Eski ou panse ki bann dimounn kapav rezoud bann problem ki pe anpes nou ena lape ek sekirite, ek ki menas nou lavenir? Pou reisi rezoud nou bann problem, nou bizin konn lakoz sa bann problem-la.

Anou pran enn lexanp. Enn misie ki apel Tom ti malad ek plitar li’nn mor. Kifer li’nn mor? Enn dokter ki travay dan lopital kot Tom ti admet avan so lamor explike: “Kan bann premie sintom-la ti aparet, personn pa ti pans pou rod lakoz sa bann sintom-la.” Li paret ki bann dokter ki ti okip Tom avan, ti zis donn li bann medsinn pou soulaz li.

Eski bann dimounn pe esey rezoud bann problem sa lemond-la dan mem fason? Par exanp, pou lit kont kriminalite, bann gouvernman pas bann lalwa, instal bann kamera, ek ogmant kantite lapolis. Mem si sa bann aksion-la marse dan enn sertenn fason, zot pa rezoud lakoz problem-la. An realite, fason ki bann dimounn azir montre seki zot panse, seki zot resanti, ek seki zot anvi.

Daniel viv dan enn pei Sid Ameriken kot lekonomi pe tonbe. Li explike: “Avan, nou ti ena enn lavi normal. Nou pa ti bizin per ki enn kikenn menas nou ar enn zarm pou kokin nou. Me asterla, nepli ena okenn lavil ouswa vilaz kot ena lape. Nou lekonomi ki pe tonbe finn montre kouma boukou dimounn ete vremem: zot gourma kas ek zot pena respe pou lavi ek dibien lezot.”

Enn misie ki nou pou apel Elias ti sove akoz lager ki ti ena dan Lwes Lazi, ek plitar, li ti etidie Labib. Li dir: “Boukou zenn zom dan mo lavil ti gagn presion ar zot fami ek ar sistem politik ek relizie, pou al lager ek pou vinn bann ero. Bann zenn ki ti dan lot kan osi ti gagn mem presion! Tousala finn montre mwa kouma li bien tris ki nou met nou konfians dan bann dirizan imin.”

Enn vie liv ranpli ar sazes ena rezon kan li dir:

• “Tandans leker bann dimounn, li move depi zot zenes.”​—Zenez 8:21.

• “Leker pli tret ki ninport ki lezot kitsoz ek li bien move. Kisannla kapav konn li?”​—Zeremi 17:9.

• “Dan leker sorti bann move lintansion, kouma fer krim, . . . move lavi, kokin, mansonz.”​—Matie 15:19.

Bann dimounn pa finn reisi trouv enn solision pou bann defo ki nou ena dan nou leker, bann defo ki pous bann dimounn pou bles lezot. An realite, sa bann defo-la pe pli anpire, parey kouma nou’nn trouve dan lartik avan. (2 Timote 3:1-5) Malgre bann kapasite extraordiner ki nou ena azordi pou kominik avek lezot ek osi bann konesans ki nou ena, sa pe kontign anpire! Alor, kifer nou pa pe reisi met lape ek sekirite dan lemond? Eski nou vremem kapav fer sa? Ouswa eski nou pe esey fer seki inposib?

Mem si, pa kone par ki mirak, nou arive trouv enn solision pou bann defo ki bann dimounn ena, kanmem sa, nou pa pou reisi fer lemond vinn an sekirite. Kifer? Parski antan ki imin, nou ena bann limit.

Laverite se ki: “Enn dimounn . . . pa finn kree pou diriz so pa.” (Zeremi 10:23) Wi, nou pa finn kree  pou diriz nou par noumem. An realite, parey kouma bann imin pa finn kree pou viv anba delo ouswa dan lespas, bann imin pa finn kree pou diriz lezot imin!

Anou pran enn lexanp. An zeneral, eski bann dimounn kontan kan lezot dir zot kouma zot bizin viv ouswa ki bann prinsip moral zot bizin swiv? Eski bann dimounn kontan kan lezot dir zot seki zot bizin panse lor bann kitsoz kouma lavortman, lapenn kapital, ouswa fason pou disiplinn zot zanfan? Sa se zis de-trwa domenn ki kree divizion parmi bann dimounn. Alor, mem si sa difisil pou aksepte, seki Labib dir fer sans. Nou pena ni kapasite, ni drwa moral pou diriz lezot imin. Alor, kotsa nou kapav gagn led?

Repons pli lozik pou sa kestion-la se rod led ar nou Kreater. Apre tou, se Li ki’nn kree nou! Ek Li pa finn bliye nou, mem si boukou dimounn pans sa. An realite, kan nou reflesi lor bann konsey ranpli ar sazes ki ena dan Labib, nou konpran ki Bondie interese ar nou. Kan nou konpran sa liv extraordiner la, nou osi konpran noumem pli bien. Nou osi konpran kifer listwar limanite dan lapenn koumsa. Ek parey kouma enn filozof Alman ti ekrir, nou konpran kifer “bann dimounn ek bann gouvernman pa finn tir okenn leson ar listwar, ouswa pa finn azir dapre bann prinsip ki listwar finn aprann zot.”

Enn zour, enn zom saz ti dir ki “rekonet sazes par so rezilta.” (Lik 7:35, NW) Nou trouv enn lexanp sa sazes-la dan Izai 2:22 ki dir: “Aret met zot konfians dan bann dimounn.” Sa konsey bien saz la kapav protez nou kont bann fos lespwar ek bann lide ki pa realist. Kenneth, ki res dan enn lavil Nor Ameriken kot ena boukou violans, explike: “Enn apre lot, bann politisien promet ki sitiasion pou ameliore, me zot pa reisi. Sa montre ki seki Labib dir li vre ek li saz.”

Daniel, ki nou ti mansione avan, dir “Sak zour ki pase konvink mwa plis ki bann dimounn pa kapav diriz zot bien. . . . Mem si ou ena kas dan labank ouswa ou finn fer bann bon linvestisman, sa pa vedir ki ou pou an sekirite dan lavenir. Dan sa domenn-la, mo finn trouv boukou dimounn gagn bann gran desepsion.”

Labib pa zis protez nou kont bann lide ki pa realist, li osi donn nou lespwar. Nou pou trouv sa dan bann prosin lartik.