1, 2. (a) Ki “la tente David” representé, ek couma li ti pou ré-construire? (b) Kisannla ki peuple Jéhovah zordi?

 PENDANT enn reunion bien important ki college central ti faire dan Jérusalem en l’an 49 nou lepok, disciple Jacques ti dire: “Syméôn [Pierre] finn raconte en detail couma pou premier fois, Bondié finn prend compte bann nation pou tire enn peuple parmi zot pou so nom. Ek parole bann Prophete en accord avek sa, couma inn ecrire: ‘Apré sa bann kitsoz-la, mo pou retourné ek mo pou ré-construire la tente David ki’nn tombé; ek mo pou ré-construire so bann ruine ek mo pou redresse li, pou ki bann zom ki’nn resté vrai-mem rod Jéhovah, ensam avek bann dimoune dan tou bann nation, bann dimoune ki porte mo nom, c’est seki Jéhovah dire. Li pé faire sa bann kitsoz ki bann dimoune koné depuis longtemps-la.’”​—Actes 15:13-18.

² “La tente [setadir bann descendant royal] David” ti tombé kan le Roi Tsidqiya ti detroné. (Amos 9:11) Selman, Bondié ti pou ré-construire sa “la tente[-la]” kan Jésus, enn descendant David, ti pou vinn le Roi pou touletan. (Ézék. 21:27; Actes 2:29-36) Pareil couma Jacques ti dire dan sa reunion bien important-la, prophetie Amos ti realisé kan ti rassemblé bann heritier Royaume Bondié parmi bann Juif ek bann non-Juif toulé-deux. Zordi, bann chretien oint ki encore lor la terre, ek plusieurs million “lezot brebis,” zot uni pou preche la verité ki ena dan la Bible en tant ki bann serviteur Jéhovah.​—Jean 10:16.

3, 4. Couma peuple Jéhovah ti reste fidele dan Babylone?

³ Kan bann Juif ti al en captivité dan Babylone, li ti clair ki “la tente David” ti’nn tombé. Bann Juif ti reste en captivité dan Babylone depuis 607 ziska 537 avant nou lepok. Alors, couma zot ti kapav reste fidele pendant sa 70 an-la parmi enn peuple ki ti pratik fausse religion?  Dan mem fason ki nou pé reste fidele zordi en tant ki peuple Jéhovah dan le monde Satan. (1 Jean 5:19) Enn grand l’heritage spirituel finn aide nou pou reste fidele.

⁴ Dan nou l’heritage spirituel, nou ena Parole Bondié. Bann Juif ki ti en captivité dan Babylone pa ti ena bann l’Ecriture sacré en entier, mais zot ti konn la Loi Mosaïk, avek Dix Commandement ki ti ena ladan. Zot ti konn “bann chanté Sion,” ek zot ti rappel beaucoup proverbe. Zot ti koné aussi couma lezot serviteur Jéhovah dan le passé ti reste fidele. Oui, sa bann Juif-la ti ploré kan zot ti rappel Sion, ek zot pa ti blié Jéhovah. (Lire Psaume 137:1-6.) Sa ti faire zot reste vivant lor plan spirituel mem si zot ti dan Babylone kot ti ena beaucoup fausse doctrine ek bann pratik ki ti kont la loi Jéhovah.

5. Dan le passé, ki bann trinité ti ena dan Babylone ek dan l’Égypte?

⁵ La Trinité, croyance ki Bondié Li en trois personne, ti ena enn grand l’importance dan l’adoration bann Babylonien. Zot ti ena enn bondié en trois personne, Sîn (bondié la lune), Shamash, (bondié soleil), ek Ishtar (déesse fertilité ek la guerre). Dan le passé en Égypte, souvent bann dimoune ti croire ki enn bondié ti marié ar enn déesse ek zot ti gagne enn garson. Sa trois-la ti “forme enn bondié en trois personne, setadir enn trinité kot papa-la pa ti touletan chef. Parfois li ti consideré zis couma enn prince, alors ki bondié principal ti déesse-la.” (New Larousse Encyclopedia of Mythology) Bondié Osiris, déesse Isis ek zot garson, Horus, ti forme enn trinité en Égypte.

6. Ki été la Trinité, ek couma nou finn protegé kont sa fausse doctrine-la?

⁶ Zordi aussi la chretienté adore enn bondié en trois personne​—la Trinité. Bann chef religieux dire ki le Père, le Fils ek l’esprit saint forme enn sel Bondié. Mais c’est enn offense kont souveraineté Jéhovah, ki faire croire ki Li enn bondié en trois personne​—zis enn tiers dan enn bondié. Bann serviteur Jéhovah finn protegé kont sa fausse doctrine-la parski zot d’accord avek sa bann parole inspiré-la: “Ecouté, O Israël: Jéhovah nou Bondié Li enn sel Jéhovah.” (Deut. 6:4) C’est Jésus ki ti cite sa verset-la. Ki vrai chretien ki pa pou d’accord avek li?​—Marc 12:29.

7. Kifer li impossible ki enn dimoune ki croire dan la Trinité, prend bapteme pou vinn enn Témoin de Jéhovah?

⁷ Doctrine la Trinité li contraire ar l’ordre ki Jésus ti donne so bann disciple. Li ti dire zot al “faire bann disciple parmi bann dimoune dan tou bann nation, baptise zot au nom du Père, du Fils ek l’esprit saint.” (Mat. 28:19) Pou enn dimoune kapav prend bapteme couma enn vrai chretien ek vinn enn Témoin de Jéhovah, li bizin reconette ki Jéhovah pli grand, ek reconette aussi position ek l’autorité so Garson, Jésus Christ. Enn candidat bapteme bizin aussi croire ki l’esprit saint c’est la force actif, pa enn partie dan enn Trinité. (Gen. 1:2) Enn dimoune ki contigne croire dan la Trinité pa kapav prend bapteme pou montré ki li’nn voué so la vie ar Jéhovah. Nou vrai-mem bien reconnaissant ki nou l’heritage spirituel finn protege nou kont sa l’enseignement ki deshonore Bondié-la!

8. Ki bann Babylonien ti croire concernant bann bondié ek bann demon?

⁸ Bann dimoune dan Babylone pa ti zis croire dan bann bondié mais zot ti croire aussi dan bann demon ek dan spiritisme. Enn encyclopedie (The International Standard Bible Encyclopaedia) dire: “Dan religion Bab[ylonien], apré bann bondié, ti ena bann demon ki ti ena pouvoir pou faire bann dimoune gagne  tou sorte qualité maladie ki ti affecté zot lekor ek zot l’esprit. Kitfois, la plupart du temps dan sa religion-la, bann dimoune ti lutte kont bann demon, ek partout zot ti prié bann bondié pou suppliye zot aide bann dimoune pou resisté kont sa bann demon-la.”

9. (a) Kan zot ti en captivité dan Babylone, couma beaucoup Juif ti laisse-zot influencé par bann fausse l’enseignement? (b) Couma nou protegé kont bann danger spiritisme?

⁹ Kan zot ti en captivité dan Babylone, beaucoup Juif ti laisse-zot influencé par bann fausse l’enseignement. Plitar, beaucoup Juif ti croire dan enn l’enseignement Grec: Zot ti pensé ki bann demon kapav bon ou-soit mauvais. Alors, li ti facile pou bann demon controle zot la vie. Nou l’heritage spirituel protege nou pou nou pa essaye rente en contact avek bann demon, parski nou koné ki Bondié ti condamne bann pratik spiritisme ki ti ena dan Babylone. (Is. 47:1, 12-15) En plus, nou laisse-nou guidé par fason ki Bondié considere spiritisme.​—Lire Deutéronome 18:10-12; Révélation 21:8.

10. Ki nou kapav dire lor bann pratik ek bann croyance Babylone la Grande?

¹⁰ Pa selman bann Babylonien ki ti pratik spiritisme, mais aussi bann ki zordi soutenir Babylone la Grande, l’empire mondial fausse religion. (Rév. 18:21-24) Enn dictionnaire (The Interpreter’s Dictionary of the Bible) dire: “Babylone [la Grande] li pa zis enn sel l’empire ou-soit [enn place] kot ti ena enn sel culture. [Dimoune] ti konn li plus pou so bann idolatrie, ki couma enn l’endroit ki ti existé longtemps.” (Vol. 1, p. 338) Babylone la Grande, ki rempli ar spiritisme, idolatrie ek lezot peché, encore existé​—mais pou enn tigit le temps encore.​—Lire Révélation 18:1-5.

11. Ki bann avertissement nou finn publié concernant spiritisme?

¹¹ Jéhovah ti dire: “Mo pa kapav supporté kan zot servi bann pouvoir magik.” (Is. 1:13) Dan 19^eme siecle, beaucoup dimoune ti pratik spiritisme. Dapré Le Phare de la Tour de Sion ki ti publié en Mai 1885: “Croyance ki bann dimoune ki’nn mort encore vivant dan enn lot monde ou-soit zot dan enn lot forme, li pa nouveau. Sa ti forme partie dan bann religion dan le passé, ek zistoire tou bann culture ti basé lor-la.” Sa lartik-la ti ajouté ki bann demon faire-zot passe pou bann dimoune mort ki pé essaye communik avek bann dimoune vivant, ek coumsa, zot finn reussi influence pensée ek action beaucoup dimoune. Dan enn ancien brochure ki appel Que disent les Écritures du spiritisme ?, ti ena bann mem avertissement, pareil couma ena aussi dan nou bann dernier publication.

12. Ki Bondié ti inspire Salomon pou ecrire lor condition bann dimoune mort?

¹² “Tou bann ki finn aprann pou konn la verité” kapav reponn sa question-la. (2 Jean 1) Nou d’accord avek seki Salomon ti ecrire: “Enn li chien vivant vaut mieux ki enn lion mort. Bann ki vivant koné ki zot pou mort; mais bann dimoune mort zot, zot pa konn nanyé ditou . . . Tou seki to la main trouve pou faire, faire li avek to la force, parski pena ni travail, ni plan, ni connaissance, ni sagesse dan Shéol [tombe kot tou dimoune allé], place kot to pé allé.”​—Eccl. 9:4, 5, 10.

13. Couma bann Juif ti laisse-zot influencé par culture ek religion Grec?

¹³ Bann Juif ti konn la verité lor condition bann dimoune mort. Selman, kan ti divise la Grèce parmi bann general Alexandre le Grand, bann Grec ti faire zeffort pou faire peuple Juda ek Syrie accepté zot religion ek zot culture. Lerla, bann Juif ti accepté bann fausse l’enseignement, zot ti croire ki bann dimoune ena enn nâme immortel ek ki ena enn  le monde souterrain kot sa bann nâme-la al souffert. Bann Grec pa ti premier pou croire ki ena enn le monde souterrain ki rempli ar bann nâme ki pé souffert, parski bann Babylonien aussi ti croire dan “enn le monde souterrain . . . ki ti rempli ar bann kitsoz horrible, . . . ki ti dominé par bann bondié ek bann demon bien puissant ek violent.” (The Religion of Babylonia and Assyria) Oui, bann Babylonien ti croire ki nâme pa mort.

14. Ki Job ek Abraham ti koné lor la mort ek lor resurrection?

¹⁴ Mem si Job pa ti ena la Bible, li ti konn la verité concernant la mort. Li ti aussi koné ki si li mort, Jéhovah, enn Bondié ki ena l’amour ti pou ena enn grand desir pou ressuscite li. (Job 14:13-15) Abraham aussi ti croire dan resurrection. (Lire Hébreux 11:17-19.) Li impossible pou ressuscite enn dimoune ki pa kapav mort, alors, sa bann dimoune ki ti ena la crainte pou Bondié-la pa ti croire ki nâme pa mort. Pena doute ki l’esprit saint Bondié ti aide Job ek Abraham pou comprend dan ki condition bann dimoune mort été ek pou ena la foi dan resurrection. Sa bann verité-la forme aussi partie dan nou l’heritage.

15, 16. Couma nou finn delivré ar peché ek la mort?

¹⁵ Nou bien reconnaissant ki Bondié finn aussi faire nou konn la verité lor moyen ki Li servi pou delivré nou ar peché ek la mort. (Rom. 5:12) Nou koné ki Jésus ti “vini, pa pou lezot servi li, mais pou li servi lezot ek pou li donne so nâme couma enn ranson pou libere beaucoup dimoune.” (Marc 10:45) Nou vrai-mem bien content ki nou ena la connaissance concernant “liberation par ranson ki Christ Jésus inn payé”!​—Rom. 3:22-24.

¹⁶ Dan premier siecle, bann Juif ek bann non-Juif toulé-deux ti bizin repenti pou zot peché ek ena la foi dan sacrifice  Jésus. Sinon, Bondié pa ti pou pardonne zot peché. Zordi aussi pareil. (Jean 3:16, 36) Si enn dimoune reste attaché ar bann fausse doctrine couma la Trinité ek nâme immortel, li pa pou kapav gagne bann bienfait ar la ranson. Mais nou, nou kapav. Nou konn la verité lor Garson Bondié, ek “a travers li, nou finn gagne nou delivrance par la ranson, ek pardon pou nou bann peché.”​—Col. 1:13, 14.

17, 18. Kot-sa nou kapav aprann zistoire nou l’organisation, ek couma nou kapav gagne bann bienfait ar seki nou aprann?

¹⁷ Nou kapav dire beaucoup kitsoz encore lor bann vrai l’enseignement ki nou finn accepté, lor bann l’experience ki nou finn faire en tant ki serviteur Bondié, ek lor bann benediction spirituel ek materiel ki nou gagné. Pendant plusieurs dizaine l’année, dan nou bann l’Annuaire, ena bann recit bien vivant lor nou l’activité dan bann pays dan le monde entier. Bann video La foi en action, 1^er ek 2^eme partie, ek bann publication couma livre Les Témoins de Jéhovah : Prédicateurs du Royaume de Dieu raconte zistoire l’organisation bann Témoins de Jéhovah. Ek souvent dan nou bann periodik, nou bann frere ek soeur raconte zot prop l’experience.

¹⁸ Nou gagne bann bienfait kan nou examine zistoire l’organisation Jéhovah, pareil couma bann Israélite ti gagne bann bienfait kan zot ti reflechi lor fason ki Bondié ti delivré zot dan l’esclavage en Égypte. (Ex. 12:26, 27) Kan Moïse ti vinn vié, li ti kapav raconte bann kitsoz extraordinaire ki Bondié ti faire. Li ti donne sa conseil-la bann Israélite: “Rappel lepok longtemps, mazinn bien bann l’année ki’nn passé generation en generation; demann to papa, ek li pou kapav raconte toi; to bann grand dimoune ek zot pou kapav dire toi.” (Deut. 32:7) Nou tou, en tant ki ‘peuple Jéhovah ek troupeau ki dan so la plaine,’ avek la joie nou donne Bondié la gloire ek raconte lezot dimoune bann kitsoz extraordinaire ki Li’nn faire. (Ps. 79:13) En plus, li bon ki nou examine zistoire nou l’organisation, tire leson ar seki nou aprann, ek laisse sa influence nou l’avenir.

19. Nou koné ki nou dan la lumiere spirituel, alors ki nou bizin faire?

¹⁹ Nou bien reconnaissant ki nou pa dan noirté spirituel mais ki nou dan la lumiere spirituel ki Bondié donne nou. (Prov. 4:18, 19) Alors, anou etudié Parole Bondié avek serieux ek preche la verité avek zele. Nou pou ena mem sentiment ki enn psalmiste ki ti loué Souverain Seigneur Jéhovah avek sa bann parole-la: “Mo pou mentionne to la justice, zis to la justice. Ah Bondié, to finn enseigne moi depuis ki mo ti jeune, ek ziska asterla mo pé annonce to bann travail extraordinaire. Mem ziska la vieillesse ek bann cheveux blanc, ah Bondié, pa quitte moi, ziska ki mo faire sa generation-la konn la force to lé-bras, ek tou bann ki pou vini apré, konn to puissance.”​—Ps. 71:16-18.

20. Ki question ki’nn soulevé, ek ki ou pensé lor-la?

²⁰ En tant ki bann serviteur ki’nn voué zot la vie ar Jéhovah, nou koné ki l’integrité bann dimoune ena enn rapport avek souveraineté Jéhovah. Oui, nou preche la verité ki Jéhovah Li-mem Souverain l’univers, ki merite tou nou l’adoration. (Rév. 4:11) Avek l’aide so l’esprit saint, nou preche aussi la bonne nouvelle ar bann humble, nou aide bann dimoune ki ena enn grand chagrin dan zot leker, ek nou reconforte bann ki en deuil. (Is. 61:1, 2) Satan faire tou pou domine lor peuple Bondié ek lor tou dimoune. Malgré sa, nou bien apprecié nou l’heritage spirituel ek nou bien decidé pou garde nou l’integrité envers Bondié ek pou loué Souverain Seigneur Jéhovah asterla ek pou touletan.​—Lire Psaume 26:11; 86:12.