1-3. (a) Kifer Josué li enn bon l’exemple pou nou? (b) Ki nou bizin rappel kan nou prend bann decision?

 BANN choix ki nou faire zot bien important. Enn dimoune ki ena enn choix pou faire, li ena plusieurs possibilité ek enn certain controle lor direction ki li pou donne so la vie. Anou prend enn l’exemple: Mazinn enn missié ki pé marché lor enn chemin ek enn coute, li trouve chemin-la prend deux direction different. Lekel li pou choisir ladan? Si dan so la tête, missié-la ena enn l’endroit precis kot li pou allé, lerla, surement li pou choisir sa chemin ki pou amenn li pli pré ar sa l’endroit-la, au lieu ki li prend sa chemin ki pou eloigne li-la.

² Dan la Bible, ena l’exemple beaucoup dimoune ki finn bizin faire bann choix important. Par exemple, Caïn ti bizin decidé si li ti pou controle so colere ou-soit non. (Gen. 4:6, 7) Josué ti bizin choisir si li ti pou servi vrai Bondié ou-soit adore bann fausse bondié. (Jos. 24:15) Josué ti ena l’objectif pou reste proche ar Jéhovah; alors li ti faire enn choix ki ti permette li pou faire sa. Caïn pa ti ena sa l’objectif-la ek li ti faire enn choix ki ti eloigne li ar Jéhovah.

³ Parfois, nou aussi nou bizin prend bann decision important pou ki nou kapav reste lor bon chemin. Kan sa arrivé, rappel ou l’objectif​—donne la gloire Jéhovah dan tou seki ou faire ek evite tou seki kapav eloigne ou ar Li. (Lire Hébreux 3:12.) Dan sa lartik-la ek dan prochain lartik, nou pou examine sept domaine dan nou la vie kot nou bizin pa laisse nanyé eloigne nou ar Jéhovah.

4. Kifer li important ki enn chretien travail?

⁴ Bann chretien bizin travail pou zot vive ek donne zot famille seki zot bizin lor plan materiel. La Bible montré ki si enn chretien pa envie donne so famille  seki li bizin, li pire ki enn dimoune ki pena la foi. (2 Thess. 3:10; 1 Tim. 5:8, note) Li clair ki enn chretien bizin travail, mais si li pa faire attention, bann decision ki li prend concernant travail ek faire enn carriere kapav eloigne li ar Jéhovah. Couma?

5. Ki bann kitsoz nou bizin prend en consideration avant ki nou accepté enn travail?

⁵ Supposé ou pé rod enn travail. Si ou vive dan enn pays kot li difficile pou gagne enn travail, kitfois ou kapav tenté pou accepté premier travail ki propose ou, n’importe ki travail. Mais ki ou pou faire si travail-la pa en accord avek bann principe la Bible? Si le temps ki ou pou passé dan sa travail-la, ou-soit bann voyage ki sa pou impliké pou affecté ou bann activité spirituel ek eloigne ou avek ou famille, ki ou pou faire? Eski ou pou accepté sa travail-la kan-mem, ek pensé ki vaut mieux ena enn travail coumsa ki pena travail ditou? Pa blié ki si ou choisir enn mauvais chemin, sa kapav eloigne ou ar Jéhovah. (Héb. 2:1) Kan ou pé rod enn travail ou-soit ou pé pense pou change travail, couma ou kapav prend bann bon decision?

6, 7. (a) Ki l’objectif kitfois enn dimoune ena en seki concerne travail? (b) Ki l’objectif pou faire ou vinn pli proche ar Jéhovah, ek kifer?

⁶ Pareil couma nou ti mentionné au commencement, rappel bien ki l’objectif ou ena. Demann-ou-mem: ‘Dan ki but mo pé envie faire sa travail-la ou sa carriere-la?’ Si ou considere enn travail couma enn moyen pou realise enn l’objectif​—pou donne ou ek ou famille seki zot bizin lor plan materiel pou zot contigne servi Jéhovah​—Jéhovah pou beni ou bann zeffort. (Mat. 6:33) Si ou perdi ou travail ou-soit ou gagne enn probleme finance ki ou pa ti pé attann, sa pa enn probleme pou Jéhovah. (Is. 59:1) Li “koné couma pou delivré bann dimoune ki attaché ar Li, kan zot dan l’epreuve.”​—2 Pierre 2:9.

⁷ De lot coté, ki pou arrivé si ou l’objectif c’est zis pou vinn riche? Kitfois ou pou reussi. Mais, mem si ou vinn riche, rappel ki sa qualité “succès-la” pou coute ou bien cher. (Lire 1 Timothée 6:9, 10.) Si ou accorde trop l’importance ar l’argent ou-soit ou carriere, sa pou zis eloigne ou ar Jéhovah.

8, 9. Kifer bann parent bizin reflechi lor l’attitude ki zot ena concernant zot travail? Expliké.

⁸ Si ou enn parent, reflechi couma ou l’exemple kapav ena enn l’effet lor ou bann zenfant. Dapré seki zot trouvé, ki pli important pou ou​—ou carriere ou-soit ou l’amitié avek Jéhovah? Si ou bann zenfant remarké ki, seki passe en premier dan ou la vie c’est ena enn grand position ek vinn riche, eski zot aussi zot pa pou faire mem mauvais choix kan zot grandi? Eski li possible ki zot perdi enn certain respé pou ou en tant ki parent? Enn jeune soeur dire: “Seki mo kapav rappel lor mo papa c’est ki li ti bien occupé avek so travail. Au commencement, li ti pé travail tellement dur parski li ti envie ki nou famille gagne bann pli bon kitsoz dan la vie. Li ti envie ki nou pa mank nanyé. Mais sa bann dernier l’année-la, kitsoz inn changé. Li travail, travail ek li amenn bann kitsoz ki coute cher, ki pa necessaire, au lieu ki bann kitsoz ki nou bizin. Finalement, bann dimoune konn nou couma enn famille ki ena beaucoup kass au lieu ki enn famille ki encourage lezot lor plan spirituel. Mo ti pou pli content ki mo papa travail dur pou ki nou famille fort lor plan spirituel, plutot ki li travail dur pou gagne beaucoup kass.”

⁹ Parent, pa accorde trop l’importance ar ou carriere ek ou laisse sa eloigne ou ar Jéhovah. Par ou l’exemple, montré ou bann zenfant ki ou vrai-mem croire ki pli grand richesse ki nou ena c’est bann richesse spirituel, pa materiel.​—Mat. 5:3.

10. Ki enn jeune kapav prend en consideration kan li pé choisir enn carriere?

¹⁰ Si ou enn jeune ki pé pense pou faire enn carriere, couma ou kapav choisir pou suive enn bon chemin? Couma nou finn  trouvé, ou bizin koné ki l’objectif ou finn fixé. Si ou pense pou gagne enn formation pou enn certain travail, eski sa travail-la pou permette ou servi plus Jéhovah, ou-soit eski sa pou eloigne ou ar Li? (2 Tim. 4:10) Eski ou l’objectif c’est pou imite bann dimoune ki zot bonheur depann lor quantité kass ki zot ena dan la banque ou-soit dan business? Ou-soit eski ou pou choisir pou ena mem confiance ki David, ki ti ecrire: “Mo ti enn jeune homme, mo finn mem vinn vié, ek pourtant mo pa finn trouve enn dimoune juste ki’nn abandonné net, ni so descendance ki pé rod di-pain”? (Ps. 37:25) Pa blié ki enn chemin ladan pou eloigne ou ar Jéhovah, alors ki lot chemin-la pou faire ou amenn pli bon la vie ki kapav ena. (Lire Proverbes 10:22; Malaki 3:10.) Ki chemin ou pou choisir? a

11. Ki la Bible dire lor bann detente ek bann divertissement, ek ki nou bizin rappel?

¹¹ La Bible pa enn livre ki kont bann plaisir, ni li dire ki detente ek divertissement c’est bann kitsoz ki faire nou perdi le temps. Paul ti dire Timothée: “l’exercice physik li utile zis pou enn tigit kitsoz.” (1 Tim. 4:8) La Bible dire mem ki ena enn “le temps pou riyé” ek “enn le temps pou sauté,” ek li encourage nou pou prend assez repos. (Eccl. 3:4; 4:6) Mais selman, si ou pa faire attention, bann detente ek bann divertissement kapav eloigne ou ar Jéhovah. Couma? Sa kapav arrivé si ou pa veille bien ki qualité detente ek divertissement ou pou ena, ek ki quantité le temps ou pou passé pou diverti-ou.

12. Ki bann kitsoz ou bizin prend en consideration concernant bann detente ek bann divertissement ki ou choisir?

¹² Premierement, anou guetté ki qualité divertissement ek detente nou bizin choisir. Ou kapav sur ki ena bann bon detente ek bann bon divertissement. Mais nou bizin reconette ki la plupart divertissement mette en valeur bann kitsoz ki Bondié detesté, parmi ena violence, spiritisme, ek l’immoralité sexuel. Alors, ou bizin guette bien ki qualité detente ek divertissement ou ena. Ki l’effet sa ena lor ou? Eski sa encourage ou pou vinn violent, pou ena enn grand l’esprit competition, ou-soit pou vinn nationaliste? (Prov. 3:31) Eski sa faire ou depense beaucoup l’argent? Eski sa kapav troublé conscience lezot? (Rom.  14:21) Ki qualité dimoune ou bann detente ou-soit ou bann divertissement faire ou frequenté? (Prov. 13:20) Eski sa pousse ou pou envie faire bann mauvais kitsoz?​—Jacq. 1:14, 15.

13, 14. Kifer ou bizin reflechi lor quantité le temps ki ou passé dan bann divertissement?

¹³ Reflechi aussi lor ki quantité le temps ou passé dan bann detente ek bann divertissement. Demann-ou-mem: ‘Eski mo passe tellement le temps dan bann divertissement ki mo pa reste assez le temps pou bann activité spirituel?’ Si ou choisir pou passe beaucoup le temps dan bann detente ek bann divertissement, ou pou trouvé ki sa bann divertissement-la pa finn faire ou gagne sa quantité di-bien ki ou ti pensé-la. En realité bann ki mette bann divertissement dan place ki bizin, zot profite li pli bien. Kifer? Parski zot koné ki zot inn faire “bann kitsoz ki pli important” avant, alors zot pa senti-zot coupable kan zot detann-zot.​—Lire Philippiens 1:10, 11.

¹⁴ Mem si li parette agreable pou passe beaucoup le temps dan bann divertissement, si ou prend sa chemin-la, sa kapav eloigne ou ar Jéhovah. Enn jeune soeur 20 an ki appel Kim ti aprann sa par l’experience. Li dire: “Mo ti dan tou fête ki ti ena. Toulé-week-end ti ena enn kitsoz extra​—Vendredi, Samedi, ek Dimanche. Selman asterla, mo trouvé ki ena tellement beaucoup kitsoz ki pli important pou faire. Par exemple, en tant ki pionnier, mo bizin levé six heure gramatin pou al preché, alors mo pa kapav passe le temps avek lezot ziska enn heure ou-soit deux heure du matin. Mo koné ki tou bann fête pa mauvais, mais zot bien kapav detourne-nou. Couma tou kitsoz, nou bizin garde zot dan zot place.”

15. Couma bann parent kapav aide zot bann zenfant pou choisir bann bon divertissement?

¹⁵ Bann parent ena responsabilité pou donne zot famille seki zot bizin lor plan materiel, spirituel ek affectif. Sa implik aussi ki zot trouve le temps pou bann detente. Si ou enn parent, fodé pa ou critik tou bann divertissement ek pensé ki zot mauvais. En mem temps, faire attention ar bann divertissement ki immoral. (1 Cor. 5:6) Si ou bien reflechi avant, ou kapav trouve bann detente ek bann divertissement ki pou vrai-mem faire ou famille gagne bann bienfait. b Dan sa fason-la, ou ek ou bann zenfant pou choisir enn chemin ki pou rapproche zot ar Jéhovah.

16, 17. Ki situation finn faire beaucoup parent bien souffert, ek couma nou koné ki Jéhovah comprend zot la peine?

¹⁶ Relation ki ena entre parent ek zenfant tellement fort ki Jéhovah servi sa qualité relation-la couma enn l’exemple pou montré so prop l’amour pou so peuple. (Is. 49:15) Alors, li normal ki nou bien affecté kan enn membre nou famille ki nou bien content quitte Jéhovah. Enn soeur ki so tifi ti exclu, dire: “Mo ti bien souffert. Mo ti demann-moi: ‘Kifer li’nn quitte Jéhovah?’ Mo ti senti-moi coupable ek mo ti reproche-mo-mem.”

¹⁷ Jéhovah comprend ou la peine. “So leker ti faire mal” kan premier membre so famille ki ti lor la terre, ek plitar la plupart dimoune ki ti vive avant Deluge, ti rebellé kont Li. (Gen. 6:5, 6) Li possible ki, bann ki jamais inn passe par enn situation coumsa, pa arrivé comprend souffrance ki sa causé. Mais li pa pou sage ki ou laisse mauvais conduite enn membre ou famille ki’nn exclu, eloigne ou ar Jéhovah. Alors, kan enn membre ou famille quitte Jéhovah, couma ou pou kapav faire face avek sa grand chagrin ki ou ressenti-la?

18. Kifer fodé pa ki bann parent reproche-zot-mem si enn zenfant quitte Jéhovah?

¹⁸ Pa reproche-ou-mem pou seki’nn arrivé. Jéhovah inn donne tou dimoune  enn choix, ek chaque membre enn famille ki finn voué ek baptisé bizin “sarié so prop charge” ek choisir si li pou servi Jéhovah. (Gal. 6:5) Finalement, c’est pa ou, mais c’est sa dimoune ki finn faire peché-la ki Jéhovah considere couma coupable pou choix ki li’nn faire. (Ézék. 18:20) Ek aussi, pa reproche lezot. Respecté disposition ki Jéhovah inn prend pou discipline sa dimoune-la. Tini ferme kont Satan le Diable​—pa kont bann ancien ki pé agir pou protege congregation.​—1 Pierre 5:8, 9.

19, 20. (a) Couma bann parent ki ena enn zenfant ki’nn exclu kapav faire face ar zot chagrin? (b) Ki l’espoir sa bann parent-la kapav ena?

¹⁹ De lot coté, si ou choisir pou vinn amer kont Jéhovah, ou pou eloigne-ou-mem ar Li. En realité, seki sa membre ou famille ki ou bien content-la bizin trouvé, c’est ki ou bien decidé pou mette Jéhovah avant tou kitsoz​—avant-mem bann relation familial. Alors, pou faire face ar sa situation-la, ou bizin faire tou seki ou kapav pou garde enn bon spiritualité. Pa eloigne-ou ar ou bann frere ek soeur spirituel. (Prov. 18:1) Dan la priere, dire Jéhovah seki ou ressenti. (Ps. 62:7, 8) Pa rod bann excuse pou frequente sa membre la famille ki exclu-la, par exemple, par telephone, SMS ou-soit e-mail. (1 Cor. 5:11) Reste bien occupé dan bann activité spirituel. (1 Cor. 15:58) Sa soeur ki nou ti mentionné avant-la dire: “Mo koné ki mo bizin reste occupé dan service Jéhovah ek garde mo spiritualité bien fort pou ki, kan mo tifi retourne vers Jéhovah, mo pou kapav aide li.”

²⁰ La Bible dire ki l’amour “espere tou.” (1 Cor. 13:4, 7) Li pa mauvais ki ou garde l’espoir ki sa kikenn ki ou content-la pou retourne vers Jéhovah enn jour. Toulé-l’année, beaucoup exclu, repenti ek retourne vers l’organisation Jéhovah. Kan zot repenti, Jéhovah pa reste en colere kont zot. Au contraire, Li “disposé pou pardonné.”​—Ps. 86:5

21, 22. Ki ou bien decidé pou faire kan ou servi ou liberté pou choisir?

²¹ Jéhovah finn crée bann dimoune avek liberté pou choisir. (Lire Deutéronome 30:19, 20.) Mais avek sa liberté-la, nou ena enn grand responsabilité. Chaque chretien bizin demann-li-mem: ‘Lor ki chemin mo été? Eski mo pé permette mo travail, enn carriere, bann detente ek bann divertissement, ou-soit bann relation familial eloigne moi ar Jéhovah?’

²² L’amour ki Jéhovah ena pou so peuple jamais pa changé. Sel fason ki nou kapav eloigne-nou ar Jéhovah, c’est si nou choisir enn mauvais chemin. (Rom. 8:38, 39) Mais sa pa bizin arrivé! Prend determination pou pa laisse nanyé eloigne ou ar Jéhovah. Dan prochain lartik, nou pou examine quatre lezot domaine kot ou kapav montré ki ou bien decidé pou faire sa.