Si li vre, alor kitfwa nou ena kapasite pou diminie nou bann soufrans.

Ziska ki pwin bann imin responsab pou sa bann soufrans ki mansione anba la?

• Violans.

  Dapre enn estimasion Lorganizasion Mondial Lasante, 1 adilt lor 4 inn fer fas ar violans fizik kan zot ti tipti, ek 1 madam lor 3 inn fer fas ar violans fizik ouswa sexiel (ouswa mem toulede).

• Enn Dimounn Ki Nou Kontan Mor.

  Dapre rapor World Health Statistics 2018, ki’nn pibliye par Lorganizasion Mondial Lasante, “finn ena apepre 477,000 krim dan lemond an 2016.” Anplis, dan sa mem lane-la finn ena apepre 180,000 dimounn ki’nn mor dan bann lager.

• Bann Problem Lasante.

  Fran Smith, enn ekrivin, ti ekrir enn lartik ki ti pibliye dan magazinn National Geographic, ek ladan li ti dir ki ‘plis ki enn milyar dimounn fime, ek taba lie ar sink maladi ki provok pli boukou lamor. Sa bann maladi-la se: malad leker, bann atak, bann infeksion respiratwar, bann problem respiratwar kronik, ek kanser poumon.’

• Pa Konsider Tou Dimounn Parey lor Plan Sosial.

  Enn sikolog, Jay Watts, dir ki ‘bann dimounn soufer pli boukou lor plan emosionel parski zot mizer, zot viktim linzistis akoz zot ran sosial, zot ras, zot sex, parski ena lespri konpetision, ek parski zot inn al refizie dan enn lot pei.’

  APRANN PLIS

  Get video Kifer Bondie Ti Kree Later? lor jw.org/mfe.

Laplipar soufrans ki ena dan lemond zordi, se akoz bann imin.

Ena boukou soufrans azordi, parski olie ki bann gouvernman servi lepep, zot fer dominer ar zot.

“Dimounn finn dominn dimounn pou zot prop maler.”​—EKLEZIAST 8:9.

Kapav diminie soufrans.

Bann prinsip Labib kapav amelior nou lasante ek fer ki nou res anpe avek lezot.

“Enn leker kalm donn lekor lavi, me zalouzi li enn pouritir pou lezo.”​—PROVERB 14:30.

“Met dekote tou zot lamertim, zot koler, zot laraz, zot insilt, zot mesanste; tousala bizin disparet.”​—EFEZIEN 4:31.