Kifer personn pa gagn drwa met piblikasion bann Temwin Zeova lor lezot sit Internet ouswa lor bann rezo sosial?

Sertin dimounn panse ki akoz nou bann piblikasion gratis, zot kapav kopie ouswa met sa bann piblikasion-la lor lezot sit Internet ouswa lor bann rezo sosial. Me sa kapav kree bann problem bien grav ek li al kont Bann Kondision pou Bann Itilizater * (get not) ki ena an rapor avek nou bann sit Internet. Sa Bann Kondision pou Bann Itilizater la dir dan enn fason kler ki personn pa gagn drwa “pran seki ena dan sa sit-la ek met sa lor Internet (ninport ki sit, enn sit kot partaz bann file, ouswa ninport ki rezo sosial).” Kifer sa bann reg-la inportan?

Tou bann kitsoz ki ena lor nou bann sit ena copyright, savedir ki zot proteze par lalwa. Sa li inportan parski sa anpes bann dimounn mal servi seki ena lor nou bann sit. Bann aposta ek bann lezot dimounn ki anvi fer ditor nou travay parfwa met nou bann piblikasion lor zot bann sit Internet pou atir latansion bann Temwin Zeova ek lezot dimounn. Me lor sa bann sit-la zot met osi bann kitsoz ki kapav kree bann dout dan lespri bann dimounn. (Psom 26:4; Proverb 22:5) Ena lezot ki finn servi nou bann piblikasion ouswa nou logo jw.org lor bann piblisite, dan bann aplikasion pou bann laparey mobil, ouswa lor bann prodwi ki zot vande. Me nou kapav al lakour ek anpes zot fer sa parski nou bann piblikasion ek nou logo zot proteze par lalwa. (Proverb 27:12) Me, lakour kitfwa pa pou soutenir nou si nou donn sertin dimounn, mem nou bann frer, drwa pou met nou bann piblikasion lor lezot sit Internet ouswa pou servi nou logo jw.org pou vann bann prodwi.

Si nou download nou bann piblikasion lezot plas apart jw.org, sa kapav bien danzere. Zeova donn nou manze spiritiel zis atraver “lesklav fidel ek saz.” (Matie 24:45, NW.) Sa ‘esklav-la’ servi zis so bann sit ofisiel pou donn nou manze spiritiel, setadir www.pr418.com, tv.pr418.com, ek wol.pr418.com. Ek pou bann laparey mobil nou ena zis trwa aplikasion ofisiel: JW Language^®, JW Library^®, ek JW Library Sign Language^®. Lor sa bann sit-la ek sa bann aplikasion-la, nou pa pou gagn okenn piblisite ek nanye ki sorti dan lemond Satan. Me si nou gagn nou bann piblikasion lor enn lot sit ouswa aplikasion, ena enn danze ki sa bann piblikasion-la inn kapav sanze dan enn sertenn fason.​—Psom 18:26; 19:8.

Anplis, si nou met nou bann piblikasion lor bann sit Internet kot bann dimounn kapav met bann komanter, sa kapav donn bann aposta ek lezot dimounn lokazion pou kritik lorganizasion Zeova. Lerla, sertin frer diskit avek sa bann dimounn-la, ek sa zet ankor plis dezoner lor Zeova. Sa bann diskision lor Internet la se pa enn bon fason pou koriz fason panse enn kikenn ek ed li pou konpran laverite. (1 Timote 6:3-5; 2 Timote 2:23-25) Anplis, sertin dimounn kree bann sit Internet ouswa bann kont lor bann rezo sosial ki donn linpresion ki zot dan lorganizasion ouswa ki zot bann frer Komite Santral. Me tousala fos. Okenn manb Komite Santral pena enn paz personel lor Internet ni zot ena enn kont lor bann rezo sosial.

Kan nou diriz bann dimounn lor jw.org, nou pe soutenir predikasion lor “Bonn Nouvel.” (Matie 24:14) Nou bann sit Internet ek nou bann aplikasion pe ameliore deplizanpli. Nou anvi ki tou dimounn tir profi ar sa. Alor, nou gagn drwa e-mail lezot enn piblikasion ouswa avoy zot enn link ki pou diriz zot lor nou sit Internet. Dan sa fason-la nou diriz bann dimounn ver sel mwayin ki Zeova servi pou donn nou manze spiritiel, setadir “lesklav fidel ek saz.”