Selman, bann dimounn ki servi zis teknolozi pou fer bann kamarad, zot kapav . . .

• pa konpran santiman zot bann kamarad.

• santi zot tousel ek tris.

• pans zis zotmem ek pa gagn traka pou lezot.

GAGN TRAKA LEZOT

Pou nou kapav konpran santiman lezot, nou bizin pran letan pou interes nou ar zot. Me li kapav difisil pou fer sa si nou tro okipe zis lir, avoy mesaz ouswa get bann foto lor bann rezo sosial.

Avek letan, si ou gagn tro boukou mesaz, ou kapav koumans trouv sa fatigan pou reponn mesaz ou bann kamarad. Kitfwa ou telman fatige ki ou zis reponn enn mesaz vit-vit san pran letan pou gete si se enn mesaz inportan, ek lerla ou pa remarke ki kitfwa ou kamarad ti bizin ou led.

REFLESI LOR LA: Kan ou pe avoy ou kamarad enn mesaz, kouma ou kapav montre ki ou vremem interese ar li?​—1 PIER 3:8.

OU SANTI OU TOUSEL

Enn sondaz finn montre ki boukou dimounn santi zot pli pa bien kan zot al lor bann rezo sosial. Bann ki’nn fer sa resers-la finn trouve ki kan enn kikenn pas letan get bann foto lezot ek get seki lezot fer, “sa donn li linpresion ki li finn perdi so letan.”

Anplis, kan nou pas letan pou get bann zoli foto ki nou bann kamarad poste, nou kapav ena tandans pou konpar nou lavi ar zot ek nou kapav panse ki nou lavi pa osi interesan. Malerezman, bann rezo sosial kapav donn nou linpresion ki tou bann lezot dimounn pe amize, ek ki nou, nou lavi li monotonn.

REFLESI LOR LA: Kan ou pe servi bann rezo sosial, kouma ou kapav evit konpar ou lavi ar lezot?​—GALAT 6:4.

ENN LATITID EGOIS

Enn profeser finn remarke ki sertin parmi so bann zelev zot egois ek zot pans zis zotmem. Sa bann zelev-la fer kamarad zis avek bann ki pou kapav fer kitsoz pou zot. Bann lamitie koumsa zot egois. Enn kikenn kapav panse ki so bann kamarad zot kouma enn aplikasion lor so telefonn ki li servi kan li anvi. Savedir ki so kamarad bizin la kan li anvi ek apre li inior kamarad-la kan li nepli bizin li.

REFLESI LOR LA: Eski seki mo pe poste lor Internet donn lezot linpresion ki mo kontan atir latansion lor momem ouswa ki mo enn kikenn ki kontan montre ki mo meyer ki lezot?​—GALAT 5:26.

REFLESI LOR FASON KI OU SERVI TEKNOLOZI

Kan se nou ki ena kontrol lor teknolozi, li pou ed nou pou kominik ar nou bann kamarad ek mem vinn pli pros ar zot.

Swazir lakel parmi sa bann sigzesion-la ou anvi eseye ouswa ekrir ou prop lide.

• Esey zwenn ek koz ar bann dimounn (olie ki zis avoy enn e-mail ouswa enn sms)

• Tengn (ouswa met lor silans) ou portab kan ou pe koz avek lezot

• Diminie letan ki ou pase pou get seki lezot inn poste lor bann rezo sosial

• Aprann pou ekout lezot

• Pran kontak avek enn kamarad ki pe pas par bann moman difisil