NOU lir dan Levanzil Matie: “Ler Zezi rant dan tanp, li farous tou bann ki ti pe vande ek aste, li devir anba lao latab bann sanzer larzan ek sez bann vander pizon. Li dir zot, ‘Finn ekrir, “Pou apel mo lakaz, enn lakaz lapriyer.” Me zot finn fer li vinn enn kavern voler.’”—Matie 21:12, 13.

Listwar montre ki bann marsan dan tanp ti inzis anver bann klian. Zot ti pe vann zot bann marsandiz bien ser. Par exanp, bann marsan ti abitie vann bann pizon telman bomarse ki mem bann dimounn mizer ti kapav aste zot pou fer bann sakrifis. Selman, bann vie liv Zwif montre ki pandan enn tan dan premie siek, de pizon ti kout enn denie an-or. Enn dimounn ti pou bizin travay apepre 25 zour pou gagn sa kantite kas-la. Bann pizon ti vinn telman ser ki bann dimounn mizer ti nepli kapav aste zot. (Levitik 1:14; 5:7; 12:6-8) Rabin Shimon ben Gamaliel ti telman ankoler ar sa sitiasion-la ki li ti diminie kantite sakrifis ki bann Zwif ti bizin fer. Kan li ti fer sa, pri de pizon deswit ti tonbe ek ti vinn 100 fwa mwin ser.

Nou trouve ki bann marsan ki ti dan tanp ti gourma kas ek ti fer profi lor ledo zot bann klian. Sa montre nou ki Zezi ti ena rezon kan li ti dir ki sa bann marsan-la ti bann “voler.”