Stres se fason ki ou lekor reazir ar enn sitiasion difisil. Ou servo avoy boukou ormonn dan tou parti ou lekor. Sa ogmant vites ki ou leker bate, ena enn lefe lor ou tansion, elarzi ouswa konpres ou bann poumon, ek redi ou bann misk. Avan ki ou rann ou kont ki pe pase, ou lekor deza pare pou reazir. Kan sa sitiasion difisil la fini, ou lekor tengn “alarm” la, ek revinn normal.

Stres se enn reaksion natirel ki ed ou pou fer fas ar bann sitiasion difisil ouswa danzere. Sa reaksion-la koumans dan ou servo. Bon stres permet ou pou azir ouswa reazir vit. Inpe stres kapav ed ou pou realiz ou bann lobzektif ouswa pou fer bann kitsoz pli bien, kitfwa pandan enn lexame, enn interview, ouswa enn levennman sportif.

Me selman, kan stres-la tro boukou, dir tro lontan, ouswa kronik li kapav fer ou ditor. Kan ou lekor deklans “alarm” la tro souvan ouswa dan enn fason kronik, ou kapav koumans soufer lor plan fizik, emosionel, ek mantal. Ou konportman, mem fason ki ou tret lezot, kapav sanze. Kan enn dimounn strese dan enn fason kronik li kapav koumans fer bann kitsoz ki pa bon pou so lasante, li kapav adopte bann move labitid ek pran bann kitsoz ki pa bon. Li kapav osi fer bann dimounn tom dan depresion, fer enn burnout, ouswa mem pans pou swisid zot.

Mem si stres pa afekte tou dimounn dan mem fason, li kapav fer nou gagn diferan problem lasante. Ek li kapav afekte preske sak parti nou lekor.