Parfois, enn decouverte ki bann archeologue faire, confirme dan enn fason direct ou-soit indirect ki enn personnage biblik inn vrai-mem existé. C’est seki ti arrivé par exemple, en 2011, kan bann bibliste Israélien ti publié bann renseignement lor enn decouverte ki zot ti faire. Zot ti trouve enn ossuaire, setadir enn boite en calcaire, kot ti garde lezo enn dimoune mort apré ki so la chair ti’nn decomposé. Sa boite-la ti decoré ek ti ena 2,000 an.

Lor sa boite-la ti’nn ecrire: “Miriam, tifi Yéshoua, garson Caïphe, pretre Maazia, ki sorti Beth Imri.” Grand pretre Juif ki ti impliké dan jugement ek dan la mort Jésus, ti appel Caïphe. (Jean 11:48-50) Flavius Josèphe, enn historien, ti koz lor li couma “Joseph, ki ti appel Caïphe.” Sa boite-la ti surement pou enn membre famille Caïphe. Avant sa, ti’nn deja decouvert enn lot boite ki certain pensé ti pou sa grand pretre-la li-mem. Lor sa boite-la ti ecrire: Yehôsef bar Qayafa, setadir Joseph, garson Caïphe. a Alors, Miriam ti famille ar Caïphe dan enn certain fason.

Dapré bann renseignement enn l’organisation ki appel Autorité des antiquités d’Israël (IAA), ti reussi prend sa boite kot ti ena bann lezo Miriam-la ar bann voleur ki ti al kokin dan enn ancien tombeau. Kan ti examine bien sa boite-la ek seki’nn ecrire lor-la, sa confirmé ki tou bann renseignement ki’nn trouvé en rapport avek sa, zot vrai.

Sa boite kot ena bann lezo Miriam-la faire nou konn enn nouveau kitsoz. Li faire reference ar “Maazia,” ki ti dernier dan 24 groupe pretre ki ti servi sakenn so tour dan temple Jérusalem. (1 Chron. 24:18) Dapré IAA, seki ti ecrire lor sa boite-la montré ki “famille Caïphe ti ena enn lien avek groupe Maazia.”

Lor sa boite-la mentionne aussi Beth ʹImri. Ena deux fason pou comprend sa parti-la. IAA dire: “Premier possibilité seki Beth Imri c’est nom enn famille pretre​—bann garson Immer (Ezra 2:36-37; Nehémia 7:39-42) ek parmi zot bann descendant, ti ena bann pretre ki sorti dan groupe Maazia. Deuxieme possibilité seki [sa Beth Imri-la c’est] l’endroit kot sa dimoune ki’nn mort-la [setadir Miriam] ti sorti, ou-soit place kot tou so famille ti sorti.” En tou cas, sa boite kot ena lezo Miriam-la donne enn preuve ki la Bible koz lor bann dimoune ki’nn vrai-mem existé, ki ti sorti dan bann famille ki’nn vrai-mem existé.