Beaucoup nation dan le passé ti attache certain criminel lor enn poteau pou mette zot a mort. Bann Romain ti attache ou-soit ti couloute enn criminel lor enn poteau, kot kitfois li ti contigne vive pendant plusieurs jour avant ki douleur, la soif, la faim, ek bann condition climatik, ti faire li nepli kapav supporté. Bann Romain ti attache bann grand criminel lor enn poteau pou puni zot ek faire zot gagne honté.

Ki nou kapav dire lor nation Israël? Eski bann Israélite ti attache bann criminel lor enn poteau pou mette zot a mort? La Loi Mosaïk ti dire: “Ek si enn zom finn faire enn peché ki merite la mort ek finn touye li ek finn attache li lor enn poteau, fodé pa ki so cadavre passe la nuit lor poteau-la, mais to bizin enterre li mem jour.” (Deut. 21:22, 23) Alors, li clair ki, dan lepok bann l’Écritures Hébraïques, ti touye enn dimoune ki ti merite la mort, avant ki ti attache li lor enn poteau ou-soit enn pié.

En rapport avek sa, Lévitique 20:2 dire: “N’importe ki zom parmi bann garson Israël, ek n’importe ki etranger ki reste couma enn etranger en Israël, ki offert enn dan so bann descendant Molek, bizin mette li a mort sans faute. Peuple dan sa pays-la bizin envoye li coute roche ziska li mort.” Bann ki ti ena “enn l’esprit sorcier ou-soit enn l’esprit pou predire l’avenir,” ti bizin mette zot aussi a mort. Couma? ‘Ti envoye zot coute roche.’​—Lév. 20:27.

Deutéronome 22:23, 24 dire: “Si ti ena enn tifi vierge ki ti fiancé ar enn zom, ek ki vrai-mem enn zom finn trouve li dan la ville ek finn dormi ar li, alors, zot bizin faire toulé-deux sorti en dehors la porte sa la ville-la ek envoye zot coute roche ek zot bizin mort, tifi-la, parski li pa’nn criyé dan la ville, ek zom-la parski li finn humilié femme so prochain. Coumsa-mem ki zot bizin tire seki mauvais parmi zot.” Nou comprend par la ki, si parmi bann Israélite dan le passé, enn dimoune ti commette enn action bien cruel, fason principal ki ti touye li, c’est lapide li ziska li mort. a

Deutéronome 21:23 dire ki “enn kikenn ki attaché lor enn poteau, pou Bondié li enn maudit.” Kan bann Israélite ti trouve cadavre enn mauvais dimoune ‘ki’nn maudit par Bondié,’ exposé en publik lor enn poteau ou-soit enn pié, sa ti servi couma enn l’avertissement pou zot.