1. Kouma boukou pe esey fer plis pou servi Zeova?

 NOU ena boukou travay pou fer avan lafin sa lemond-la. (Mat. 24:14; Lik 10:2; 1 Pier 5:2) Nou tou nou anvi donn Zeova nou best, ek boukou pe fer plis dan zot minister. Sertin anvi vinn pionie, al servi dan Betel, ouswa al ede lor bann proze konstriksion. Ek boukou frer pe fer zefor pou kalifie zot pou vinn asistan ministeryel ouswa ansien. (1 Tim. 3:1, 8, NW) Zeova bien kontan kan Li trouve kouma so bann serviter ena dezir pou fer plis pou Li!​—Ps. 110:3 NW; Iza. 6:8.

2. Ki nou kapav resanti kan nou pa reisi realiz enn lobzektif dan servis Zeova?

² Kitfwa nou kapav santi nou dekouraze si nou pankor reisi realiz nou bann lobzektif, sirtou si sa fer lontan ki nou’nn fixe sa bann lobzektif-la. Ouswa nou kapav dekouraze parski ena bann kitsoz ki nou pa kapav fer dan lorganizasion Zeova akoz nou laz ouswa pou bann lezot rezon. (Prov. 13:12) Melissa, * par exanp, ti anvi al servi dan Betel ouswa asiste Lekol pou Bann Evanzelizater Rwayom Bondie, me li dir: “Mo tro vie pou gagn sa bann privilez-la. Akoz sa, parfwa mo santi mwa dekouraze.”

3. Ki kitsoz sertin bizin fer pou zot gagn lezot responsabilite dan servis Zeova?

³ Sertin frer ki zenn ek ki ena enn bon lasante kitfwa bizin devlop sertin kalite avan ki zot pre pou asim lezot responsabilite. Par exanp, sertin kapav intelizan, ena kapasite pou pran bann desizion vit, ek zot dispoze pou travay. Me kitfwa zot bizin aprann pou ena plis pasians, vinn pli serye  dan zot travay, ek aprann pou ena plis respe pou lezot. Si to fer bann gran zefor pou devlop bann kalite ki bizin, bann frer kapav donn twa enn responsabilite kan to pa atann. Anou get lexanp Nick. Kan li ti ena 20 an, li ti bien dekouraze parski li pa ti nome kouma asistan ministeryel. Li dir: “Mo ti panse ki ti ena enn problem ar mwa.” Me Nick pa ti bes lebra. Li ti fer so best dan lasanble ek dan travay predikasion. Azordi, li pe servi kouma enn manb Komite Biro Nasional.

4. Ki nou pou examine dan sa lartik-la?

⁴ Eski to dekouraze parski to pankor reisi realiz enn lobzektif dan servis Zeova? Si wi, priye Zeova ek dir Li seki to resanti. (Ps. 37:5-7) Anplis, demann bann frer ki ena lexperyans kouma to kapav progrese, ek fer to best pou aplik zot konsey. Si to fer sa, kitfwa to pou kapav realiz to lobzektif. Me, parey kouma Melissa, kitfwa pou linstan, li pa posib ki to fer seki to anvi pou Zeova. Malgre sa, kouma to kapav gard to lazwa? Dan sa lartik-la, nou pou gete (1) ki kitsoz kapav donn nou lazwa, (2) kouma nou kapav gagn plis lazwa, ek (3) ki kalite lobzektif nou kapav fixe pou ogmant nou lazwa.

5. Lor ki kitsoz nou bizin res konsantre pou ki nou zwaye? (Ekleziast 6:9)

⁵ Ekleziast 6:9 explik nou ki kitsoz kapav ed nou pou ena lazwa. (Lir. *) Enn dimounn ki res konsantre lor ‘seki so lizie trouve’ pou satisfe ar seki li ena asterla. Me enn dimounn ki galoup deryer seki li pa kapav gagne, zame li pa pou satisfe. Alor, ki leson nou kapav aprann? Pou nou zwaye, nou bizin konsantre nou lor seki nou ena ek pa lor bann kitsoz ki nou pa kapav gagne.

6. Ki lexanp nou pou examine asterla, ek ki nou pou aprann ar sa lexanp-la?

⁶ Eski li vremem posib ki nou satisfe ar seki nou deza ena? Wi li posib. Me li normal ki avek letan nou anvi realiz bann nouvo lobzektif. Nou kapav vremem zwaye avek bann kitsoz ki “nou lizie trouve.” Kouma nou kapav fer sa? Anou get parabol Zezi lor bann talan, ki trouv dan Matie 25:14-30. Dan sa parabol-la, nou pou aprann kouma nou kapav zwaye ek kouma nou kapav gagn ankor plis lazwa ar seki nou deza ena.

7. Fer enn rezime parabol Zezi konsernan bann talan.

⁷ Dan sa parabol-la, enn misie ti pe al an vwayaz. Avan li ale, li ti apel so bann esklav ek li ti donn sakenn parmi zot bann talan pou ki zot fer komers. * Misie-la ti kone ki so bann esklav ti ena diferan kapasite. Alor, li ti donn premie-la sink talan, deziem-la de talan, ek trwaziem-la enn talan. De premie esklav-la ti travay dir pou fer plis kas pou zot met. Me trwaziem esklav-la pa ti fer nanye ar kas ki so met ti donn li. Akoz sa, so met ti met li deor.

8. Kifer premie esklav dan sa parabol-la ti kapav zwaye?

⁸ Premie esklav-la sirman ti bien kontan ki so met ti donn li sink talan. Sa ti reprezant boukou larzan, ek sa ti montre ki so met ti fer li konfians. Me ki nou kapav dir lor deziem esklav-la? Eski li ti dekouraze  parski li pa ti gagn mem kantite talan ki premie esklav-la? Kouma li ti reazir?

9. Ki Zezi pa ti dir konsernan sa deziem esklav-la? (Matie 25:22, 23)

⁹ Lir Matie 25:22, 23. Zezi pa ti dir ki sa deziem esklav-la ti ankoler parski li ti gagn zis de talan. Ek Zezi pa ti dir ki sa esklav-la ti plengne ek ti dir: ‘Kifer mo met inn donn mwa pli tigit talan? Mo travay dir parey kouma sa premie esklav-la! Si mo met trouve ki mo pa enn bon travayer, alor kitfwa mo bizin anter so larzan ek travay pou momem.’

10. Ki kitsoz deziem esklav-la ti fer ar so bann talan?

¹⁰ Parey kouma sa premie esklav-la, deziem esklav-la ti konpran ki so met ti donn li enn travay bien inportan, ek li ti travay dir pou so met. Ki rezilta li ti gagne? Li ti fer so de talan vinn kat talan. Met-la ti rekonpans so esklav parski li ti travay dir. Li ti felisit li ek donn li plis responsabilite!

11. Kouma nou kapav gagn plis lazwa?

¹¹ Dan mem fason, nou pou gagn plis lazwa kan nou fer nou maximum dan ninport ki travay ki nou gagne dan servis Zeova. ‘Devoue tou to letan’ dan travay predikasion ek travay dir dan lasanble. (Zist. 18:5; Ebre 10:24, 25) Prepar bien to bann renion pou ki to kapav donn bann komanter ankourazan. Konsider bann devwar ki to gagne dan renion lasemenn kouma enn kitsoz ki bien inportan. Si to’nn gagn enn responsabilite dan lasanble, to bizin serye ek fode pa to an retar. Fode pa to panse ki sa responsabilite-la  pa inportan ek ki li pa merit to letan. Okontrer, travay dir pou to vinn pli efikas dan travay-la. (Prov. 22:29) Plis to travay dir pou Zeova, plis to lamitie avek Li pou grandi, ek plis to pou zwaye. (Gal. 6:4) Lerla, sa pou pli fasil osi pou to gard to lazwa kan enn lot dimounn gagn enn responsabilite ki to ti anvi gagne.​—Rom. 12:15; Gal. 5:26.

12. Ki kitsoz ti ed Melissa ek Nick pou gagn plis lazwa?

¹² Eski to rapel Melissa, ki nou ti mansione dan paragraf 2 ek ki ti anvi al Betel ek asiste Lekol pou Bann Evanzelizater Rwayom Bondie? Mem si li pa ti kapav realiz sa lobzektif-la, li ti dir: “Mo ti fer mo best dan mo servis pionie ek mo ti esey tou bann diferan metod predikasion.” Ki kitsoz Nick ti fer kan li pa ti nome kouma asistan ministeryel? Li dir: “Mo ti konsantre mwa lor seki mo ti kapav fer, kouma par exanp, prese ek ankouraz lezot par mo bann bon komanter. Mo ti osi ranpli enn form pou al servi dan Betel, ek lane apre, mo ti rant Betel.”

13. Ki bienfe to pou gagne si to res bien okipe dan travay ki’nn donn twa? (Ekleziast 2:24)

¹³ Si to res bien okipe dan travay ki to’nn gagne, eski savedir ki to pou gagn plis responsabilite dan lavenir? Kitfwa to kapav gagn plis responsabilite, parey kouma Nick. Me si parey kouma Melissa, to pa’nn gagn lezot responsabilite, to ankor kapav gagn plis lazwa ek to pou ere pou seki to pe kapav fer pou Zeova. (Lir Ekleziast 2:24. *) Anplis, to pou zwaye parski to kone ki to fer plezir nou Met, Zezi Kris.

14. Ki nou bizin touletan rapel kan nou reflesi lor nou bann lobzektif dan servis Zeova?

¹⁴ Si nou pe deza fer nou best dan nou servis pou Zeova, eski savedir ki fode pa nou esey fer plis pou Li? Non! Nou bizin fixe bann lobzektif ki pou ed nou pou vinn bann pli bon proklamater ek ansegnan. Ek nou bizin osi fixe lobzektif pou ed nou bann frer ek ser. Nou pou reisi realiz sa bann lobzektif-la si nou konsantre nou lor kouma nou kapav ed lezot, olie ki nou konsantre nou lor noumem.​—Prov. 11:2; Zist. 20:35.

15. Sit sertin lobzektif ki kapav ed twa pou ogmant to lazwa.

¹⁵ Ki bann lobzektif to kapav fixe tomem? Demann Zeova pou ed twa trouve ki bann lobzektif to kapav realize. (Prov. 16:3; Zak 1:5) Eski to kapav fixe enn parmi bann lobzektif ki nou’nn mansione dan  premie paragraf, kouma par exanp, fer pionie tanporer ouswa permanan, al servi dan Betel, ouswa al ede lor bann proze konstriksion? Ouswa to kapav aprann enn nouvo lang pou to kapav pres bonn nouvel ouswa al servi dan enn lot teritwar. To kapav aprann plis lor sa bann lobzektif-la kan to lir sapit 10 dan liv Organisés pour faire la volonté de Jéhovah ek kan to koz sa avek enn ansien dan to lasanble. * Kan to fer zefor pou realiz sa bann lobzektif-la, lezot dan lasanble pou trouv to bann progre ek to pou gagn plis lazwa.

16. Ki to kapav fer si, pou linstan, to pa kapav realiz enn lobzektif ki to anvi?

 ¹⁶ Me ki to kapav fer si, pou linstan, to pa kapav realiz enn parmi bann lobzektif ki’nn mansione dan sa lartik-la? To kapav fixe twa enn lobzektif ki to kapav realize. Anou get sertin parmi sa bann lobzektif-la.

17. Dapre 1 Timote 4:13, 15, kouma enn frer kapav vinn enn pli bon ansegnan?

¹⁷ Lir 1 Timote 4:13, 15. Si to enn frer batize, to kapav fer zefor pou vinn enn pli bon orater ek enn pli bon ansegnan. Kifer? Parski si to pe “donn twa afon” pou vinn enn bon lekter, enn bon orater, ek enn bon ansegnan, to pou plis kapav ed bann ki pe ekout twa. Esey fixe twa lobzektif pou etidie ek aplik seki ena dan brosir Amelior To Lektir ek To Lansegnman. Etidie bann leson-la enn par enn, fer bann seans lexersis regilierman, ek aplik seki to pe aprann kan to fer bann diskour. Rod konsey avek konseye adzwin ouswa lezot ansien ki pe “travay dir pou prese ek ansegne.” * (1 Tim. 5:17) Fode pa to konsantre twa zis lor fason ki to pou aplik bann sigzesion ki ena dan brosir-la, me konsantre twa osi lor kouma to kapav ed bann ki pe ekout twa pou ranforsi zot lafwa ek pou met an pratik seki zot pe aprann. Kan to fer sa, to pou ogmant to lazwa ek ogmant lazwa lezot osi.

18. Ki kitsoz kapav ed twa pou realiz to bann lobzektif dan to minister?

¹⁸ Nou tou nou ena responsabilite pou prese ek fer bann disip. (Mat. 28:19, 20;  Rom. 10:14) Eski to anvi vinn pli efikas dan sa travay bien inportan-la? Etidie brosir Lansegnman ek apre sa, fixe twa bann lobzektif presi ki pou ed twa pou met an pratik seki to pe aprann. To kapav gagn bann lezot sigzesion pratik dan Kaye Renion Lavi Kretien ek Minister ek dan bann video model konversasion ki nou gagne dan nou bann renion lasemenn. Esey diferan sigzesion ek gete lekel ki pli adapte ar to teritwar. Kan to aplik sa bann sigzesion-la, to pou vinn enn pli bon ansegnan ek sa pou donn twa plis lazwa.​—2 Tim. 4:5.

19. Ki kitsoz kapav ed twa pou devlop bann kalite ki fer Bondie plezir?

¹⁹ Fode pa to bliye ki enn parmi bann lobzektif pli inportan ki to kapav fixe tomem, se pou devlop bann kalite ki fer Bondie plezir. (Gal. 5:22, 23; Kol. 3:12; 2 Pier 1:5-8) Kouma to kapav fer sa? Anou pran enn lexanp. Fer koumadir to pe anvi ranforsi to lafwa. Sirman to pou lir bann lartik dan nou bann piblikasion ki donn bann sigzesion pratik pou ranforsi nou lafwa. Kitfwa to pou get bann video osi, lor Program Televizion JW, ki koz lor bann frer ek ser ki’nn gard zot lafwa for dan diferan leprev. Ek apre sa, to pou reflesi kouma to kapav imit zot lafwa.

20. Ki nou kapav fer pou nou ena plis lazwa ek pou nou mwins dekouraze?

²⁰ Pena dout ki nou tou nou ti pou kontan fer plis pou Zeova, pa vre! Dan lemond nouvo, nou pou kapav servi Li dan enn fason konple. Me an atandan, si nou fer nou best dan seki nou pe kapav fer asterla, nou pou ena plis lazwa ek nou pou mwins dekouraze. Me pli inportan ankor, nou pou donn Zeova, nou “Bondie ere,” loner ek laglwar. (1 Tim. 1:11, NW) Alor, anou gagn lazwa dan bann responsabilite ki nou ena!