1, 2. Ki la guerre bien réel ki pé kosté, ek ki bann serviteur Bondié pa pou bizin faire dan sa la guerre-la?

 LE 30 Octobre 1938, ti ena plusieurs million dimoune dan l’Amérique ki ti pé ecoute enn programme bien populaire lor radio. Dan sa programme-la bann acteur ti pé joué enn piece theatre, ki basé lor enn livre science-fiction ki appel La Guerre des mondes. Bann journaliste dan sa piece-la ti annoncé ki bann creature extra-terrestre ki sorti lor planete Mars pé vinn prend controle la Terre pou detruire tou seki ena lor-la. Mem si ti annoncé ki sa programme-la ti enn piece theatre, beaucoup dimoune ki ti pé ecoute radio ti pensé ki vrai-mem sa ti pé arrivé ek zot ti peur. Certain ti mem prend bann disposition pou protege-zot kont bann extra-terrestre ki pa ti existé vrai-mem.

² Zordi, ena enn la guerre bien réel ki pé kosté. Selman, bann dimoune pa pé prend sa compte. C’est la Bible, Parole ki Bondié inn inspiré, ki annonce sa la guerre-la, pa enn livre science-fiction. Sa la guerre-la appel Har-Maguédôn​—la guerre ki Bondié pou faire kont sa mauvais le monde-la. (Rév. 16:14-16) Dan sa la guerre-la, bann serviteur Bondié lor la terre pa pou bizin defann-zot-mem kont bann creature ki sorti lor enn lot planete. Mais kan-mem, zot pou impressionné par bann l’evenement bien etonnant ek par fason ki Bondié pou manifesté so pouvoir.

3. Ki prophetie nou pou examiné, ek kifer li important pou nou zordi?

³ Enn prophetie la Bible ki trouve dan Zekaria chapitre 14 ena enn lien direct avek la guerre Har-Maguédôn. Mem si sa prophetie-la inn ecrire ena apepré 2,500 an, li touche nou la vie. (Rom. 15:4) Beaucoup kitsoz ki mentionné ladan ena enn rapport avek situation bann serviteur Bondié depuis ki Royaume  Messianik inn etabli dan le ciel en 1914, ek aussi avek bann l’evenement interessant ki pou arrivé bientot dan l’avenir. Sa prophetie-la koz lor “enn vallée ki bien grand” ek lor bann ‘de l’eau ki pé coulé.’ (Zek. 14:4, 8) Sa vallée-la ena enn role important dan protection bann adorateur Jéhovah. Ek kan nou comprend seki sa de l’eau-la kapav representé pou nou, nou pa pou zis trouve l’importance pou boire zot, mais aussi nou pou envie boire zot. Alors, li dan nou l’interet ki nou examine bien sa prophetie-la.​—2 Pierre 1:19, 20.

4. (a) Kan “jour ki pou Jéhovah” ti commencé? (b) Plusieurs dizaine l’année avant 1914, ki bann adorateur Jéhovah ti annoncé, ek couma bann chef sa le monde-la ti reagir?

⁴ Zekaria chapitre 14 verset premier faire reference ar “enn jour ki pou Jéhovah.” (Lire Zekaria 14:1, 2.) Ki été sa jour-la? C’est “jour du Seigneur” ki’nn commencé kan “royaume le monde” ti vinn “royaume nou Seigneur ek royaume so Christ.” (Rév. 1:10; 11:15) Sa jour-la ti commencé en 1914 kan Royaume Messianik ti etabli dan le ciel. Plusieurs dizaine l’année avant 1914, bann adorateur Jéhovah ti annoncé ki “le temps fixé bann nation” ti pou fini sa l’année-la ek ki le monde ti pou rente dan enn periode bien difficile ki jamais li pa’nn koné avant. (Luc 21:24) Couma bann nation ti reagir? Au lieu ki bann chef politik ek religieux ti prend compte sa l’avertissement-la, zot ti meprise ek persecute sa bann chretien oint ki ti zelé-la. Kan zot ti faire sa, zot ti bouffonne Bondié Tout-Puissant Li-mem, parski bann ambassadeur Royaume Bondié represente “Jérusalem celeste”​—Royaume Messianik​—ek zot forme partie dan sa Royaume-la.​—Héb. 12:22, 28.

5, 6. (a) Pareil couma Zekaria ti annoncé, ki bann nation ti faire kont “la ville” ek so ‘bann citoyen’? (b) Ki ‘bann ki ti resté parmi le peuple’ representé?

⁵ Zekaria ti annonce seki bann nation ti pou faire, li ti dire: “Zot pou prend la ville [Jérusalem].” Sa “la ville[-la]” c’est Royaume Messianik. Li representé par so ‘bann citoyen,’ bann chretien oint ki encore lor la terre. (Phil. 3:20) Pendant Premier Guerre Mondial, bann opposant ti “prend,” setadir ti arrete bann frere ki ti ena bann grand responsabilité dan l’organisation Jéhovah, ek ti mette zot dan enn prison dan Atlanta, en Géorgie, (Amérique). ‘Zot ti prend tou seki ti ena dan bann lakaz’ setadir ki zot ti agir avek injustice ek dan enn fason cruel envers sa bann serviteur fidele ki ti innocent-la. Sa bann opposant-la ti interdit publication bann chretien oint ek ti essaye arrete predication ki zot ti pé faire.

⁶ Mem si l’ennemi peuple Bondié ti pli beaucoup ki zot, ti koz menti lor zot, ek ti persecute zot, zot pa ti kapav detruire vrai l’adoration. Ti ena ‘bann ki ti resté parmi le peuple,’ setadir bann chretien oint ki, avek fidelité, ti refusé ki zot l’ennemi ‘detruire zot dan la ville.’

7. Ki l’exemple bann chretien oint inn laissé pou tou bann vrai adorateur zordi?

⁷ Eski sa prophetie-la ti realisé dan enn fason complet kan Premier Guerre Mondial ti fini? Non. Bann nation ti pou contigne attak bann chretien oint ki ti lor la terre ek zot bann compagnon ki ena l’esperance pou vive lor la terre. (Rév. 12:17) Deuxieme Guerre Mondial ti montré sa. L’exemple fidelité bann chretien oint encourage bann serviteur Bondié zordi pou endure n’importe ki l’epreuve ki zot gagné. Parmi bann l’epreuve, zot gagne l’opposition ar bann membre zot famille ki pa Témoin, ar bann camarade travail ou-soit lekol ki bouffonne zot a cause zot la foi. (1 Pierre 1:6, 7) N’importe  kot-sa zot vive, bann vrai adorateur Jéhovah bien decidé pou “tini ferme dan enn mem l’esprit,” sans ki zot “peur zot bann l’ennemi.” (Phil. 1:27, 28) Mais kot-sa bann serviteur Bondié pou senti-zot en securité dan enn le monde ki ena la haine pou zot?​—Jean 15:17-19.

8. (a) Dan la Bible, ki bann montagne kapav representé? (b) Ki “montagne kot ena bann pié zolive” representé?

⁸ Si Jérusalem​—“la ville”​—li symbolik ek li represente Jérusalem celeste, alors “montagne kot ena bann pié zolive ki en face Jérusalem,” li aussi li bizin symbolik. Ki sa montagne-la representé? Couma eski li pou “fann au milieu” ek vinn deux montagne? Kifer Jéhovah koz lor zot couma “mo bann montagne”? (Lire Zekaria 14:3-5.) Dan la Bible, bann montagne kapav represente bann royaume, ou-soit bann gouvernement. Ek aussi, souvent la Bible associé benediction ek protection ar montagne Bondié. (Ps. 72:3; Is. 25:6, 7) Alors, sa montagne kot ena bann pié zolive ki trouve dan l’est Jérusalem ek kot Bondié pé debouté-la, li represente souveraineté universel Jéhovah, so domination lor tou so creation.

9. Dan ki sens “Mont des Oliviers” fann au milieu?

⁹ Dapré prophetie Zekaria, sa montagne kot ena bann pié zolive-la fann au milieu. Ki sa vedir? Sa vedir ki Jéhovah etabli enn lot domination, ki secondaire. Sa deuxieme domination-la c’est Royaume Messianik ki dirigé par Jésus Christ. C’est a cause sa ki, kan “Mont des Oliviers” pou fann au milieu pou vinn deux montagne, Jéhovah koz lor sa deux montagne-la couma “mo bann montagne.” (Zek. 14:4, note) Toulé-deux montagne-la pou Li.

10. Ki sa “vallée ki bien grand” ki trouve entre sa deux montagne-la representé?

¹⁰ Kan sa montagne symbolik-la fann au milieu, la moitié dan le nord ek la moitié dan le sud, lipié Jéhovah reste lor toulé-deux montagne. Enba lipié Jéhovah, “enn vallée ki bien grand” commence existé. Sa vallée symbolik-la represente protection Bondié, kot bann serviteur Jéhovah en securité enba so souveraineté universel ek Royaume Messianik so Garson. Jéhovah pou veillé ki vrai l’adoration jamais disparette. Kan eski division sa montagne kot ena bann pié zolive-la ti commencé? Sa ti arrivé kan Royaume Messianik ti etabli a la fin le temps fixé bann nation, en 1914. Kan eski bann vrai adorateur ti commence sauvé pou al dan sa vallée symbolik-la?

11, 12. (a) Kan eski peuple Bondié ti commence sauvé pou al dan so vallée symbolik? (b) Couma nou koné ki Jéhovah protege so peuple?

¹¹ Jésus ti donne so bann disciple sa l’avertissement-la: “Tou bann nation pou ena la haine pou zot a cause mo nom.” (Mat. 24:9) Pendant dernier jour sa systeme-la, depuis 1914, sa la haine-la inn vinn pli fort. Malgré bann l’attak bien cruel ki ti ena kont bann chretien oint pendant Premier Guerre Mondial, bann l’ennemi pa ti reussi faire sa groupe chretien fidele-la disparette. En 1919, zot ti delivré ar l’influence Babylone la Grande, l’empire mondial la fausse religion. (Rév. 11:11, 12) a C’est sa l’année-la ki bann serviteur Jéhovah ti commence sauvé pou al dan vallée so bann montagne.

¹² Depuis 1919, partout lor la terre  Jéhovah contigne protege so bann vrai adorateur dan so vallée. Pendant plusieurs dizaine l’année, dan beaucoup pays, bann gouvernement ti interdit predication bann Témoins de Jéhovah ek zot bann publication. Dan certain pays, encore ena sa bann interdiction-la. Mais, n’importe ki sa bann gouvernement-la kapav faire, jamais zot pou reussi detruire vrai l’adoration lor la terre! Lé-bras puissant Jéhovah pou contigne protege so peuple.​—Deut. 11:2.

13. Couma nou reste dan vallée Jéhovah kot nou gagne protection, ek kifer asterla, li encore plus important ki nou faire sa?

¹³ Si nou reste attaché ar Jéhovah ek reste ferme dan la verité, Li ek Jésus Christ, so Garson, pou faire zot part, ek jamais Bondié pou laisse personne rass nou dan zot la main. (Jean 10:28, 29) N’importe ki l’aide nou bizin, Jéhovah pré pou aide nou pou nou kapav obeir Li en tant ki Souverain l’univers ek reste fidele ar Royaume Messianik. Alors, li bien important ki nou reste dan vallée Bondié kot nou gagne protection, parski sa vallée-la pou ena enn pli grand l’importance encore pou bann vrai adorateur pendant la grande tribulation ki pé kosté.

14, 15. Dan ki situation bann ki en dehors vallée Jéhovah pou été kan “jour ki [Bondié] faire so la guerre” pou arrivé?

¹⁴ A mesure ki la fin sa systeme-la pé kosté, Satan pou faire plus zeffort pou attak bann serviteur Jéhovah. Mais bientot, Satan pou faire so dernier l’attak kont peuple Bondié. Kifer? Parski, “jour ki [Bondié] faire so la guerre” pou arrivé, Li pou detruire tou bann l’ennemi so peuple. Sa la guerre-la pou montré la gloire Jéhovah couma enn Guerrier, plus ki tou lezot “jour bataille” ki Li’nn faire dan le passé.​—Zek. 14:3.

¹⁵ Sa jour ki Bondié pou faire la guerre-la, dan ki situation bann ki en dehors sa “vallée ki bien grand[-la]” pou été? Zot pa pou “ena la lumiere” setadir zot pa pou ena faveur Bondié. Sa jour-la, “cheval, mulet, chameau, bourrik ek toute sorte qualité zanimo domestik”​—ki represente bann l’equipement militaire bann nation​—pou affecté. Sa bann l’equipement-la pou “arrete en place,” zot pou inutile coumadir zot inn congelé. Jéhovah pou aussi servi “enn malheur” setadir bann l’epidemie pou puni so bann l’ennemi. Nou pa koné si sa pou arrivé dan enn fason litteral ou-soit non, en tout cas, sa malheur-la pou arrete tou zot bann menace. Sa jour-la, ‘lizié bann l’ennemi ek zot la langue pou pourri’ setadir ki zot pa pou kapav faire nou di-tort ou-soit koz en mal kont Bondié. (Zek. 14:6, 7, 12, 15) Sa destruction-la pou partout lor la terre. Dan sa la guerre-la, pou ena beaucoup ki pou dan coté Satan. (Rév. 19:19-21) “Bann dimoune ki Jéhovah pou touyé sa jour-la, pou depuis enn boute la terre ziska lot boute.”​—Jér. 25:32, 33.

16. Ki bann question nou bizin demann-nou-mem alors ki jour la guerre Bondié pé kosté, ek ki nou pou bizin faire?

¹⁶ La guerre touletan amenn souffrance, mem pou bann ki gagne finalement la victoire. Li possible ki pena mangé. Bann dimoune perdi zot di-bien. La vie vinn difficile. Dimoune pena liberté ki zot ti ena avant. Si nou gagne sa bann difficulté-la, couma nou pou reagir? Eski nou pou paniké? Eski nou pou renié nou la foi enba bann pression? Eski nou pou perdi l’espoir ek decouragé? Alors, li pou vrai-mem bien important ki, pendant la grande tribulation, nou garde confiance dan pouvoir ki Jéhovah ena pou sauve nou ek ki nou reste dan so vallée kot nou gagne protection!​—Lire Habaqouq 3:17, 18.

17, 18. (a) Ki sa ‘de l’eau ki pou coulé-la’ representé? (b) Ki “la mer dan l’est” ek “la mer dan l’ouest” representé? (c) Kan ou guette l’avenir ki ou bien decidé pou faire?

¹⁷ Apré Har-Maguédôn, ‘de l’eau pou coule’ en abondance, zot pou sorti kot Royaume Messianik. Sa bann ‘de l’eau-la’ represente bann disposition ki Jéhovah prend pou nou gagne la vie. “La mer dan l’est” represente la Mer Morte, ek “la mer dan l’ouest” represente la Mer Méditerranée. Toulé-deux la mer represente bann dimoune. La Mer Morte represente bann dimoune ki dan tombe ek ki pou ressuscité. La Mer Méditerranée ki rempli ar la vie, represente bann membre ‘la grande foule’ ki pou sauvé jour Har-Maguédôn. (Lire Zekaria 14:8, 9; Rév. 7:9-15) A mesure ki toulé-deux groupe pou boire de l’eau symbolik ki sorti dan “la riviere de l’eau la vie,” zot tou pou vinn parfait ek pou vive pou touletan.​—Rév. 22:1, 2.

¹⁸ Jéhovah pou protege nou kan Li pou detruire sa mauvais systeme-la ek Li pou faire nou rente dan le monde nouveau kot pou ena la justice. Mem si tou bann nation ena la haine pou nou, nou bien decidé pou reste fidele envers Royaume Bondié, ek pou reste dan vallée Jéhovah kot nou gagne so protection.