Kifer Dimounn Nepli Ena Respe pou Lezot?

ZWE

KIFER LI INPORTAN KI NOU ENA RESPE POU LEZOT?

Kan nou ena respe pou lezot, nou kapav anpes enn sitiasion anpire.

Enn proverb dan Labib dir: “Enn repons kan li dous, li fer lakoler disparet, me enn parol blesan fer lakoler monte.” (Proverb 15:1) Kan nou mank respe dan fason ki nou koze ek azir ar lezot, se koumadir nou pe zet delwil lor dife ek sa kapav fer nou gagn bann konsekans grav.
Zezi ti dir: “Parol ki sorti dan labous enn dimounn montre ar ki kitsoz so leker ranpli.” (Matie 12:34) Kan nou pena respe pou lezot, sa montre seki nou vremem resanti pou bann dimounn ki sorti depi enn lot ras, enn lot tribi, enn lot pei ouswa ki pena mem ran sosial ki nou.

Dan enn sondaz ki’nn fer pa tro lontan dan 28 pei avek plis ki 32,000 dimounn, 65 poursan ladan finn dir ki zame zot inn trouv sa kantite dimounn la ki pena manier ek respe pou zot kamarad azordi.

SEKI OU KAPAV FER

Ki ou dan lekol ouswa dan travay, ou bizin respekte tou dimounn—mem si zot pena mem lopinion ki ou. Rod bann kitsoz lor ki zot kapav tom dakor. Sa pou ed ou pou pa kritik lezot, ni ziz lezot.

“Aret zize pou ki Bondie pa ziz zot.”—Matie 7:1.

Tret lezot parey kouma ou ti pou kontan lezot tret ou. Si ou zanti ek bon avek lezot, zot osi zot pou tret ou parey.

“Seki zot anvi bann dimounn fer pou zot, fer parey pou bann-la.”—Lik 6:31.

Pardonn lezot. Kan enn kikenn dir ouswa fer enn kitsoz ki bles ou, pa panse ki sa dimounn-la ti ena enn move lintansion.

“Bon zizman enn zom anpes li pou ankoler vit, ek se enn loner pou li pou pas lor bann erer.”—Proverb 19:11.

SEKI NOU PE FER

Dan bann landrwa kot bann Temwin Zeova viv ek travay, zot montre respe pou lezot ek zot ankouraz lezot osi pou fer parey.

Nou ofer enn lansegnman Labib gratis ar tou dimounn, me nou pa fors zot pou aksepte nou krwayans ek nou lopinion. Plito, nou fer zefor pou aplik konsey ki ena dan Labib kan nou partaz nou mesaz “avek douser ek profon respe.”—1 Pier 3:15; 2 Timote 2:24.

Nou pa fer diskriminasion ek nou akeyir dan nou bann renion tou dimounn ki sorti dan diferan kiltir ki anvi aprann seki Labib ansegne. Ek mem si nou pa touletan dakor avek fason ki zot fer bann kitsoz, nou fer zefor pou “respekte tou bann imin.”—1 Pier 2:17, Nouvo Testaman an Kreol Morisien.

Nou respekte lotorite gouvernman dan pei kot nou reste. (Romin 13:1) Nou obeir lalwa ek nou pey tax. Mem si nou pa partisip dan politik, nou respekte drwa ki lezot ena pou pran zot prop desizion dan bann zafer politik.

LEVE!