Lavi Fami ek Bann Kamarad
Boukou dimounn trouv sa difisil pou ena bann bon relasion avek bann manb zot fami ek zot bann kamarad. Anou get sertin prinsip Labib ki kapav ed ou amelior ou relasion avek lezot.
PANS LEZOT
PRINSIP LABIB: “Pa rod zis zot prop lintere, me osi lintere lezot.”—Filipien 2:4, NW.
KI SAVEDIR: Nou pou ena enn bon relasion avek lezot si nou konsantre plis lor seki nou kapav fer pou zot ki lor seki zot kapav fer pou nou. Ou kapav gat ou relasion avek lezot, si ou egois. Par exanp, enn konzwin ki egois kapav vinn infidel. Anplis, personn pa anvi fer kamarad avek enn dimounn ki touletan fer vantar lor seki li ena ouswa kone. Pa tro lontan enn liv ti dir ki “bann dimounn ki egois pou gagn boukou problem.”
KI OU KAPAV FER:
-
Ed lezot. Bann bon kamarad fer konfians ek touletan pre pou ed sakenn so kamarad. Dapre sertin resers ki’nn fer, bann dimounn ki ed lezot ena mwins tandans pou tom dan depresion ek ena plis konfians an zotmem.
-
Ena l’empathie. L’empathie inplik resanti lapenn enn lot dimounn dan ou leker. Si ou ena l’empathie ou pa pou servi bann parol sarkastik, ou pa pou fer bann badinaz ki pou bles santiman lezot.
Kan ou montre l’empathie, ou pe osi montre ki ou pe respekte ek aksepte lezot kouma zot ete. Alor, l’empathie kapav ed ou pou evit ena bann prezize ek osi pou fer kamarad avek bann dimounn ki sorti dan diferan kiltir.
-
Pas letan avek lezot. Plis ou pas letan avek lezot, plis ou pou aprann konn zot. Si ou anvi gagn enn bon kamarad, ou bizin koz lor bann kitsoz ki interes li ek ki inportan pou li. Alor, ekout bien. Pran kont bann kitsoz ki trakas li. Pa tro lontan, enn resers ti montre ki “bann dimounn plis ere kan zot gagn bann konversasion lor bann kitsoz ki inportan.”
SWAZIR BIEN OU BANN KAMARAD
PRINSIP LABIB: “Bann move frekantasion gat bann valer moral.”—1 Korintien 15:33, not, NW.
KI SAVEDIR: Bann dimounn ki nou frekante pou ena swa enn bon swa enn move linflians lor nou. Bann sosiolog dir ki sa kalite linflians-la kapav afekte ou lavi. Par exanp, zot dir ki enn dimounn kapav koumans fime ouswa anvi divorse parski so bann kamarad pe fer sa.
KI OU KAPAV FER: Fer kamarad avek bann dimounn ki ena bann kalite ek bann valer ki ou apresie ouswa ki ou anvi imite. Par exanp, fer kamarad avek bann dimounn ki ena boukou takt, ki montre respe, ki zenere, ek ki montre lospitalite.
BANN LEZOT PRINSIP LABIB
Get bann video ki baze lor Labib ek ki’nn fer pou amelior lavi fami bann koup marye, bann adolesan, ek bann zenn zanfan
EVIT BANN PAROL BLESAN.
“Bann koze san reflesi zot koumadir bann kout lepe.”—PROVERB 12:18.
MONTRE OU ZENERE.
“Enn dimounn ki zenere pou prospere.”—PROVERB 11:25.
TRET LEZOT KOUMA OU TI POU KONTAN LEZOT TRET OU.
“Tou seki zot anvi ki lezot fer pou zot, fer parey pou lezot osi.”—MATIE 7:12.
