre lazistis.” (Zan 7:24) Alor, Zezi anvi ki nou vinn kouma li ek ki nou pa ziz lezot par zot laparans. Dan sa lartik-la, nou pou examinn trwa kitsoz ki  kapav inflians nou lopinion: ras ouswa nasionalite enn dimounn, kantite kas ki li ena, ek so laz. Dan sak domenn, nou pou aprann kouma nou kapav obeir Zezi ek pa ziz lezot par zot laparans.

3, 4. (a) Kifer Pier ti sanz so fason panse lor bann non-Zwif? (Get zimaz dan koumansman lartik.) (b) Ki Zeova ti ed Pier pou konpran?

³ Sey mazine seki lapot Pier ti resanti kan ti demann li pou al Sezare, dan lakaz enn non-Zwif ki ti apel Korney! (Zistwar Bann Apot 10:17-29) Depi ki Pier ti tipti finn ansegn li ki bann non-Zwif ti inpir. Me sertin kitsoz ti fek arive ki’nn fer li sanz so fason panse. Par exanp, Bondie ti fer li gagn enn vizion. (Zistwar Bann Apot 10:9-16) Dan sa vizion-la, Pier ti trouv enn kitsoz ki ti resanble enn nap ki ranpli ar bann zanimo inpir ti pe desann depi lesiel. Apre sa, enn lavwa ti dir li: “Pier, leve; touye, manze!” Pier ti refize dan enn fason ferm. Lerla, lavwa-la ti dir li: “Pa konsider kiksoz inpir si Bondie finn deklar li prop.” Apre sa vizion-la, Pier pa ti pe konpran seki sa lavwa-la ti pe rod dir li. Zis apre, bann mesaze Korney ti arive. Lespri sin ti gid Pier pou li al dan lakaz Korney, alor li ti al avek sa bann mesaze-la.

⁴ Si Pier ti ziz “dapre laparans,” zame li ti pou al dan lakaz Korney. Zame bann Zwif pa ti al dan lakaz bann non-Zwif. Me kifer Pier ti fer sa? Mem si li ti ena bann prezize lor bann non-Zwif, vizion ki li ti gagne ek instriksion ki lespri sin ti donn li, ti sanz so fason panse. Apre ki Pier ti ekout Korney, li ti dir: “Asterla mo realize ki Bondie tret tou dimoun parey lor mem baz. Bondie aksepte ninport ki dimoun dan ninport ki nasion si li ador li e fer seki drwat.” (Zistwar Bann Apot 10:34, 35) Pier ti extra kontan kan li ti aprann ki Zeova konsider tou dimounn parey, ek sa ti pou ena enn lefe lor tou bann Kretien. Kouma?

5. (a) Ki kitsoz Zeova anvi ki tou bann Kretien konpran? (b) Mem si nou konn laverite, ki li posib nou ankor ena dan nou?

⁵ Zeova ti servi Pier pou ed tou bann Kretien konpran ki Li pa fer preferans. Pou Zeova, nou ras, nou nasionalite, nou tribi, ouswa nou lang pa fer okenn diferans. Tanki nou ena lakrint pou Bondie ek nou fer seki drwat, Li pou aksepte nou. (Galat 3:26-28; Revelasion 7:9, 10) Sirman to deza konn sa. Me kitfwa to’nn grandi dan enn pei ouswa dan enn fami kot ti ena boukou prezize. Mem si to panse to pa fer preferans, eski li posib ki to ankor ena enn ti tras prezize dan twa? Mem si Pier ti ed lezot pou trouve ki Bondie pa fer preferans, plitar limem li ti ankor  ena bann prezize. (Galat 2:11-14) Alor, kouma nou kapav imit Zezi ek aret ziz lezot par zot laparans?

6. (a) Ki kapav ed nou pou eliminn tou tras prezize dan nou? (b) Ki rapor enn ansien ti montre lor li?

⁶ Pou kone si nou ena bann prezize, nou bizin examinn noumem. Nou bizin konpar nou latitid avek seki nou aprann dan Parol Bondie. (Psom 119:105, NW.) Nou kapav osi demann enn kamarad si li finn remark bann ti tras prezize dan nou ki nou pa kapav trouve par noumem. (Galat 2:11, 14) Kitfwa nou telman abitie pans dan enn sertenn fason ki nou pa rann nou kont ki nou ena bann prezize! Se seki ti ariv enn ansien. Li ti ekrir enn rapor lor enn koup bien devwe ki ti dan servis aplintan. Mari-la ti sorti dan enn kiltir ki boukou dimounn ti konsider inferyer. Ansien-la ti ekrir boukou bon kitsoz lor sa frer-la, me li ti azoute: “Mem si li sorti dan [sa kiltir-la], so bann manier ek so fason viv ed lezot pou konpran ki si enn dimounn sorti dan sa kiltir-la li pa pou otomatikman malang ek pena bon manier, parey kouma boukou dimounn ete dan sa kiltir-la.” Ki leson nou aprann? Mem si nou ena boukou responsabilite dan lorganizasion Zeova, nou bizin examinn noumem ek aksepte led lezot pou trouve si ankor ena bann ti tras prezize dan nou. Ki nou kapav fer ankor?

7. Kouma nou kapav montre ki nou finn “ouver nou leker angran”?

⁷ Si nou “ouver nou leker angran,” olie ki nou ena bann ti tras prezize nou pou ena lamour. (2 Korintien 6:11-13) Eski to prefer pas letan avek zis bann dimounn ki mem ras, nasionalite, tribi ouswa ki koz mem lang ki twa? Si wi, esey pas letan avek lezot osi. To kapav invit bann frer ek ser ki sorti dan diferan kiltir pou travay avek twa dan predikasion. Ouswa to kapav invit zot kot twa pou pran enn repa ouswa pou enn ti program. (Zistwar Bann Apot 16:14, 15) Avek letan, to leker pou telman ranpli ar lamour ki pou nepli ena plas pou bann prezize. Asterla, anou get enn lot kitsoz ki kapav fer nou ziz “dapre laparans.”

8. Ki nou aprann dan Levitik 19:15?

⁸ Fason ki nou trouv lezot kapav inflianse par ki kantite enn dimounn ris ouswa pov. Levitik 19:15 dir: “Fode pa to fer preferans ar bann pov ouswa montre preferans anver bann ris. To bizin ziz to konpagnon avek lazistis.” Kouma rises ouswa povrete enn dimounn kapav inflians fason ki nou trouv li?

9. Ki verite bien tris Salomon ti ekrir, ek ki sa ansegn nou?

⁹ Salomon ti inspire pou ekrir sa  verite bien tris la: “Enn dimounn pov, mem so bann vwazin deteste li, me enn dimounn ris ena boukou kamarad.” (Proverb 14:20) Ki sa proverb-la ansegn nou? Si nou pa fer atansion, li kapav arive ki nou rod fer kamarad avek bann frer ki ris ek pa avek bann ki pov. Kifer li danzere kan nou ziz bann dimounn dapre seki zot ena ouswa seki zot pena?

10. Zak ti met bann Kretien an gard kont ki problem?

¹⁰ Si nou ziz nou bann frer dan enn fason diferan akoz zot ris ouswa pov, nou kapav kree divizion dan kongregasion. Sa ti arive dan sertin kongregasion dan premie siek, ek Zak ti met sa bann Kretien-la an gard kont sa. (Lir Zak 2:1-4.) Fode pa ki nou permet ki ena divizion dan kongregasion. Me, kouma nou kapav evit ziz bann dimounn dapre seki zot ena?

11. Eski bann kitsoz materyel ena enn lefe lor relasion ki enn dimounn ena avek Zeova? Explike.

¹¹ Nou bizin trouv nou bann frer ek ser kouma Zeova trouv zot. Enn kikenn pa pou gagn valer devan lizie Zeova parski li ris ouswa pov. Nou relasion avek Zeova pa depann lor ki kantite larzan ouswa ki kantite kitsoz materyel ki nou ena. Li vre ki Zezi ti dir ki  li pou “bien difisil pou enn ris rant dan Rwayom lesiel,” me li pa ti dir ki li pou inposib. (Matie 19:23) Zezi ti dir osi: “Bienere zot ki bann pov, Rwayom Bondie pou zot.” (Lik 6:20) Me sa pa vedir ki tou bann dimounn pov ti pou ekout Zezi ek ti pou gagn bann benediksion spesial. Ti ena boukou dimounn pov ki pa ti swiv Zezi. An realite, nou pa kapav ziz relasion ki enn dimounn ena avek Zeova par bann kitsoz materyel ki li ena.

12. Ki bann Lekritir ansegn bann dimounn ris ek bann dimounn pov?

¹² Parmi pep Zeova, ena bann frer ek ser ki ris ek ena lezot ki pov. Me zot tou zot kontan Zeova ek zot servi Li avek tou zot leker. Bann Lekritir dir bann dimounn ris “pa met zot lesperans dan bann fos rises. Met zot lesperans plito dan Bondie.” (Lir 1 Timote 6:17-19.) Parol Bondie averti tou bann serviter Zeova, ki zot ris ouswa pov, ki li danzere pou kontan kas. (1 Timote 6:9, 10) Kan nou ena mem fason panse ki Zeova lor nou bann frer ek ser, nou pa pou ziz zot dapre seki zot ena ouswa seki zot pena. Me ki nou kapav dir lor laz enn kikenn? Eski se enn bon rezon pou ziz lezot?

13. Kouma Labib montre nou ki nou bizin ena respe anver bann ki aze?

¹³ Labib souvan dir ki nou bizin respekte bann ki aze. Levitik 19:32 dir: “Devan bann seve blan to bizin leve, ek to bizin donn loner enn dimounn aze, ek to bizin ena lakrint pou to Bondie.” Proverb 16:31 dir ki “bann seve blan, zot kouma enn kouronn bote kan zot dan semin lazistis.” Pol ti dir Timote ki fode pa li kritik bann zom aze, me tret zot kouma so bann papa. (1 Timote 5:1, 2) Mem si Timote ti ena sertin lotorite lor bann frer aze, li ti bizin touletan tret zot avek konpasion ek respe.

14. Dan ki sitiasion kitfwa nou bizin koriz enn kikenn ki pli aze ki nou?

¹⁴ Me ki nou pou fer si enn kikenn aze fer enn pese volonterman ouswa ankouraz enn kitsoz ki pa fer Zeova plezir? Zeova pa pou exkiz enn kikenn ki fer enn pese volonterman, mem si dimounn-la aze ek lezot bien respekte li. Remark prinsip ki ena dan Izai 65:20: “Enn kikenn ki fer pese pou gagn malediksion, mem si li ena san-t-an.” Nou trouv enn lot prinsip ki inpe parey dan vizion Ezekiel. (Ezekiel 9:5-7) Alor, seki pli inportan se, respekte Zeova, Ansien Bann Zour. (Daniel 7:9, 10, 13, 14) Sa respe ki nou ena pou Zeova la pou donn nou kouraz pou koriz enn dimounn ki bizin led, malgre laz ki li ena.​—Galat 6:1.

15. Kouma lapot Pol ti montre ki nou bizin ena respe anver bann frer ki pli zenn?

¹⁵ Me kouma nou pou tret enn frer si li zenn? Eski savedir ki li pa merit nou respe? Non. Pol ti dir Timote: “Mo napa oule ki personn souzestim twa akoz to enn zenes. Okontrer, vinn enn lexanp pou zot par to parol, to lamour, to lafwa, to manier viv.” (1 Timote 4:12) Kan Pol ti ekrir sa, sirman Timote ti ena apepre 30 an. Kanmem sa, Pol ti donn li bann responsabilite bien inportan. Ki leson nou aprann? Fode pa  nou ziz bann frer ki pli zenn dapre zot laz. Reflesi lor tou seki Zezi ti fer kan li ti ena enn tipe plis ki 30 an!

16, 17. (a) Kouma bann ansien deside si enn frer li kalifie pou servi kouma asistan ministeryel ouswa ansien? (b) Kouma bann lopinion personel ek bann koutim ki ena dan pei kapav al kont seki bann Lekritir dir?

¹⁶ Dan sertin kiltir, bann dimounn pena respe pou bann ki pli zenn. Akoz sa, kitfwa sertin ansien pa rekomann bann zenn frer kouma asistan ministeryel ouswa ansien, mem si zot kalifie pou asim sa bann responsabilite-la. Me Labib zame pa dir ki enn frer bizin ariv enn sertin laz avan ki li vinn asistan ministeryel ouswa ansien. (1 Timote 3:1-10, 12, 13; Tit 1:5-9, NW.) Si enn ansien fer sa vinn enn reg akoz so kiltir, li pa pe swiv Parol Bondie. Fode pa ki bann ansien ziz bann zenn frer dapre zot prop lopinion ouswa dapre bann koutim dan pei, me dapre bann prinsip ki ena dan Parol Bondie.​—2 Timote 3:16, 17.

¹⁷ Si bann ansien pa swiv bann prinsip Labib, li kapav arive ki zot anpes nomm enn frer ki kalifie pou vinn ansien ouswa asistan ministeryel. Dan enn pei, enn asistan ministeryel ti asim bien bann responsabilite inportan, ek bann ansien ti dakor ki li ranpli bann kondision ki ena dan Labib pou vinn enn ansien. Selman, sertin ansien ki ti pli aze ti dir ki li ti paret tro zenn pou vinn enn ansien, alor zot pa ti rekomann li. Malerezman, sa frer-la pa ti nome, ek tousala akoz so laparans. Ek li paret ki sa fason panse-la li bien komin dan sertin parti lemond. Li bien inportan ki nou kont lor Labib olie ki nou kont lor nou prop lopinion ouswa lor bann koutim ki ena dan pei. Lerla nou pou obeir Zezi ek nou pou aret ziz lezot par zot laparans.

18, 19. Ki pou ed nou pou trouv nou bann frer kouma Zeova trouv zot?

¹⁸ Nou inparfe, me kanmem sa, nou kapav aprann pou get lezot san okenn prezize parey kouma Zeova. (Zistwar Bann Apot 10:34, 35) Alor, nou bizin touletan ekout bien bann rapel ki nou gagne dan Parol Bondie. Kan nou aplik sa bann konsey-la, nou pe swiv komannman Zezi, ki dir: “Pa ziz dapre laparans.”​—Zan 7:24.

¹⁹ Biento nou Lerwa, Zezi Kris, pou ziz tou dimounn. Li pa pou ziz dapre seki li trouve ouswa tande, me plito dapre Bondie so bann prinsip ki zis. (Izai 11:3, 4) Nou pe atann avek inpasians sa lepok extraordiner la!