Parski kan enn dimounn egosantrik sa kapav fer li ena bann prezize. Enn dimounn ki egosantrik pans zis li tousel. Li panse ki li ena plis valer ki lezot, ek li panse ki bann dimounn ki pa parey kouma li, inferyer. Ninport kisannla kapav tom dan sa piez-la. Encyclopædia Britannica dir: “Laplipar dimounn ki viv dapre enn kiltir panse ki zot fason viv, zot manze, labiyman, krwayans, prinsip, ek lezot kitsoz ankor, pli bon ki pou lezot.” Kouma nou kapav evit sa move fason panse la?

“Avek imilite, konsider lezot meyer ki zotmem.”​—FILIPIEN 2:3.

Ki savedir? Nou bizin aprann pou ena limilite pou ki nou pa panse ki nou meyer ki lezot. Limilite ed nou pou rekonet ki dan sertin domenn lezot pli bon ki nou. Nou pa kapav dir ki ena enn group dimounn ki ena tou bann kalite ek bann kapasite ki existe.

Anou get lexanp Stefan. Li ti grandi dan enn pei Kominist, ek li ti ena bann prezize lor bann dimounn ki viv dan bann pei ki pa Kominist. Me li ti reisi lit kont so bann prezize. Li dir: “Mo panse ki pou lit kont bann prezize,  li inportan ki nou panse ki lezot meyer ki nou. Mo pa konn tou kitsoz. Ninport kisannla kapav aprann mwa enn kitsoz.”

Ou bizin onet anver oumem ek rekonet ki ou fer bann erer. Rekonet ki lezot pli bon ki ou dan sertin domenn. Fode pa ou panse ki tou bann dimounn ki form parti enn group ena mem defo.

Okontrer, olie ki ou pans bann kitsoz negatif lor enn dimounn ki form parti enn group, poz oumem sa bann kestion-la:

• ‘Eski bann kitsoz ki mo pa kontan ar sa dimounn-la zot vremem pa bon, ouswa zot zis diferan?’

• ‘Eski sa dimounn-la kapav trouve ki mo ena bann defo?’

• ‘Dan ki domenn sa dimounn-la pli bon ki mwa?’

Si ou reponn sa bann kestion-la dan enn fason onet, ou pa pou zis sirmont ou bann prezize, me ou pou kapav osi trouv bann zoli kitsoz ki ou kontan ar sa dimounn-la.