Mo’nn ne le 22 Desam 1929, dan enn ti vilaz ki apel Noville. Dan sa ti vilaz-la, ena nef laferm, ek li trouv pre ar Bastogne, ki trouv dan bann Ardennes dan Belzik. Mo ena bann zoli souvenir avek mo bann paran dan laferm. Avek mo ti frer Raymond, toulezour nou ti tir dile vas ek nou ti al ede dan karo. Dan nou vilaz, tou dimounn ti kontan ed zot kamarad.

Mo bann paran, Emile ek Alice, ti bann Katolik pratikan ek zot ti al lames toule Dimans. Selman, ver lane 1939, bann pionie ki ti sorti Langleter ti vinn dan nou vilaz ek zot ti donn mo papa enn labonnman ar magazinn Consolation (ki azordi apel Leve!). Mo papa ti konpran bien vit ki sa bann magazinn-la ti dir laverite, ek sa ti motiv li pou koumans lir Labib. Kan li ti aret al lames, nou bann vwazin, ki ti bann bon kamarad avan, ti koumans persekit nou. Zot ti esey fors mo papa pou li res Katolik, ek akoz sa souvan zot ti diskite.

Mo ti bien sagrin kan mo ti trouv mo papa gagn persekision, ek mo ti sipliy Bondie dan lapriyer. Se lor sa sitiasion-la mem ki mo koze dan koumansman sa lartik-la. Me kan nou bann vwazin tigit-tigit ti aret persekit mo papa, mo ti bien kontan. Mo ti sir ki Zeova ti tann mo lapriyer.

Le 10 Me 1940, bann Nazi ti anvayir Belzik, ek akoz sa, boukou dimounn ti kit pei ti ale. Mo fami ti al dan lesid Lafrans. Lor nou sime, souvan nou ti travers bann landrwa bien danzere, kot bann solda Alman ti pe lager kont bann solda Franse.

Kan nou ti retourn lor nou laferm, nou lisien Bobbie ti vinn akeyir nou. Selman, bann dimounn ti kokin laplipar kitsoz ki nou ti  ena. Akoz sa sitiasion-la, mo ti demann momem, ‘Kifer ena lager ek soufrans?’

Sa lepok-la, Frer Emile Schrantz, a ki ti enn pionie ek enn ansien, ti pe vizit nou, ek sa ti bien ankouraz nou. Li ti servi Labib pou explik mwa kifer nou soufer ek li ti osi reponn mo bann lezot kestion. Mo ti vinn pli pros ar Zeova ek mo ti sir ki Li enn Bondie ki ena lamour.

Avan mem ki lager fini, nou ti pe kapav zwenn ar bann lezot Temwin. An Out 1943, Frer José-Nicolas Minet ti vinn dan nou laferm pou fer enn diskour. Sa zour-la, li ti demande: “Kisann-la anvi pran batem?” Mo papa ek mwa nou ti lev nou lame, ek nou toule-de nou ti batize dan enn ti larivier ki pa tro lwin ar nou laferm.

An Desam 1944, larme Alman ti fer so dernie gran latak dan lwes Lerop. Ti apel sa latak-la, Lager Bann Ardennes. Nou ti res pre kot bann-la ti fer sa latak-la. Akoz sa, nou ti res konfine dan lakav nou lakaz pandan apepre enn mwa. Enn zour, kan mo ti sorti pou al donn bann zanimo manze, enn bom ti exploze lor nou laferm ek twa nou grenie ti grene. Enn solda Ameriken, ki ti dan lekiri, ti kriye bien for, “Zet to lekor anba!” Lerla, mo ti galoupe, mo ti zet mo lekor pre kot li, ek li ti met so elmet lor mo latet pou protez mwa.

Apre lager, souvan nou ti al renion dan enn lasanble ki trouv dan Liège, ki apepre 90 kilomet dan lenor Noville. Avek letan, nou ti reisi form enn ti group dan Bastogne. Mo ti koumans travay dan enn biro tax ek mo ti gagn lokazion pou etidie lalwa. Apre sa, mo ti al travay kot enn noter. An 1951, nou ti organiz enn ti lasanble sirkonskripsion dan Bastogne. Anviron enn santenn dimounn ti asiste sa lasanble-la, ek parmi zot ti ena enn ser ki ti pionie ek ki ti apel Elly Reuter. Li ti fer 50 kilomet lor so bisiklet pou asiste sa lasanble-la. Nou ti koumans kontan nou kamarad ek nou ti fianse. Sa lepok-la, Elly ti gagn linvitasion pou asiste Lekol Galaad dan Letazini. Me li  ti ekrir biro mondial pou explike kifer li ti refiz sa linvitasion-la. Frer Knorr, ki ti responsab Lasosiete sa lepok-la, ti reponn li ek ti dir li ki kitfwa enn zour li pou kapav fer Lekol Galaad ansam ar so misie. Elly ek mwa, nou’nn marye an Fevriye 1953.

Sa lane-la, Elly ek mwa nou ti al asiste lasanble « La société du monde nouveau » ki ti fer dan Yankee Stadium, dan New York. Laba, mo ti zwenn enn frer ki ti pou fer mwa gagn enn bon travay, ek li ti dir mwa vinn imigre dan Letazini. Me apre ki nou ti priye Zeova, Elly ek mwa nou ti desid pou refiz sa travay-la. Nou ti retourn dan Belzik pou soutenir nou ti group dis proklamater dan Bastogne. Lane apre, nou ti gagn enn ti-garson ek nou ti apel li Serge. Nou ti extra kontan! Malerezman, set mwa apre, Serge ti tom malad ek li ti mor. Nou ti partaz nou lapenn ar Zeova ek lesperans rezireksion ti donn nou lafors.

An Oktob 1961, mo ti gagn enn travay part-time ek sa ti permet mwa fer pionie. Sa zour-la, mo ti gagn enn call ar serviter biro nasional Belzik. Li ti demann mwa si mo ti kapav koumans servi kouma sirveyan sirkonskripsion (ki azordi apel responsab sirkonskripsion). Mo ti demann li: “Eski nou kapav servi kouma pionie avan ki nou aksepte sa lafektasion-la?” Bann frer ti aksepte, ek nou ti fer pionie pandan wit mwa avan ki nou koumans servi dan sirkonskripsion an Septam 1962.

Apre de-z-an dan servis sirkonskripsion, nou ti gagn linvitasion pou al servi dan Betel Bruxelles. Nou ti koumans nou servis an Oktob 1964 ek sa lafektasion-la ti fer nou gagn boukou benediksion. An 1965, Frer Knorr ti vizit nou Betel. Inpe apre so vizit, mo ti gagn sok kan mo ti nome serviter biro nasional. Apre sa, Elly ek mwa nou ti gagn linvitasion pou asiste 41^em klas Lekol Galaad. Seki Frer Knorr ti dir 13 an avan ti realize. Apre lekol, nou ti retourn Betel Belzik.

Pandan plizir lane, mo ti servi mo konesans lor lalwa pou ed bann serviter Zeova pou defann zot drwa pou ador Zeova dan Lerop ek dan lezot plas. (Fil. 1:7) Gras-a sa, mo ti kapav zwenn plizir fonksioner dan plis ki 55 pei kot nou laktivite ti lor restriksion ouswa ti interdi. Kan mo ti prezant mwa, mo pa ti koz lor mo lexperyans dan lalwa; mo ti prezant mwa kouma “enn serviter Bondie.” Mo ti touletan rod direksion Zeova parski mo kone ki “leker enn lerwa [ouswa enn ziz], li parey kouma bann ti larivier delo dan lame Zeova. Li diriz sa partou kot Li kontan.”—Prov. 21:1.

Mo ankor rapel enn konversasion ki mo ti gagne ar enn misie ki travay dan Parlman Eropein. Plizir fwa mo ti demann pou  koz avek li, ek finalman li ti aksepte pou zwenn mwa. Li ti dir mwa: “Mo ena zis sink minit pou donn ou.” Lerla, mo ti bes mo latet ek mo ti fer enn lapriyer dan mo leker. Kan li’nn trouv sa, li’nn demann mwa ki mo ti pe fer. Lerla, mo ti lev mo latet ek mo ti dir li: “Mo pe remersie Bondie parski ou enn parmi so bann serviter.” Li ti dir mwa: “Ki ou pe rod dir?” Mo ti montre li Romin 13:4. Sa misie-la ti enn Protestan ek li ti ena respe pou Labib. Sa verse-la ti bien tous li, ek li ti permet mwa koz avek li pandan enn er-tan edmi. Sa konversasion-la ti donn bann bon rezilta, ek li ti mem dir ki li ti respekte travay bann Temwin Zeova.

Pandan plizir lane, bann Temwin Zeova dan Lerop inn lager pou zot bann drwa konsernan zot netralite, lagard bann zanfan, tax, ek lezot kitsoz ankor. Sa ti enn gran privilez pou mwa pou trouve kouma Zeova inn ed nou pou gagn laviktwar dan sa bann case-la. Bann Temwin Zeova inn gagn plis ki 140 case devan La Cour européenne des droits de l’homme.

Pandan bann lane 1990, mo ti travay ansam ar Frer Philip Brumley, ki ti dan biro mondial, ek Frer Valter Farneti, ki ti sorti Litali. Nou laktivite ti lor restriksion dan Kiba, ek nou ti ed bann frer ek ser ki res laba pou ki zot kapav pli lib pou servi Zeova. Mo ti ekrir enn let lanbasad Kiba ki trouv Belzik ek mo ti zwenn enn ofisie ki ti pe travay lor nou dosie. Me bann premie fwa ki nou ti zwenn, nou pa ti reisi tom enn lakor.

Apre ki nou ti priye Zeova, nou ti fer demann pou avoy 5,000 Labib dan Kiba par bato, ek bann-la ti aksepte nou demann. Nou bann frer ek ser ti gagn zot Labib ek nou ti trouve kouma Zeova ti pe beni nou bann zefor. Apre sa, nou ti redemann permision pou avoy 27,500 Labib. Ankor enn fwa, zot ti aksepte nou demann. Gras-a sa, sak frer ek ser dan Kiba ti reisi gagn so prop Labib, ek sa ti vremem rann mwa ere.

Mo ti al Kiba plizir fwa pou esey fer tir bann restriksion ki ti ena lor nou laktivite. Gras-a sa, mo ti reisi fer kamarad ar plizir fonksioner ki dan gouvernman.

An 1994, ti ena enn lager rasial dan Rwanda kont bann Tutsi, ek plis ki 1,000,000 dimounn ti mor. Malerezman, sertin nou bann frer ek ser osi ti mor. Akoz sa, bann frer ti organize bien vit  pou ki enn group frer ed nou bann frer ek ser ki dan Rwanda.

Kan nou group ti ariv Kigali, kapital Rwanda, nou ti trouve ki bann miray biro tradiksion ek stor bann piblikasion, ti ranpli ar trou akoz bann bal. Nou ti bien tris kan nou ti aprann kouma bann dimounn ti touy nou bann frer ek ser kout sab. Me nou ti aprann osi kouma bann frer ek ser ti montre lamour anver zot kamarad. Par exanp, nou ti zwenn enn frer Tutsi ki ti rakont nou kouma enn fami Temwin Hutu ti kasiet li dan enn trou pandan 28 zour pou protez li. Pandan enn renion dan Kigali, nou ti fer zefor pou ankouraz ek rekonfort plis ki 900 frer ek ser.

Apre sa, nou ti travers frontier Zaïre (azordi Repiblik Demokratik Kongo) pou al rod bann frer ek ser ki ti kit Rwanda pou al dan bann kan refizie ki ti pre ar lavil Goma. Selman, nou pa ti pe reisi trouv zot. Alor, nou ti priye Zeova pou ki Li gid nou. Lerla, nou ti trouv enn kikenn ki ti pe vinn ver nou ek nou ti demann li si li ti konn enn Temwin Zeova. Li ti dir nou: “Wi, momem mo enn Temwin. Mo pou bien kontan pou amenn zot get komite sekour.” Apre ki nou ti fer enn renion bien ankourazan ar komite sekour, nou ti zwenn apepre 1,600 refizie ek nou ti ankouraz zot ek rekonfort zot. Nou ti osi lir let ki Komite Santral ti avoye. Seki Komite Santral ti ekrir ti bien tous bann frer ek ser. Dan sa let-la, Komite Santral ti dir: “Nou touletan pans zot dan nou lapriyer. Nou kone ki Zeova pa pou abandonn zot.” Sa bann parol-la ti vre, parski azordi ena plis ki 30,000 Temwin dan Rwanda.

An 2011, apre anviron 58 an maryaz, Elly inn mor. Mo ti bien tris, me kan mo ti priye Zeova, sa ti vremem rekonfort mwa. Kan mo ti pres bon nouvel osi, sa ti bien rekonfort mwa.

Mem si mo ena plis ki 90 an, mo sorti predikasion sak semenn. Mo bien kontan osi ki mo pe kapav ede dan Departman Legal, isi dan Betel Belzik. Mo kontan osi pou partaz mo lexperyans ar lezot ek pou ankouraz bann zenn dan lafami Betel gras-a bann vizit pastoral.

Inn gagn 84 an depi ki mo’nn priye Zeova pou premie fwa. Sa ti koumansman enn zoli lavi, ek mo’nn kapav vinn pli pros ar Zeova. Mo bien rekonesan ki pandan toutlong mo lavi Zeova inn ekout mo lapriyer!—Ps. 66:19. b