LARTIK LETID 25
KANTIK 7 Zeova, Nou Lafors
Rapel ki Zeova “Limem Bondie Vivan”
“Zeova li vivan!”—PS. 18:46.
PWIN PRINSIPAL
Kan nou rapel ki Zeova Li enn Bondie ki vivan, nou gagn boukou bienfe.
1. Ki kitsoz kapav ed nou pou kontign servi Zeova malgre bann difikilte?
LABIB dir ki nou pe viv “bann lepok kritik, difisil pou siporte.” (2 Tim. 3:1) Anplis bann difikilte ki tou dimounn gagne, bann serviter Zeova bizin fer fas ar lopozision ek persekision. Ki kitsoz kapav ed nou pou kontign servi Zeova malgre sa bann difikilte-la? Enn kitsoz ki kapav ed nou se kan nou rapel ki Zeova Li “Bondie vivan” ek ki li kapav soutenir nou.—Zer. 10:10; 2 Tim. 1:12.
2. Ki kitsoz kapav donn nou lafors pou andir nou bann difikilte?
2 Zeova trouv tou bann difikilte ki nou gagne ek Li touletan anvi ed nou. (2 Kro. 16:9; Ps. 23:4) Kan nou kone ki nou Bondie gagn nou traka ek ki Li touletan pre pou ed nou, sa donn nou lafors pou andir ninport ki difikilte. Anou gete kouma Zeova ti ed Lerwa David.
3. Kan David ti dir “Zeova li vivan,” ki li ti pe rod dir?
3 David ti konn Zeova ek li ti kont lor Li. Kan Lerwa Sail ek bann lezot dimounn ti rod touy li, David ti priye Zeova pou ki Li ed li. (Ps. 18:6) Apre ki Zeova ti reponn so lapriyer ek ti sov li, David ti dir: “Zeova li vivan!” (Ps. 18:46) Ki li ti pe rod dir? David pa ti pe zis dir ki Bondie Li existe. Pou explik sa verse-la, enn liv referans dir ki David ti pe rod dir ki Zeova Li “vre Bondie ek ki Li touletan ed so bann serviter.” Wi, David ti kone ki so Bondie ti konn tou seki pe pase dan so lavi, ek ki Li ti pre pou ed li. Sa ti ankouraz David pou kontign servi Zeova ek pou kontign loue Li.—Ps. 18:28, 29, 49.
4. Kan nou sir ki Zeova Li “Bondie vivan,” ki bienfe nou gagne?
4 Kan nou sir ki Zeova Li “Bondie vivan,” sa motiv nou pou kontign fer nou maximum pou servi Li ek sa donn nou lafors pou andir nou bann difikilte. Sa motiv nou osi pou res pros ar Li.
BONDIE VIVAN POU DONN TWA LAFORS
5. Kan nou gagn bann difikilte, ki kitsoz nou kapav sir? (Filipien 4:13)
5 Kan nou rapel ki Zeova Li Bondie vivan ek ki Li touletan pre pou ed nou, sa donn nou lafors pou andir ninport ki difikilte. Apre tou, pena okenn difikilte ki Zeova pa kapav sirmonte. Limem Bondie Tou-Pwisan, ek Li kapav donn nou lafors pou andire. (Lir Filipien 4:13.) Akoz sa, nou sir ki nou kapav sirmont ninport ki difikilte. Anplis, kan nou trouve kouma Zeova ed nou pou sirmont bann ti difikilte, nou ena plis konfians ki Li kapav ed nou kan nou gagn bann gran leprev.
6. Kan li ti zenn, ki kitsoz ti fer David ena plis konfians an Zeova?
6 Anou get de sitiasion ki ti ed David pou ena plis konfians an Zeova. Kan David ti enn zenn berze, enn lion ek enn lours ti pran bann mouton so papa. Avek kouraz, toule-de fwa David ti galoup deryer sa bann zanimo-la ek li ti sov bann mouton so papa. Selman, David pa ti panse ki li ti reisi fer sa par limem. Li ti kone ki Zeova ti ed li. (1 Sam. 17:34-37) David zame pa ti bliye seki ti ariv li! Li ti reflesi lor la, ek sa ti fer li ena plis konfians ki Zeova ti pou ed li dan lavenir.
7. Lor ki kitsoz David ti res konsantre, ek kouma sa inn ed li pou touy Goliat?
7 Apre sa, kan David ti enn adolesan, li ti al get larme bann Izraelit. Li ti trouve ki bann solda Izraelit ti bien per, parski enn zean ki ti apel Goliat, ti pe “provok larme Izrael.” (1 Sam. 17:10, 11) Bann solda Izraelit ti per parski zot ti res konsantre lor grander sa zean-la ek lor seki li ti pe dir. (1 Sam. 17:24, 25) Parkont, David ti pe konsantre lor enn lot kitsoz. Li ti kone ki Goliat pa ti pe zis provok larme Izrael, me li ti pe osi provok “larme Bondie vivan.” (1 Sam. 17:26) Dan sa ler-la, David ti pe mazinn Zeova. Li ti kone ki so Bondie, ki ti ed li kan li ti enn zenn berze, ti pou ed li dan sa sitiasion-la osi. Alafin, avek led Zeova, David ti touy Goliat!—1 Sam. 17:45-51.
8. Kouma nou kapav ena plis konfians ki Zeova pou ed nou? (Get zimaz osi.)
8 Nou osi nou pou kapav sirmont nou bann difikilte si nou rapel ki nou Bondie Li vivan ek ki Li pre pou ed nou. (Ps. 118:6) Pou nou ogmant nou konfians dan Zeova, nou bizin reflesi lor seki Li’nn fer dan lepase. Kan nou lir bann zistwar ki ena dan Labib, nou pou trouve kouma Zeova inn sov so bann serviter. (Iza. 37:17, 33-37) Nou kapav osi al lor nou sit jw.org ek gete kouma Zeova inn soutenir nou bann frer ek ser dan nou lepok. Nou kapav osi reflesi kouma Zeova inn ed nou personelman. Kitfwa nou panse ki Zeova pa’nn fer bann kitsoz extraordiner pou ed nou; Li pa’nn sov nou dan lagel enn lion ouswa enn lours. Selman, Li’nn fer boukou kitsoz pou ed nou. Par exanp, Li’nn atir nou ver Li pou ki nou kapav vinn so kamarad. (Zan 6:44) Anplis, si nou ankor dan laverite azordi, se gras-a Li. Alor, demann Zeova pou ed twa pou rapel bann moman kot Li’nn reponn to bann lapriyer, kot Li’nn donn twa exakteman seki to ti bizin dan ler ki bizin, ek kot Li’nn pran twa swin dan bann moman difisil. Kan to reflesi lor tou seki Li’nn fer pou twa, to pou ena plis konfians ki Li pou kontign ed twa dan lavenir.
Fason ki nou azir kan nou gagn bann difikilte, ena enn lefe lor bann santiman Zeova (Get paragraf 8-9)
9. Kan nou gagn bann difikilte, ki kitsoz fode pa nou bliye? (Proverb 27:11)
9 Kan nou gagn bann difikilte, fode pa nou bliye enn kitsoz bien inportan: Satan pretann ki kan nou gagn bann difikilte, nou pou abandonn Zeova. Alor, nou kapav montre ki nou kontan Zeova par fason ki nou azir kan nou gagn bann difikilte. (Zob 1:10, 11; lir Proverb 27:11.) Kan nou res fidel ar Zeova malgre nou bann difikilte, sa montre ki nou kontan Li ek ki Satan enn manter. Eski to pe gagn bann problem finans, to pe gagn persekision ar gouvernman, bann dimounn pa ekout twa kan to prese, ouswa to pe gagn bann lezot difikilte? Si to pe pas par sa bann sitasion-la, pa bliye ki sa donn twa lokazion pou fer leker Zeova kontan. Pa bliye osi ki Zeova zame pa pou les twa gagn enn difikilte ki to pa kapav siporte. (1 Kor. 10:13) To kapav sir ki Li pou donn twa lafors pou andire.
BONDIE VIVAN POU REKONPANS TWA
10. Ki kitsoz “Bondie vivan” fer pou so bann serviter?
10 Zeova touletan rekonpans so bann serviter. (Ebre 11:6) Gras-a Li, depi aster-la mem nou santi nou anpe ek nou ere, ek dan lavenir Li pou donn nou lavi pou touletan. Nou kapav sir ki Zeova pou rekonpans nou parski Li anvi fer li ek Li ena kapasite pou fer li. Akoz sa, nou kontign fer nou maximum pou servi Li, parey kouma so bann serviter dan lepase. Se seki Timote ti fer.—Ebre 6:10-12.
11. Ki ti motiv Timote pou travay dir dan lasanble? (1 Timote 4:10)
11 Lir 1 Timote 4:10. Timote ti sir ki Zeova ti pou rekonpans li, ek sa ti motiv li pou travay dir dan lasanble. Ki li ti fer? Lapot Pol ti ankouraz li pou vinn enn pli bon ansegnan dan predikasion ek dan lasanble. Timote ti bizin osi donn enn bon lexanp so bann frer ek ser, ki zot zenn ouswa vie. Li ti osi gagn bann responsabilite ki bien difisil. Par exanp, parfwa li ti bizin donn bann konsey ki fran, me avek amour. (1 Tim. 4:11-16; 2 Tim. 4:1-5) Ena fwa, lezot pa ti trouv bann travay ki Timote ti fer, ouswa zot pa ti rekonesan anver li. Selman, Timote ti sir ki Zeova ti pou rekonpans li.—Rom. 2:6, 7.
12. Kifer bann ansien travay dir dan lasanble? (Get zimaz osi.)
12 Ansien, to kapav sir ki Zeova trouv tou bann travay ki to fer ek sa ena boukou valer pou Li. Mem si bann ansien bien okipe ar bann vizit pastoral, ar lansegnman, ek ar predikasion, boukou ansien soutenir bann proze konstriksion ek zot al ede kan ena bann katastrof. Ena lezot ki servi dan bann Komite Liezon Ospitalie ouswa dan bann Group Vizit Malad. Bann ansien kone ki lasanble li pou Zeova, pa pou bann dimounn. Akoz sa, zot fer sa ar tou zot leker, ek zot sir ki Zeova pou rekonpans zot pou sa.—Kol. 3:23, 24.
Bondie vivan rekonpans bann ki travay dir dan lasanble (Get paragraf 12-13)
13. Kouma Zeova trouv bann zefor ki nou fer pou servi Li?
13 Pa tou dimounn ki kapav vinn ansien. Selman, nou tou nou kapav donn kitsoz Zeova. Nou Bondie bien kontan kan Li trouv nou fer tou seki nou kapav pou servi Li. Li apresie bann kontribision ki nou fer pou travay predikasion, mem si nou pa kapav donn boukou. Li bien kontan kan nou lev nou lame pou donn enn repons dan renion mem si nou timid, ek Li bien kontan osi kan nou pardonn bann ki ofans nou. Mem si parfwa to ena linpresion ki to pa pe fer boukou pou Zeova, to kapav sir ki seki to pe fer ena boukou valer pou Li. Li bien kontan twa ek Li pou rekonpans twa pou sa.—Lik 21:1-4.
RES PROS AR BONDIE VIVAN
14. Kan nou res pros ar Zeova, kouma sa ed nou pou res fidel anver Li? (Get zimaz osi.)
14 Si Zeova Li enn Bondie vivan pou nou, li pou pli fasil pou nou res fidel anver Li. Zeova ti enn Bondie vivan pou Zozef, ek akoz sa Zozef pa ti komet limoralite. Li pa ti anvi kas leker Zeova. (Zen. 39:9) Pou ki Zeova vinn enn Bondie ki vivan pou nou, nou bizin pran letan pou priye Li ek etidie so Parol Labib. Lerla, nou pou vinn pli pros ar Li. Ek parey kouma Zozef, si nou ena enn bon lamitie ar Zeova, nou pa pou anvi fer nanye ki kapav kas So leker.—Zak 4:8.
Kan to res pros ar Zeova, sa pou ed twa pou res fidel anver Li (Get paragraf 14-15)
15. Ki leson nou kapav aprann ar seki ti ariv bann Izraelit dan dezer? (Ebre 3:12)
15 Kan enn kikenn bliye ki Zeova Li enn Bondie ki vivan, sa kapav fer li al lwin ar Zeova. Se seki ti ariv bann Izraelit kan zot ti dan dezer. Zot ti kone ki Zeova existe, selman zot ti koumans ena bann dout ki Zeova kapav pran zot swin. Zot ti mem dir: “Eski Zeova li omilie nou ouswa non?” (Ex. 17:2, 7) Apre sa, zot ti rebel kont Zeova. Fode zame ki nou swiv zot move lexanp!—Lir Ebre 3:12.
16. Ki kitsoz kapav fer nou perdi konfians an Zeova?
16 Azordi, nou pe viv dan enn move lemond ek nou kapav gagn difikilte pou res pros ar Zeova. Boukou dimounn pa krwar ki Bondie existe, ek bann ki pa swiv bann prinsip Bondie, bien souvan zot dan bien. Kan nou trouv bann kitsoz koumsa, sa kapav fer nou perdi konfians an Zeova. Mem si nou kone ki Bondie existe, nou kapav koumans ena bann dout ek panse ki Li pa pou ed so bann serviter. Se seki ti ariv ekrivin Psom 73. Li ti trouve ki bann dimounn ki pa ti swiv bann lalwa Bondie ti dan bien. Ek akoz sa, li ti koumans demann limem si li vo lapenn servi Bondie.—Ps. 73:11-13.
17. Ki kitsoz kapav ed nou pou res pros ar Zeova?
17 Ki kitsoz ti ed sa ekrivin psom la pou sanz so fason panse? Li ti reflesi lor seki ti pou ariv bann dimounn ki bliye Zeova. (Ps. 73:18, 19, 27) Li ti osi reflesi lor bann bienfe ki enn kikenn gagne kan li servi Bondie. (Ps. 73:24) Nou osi nou bizin reflesi lor tou bann benediksion ki Zeova inn donn nou. Nou kapav osi reflesi lor kouma nou lavi ti pou ete azordi si nou pa ti servi Zeova. Kan nou fer sa, sa pou ed nou pou res fidel ar Zeova, ek parey kouma sa ekrivin psom la, nou pou kapav dir: “Me pou mwa, vinn pros ar Bondie, sa li bon pou mwa.”—Ps. 73:28.
18. Kifer fode pa nou per seki pou arive dan lavenir?
18 Nou pou kapav sirmont ninport ki difikilte nou gagne azordi parski nou pe “travay kouma esklav pou enn Bondie ki vivan ek vre.” (1 Tes. 1:9) Nou Bondie Zeova, Li gagn nou traka ek Li pou touletan ed nou. Li’nn ed so bann serviter dan lepase, ek Li pe ed so bann serviter azordi osi. Biento pou ena enn gran soufrans lor later, me nou pa pou tousel; Zeova pou avek nou! (Iza. 41:10) Alor, nou tou anou “ena enn gran kouraz ek dir: ‘Se Zeova ki ed mwa; mo pa pou per.’”—Ebre 13:5, 6.
KANTIK 3 Nou Lafors, Nou Lespwar, Nou Konfians
